الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة hesham90

الاستاذ/ حسين
تقبل الله منا ومنكء

آمين يا رب العاليمن
اسئلة اليوم12/9/2010 الساعة3 عصرا
1-لما يبقى الواحد سايق العربية على التانى مثلا وبسرعة 20ك ويشوف امامه الطريق حيقف طفل معدى الشارع او بيلعب او دراجة او تكتوك او اى سبب حيخليه يقف وبعدين يمشى على طول والسؤال؟
هل الافضل ادوس دبرياج على الاخر وفرامل وافضل دايس والعربية واقفة تماما علشان حمشى على طول ولا زى ماباعمل اول مالاقى انى حاقف لاى سبب امور على طول وبعدين اديها الاول واطلع وعلى طول بقى كل شوية امور وادى الاول واطلع مع ملاحظة ان دايما الوقوف متكرر ارجوا التفضل بالتعقيب وتقبل خالص تحياتى

والله انت بتتكلم فى موضوع مهم جدا ... بالأمس كنت راجع من عند "حماتى" ههههههه وطبعا عيد والشباب والاولاد الصغيرين فى الشارع والدنيا بالليل والمشى بحرص شديد جدا جد ... ورغم ذلك تشوف العجب

تشوف مثلا امرأة نازلة اسفل الرصيف وواقفة ... طيب انت واقفة تحت الرصيف ليه ... ياتعدى يا تقفى فوق الرصيف

تشوف واحد ههههههههه واقف فى نص الشارع بدون اى سبب

تشوف امرأة جالسة على الرصيف ومنزلة رجلها فى الشارع فى وسط الزحام هههههههه يعنى اللى موش واخد بالله وماشى براحة ممكن يعمل كارثة ربنا يحفظنا جميعا

شوف اولاد مراهقين يعدوا الشارع واول ما يوصلوا الى منتصف الشارع تلاقيهم قللوا سرعة المشى ههههههه أكنهم بيقولوا لك والنبى اخبطنا شوف هانعمل لك ايه هههههههه طيب انا لا قدر الله لو خبطك شوف انت هايحصل لك ايه ؟ حاجة كده فى منتهى الادب ؟

الحمد لله الواحد بيمسك اعصابه وعنده القدرة انه يتوقف تماما لتجنب الاشكال دى

وطبعا حكاية الاولاد اللى بيخرجوا لك من بين العربيات .. وشغلانة

بصراحة لما تشوف الناس وهى ماشية فى الشارع تعرف البلد دى ماشية ازاى

حاجة فى منتهى اللا مبالاة

اللى ماشى موش خايف على نفسه
وينظر اليك للأسف بحقد وغيره وقرف ههههههه

المهم والخلاصة: اى بنى آدم تشوفه لازم تحترس جدا جدا جدا ... لان ده لحم ودم ... حتى ولو كان البعيد بارد وموش عايز يعدى الشارع زى الرجالة .. برغم انك مهدى سرعتك تماما ... لو لزم الامر انك تتوقف مافيش اى مشاكل
وحاول انك تعدى من خلف المريض ههههه
او انك تهدى عربيتك وماتروحش يمين او شمال حتى ولو هاتتوقف وده الاحسن لك

بالنسبة لعملية المور
انا لا امور الا اذا كنت هاتوقف مدة او داخل على اى موقف هاياخد منى مدة مثلا مطب صناعى اشارة او قضيب مترو او ازدحام ... بمور العربية واتركها تسير حتى تصل للمنطقة اللى هاتوقف فيها وساعتها اضغط فرامل خفيف واتوقف

لو العربية توقفت ... خلى عينك للامام بمسافة كبيرة يعنى انظر الى العربيات التى امام عربيتك ولما تلاقي العربيات ابتدأت تتحرك او لما تشاهد ان الإشارة فتحت ... اضغط الدبرياج واستعد بالغيار الاول ... خلاف كده مافيش داعى اطلاقا انك تفضل ضاغط الدبرياج خالص عشان تحافظ على العربية

لو كنت ماشى فى الزحام بهدوء جدا ... فى الحالة دى ممكن تفضل ضاغط على الدبرياج خفيف لانك فى اى لحظة سوف تتوقف وعشان العربية ما تترجش منك

وتحياتى للاعضاء الافاضل والعضوات الفضليات وكل عام وجميع حضراتكم بخير والف سلامة وربنا سبحانه وتعالى يبارك لكم فى صحتكم وصحة اولادكم ويعطيكم خيرها ويكفيكم شرها قولو آمييييين

الله يبارك فى حضرتك ويسعدك دنيا وآخرة
مع اطيب التمنيات
اخوك حسين غزالة

المشاركة الأصلية كتبت بواسطة nadeen

السلام عليكم ورحمة الله وبركاته

وعليكم السلام ورحمة الله وبركاته

أفتقدتكم جدا الفترة اللى فاتت بس الظروف الحمد لله

حمد لله على سلامة حضرتك
واهلا وسهلا بك فى اى وقت

،أنا عملت حادثة بالعربية الحمد لله انا وبنتى بخير بس الفانوس الأمامى اتكسر والرفرف اتطبق والكبوت اتأثر

الف مليون سلامة وفداك ميت رفرف والف فانوس .... المهم حضرتك بخير والبنوتة بخير ... ولا تضايقى نفس

...انا كنت من المتابعين جيدا للموضوع ده والفترة اللى فاتت انشغلت وقل دخولى على النت و الحادثة دى ليها حوالى اسبوع ، طبعا الحالة النفسية كانت صعبة جدا بس دلوقتى ابتديت اتحسن ولله الحمد

معلهش ... حصل خير والله يكون فى العون

القصة بقى انى رجعت لنقطة الصفر تانى يعنى بعد ما اخدت الثقة بنفسى وبقيت بطلع بالعربية كتير لوحدى ومش بتحصل اى حاجة فجأة يحصل كده،

هههههههه معلهش آنا آسف ده اللى بيقولوا عليه ثقة زيادة عن اللزوم ... يعنى تلاقى الواحد اصبح ريلاكس شوية .. وماسك الدركسيون بيد واحدة ... واصبح لا يطبق الكثير من التعليمات اللى اتعلمها لسلامته وسلامة الآخرين ... يعنى مثلا ترك مسافة كافية بينه وبين السيارة التى امامه ... لما رجله تاخد على العربية ويشعر بفوة آداء العربية الجديدة ... يبدأ يتنازل شوية وينسى نفسه ... ومرة واحدة تقديره للمسافاة يكون خطأ ولا يستطيع التوقف فى الوقت المناسب وده خطأ كبير قوى

اللى مضايقنى اوى ان انا الغلطانة هتتصدموا لما تعرفوا عملت ايه دوست بنزين فجأة بدل فرامل (والعربية اوتوماتيك) وفى عز الزحمة وقت خروج الموظفين!!! مش عارفة ازاى ، انا بسوق ليا 7 شهور عمرى ما عملت كده..طبعا مش قادرة اسوق تانى ، هو ممكن الواحد يلخبط فجأة وهو سايق وينسى هى رجله على اى دواسة؟

حضرتك انت خبطى العربية التى امامك من الخلف بسبب انه توقف بشكل مفاجىء ... هل كنت بتتكلمى مع بنت حضرتك فى العربية فى نفس الوقت ... وهل البنت سنها صغير قوى يعنى اقل من 7 سنين ... لو كانت اقل من 7 سنين المفروض انها تجلس فى الكنبة الخلفية عشان متلخبطكيش وانت ماشية ... ده طبعا غير موضوع المسافة بينك وبين السيارة التى امامك ... يا ريت تكتبى لنا الموقف بشىء من التفاصيل عشان نتعلم كلنا ... أنا آسف انى هافكرك بالموضوع ده ... لكن عايزين نعرف
حضرتك كنت بتفكرى فى ايه فى الوقت ده ؟
وسرعتك كانت كام ؟
والزحام كان شكله ايه ؟
عشان نتعلم ونحترس كلنا من الدرس ده

ادعو ا لى يا جماعة أنا بجد محتاجة دعواتكم...

الف مليون سلامة ... وحصل خير والحمد لله ... وإذا كنت قلقانة شوية .. خلاص بلاش سواقة مدة بسيطة لحد ما اعصابك تهدى وتنسى الموضوع ده وبعد كده ارجعى تانى بالسلامة وعادى
والحمد لله على كل حال
المهم انك بخير
والبنت بخير
والناس اللى حواليكى كلهم بخير
ومعلهش خبطة "حديد فى حديد" زى مابيقولوا مافيش مشاكل المهم اننا على الاقل بعيد عن البنى آدمين وربنا يسترها مع الجميع

وكل سنة وحضرتك طيبة وبخير
وما تكتريش فى اكل كحك العيد
هههههههه

فى رعاية الله
مع اطيب التمنيات
اخوكم حسين غزالة

المشاركة الأصلية كتبت بواسطة nadeen

أولا شكرا ليك يا أستاذ حسين على اهتمامك وردك، الموقف بالظبط انى كنت سايقة وبنتى 3 سنين قاعدة فى الكنبة الخلفية والشارع واقف وقدامى تاكسى وانا كمان واقفة وشمالى فاضى ،لسة بلف الدريكسيون شمال علشان انقل نفسى شمال واكمل لقيت نفسى بجرى قدامى وطبعا المسافة كانت بينننا صغيرة جدا مع دوسة البنزين فجأة حصلت الحادثة.. طبعا الشارع وقف وسحب رخص والبنت اتسرعت ..الحمد لله الحمد لله

السلام عليكم ورحمة الله وبركاته

على العموم ما دام الشارع واقف ... ماكانش فيه داعى لعمل مناورات كثير ... وموش مهم انك كنت تنتظرى شوية خلف سائق التاكسى شوية لحد ما يمشى ....

اليوم من ساعة واحدة فقط وأنا واقف او بتحرك بهدوء شديد لوجود تقاطع وكمان كان فيه واحدة ست كبيرة فى السن بتعدى ... بمجرد ما الست الكبيرة عدت ... وافاجىء بعربية تويوتا من الخلف داخلة امامى من حتة ضيقة جدا .. وفى نفس الوقت هو موش شايف ان فيه اتوبيس ماشى فى التقاطع .... وتسمعى اجمد فرامل والعربية بتبوس الاسفلت عشان تقف ...
يعنى احنا عمالين نقول من الصبح ندخل على التقاطعات براحة حتى ولو كانت فاضية .... لكن الظاهر ان فيه كثير من الناس للاسف موش بتقدر او موش بتفهم كويس خطورة المواقف

وقبلها واحد عمال يضرب لى كلاكس ... طبعا ولا عبرته ... وبعد شوية اتنرفزت وقلت له "فيه ايه ؟" ... "انت عايز ايه بالضبط ؟"
المهم بعد ما عدى منى ... بيقول لى: امشى على جنب .... قلت له: انت شايف الشارع اصلا فيه اى منفس غير لعربية واحدة ....
يعنى انت عايزنى اخبط عربية تانية عشان سعادتك تعدى ...

ده كان اول درس سمعته من احد الاصدقاء ... لو المكان ضيق مافيش داعى انك تفكر توسع لغيرك عشان يعدى .... يعنى اوعى تعمل فيها مثالى لدرجة انك تسبب لنفسك مشكلة

وفى الاول والآخر ربنا هو اللى بيحفظ الجميع

والف مليون سلامة

مع اطيب التمنيات
اخوكم حسين غزالة