انا ممكن اقولك تجربتي معاها خاصة انها عشره 11 سنه استخدام وبعتها من شهر واحد واشتريت اسكودا بردو بس اوكتافيا a4
اليركب اسكودا او الماني عامة ميقدرش يغير غير الماني بردو وده لاسباب
1- ثبات ممتاز
2-قطع غيار متوافرة ورخيصة
3-عفشه حمالة قاسيه مغيرتهاش لغاية مابعتها بالرغم من استخدام شاق جدا وكنت بروح بيها مزرعتي وسط طرق غير مرصوفه
4- استهلاك البنزين كويس مقدرش اقول انه ممتاز
5- صاج تقيل ياما اتخبطت واي سمكري لايمكن يقولك غير رفرف ولا اي حاجه هو الشاكوش والسنده ولمبة الحام ترجع ذي الفل
6- مفتحتش كبوتها لمدة 6 سنين غير لتغير فلاتر الزيت والبنزين يعني اعتماديتها عاليه جدا
7- سير الكاتينة جنزير يعني ميعملش معاك حركات نص كم ويعيش علي الاقل 9 سنين
لكن طبعا ليها عيوب بردو منها
1- واطيه علي الارض ممكن تحك في المطبات من تحت الموتور بس المشكله دي حلها انك تعرف كويس انك متخطيش علي مطبات عاليه ذي بيارات المجاري انما المطبات الصناعيه عادي
2- السخونه وحل المشكله سهل بتركيب ترومستات مروحه بتاع عربيه 128 شوط قصير 70 الي 50 اي نعم المروحه هتشتغل فترة اطول بس هتحمي الموتور ولي ملحوظه هامه ان السخونه الطبيعية للعربية هي 90 العربيه متصنعه علي كده واحسن اداء للعربيه بالنسبه للموتور واستهلاك البنزين عند درجة حرارة 90 ولو معاك الكاتلوج مكتوب فيه متغيرش الترومستات لاخر شوطه اقل لانه هيقلل من كفاءة العربية لكن انا بالنسبه الي حصلت المشكله ان العربيه كانت بتعدي ال90 درجه والمروحه متشتغلش والسبب ان الترومستات بتتكون عليه طبقة من الرواسب من مياه الريداتير بتائثر علي حساسه فبيحسش ان العربيه سخنت فالمروحه بتشتغل متاخر وحل المشكله ذي مقولتلك سهل بالاضافة الي التاكد من احكام دورة التبريد وعدم وجود تسريب وده مهم جدا
3- العربيه تقيله مش بتاعت سحب وجري وشد مع استعمال بنزين 92 العربيه بقيت طياره
4- الفتيس في المرشدير تقيل ومبيجيش من اول مره ابدا
5- العربيه شنطتها صغيره ومتنفعش تكون لاسره تنفع لشاب استخدام فردي انما اسره وسفر وشنط منصحكش
اتمني اكون افدتك وتحت امرك
المفضلات