الموضوع: اخيرا عملت true cold air intake للسيراتو

المشاركة الأصلية كتبت بواسطة a_tharwat

الموضوع بسيط جدا يا جماعة. وظيفة فلتر الهواء بتاع العربية انه ينضف الهواء اللي داخل للموتور عشان يحمي الموتور من التاكل. الفلتر الاصلي بتاع العربية معمول حسابه انه يبقى صوته واطي, لان الغالبية العظمى من الناس اللي بتشتري عربيات بتبقى عاوزة صوتها واطي, دي غير ان برة في قوانين بتحكم شدة الاصوات اللي خلرجة من العربية.

عشان الفلتر يحقق ده, لازم يكتم الموتور شوية. فكده في جزء من الهورس باور بيضيع نتيجة لان الموتور بيبذل مجهود عشان يشد الهواء من الفلتر. الفلاتر السبور بتبقى الفلترة بتاعتها اقل, فالموتور بيبذل جهد اقل في سجب الهواء.

عشان كده نقدر نقول ان الفلتر السبور مش بيزود هورس باور, وانما بيرجع الهورس باور اللي كان ضايع. ده طبعا على حساب ان الصوت بيزيد شوية والفلتر بتقل شوية.

في ميزة تانية ممكن نزودها عن طريق اننا نحط الفلتر السبور في مكان يشفط منه هواء بارد من بره الكبيوت. الهواء البارد بتبقى كثافته اعلى من الهواء السخن اللي تحت الكبوت, وده معناه ان نسبة الاكسجين بتبقى اكتر وبالتالي لو العربية قديمة هيبقى حرقها انضف ول جديدة حتطلع هورس باور اكتر (بس نسبة هايفة يعني 3% بالكتير قوي)

يس كده, الفايدة الفعلية ان استجابة الموتور تبقى احسن, ومع حسن الاستخدام يحرق بنزين اقل, ولو جاب 1 ولا 2 هورس باور برضه يبقى قشطة :)

انت كده نورت المحكمة وفهمت فعلا انت بتعمل ايه بجد انت عبقرى ودماغك فعلا ملينة عربيات ومواتير وبنزين كمان ههههههههه انما تقولى سباك ومواسير وسيراتو صعب جدا

فيها ايه بس لما كنت فتحت الموضوع يكون بدايته كده انما انت جبت من الاخر من اول مرة وانت كان عندك اعتقاد ان فى ناس فاهمة انت بتعمل ايه وانت قلت انك مشترك فى منتدايات اجنبية كتيرة وهما فاهمين انت بتعمل ايه احنا هنا بقى عاوزين نوصل لكده .
عضو زى حضرتك بيزود معلوماتنا عن العربيات فعلا انت اضافه وحظنا حلو انك من ملاك السيراتو .

مش عاوزك تزعل من الناس وتاكد ان مافيش حد بيهجمك بس علشان حضرتك ابتيدت من الاخر وكتير وانا منهم مكناش فاهمين وتانى حاجه السيراتو دى عزيزة علينا جدا واكيد عندك برضه فبنستغرب ازاى حد يعمل فيها كده
كمل مشروعك للاخر ويكفينا فخرا ان عندنا كل حاجه حتى التعديلات اللى بتم على العربيات القديمة احنا بقى بنعملها على الجديدة كمان... خلص بس للاخر وافتح موضوع جديد ويكون شرح وافى من الالف الى الياء وتاكد انه هينتشر فى كل المنتديات الخاصة بالسيارات.