الموضوع: أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

أنا عايز أقول حاجة مهمة مش دايماً النصاب بينصب على الطماع
هتلاحظو إن النصاب وهو داخل عليك بيتكلم كتير جداً
وبيبص في ملامح وشك أوي
و أول مانتا تبصله يبص في الأرض أو لأي حد تاني
عشان كل هدفه إنه مايخلكش تركز في أي حاجة " يتوهك "
عشان هو بيفهمك وبيعرف شخصيتك بعد كده
ساعة لما بيعرف شخصيتك كل سنة و إنت طيب
وممكن بعد كده لما يمشي وتفكر في اللي هو قاله تعرف وتتأكد إنه نصاب وعوضك على الله

يعني مش دايماً هو بيستغل الطمع

ممكن يستغل " الطيبة" لو لاقاك طيب يخشلك من ناحية الطيبة لما يشوف تعبيرات وشك
ممكن يستغل " الجهل " وهو بيكلمك تلاقية بيقول حاجات كتير فيلاحظ عليك الجهل بهذا الشيء بواسطة تعبيرات وشك أيضا
ممكن يستغل " هبلك " ممكن يستغل " استعجالك " ممكن يستغل " توهانك " بواسطة تعبيرات وشك أيضاً
خلي بالك ممكن يستغل " نصاحتك " و إن إنت واد إور مايتخافش عليك هيخشلك برده من تعبيرات وشك

يعني من الآخر

ماتحطش نفسك في الموقف ده إلا للضرورة مع فرض سوء النية دائماً
حد وقفك ==== ماتأفلوش يعني ماتعملش ناصح و تقول ماحدش هياخد مني حاجه غصبن عني
حد كلمك ==== ماتسمعلوش
باصلك ==== ماتبينش تعبيرات وشك
حد قالك إزيك يافلان الفلاني و إنتا نسيه ==== تبقى ماتعرفوش حتى لوكنت بتنسى كلت إيه الصبح
ملحوظة:
أي حد في الدنيا معرض إنو يتنصب عليه و إسأل أي حد إتنصب عليه هيقولك زي ماكون كنت تايه ساعتها وهو جالي ماعرفش منين
- و اللي يقولك أنا إتنصب عليا بس روحت وجبته وعملت فيه و أنا لو ليا جنيه بره أصرف عليه ألف جنيه ماتصدقوش - اللي اتنصب عليه اتنصب عليه وخلاص ولو شفت اللي نصب عليك بعد كده مش هاتعرف تاخد منه حاجة حتى لو موته من الضرب وممكن هو اللي يموتك من الضرب ويطلعك حرامي

مثلاً

أنا اتنصب عليا بسبب طيبتي
واحد محترم واقف أما مستشفى قالي لو سمحت أنا و أنا و أنا وشغال في شركة كذا و إنتا منين قلتلو أنا سكن هنا قالي عند فلان الفلاني وأنا أعرف فلان و فلان وخالي فلان عنده صيدلية كذا في الحته الفلانية معلومات رهيبة
أنا محرج أنا مزنوق أنا في موقف لا أحسد عليه """" أمي أمي أمي يا ناس أعمل إيه أمي لازم أعمل كده أنا أمي فوق في المستشفى مع دكتور فلان عايزة حقنه ضروري للقلب قبل العملية أنا لوحدي مش عارف أعمل إيه والدموع بتنزل من عينه أنا هجنن أعمل إيه قلتلو أأمرني حقنه عند صيدلية فلان بـ 214 جنيه لازم تتصرف أبوس إيدك أنا لوحدي أنا في ضيقه لو مش معاك أروح معاك البيت أعمل اللي إنته عايزه ده رقم موبايلي رن عليا عشان تعرفني""" الأيام دي كان والدي لسه متوفي وكنت معاه في المستشفى وطلبوا مني حقن وحاجات وربنا ستر وكان معايا فلوس وكنت لسه قابض و أنا فلبي طيب طلعتله 220 جنيه وقلتله سلامو عليكو وربنا معاك راح ماسكني وقاللي إزاي أنا لازم أردلك الفلوس دي قلتله أنا مش عاوزها لا لا لا لا و الله إحنا ناس محترمين بس أنا اللي مزنوق دلوقتي وراح مديني الفلوس تاني و قال والله العظيم وحياة أمي اللي راقده فوق بين الحيا والموت منا واخد حاجة إلا إذا قلت إنهم سلف وبكرة الساعة 11 هيكونوا عندك يا إما تاخد الموبايل قلتله خلاص خلاص قاللي إنتا ماشي منين قلتله طوالي قال أنا جاي معاك عشان الصيدلية وراح موقف تاكسي وقالة صيدلية فلان وقالي إركب قلتلو لأ روح إنتا قاللي طيب و هاتصل بكره الكلام ده سنة 2008
ساعتها بقيت ماشي مبسوط و بقول الحمد لله فرجت كربة مؤمن ومش مشكلة نص مرتبي ربنا هيعوض عليا ولو كان طلب أكتر كنت إديته
جيت تاني يوم قلت أرجع الشريط و أشوفة من الأول وكانت هذه هي الملاحظات اللي أنا ماخدتش بالي منها
1- الراجل المحترم المهذب ده كان واقف في حته ضالمة ونادالي و أنا رحتلو ××××
2- الراجل المحترم المهذب ده كان واقف جنب عربية وفي في الأرض جركن كبير " طريقة تانية للنصب "
3- الراجل المحترم المهذب ده كان بيتكلم بسرعة جداً وبيقول أسماء كتير عشان أفقد تركيزي ويطمن إنو تخش عليا النصباية وياخد اللي هو ه عاوزه بدون نقاش " وفي وسط الكلام أنا ساكن هنا أخويا العقيد فلان جاي من الاسكندرية عمي ساكن في شارع كذا " و أنا بهبلي كنت المفرض أقوله روح هات من عمك أو روح بيتكو
4-الراجل المحترم المهذب ده كان كل مابصله في وشه يبص في الارض
5- الراجل الأهبل اللي هو أنا ماخدش باله من حاجه خالص وكان قلبة طيب " مابتهونش إلا على الغلبان "
لما رجعت الشريط قلت لأ أتصل بيه إلى الآن غير متاح أنا كان ممكن أسامح وكنت ماشي وخلاص بس اللي عمله في الآخر خلاني ماسمحش أبداً .
قلت أوصافه لواحد أعرفه إنه لابس نضارة مليان شوية كان بيعرج برجله الشمال بسيط طويل قمحي قاللي ده واد نصاب ...... بيظهر كل كام شهر في حته شكل وبيعد سنين مايظهرش خالص
ماشي مرة في الشارع 2010 وبعدي لقيته راكب عربية دايو نوبيرا فضي ومعاه واحدة ....... وشايلة عيل وفي عيل راكب وره طبعاً ماتحركتش من مكاني بسبب الزهول وماشفتوش بعد كده
معلش آسف للإطالة

من الآخر ماتقفش لحد ولا تثق في أحد و إفترض دائماً سوء النية

برجاء مراعاة انتقاء الألفاظ

مشرف 5 ب

10 مساءا

24 يونيو 2010

انا لسه من ساعتين متعرض لموقف حرق دمي جدااااااااااااااااا

في مكان كده فوق في المقطم كنت رحته زمان مكان هادي وحلو قوي وتحس انك في صحراء بس على جبل عالي والقاهرة كلها تحتيك

المهم رحت المكان ده وكان معايا 2 صحابي (رجالة علشان محدش يفهم غلط) المهم لقينا المكان ده قلب كافتريات بشكل غبي ولقيت ناس بترمي نفسها قدام العربية علشان اقف المهم ركنا العربية في شارع جانبي ونزلت ولقتش مفر غير اني اقعد على كافتريا منهم
وقعدت وطلبنا 3 شاي لقيتهم جايبين الشاي ومغطييته بسلوفانة قلت حلو النصب اشتغل
بسال الواد اللي بينزلنا الطلبات بقوله الشاي بكام قالي ب 10 ج (ده على اساس اني هاخد فارغ الكباية معايا وآخد الكرسي اللي انا قاعد عليه)

قلتله اندهلي اللي معاه الحساب
جيه بقوله الشاي بكام قالي 10ج +10% ضريبة مبيعات+12% خدمة
طبعا احنا تنحنا قلتله اديني فاتورة ضريبية حالا ودخلت فيه شمال
قالي خلاص اشرب وخلي وبتاع وعمل نفسه زوق وحترم قوي

شوية ولاقينا خناقة في كافتريا جنبنا كانت كبيرة جدااااااا بسبب الحساب قلت بس كده طلبت حوار

الجميل بقى احنا قعدنا بتاع نص ساعة بالظبط والله عدى علي عيال اللي بيبيع لب وذرة وفل وزفت بتاع 10 مرات ويرجعوا ويلفوا تاني

المهم شربنا وخلصنا الحساب كام يا عمنا قالنا 30 ج قلتله مش دافعين وانا راجل مأمور ضرائب وصاحبي التاني محامي

هم اتهزو شوية وبتاع راح منادي صاحب الفرش قالنا خلاص وخليها علينا وبتاع ومش مهم اي حساب والمهم تيجوا تاني (بياكلنا بالكلام) والحساب هيبقى 30 ج بصراحة انا كنت مستعد لاي حوار وكاتب رقم 122 على الموبايل وقلت هتخرب النهاردة
لقيت واحد من صحابي راح مطلع 20ج ونهينا الحوار على كده

والله لحد دلوقتي دمي محروووووووق وطق حاسس اني اتنصب علي بالزوق

قبلها قلت نروح نتغدا ورحنا كويك اللي في شارع الميرغني وانا طلبت سندرتش ماشروم كده في عيش محمص بالجبنة الموزيريلا كان طعمها وحش جداااااااا بس ده بس قلت اجرب وجت على دماغي

بجد انا اتعكننت انهاردة جدااااااا يعني بعد يوم قرف في الشغل وقرف بعد الشغل

خلاص بقى انا داخل انام مش قاااااااااااادر