الموضوع: أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

المشاركة الأصلية كتبت بواسطة ziabassem

يا ريت يا جماعة بلاش مسلسل الاثارة والتشويق ده .. إلا لو كان العضو اللي بيكتب التوبيك مشغول ومش قادر يكتبه مرة واحدة .. وفي الحالة دي ليه عذره .

آسف جدا ... بس والله مكنش قصدي احكي القصة على اجزاء بس لقيت انها هتبقى كبيرة قوي والناس هتمل


الجزء الثالث والأخير

ذهبت للنصاب في محل الوايلي ووجدت عنده راجل طويل وعريض سنة يتراوح مابين ال50 وال55 جاحظ العينين

وكان الأستقبال بحفاوة

النصاب : اهلا اهلا استاذ خالد

انا: اهلا

النصاب : تشرب اية

أنا : ولا حاجه ... نخلص الفاتورة وبعدين نقعد نشرب براحتنا

النصاب : اعرفك بالأستاذ فلان (وهو يشير ناحيه الرجل جاحظ العينين ) تاجر جملة من اسكندرية وعايز بضاعه كبيرة وهيعمل معاك شغل كبير

أنا : وماله بس نخلص الفاتورة السابقة ونخش على الشغل الجديد

النصاب رقم 2 (جاحظ العينين) : هي الفاتورة بكام يا استاذ خالد

أنا : 1000 جنية

النصاب رقم 2 (جاحظ العينين) : مبتسما يخرج من جيبه علبة سجائر فاخرة ويعزم عليا وهو يقول خلاص الفاتورة دي حسابها عندي

أنا : وماله ادفع

النصاب رقم 2 : هات الفاتورة القديمة بقى ونعمل فاتورة جديدة بأسمي

أنا (متعجبا) : ليه هو انت مش هتخلص دلوقتي

النصاب رقم 2 : لا انا الحقيقة مش معايا سيوله دلوقتي وانا كلمتي عقد وأسأل عليا في اسكندرية

النصاب : يا استاذ خالد الحاج تاجر كبير في اسكندرية وتعاملاته كلها كبيرة أنت قلقان من ايه


* ( أتناقش مع نفسي شاردا ) نصاب وبيسلمني لنصاب اكبر منه والشركة ملهاش دعوة هتقولي ادفع من جيبك مفيش حل غير اني اتماشي معاهم واستعمل نفس اسلوب النصاب

آلا وهو الطمع ... لازم اطمعه بالبضاعه الجديدة لحد ما اقدر آخد فلوسي

أنا : طيب ادفع جزء من المبلغ ونعمل فاتورة بالباقي

النصاب رقم 2 : عيب يا استاذ خالد قولتلك 3 ايام بالظبط وهتاخد فلوسك هو صحيح انتو عندكم لو اخدت بضاعه ب10 ألاف جنية نسبة الخصم هتبقى كام ؟؟؟

انا : لازم ارجع لمدير المبيعات وهو اللي يحدد الخصم

النصاب رقم 2 : طيب نغير الفاتورة زي ما اتفقنا بقى عشان نفضى للشغل الجديد


* اضطررت رغما عني لتغير الفاتورة بأسم النصاب الجديد وبدأت الأحداث مع النصاب الجديد جاحظ العينين


بعد 3 ايام اتصل بي النصاب رقم 2 (جاحظ العينين)

النصاب رقم 2 : الو ازيك يا استاذ خالد

أنا : ايوة مين

النصاب رقم 2 : انا الحاج فلان .. انا قاعد دلوقتي في كافيه في المهندسين تقدر تيجي تقابلني دلوقتي

أنا : اديني اسم وعنوان الكافيه


ذهبت لمقابلة النصاب رقم 2 في الكافيه ووجدت معه رجل آخر شاب بتاع 25 سنة متقمص دور الصبي بتاعه اللي بيبعته يخلص شغله مع التجار


النصاب رقم 2 : اهلا اهلا يا استاذ خالد اتفضل اتفضل

أنا : اهلا بيك

النصاب رقم 2 : تشرب اية .... مترررررررررر

أنا : اي حاجه ساقعه


النصاب رقم 2 : دلوقتي عايزين نخلص البضاعه بتاعتنا وبصراحه انا بشتغل في الأمن الغذائي ومشتغلتش قبل كدة في البطاريات الجافه فعايزك تعملي تشكيله حلوة من البطاريات القلم والطورش وشوية كشافات حسبه 10 ألاف جنية

أنا : نخلص الفاتورة الأول وانا عنيا ليك


النصاب رقم 2 : ضاحكا ... هنخلصها طبعا بس انا اصلي بنزل شغل لكام محل في اسكندرية وعايز انزلهم كمان شوية بطاريات مع البضاعه

أنا : الحقيقة مقدرش اعملك فاتورة جديدة الا لما تخلص الفاتورة القديمة خلصها بس عشان حتى اعرف اجيبلك خصم كبير للبضاعه الجديدة


طبعا حاول النصاب رقم 2 أني اديله بضاعه بشتى الطرق وقعد يحكي لي قصص كفاحه في التجارة لحد ما وصل انه بقى من اكبر تجار الجمله في اسكندرية بالأضافة للأخ اللي عامل نفسه صبي التاجر الكبير قعد يقولي الحاج شغله متعب وبيتعامل مع تجار كتير

المهم طبعا مدتلوش عقاد نافع وحاولت اطمعه على قد ما اقدر في البضاعة الجديدة ام 10 آلاف جنية انها مش هتم الا لما يخلص ال1000 جنية قيمة الفاتورة السابقة وانتهت المقابلة على كدة


اللقاء الأخير

بعد يومين

النصاب رقم 2 : ألو ازيك يا استاذ خالد

أنا : أهلا

النصاب رقم 2 : أنا حضرتلك الحساب بتاعنا تعالى في نفس الكافيه عشان نخلص

أنا : جايلك حالا

وصلت المكان لقيته قاعد منتظرني وجنبة كرتونه كبيرة

أنا : سلامو عليكم

النصاب رقم 2 : وعليكم السلام أهلا أهلا ... اتفضل ... انا عشان مزعلكش مني اتصرفتلك في الطابعه دي والله واقفه عليا بأكتر من الف ، خدها وبيعها وسدد المبلغ للشركة واعتبر الباقي هديه مني ليك

* طبعا انا زهقت وبقيت عايز آخد اي حاجه واخلص

أنا : الحقيقة الفاتورة مش معايا حاليا هبقى اجيبهالك المره الجايه لما نخلص البضاعه بتاعتنا سلام بقى عشان ورايا طلبيه مهمه في مدينة السلام

مشيت وقررت ان الموضوع انتهى على كدة وكفايا عليا الطابعه ابيعها ... لكن كانت المفاجئة ان الطابعه لقيتها بعد كدة متساويش اكتر من 500 جنية

حاول يتصل بيا بعد كدة وانا مردتش وبعدين رديت عليه وقولتله انت نصاب وابن تيييييييت وانا فاهم من الأول انك عايز تنصب لكنك نصاب عبيط معتقد اني هديك بضاعة بـ 10 ألف جنية وانت مش قادر تدفع 1000 جنية .... وحسبي الله ونعم الوكيل في باقي فلوسي

طبعا دفعت المبلغ للشركة واستعوضت ربنا في الباقي ... وقولت محدش بيتعلم ببلاش والحمد لله على كدة

موضوع جميل متابع مع حضراتكم

المشاركة الأصلية كتبت بواسطة hesham_7amza

مبلغتش عنه بالفاتوره اللى معاك ليه ؟؟؟
كان زمانو اتروق بالخمسمية (500) اللى باقيه

زمايل كتير في الشركة قالت لي مش هتعرف تاخد معاه حق ولا باطل وبدام هو ناوي على النصب يبقى اكيد مضى امضى مختلفة يقدر يطعن فيها بسهوله

طيب وايه المفروض اللى كان يتعمل فى المشكلة دى؟

اعتقد من الاساس مكنش يبدل الفاتورة بفاتورة للتاجر التانى؟