هي فعلا البلد مافيهاش شغل؟

**OlaOsman** · 03-06-2010 11:53 PM

المشاركة الأصلية كتبت بواسطة mustafaibrahim

أقصد ان اللي عايز فعلا يشتغل بالتأكيد هيلاقي شغل و ربنا هايرزقه و يكرمه طول ما هو بيسعى، إنما اللي قاعد في البيت يتشرط و يتنك ع الوظايف و بعدين يقول مش لاقي شغل، ده ربنا يرزقه ازاي و هو قاعد في بيتهم؟

+111111111111111111

هى البلد فيها شغل؟؟ اه طبعا فيها لنما بكاااااااااام

و مين اللى يقبل بعد مايكون اتطحن اربع سنين فالجامعة انه يشتغل ب300 او 400 جنيه او يشتغل بواب او فمحل ملابس او sales man

اه قبل منسى مرتب الشاب فالحكومة اول لما يتخرج 105 جنيه ايوة مائة و خمس جنيهات

لااااااااااا ده احنا كده هانعيد الكلام هو هو من أول تاني

معلش، طلب صغير.. اقرا الخمس صفحات اللي فاتوا و تعالى من فضلك

**hany_mohamed** · 04-06-2010 12:13 AM

البلد هنا مختلفة عن اى بلد فى الخارج بمعنى اللى بيتعب ويقدر يقدم مجهود بدنى او ذهنى فى الخارج بيلاقى مقابل مادى محترم يغطى حاجاتة الكمالية
انما هنا فى مصر مفيش مقابل حتى للحد الادنى من المعيشة الا فى عدد قليل من الشركات والمؤسسات المحترمة اللى عارفة يعنى ايه تريح العاملين فيها علشان تأخد أضعاف مضاعفة من الشغل
بالتالى نعم يوجد شغل مناسب ومحترم بس فى الخارج
وبعدين الجيل الحالى بعد ما تم إلغاء التعيين بالحكومة وبيع المصانع والشركات بيواجه مصير مظلم لو ساب مستقبلة كده من غير تخطيط
الحل من وجهه نظرى ان كل واحد ممكن يركز وهو فى الجامعة على تخطيط مستقبلة لما بعد الجامعه و يشوف حرفة او مهنة يتدرب فيها كويس و بعدين يشتغل فيها اول ما يتخرج
.

**AhmedGen2** · 04-06-2010 12:58 AM

المشاركة الأصلية كتبت بواسطة Dr Zezo

اعتقد انه من المفيد ايضا لو تضمن الموضوع خريطة طريق منظمة للشباب" بشكل مفصل " عما يجب ان يفعله اثناء دراسته الجامعية او بعدها ليكتسب الخبرات اللازمة ليلائم مواصفات سوق العمل الان

بجانب مواصفات سوق العمل الآن ، الفيديو دة مفيد جداً:

YouTube - Richard St. John: Secrets of success in 8 words, 3 minutes

**gebreel** · 04-06-2010 01:10 AM

المشاركة الأصلية كتبت بواسطة AhmedGen2

بجانب مواصفات سوق العمل الآن ، الفيديو دة مفيد جداً:

YouTube - Richard St. John: Secrets of success in 8 words, 3 minutes

حلو جدا الفيديو ده

اسمحلي هعملوا share على الFacebook بتاعي

**أشرف العدوي** · 04-06-2010 01:20 AM

المشاركة الأصلية كتبت بواسطة mustafaibrahim

أ
اه قبل منسى مرتب الشاب فالحكومة اول لما يتخرج 105 جنيه ايوة مائة و خمس جنيهات

ده فين الي بـ 105 ده
انا كنت في وزارة الزراعة كنت باخدة 46 جنيه ايوة 46 جنيه قبل ما اتخرج
و لما بقيت خرييييييييييييج المرتب قفظ قفزة مهولة بقى 67
اه و الله الارقام دي صح
و الكارثة انا كنت شغال في الشئون القانونية و انا بكالريوس تجارة قسم محاسبة
المهم الحمد لله سبتها بعد التخرج بشهر
بس استفدت منها اني خدت على الشغل
انا متهيألي لو ما كنتش موجودة و كنت اتخرجت و انا في البيت كنت هاخد على الانتخة
سبتها و روحت اشتغلت سكرتير بـ 350 جنيه في مدينة نصر و انا ساكن في فيصل من 9 الصبح حتى 6 المغرب يعني كنت بحط من جيبي علشان المواصلات و سبتها و روحت عمر افندي قبل ما يتباع اشتغلت يوم واحد في الاإدارة في شارع عدلي في الحسابات و ما أستحملتش بصراحة حسيت انها ما فرقتش عن وزارة الزراعة خالص
و لقيتهم في الشركة الي انا كنت فيها بيكلموني بعدها بحوالي 3 ايام علشان ارجع و رجعت الشركة تاني
و استحملت سنتين و بعد كدة اتنقلت إدارة الحسابات و ما فيش كام شهر بقيت مراجع حسابات
الحمد لله سبتها و شغال في شركة من اكبر شركات الشرق الأوسط في مجالها بقالي سنتين

على فكرة في حكمة قالهالي عاطل قبل ما اتخرج
الشغل بجيب شغل
طول ما انت في البيت فرص انت تشتغل بتبقى أقل بكتييييييييييييييييييير من و انت شغال
علشان كدة اشتغلت اول حاجة جاتلي اول ما اتخرجت و هي سكرتير
و كل حاجة من دول اتعلمت منها حاجة حتى لو مش في مجال الحسابات في حاجات الواحد ما يحسش بيها انه أتعلمها غير في اوقات معينة
يعني مثلاً ايام ما كنت مراجع حسابات كان طالع عين الي خلفوني سفر كل شهر في فرع من فروع الشركة و سهر في الشغل و مرة فضلت شغال 24 ساعة يعني روحت تاني يوم الساعة 9 الصبح
طبعاً كنت بقعد اشتم في الشركة و الي جابوها
لكن لما روحت الشركة الي انا فيها عرفت اني بقيت اشتغلت تحت اقصى الضغوط عادي
يعني تلاقي الناس كلها معايا مشدودين و متلغبطين لو في مشكلة و انا عادي حتى لو في زنقة شغل ممكن اشتغل 12 ساعة متواصل عادي بردو ( لياقة بقى )
دايماً بيقولولي انت مركب على قلبك مراوح و هكذا كل شغالانة منها حاجة حتى وزارة الزراعة اتعلمت ازاي اتعامل مع المصالح الحكومية و عرفت ان الفراش هو الكل في الكل
و نسيت اني اشتغلت و انا في الكلية منهم شغالانة تبع الحزب الوطني في مشروع تشجير 6 أكتوبر حوارات كدة
و كاشير في مطعم و كنت بتسرق كل يوم من العيال الي شغالين في المطبخ و في شركة أضاءة دي الي كانت لوز و قتها كانت مسئولة عن الحفلات الكبيرة الي في مصر ( الواحد شاف بلاوي )

و رغم كدة بحس اني ولا حاجة مش عارف ليه
ده مش تواضع و لكن حقيقة
حتى دايما بروح اعمل مقابلات في اماكن و انا عارف اني مش هشتغل فيها بس علشان اعرف انا واقف فين

معلش طولت عليكوا لعل أحد يستفاد

الشغل بيجيب شغل

**Ahmed Nouh** · 04-06-2010 01:28 AM

ان شايف ان اختيار اجابه من الاثنين هو اختيار ظالم لكن الموضوع ليه عده ابعاد

اولا طول وملل وصعوبه فتره التعليم فى مصر بتخلى المتخرج راسم على راحه على اعتبار انه دون عن امثاله طحن نفسه وكمل فى الجامعه وده فعليا حقه ومنقدرش نقوله انت غلطان , فى الحاله دى البلد مفيهاش شغلانه توحد ربنا

بس هو مش بيتنك , لا هو كل مشكلته انه لم يتأقلم مع الوضع المهبب اللى احنا فيه ومعندوش نظره عامه للحال يعرف من خلالها ان مشكلته متكرره ملايين المرات وانه لازم يخرج برا الدايره ويقرص على نفسه كمان شويه بلغه او مهاره او ما شابه

اللى خرج برا الدايره وعمل كدا هو اللى بيقول , طبعا البلد غرقانه شغل ولو كان عندى اليوم 30 ساعه كنت اشتغلت فى شركتين

يعنى كل الموضوع يتلخص فى بحر الشغل وكل واحد من النوعين اللى فاتو واقف على ضفه شايف فيها البحر شكل غير التانى

النصيحه المهمه هى متقعدش فى البيت وشوف ايه مشكلتك , انا كنت لما بروح انترفيو واترفض ( كتير قوى ) كنت دايما بجاهد علشان اعرف اترفضت ليه واشتغل على الجزئيه دى بجديه لحد ما ربنا كرمنى وقفلت ثغرات كتير وجابت معاى نتيجه محترمه

الكورسات غاليه والدنيا مش مستحمله مصاريف تطوير ذات , اقرص على نفسك وخليك سوسه وهات كتب من هنا رخيصه على ممارسه من هنا بحب تعلم هتجيب معاك مهاره جديده وطور نفسك بنفسك , ده بجانب ان دخولك عالم الشغل اساسا وكسر البطاله هيفتح لك ابواب اكتر مما تتخيل بس انت بس جرب ومش هتخسر حاجه

علشان الحياه بشكل عام اساسا مش سهله ومن غير تعب مفيش ثمار وتبقى عملت حسابك انك لو ربنا كرمك واتوظفت هتفضل محلك سر وحتى مش هتطور ويمكن الشركه تمشيك علشان مش كفايه

**M.Osman** · 04-06-2010 01:39 AM

ألبلد مليانة شغل
اللي عايز يشتغل بيشتغل
و عن تجربة ... اللي بيسعى بيلاقي
و اللي بيفضل مقضيها نووووم مش هيشتغل

-

-

الموضوع: هي فعلا البلد مافيهاش شغل؟

LinkBack

أدوات الموضوع

عرض

-

-

-

-

المواضيع المتشابهه

هي البلد رايحه علي فين فوضي فعلا

هى الأفيو فعلا سيارة سيئة فعلا ؟؟؟؟ ( مشاركات خارج الموضوع )

مصر واهانة المواطن على جميع المستويات انا عايز اطفش من البلد دى البلد دى مش بتاعتنا

كارثه حقيقيه فعلا فى البلد

هل إحنا فعلا بنتطرد من البلد ؟!

الكلمات الدلالية لهذا الموضوع

المفضلات

المفضلات

ضوابط المشاركة