الموضوع: أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

المشاركة الأصلية كتبت بواسطة wesam_salom

النصبه دى بتحصل كتير قوى

ودى بتخلى المناديب دايما تخاف من الشغل

وممكن تخليهم يتصرفوا تصرفات تودى فى داهيه علشان ياخدوا حقهم

فعلا انا مخي ساعتها شاط وحسيت اني لازم آخد حقي خصوصا اني كنت لسه متخرج ودة كان اول موقف نصب اتعرض ليه في حياتي ..

المشاركة الأصلية كتبت بواسطة أحمد كمال

ياللا

شنوري و ابو مريم و خالد طلعت

كملوا او احكوا بلاش تعلقونا كده :)

الجزء التاني

بعد ما اتلم حواليا أصحاب المحلات المجاورة وبدأوا يهدوني ويقولوا ليا انت مش لوحدك دة فيه مناديب كتير حصل معاهم كدة مندوب فاين ومندوب زيت كريستال ومندوب جهينة ... إلخ إلخ

وبعدين واحد الله يصلح حاله قالي استنى انا عندي كارت لمحل ملابس بتاع الراجل دة خده وشوف عليه العنوان والتليفون وقالي انه اعطاه لمندوب فاين بس معرفش قدر يوصل للراجل ولا لاء

فكرت اتصل بالتليفون وأسأل علية وبعدين حسيت انه موقف ساذج مني وقولت هيلحق ياخد حذرة ويختفي وقررت أني اطلع على العنوان مباشرة

ذهبت الى العنوان وكان في الوايلي وكان معايا واحد صاحبي بدأنا بالبحث عنه بهدوء تام حتى لايهرب وبعد الوصول للمنطقه لم نعثر للمحل على اي اثر

أحسست بالتعب والأرهاق فأستجمعت قواي وذهبت مره اخرى للعنوان وحددت مكان المحل بالظبط ورقم العمارة فوجدته سوبر ماركت وليس محل ملابس فوقفت امامه دقيقة أنظر بداخله الى ان تفاجأت ببعض بضاعتي داخل المحل

طبعا اكيد حد هيقولي طب ما البطاريات ماليه المحلات وبنفس الماركه عادي ، لكن هقولك معرفش حسيت ليه انها بضاعتي فدخلت المحل وكانت اللي واقفه بداخله فتاه لا يتعدى عمرها 18 سنة

اشتريت اي حاجه وقولتلها هو مش المحل دة بتاع فلان الفلاني لقيتها تنظر ليا بحدة وبتقولي لالا

معرفش حسيت انها بتكدب .. !!!

خرجت وبدأت اسأل المحلات المجاورة وبعد ساعتين او 3 ساعات من البحث والسؤال عرفت ان المحل دة بتاع النصاب فعلا وانه كان محل ملابس وغير نشاطه من ايام فقط (طبعا بعد ما لم بضائع مختلفة تكفي لتموين سوبر ماركت محترم)

وعرفت ان اللي واقفه دخل المحل دي بنته وكمان الناس دلوني على عنوان بيته الجديد (لأنه عقبال عندكم كان لسه متجوز جديد غير مراته الأولى)

ذهبت لعنوان بيته الجديد وكان برضه في الوايلي وكان جنب المحل بكام شارع ، خبطت على الباب فتحت مراته سألت عليه قالتلي والله انا معرفش عنه حاجه وأسلوبها معايا في الكلام حسسني ان فيه ناس كتير بتدور عليه وعمليات النصب اللي عملها كتير

نزلت وبقيت مش عارف اعمل اية هل استناه على باب البيت واتربص له ولا اعمل اية ؟؟؟؟

فضلت داخل المنطقة لعدة ساعات اراقب البيت والمحل وبعدين فكرت في فكره ورحت داخل المحل تاني

كلمت البنت بحدة وقولتلها قولي لأبوكي ان مندوب البطاريات عايز حساب الفاتورة وانه راحلك البيت الجديد ولم يجدك ولو متصلتش بيه ورجعت البضاعة او المبلغ هيروح يعملك محضر في القسم بعنوان بيتك ومعاه الفاتورة وامضاءك عليها

خرجت من المحل ومش عارف اية اللي هيحصل بعد كدة هل ابلغ فيه واعمل محضر فعلا ولا انتظر كام يوم يمكن يخاف ولا اخش آخد حقي من المحل واعمل جناية

إلى ان رن الموبيل وكان هو النصاب

النصاب : ألو يا أستاذ خالد ...أنت فين يا راجل

أنا :الو أنت اللي فين لميت البضاعة واختفيت من محل الزمالك ؟؟؟

النصاب : ابدا والله ... دة صاحب المحل اختلفت معاه على الأيجار وطردني وأنا كنت على ميعادنا وكنت ناوي اتصل بيك عشان تيجي تاخد فلوسك .... اتفضل عندي في المحل دلوقتي عشان تاخد حسابك (طبعا قصدة محل الوايلي)


كفاية لحد كدة ونكمل بعد شوية .... بس قولولي لو الموضوع ممل عشان مكملش

المشاركة الأصلية كتبت بواسطة kh_talaat

كفاية لحد كدة ونكمل بعد شوية .... بس قولولي لو الموضوع ممل عشان مكملش

هههه انتوا بتفكرونى بالتلفزيون لما يقطع الفيلم فى اهم حتة ويقول انتظرونا

كملوا ياجماعة ده الواحد سمع حاجات فى الموضوع ده ملهاش حل

وواضح ان لسه فى كتير حيطلع

المشاركة الأصلية كتبت بواسطة kh_talaat

كفاية لحد كدة ونكمل بعد شوية .... بس قولولي لو الموضوع ممل عشان مكملش

لأ الموضوع مش ممل ولا حاجة
بالعكس احنا كدا بنتعلم من تجارب بعض

وفعلا غالبا الطمّاع بيشجع النصّاب

المشاركة الأصلية كتبت بواسطة medociv

يا جماعة انتو بتحكو من فيلم على جنب يااسطة لاشرف عبدالباقي!!!!

المواقف التي حدثت في فيلم اشرف عبد الباقي هي مأخوذه عن كتاب بعنوان (تاكسي حواديت المشاوير) للكاتب خالد الخميسي

وهي حكايات حقيقيه حكاها له سائقو تاكسي حقيقيين ومنها قصة ملك الموت

والكتاب نزلت منه اكثر من طبعه وترجم للغات عديدة وأنصح الجميع بقراءته



Khaled El khamissi Egyptian writer