الموضوع: حوارات الأطباء والمرضى

مرة ام جاتلي تكشف على ابنها....واصرت إني اكتبله مضاد حيوي حقن
انا طبعا معبرتهاش لأن الحالة مكنتش مستاهلة حقن... كتبت مضاد حيوي شرب...

المهم جاتلي بعد اسبوع تعيد الكشف والطفل لسه تعبان وجايبه معاها جوزها عشان يتخانق معايا...
هديت الراجل وربنا الهمني اقولها انتي جبتي الدواء قالت اهو...ببص في الزجاجة لقيتها شبة مليانة....قلتلها انتي كررتي العلاج من نفسك ولا ايه ... قالتلي لأ انا جبته مرة واحدة...

بصيت لجوزها وقلتله الهانم مديتش لابنك اصلا العلاج وممكن يروح فيها بسببها... والدليل ان الدواء لسه زي ما هو في الزجاجة...

وعينكم ما تشوف الا النور.... الست بقت كل حته فيها مرمية في حتة في اوضة الكشف....




موقف تاني لما كنت في امتياز....
كنت في مستشفى المطرية...وما ادراكم بالمنطقة المحيطة بالمستشفى....دخل واحد الساعة اتنين بالليل متقطع بالسنج ...اشتغل فيه لوحده بتاع تلات صنايعية....قصدي دكاترة وانا منهم.... خدله بتاع 70 غرزة ولا حاجة.... وهو بيتخيط عمال يقول"ماشي انا هوريهم ولاد التيت دول انا هاطلع مش عارف ايه....وما لذ وطاب من الشتائم المجهولة والمعلومة" المهم خلصنا خياطة وطلع من المستشفى بيبرطم ويتوعد....مفيش نص ساعة ولقيناه راجع متشلفط اكتر من الأول....وكانت ليلة سوداااااااااا لحد تقريبا ما دبحوه برة وريحونا منه..


واسوأ نوع العيان المقاوح....خاصة الستات
اكتب دواء تقولي ده بتاع ايه؟وبيعمل ايه؟وانا جربته ومجبش نتيجة.وبلاش الدواء الفلاني عشان شكله مش بيعجبني....
آخر ما بزهق اقولها طب ايه اللي جابك اصلا لما انتي عارفة ومذاكرة كل حاجة كده...

والأم اللي جايه بالعيل الساعة تلاتة الفجر في عز الشتاء عشان دافي بقاله اربع ايام.... هي خلاص حبكت دلوقتي


والله كانت فيه ايام في الصيف كنا بنام على المكاتب وسراير الكشف ونلف وشنا بالبالطو عشان الناموس....

ومواقف كتييييييييييييير هحكي ايه ولا ايه!!!!!!!!!1

دي شغلانة تقصر العمر .... ومع ذلك من اظرف الشغلانات اللي الواحد ممكن يشتغلها

والدتي استشارية نساء وتوليد ..ومن وانا صغير وانا بسمع طرائف وعجائب عن المرضى اللي بيجولها

من حوالي 10 سنين كانت والدتي فاتحه عياده في بلد ارياف شويه في قليوب ..وجاتلها واحده فلاحه عايزه تولد بنفس الطريقه اللي ولدت بيها جارتها عند دكتور مشهور قوي في البلد ...وياترى ايه هي الطريقه دي ؟؟؟؟

الست الطيبه عايزه تولد بالليزر زي جارتها ..ولما امي قاتلها مفيش حاجه اسمها ولاده بالليزر ..الست بصت لامي على انها دكتوره مبتفهمش وقامت ومشيت وراحت للدكتور المشهور اللي كاتب على عيادته بالبنط العريض احدث طرق الولاده بالليزر مع العلم ان الدكتور ده ماعهوش ماجستير نساء وتقريبا معاه دبلومه او دكتور عام

وتاني حكايه ..والدتي من كام سنه ولدت واحده زوجها شغال عامل بناء ...وكانت ولاده قيصريه ..وبعد الولاده بفتره وبسبب اهمال شديد من المريضه (نظافه شخصيه ) حالتها سائت ..وزوجها عامل البناء راح لامي وبيتخانق معاها وبيقولها بصراحه كده انا مش عاجباني عملية الولاده دي من اولها اصلا وحاسس ان الشغل فيها مش قد كده !!! سبحان الله ..عامل البنا (مع احترامي للمهنه ) بيفتي في شغل الدكتوره اللي شغاله في المهنه من اكتر من 30 سنه

ده غير الست اللي كانت بتولد وحماتها (الدايه ) دخلت عليها اثناء الولاده وكانت مش عاجبها شغل والدتي وكانت عايزه تعدل عليها طريقة الخياطه والذي منه

دي حاجات قليله ..من حكاوي كتيره جدا بتحكيهالي والدتي عن معاناتها مع المرضي ..ربنا يعينها ويعين كل الدكاتره اللي عندهم ضمير لانهم هيتعبو قوي في البلد دي ..