انت ليه فرحان بموضوع تونس؟

**hobiko** · 16-01-2011 05:20 PM

المشاركة الأصلية كتبت بواسطة moody1

وبانسبة لعدد الفقراء فمصر

طبعا انا ببقى حزين لما بروح بعض الاحياء الشعبية وبشوف كل شىء سىء منتشر وسط الفقر والجهل والمخدرات

وجهة نظرى ان الى سبب كده هى معادلة

نمو سكانى غير عادى+موارد محدود= يعنى لازم نص الشعب يبقى تحت خط الفقر !!!!!!!!!!

هقولك مثال

فليبيا الجارة الشقيقة عددهم دلوقتى 5 مليون(بس) و كموارد عندهم بترول اد مصر 10 مرات

احنا فمصر عندنا اقل من ربع مواردهم الطبيعية

وكمان ككثافة سكانية احنا قدهم 16 مرة (احنا 82 وهما 5) مليون!!!!!!

تصحيح مهم جدا

نمو سكانى غير عادى+موارد محدودة + فساااااد بلا حدود + نهب بلا حساب + انعدام ضمير بلا وازع + فشل بلامبالاة = يعنى لازم نص الشعب يبقى تحت خط الفقر

المشاركة الأصلية كتبت بواسطة m.mostafa80

معلش مع احترامى لرأيك وشخصك واضح ان حضرتك متأثر بأقاويل الحزب
انا لا منتمى لأى حزب اوفكر سياسى بس حالنا كلنا وحال البلد مش محتاج انك تبقى منتمى لحزب معارض عشان تشوف اللى انا وغيرى كتير شايفينه
ومش معنى ان انا وانت راكبين عربيات وقادرين نصرف على بيوتنا وان كان بيتم بالزق فى الغلاء اللى احنا فيه يبقى نسد ودانا عن اللى بيحصل للى مش هيلاقى ياكل هنيجى يوم ونقف انا وانت وكل الناس قدام ربنا وهنتحاسب ونتسأل ايه اللى عملناه لأخواتنا دول

+1111111111111111111111

**semmsem** · 16-01-2011 05:47 PM

فى اول يوم عصابات السلب والنهب عملت ايه؟ فى احياء اتحاصرت فى تونس اهلها مش عارفين يخرجوا من بيوتهم ....تخيل نفسك وانت قافل عليك شقتك ورعب اولادك وهو متحاصرين لمجرد ان فى عصابات - وما سيكون اكثرهم فى مصر- شايفة انك مدام ساكن فى شقة فى مدينة نصر ولا فى مصر الجديدة يبقى انت مليونير ابن ستين....ولازم نسرقك

سامحني انا في تونس والكلام ده مش مظبوط
العصابات دي كانت من الحكومه عشان تخوف الناس وتقعد في بيوتهم ويبطلوا مظاهرات بس طبعا اللي حصل ان الناس ثارت اكتر وده مكنش متوقع ده تصحيح للمعلومه
بس انا معاك ان ده هيحصل في مصر لان الجياع والحاقدين كتير

**تامر.محمد** · 16-01-2011 05:47 PM

المشاركة الأصلية كتبت بواسطة ahmed4000

الناس بلا استثناء معتقدة ان الرئيس لما يتغير يبقى حندوس على زرار التقدم فى الريموت كنترول بتاع الشعب

طب ممكن ادخل نفسي في الاستثناء ؟
:))))))))))))
هو مش الرئيس , لكنها المنظومة الحاكمة ككل , كأنه سيد و عبيده , كلهم رأس و أطراف

فنصحى الصبح نلاقى:
حنلاقى الفساد مش موجود -كان مش كلنا فينا فساد اومال مين اللى بيحط جنيه للعسكرى علشان يركن صف تانى او يدى بريزة لامين الشرطة علشان مسكه وهو بيتكلم فى الموبيل- ولا ده مش فساد
حنصحى الصبح منلاقيش واسطة ولا محسوبية -كان مفيش واحد فينا لما بيتوقف ردار وهو مخالف فعلا مبيحاولش باى طريقة يكلم فلان بيك ولا علان بيك علشان يشيله المخالفة

(1) يا رجل , ابنك لو ما ربيتوش هايطلع قليل أدب , و ابن القليل الادب هايطلع صايع و متشرد , و الشعوب زي الأطفال بالظبط , اللي ما يقدرش يعلمها و يمشيها يبقى ما يستحقش يحكمها , و مافيش شعب في الدنيا مستقيم و مؤدب و نزيه بنسبة 100% , حتى في صدر الاسلام كان فيه اللي كده و اللي كده

(2) في نفس الوقت , لاحظ معايا ان الواسطة و المحسوبية و الحاجات دي لو مش ممكنة و سهلة ماحدش هايعملها , ولاحظ معايا ان كتير مننا بيتعرض للابتزاز عشان ياخد حاجة من حقه , و ده اسمه فساد المنظومة الناتج عن الفساد اللي نازل من فوق تبعا للشكل الهرمي

حنلاقى التعليم والصحة بقت تماما فجاءة - كان المدرس والدكتور والمهندس محتاج حكومة كويسة علشان هو يبقى كويس-

بجد بجد , ايوة , مرتبات كويسة ( من اللي بيتهلب) , و رقابة صارمة , هاتلاقي الدنيا تدريجيا , يمكن بعد جيل ولا اتنين , هاتتعدل تدريجي , و لو عايز تتأكد , شوف اي شركة قطاع خاص ناجحة في البلد , و بص على قسم فيها مديره محترم

الناس حتبقى فجاءة متحضرة ومحترمة وبتراعى الذوق والاخلاق والجيران حتحب بعض والعنف حيقل وكل شئ حيبقى جميل....بس بمجرد مالرئيس يتغير...لكن الشعب ده فلة واحسن شعب فى العالم واذكى شعب فى العالم واكتر شعب متحضر فى العالم....بس حظه قليله

بخته وحش...غيرولوله الرئيس بس وهو حينطلق وحيبنى هرم جديد

ارجع لنقطة رقم(1)

بص باختصار , نظرية الاصلاح من الأسفل فقط , فاشلة , لأن لها سقف هاتنتهي عنده , و لها حائط هاتقف عنده ,و كذلك الاصلاح من الأعلى فقط فاشلة , مافيش حل الا الاتنين

**Dr Zezo** · 16-01-2011 07:32 PM

استاذ احمد لولا يقيني من طبيعة مواقفك المختلفة في بعض الاحيان - و ان كانت في السياق بالرغم من ذلك -

لظننت امرا اخرا
و لأن الردود كثيرة كفت و وفت

و لأنه من الصعب ان اقتبس كل ردودك و افسر شيئا واضحا لكل من يعيش في بلاد العرب فسأكتفي ببعض النقاط
لماذا فرحان ؟
لأنه ببساطة شديدة عندما يتحول امر ما تقرأ عنه و تنادي به و تقول انه ممكن - و يثبطك البعض بسوء نية او بحسن نية - الي امر واقع ملموس

يجعل الامر حقيقة للناس جميعا

يجعلهم يثقون بقدرتهم علي الفعل

كما الفرخ الصغير تعلمه امه الطيران بأن تثبت له فعلا بأن الطيران ممكن حقا و ليس وهم

وفى نفس الوقت فجاءة الكل مستعد للتغير -مش علشان ظروفه وحشة-

بالطبع عقيدتنا و اسلامنا و المبادئ الانسانية - حتي - تقول اننا طالما بخير و فئة معتبرة ممن حولنا ليسوا كذلك لا نلتفت اليهم

طالما انا و حضرتك و من معنا بخير
مش مهم
الدنيا بما فيها

و اذا كانت الحياة لدي حضرتك تعني طعاما صحيا - اذا توفر - و ماء عذبا - اذا توفر - و سيارة معقولة و دخل شهري مناسب يكفي الاحتياجات الاساسية و العلاج - اذا توفرا - وتعليم جيد - اذا توفر -

- هذا اذا توفر كل هذا - يعني ان الامور كلها علي ما يرام و لا داع لفعل اي شئ

فهذا يفسر لماذا تأخرنا و لماذا يتطورون

بغض النظر عن الفساد و الظلم و عدم الامان و تدني الاخلاق - في ظل انعدام رادع و هذا دور الحكومات و لو لم يكن هذا دورها لم اضطر الناس الي ابتكار منظومة الحكومة من الاساس و لعمل كل منا علي توفير كل مطالبه اجتماعية و مالية و نفسية بنفسه فلا دور للحكومة الفرد اساس كل شئ هذا بحسب رأيك !! - و عدم توفر الطعام و العلاج لفئة معتبرة من الناس حتي صار الطعام من الامور التي يتحاسد الناس عليها !!

و احب ان اعلم رأي حضرتك في العلماء و الباحثون الذين يتركون اوطانهم بالسنين و يتفرغون لبحث ما قد يعود علي بلادهم بالخير الوفير

و لماذا ليس هذا المثل ليس عندنا

و من هذا المنطلق اري بالتفكير جديا بإلغاء الجهاد و حل الجيوش و لا نحارب من جاءنا غازيا
نتفاوض مع الغزاة بالعقل و الحكمة و نضيف قليلا من الاستقرار علي الطبخة و لا نتهور و لنفكر في العواقب
بيقولوا ان الحرب وحشة و فيها ناس كتير بتموت - مدنين و عسكريين - و بيوت تتهدم و اموال تسرق و نساء تغتصب

الملاحظ الان ان الطغاة الان ينشرون مبادئ تثبط العزائم عن طريق مبدأين :

الاول : شوفتوا اللي بيحصل في تونس ..

صمام الامان و الاستقرار سافر بره

البلد ضاعت من بعده

كل واحد يحمد ربنا و يبوس ايده شعر و دقن و يموت بالطعام المسرطن او بالفشل الكلوي - بسبب المياه - او يموت من البلهارسيا و فيروسات الكبد او يمكن ربنا يكرمه بحادث طريق و يخلص بدري

بدل ما يتعور او يموت في مظاهرة او في انفلات امني

الثاني : ديني

" و اطيعوا الله و اطيعوا الرسول و اولي الامر منكم"

لا خروج علي حاكم

طالما لم يجهر بمعصية و صلي بالناس

حتي و ان جلد ظهرك و اخذ مالك " هذه اشياء فرعية كما تعرف لا تهم "

لابدمن اخذ رأي اهل الحل و العقد " من يعينهم ؟!"

متناسين او متغافلين عن ان كل ما يقولوه ليس من صميم الدين بل اجتهادات فقهية تتغير بالزمان و المكان

و محتها اجتهادات فقهية لشيوخ اجلاء معاصرين

**SeiffoZ** · 16-01-2011 07:38 PM

إللى حصل فى تونس ده مش هيغير كتير .....

اه صحيح الرئيس هرب ... لكن هرب لما العصابة إتخلت عنه ..

و العصابة لسه هناك ... و هتتحكم تانى فى الرئيس الجديد ..

دى كانت خطوة إيجابية من الشعب التونسى ..

و لكن زين العابدين معرفش يتعامل معاها .. و بالدليل إنه هرب فجأة فى وقت غريب و هروب غير منطقى ..

العصابة باعته و بتجند ناس جداد ..

ما هو رئيس البرلمان دلوقتى هو رئيس الجمهورية دلوقتى .. و البرلمان ده مقر العصابة ..

الثورة كانت المفروض على الدستور .. و تغيير القوانين ...

أنا شايف إن النتيجة بتاعت الثورة مش هتغير كتير ... زى ما زين العابدين عمل من 23 سنة ...

الحل الحقيقى حل معقد جدا ....

**M.Mostafa80** · 16-01-2011 07:41 PM

المشاركة الأصلية كتبت بواسطة ahmed4000

اللى وصلى من الموضوع كله

ان الناس عايزة تغير من اجل التغيير فى حد ذاته..

واننا مستعدين ندفع عمرنا وحياتنا علشان التغير

وان اللى مستعدين يضحوا بعمرهم دول موصلوا لمرحلة انهم يزعقوا فى مظاهرة حتى

وفى نفس الوقت فجاءة الكل مستعد للتغير -مش علشان ظروفه وحشة- ولكن علشان دولة تانية فى ناس عملوا مظاهرات وشالوا رئيس الدولة و"احنا مش اقل منهم يعنى دا احنا رجالة اوى" يعنى لو مكنش حصل حاجة فى تونس كان زمان الناس قاعدين ساكتين ومستنين الفرج

وبناء عليه انا اعتقد ان افضل حل دلوقتى ان الحكومة بكل سهولة تقرر اجراء ماتش الاهلى والزمالك بسرعة وحتلاقى الناس اتشغلت ونسيت تونس و25 يناير

من الواضح ان حضرتك ممكن تكون مش قريب من الناس وسامعها او بمعنى اصح الطبقه اللى حضرتك عايشه فيها مش متأثره بالوضع الحالى واللى حضرتك متعرفوش عن الشارع ان الشارع كلو بقى على اخره بس فعلا مستنى الشراره وواضح تهكم سيادتك على اراء الناس اللى نفسها تتغير
واللى لو مفكروش فى التغيير يبقى هيفضلو محلك سر وان لو فكرو بنفس الأسلوب ورأيهم نفس رأى حضرتك يبقى هنفضل زى ما احنا لحد مانلاقى يوم فى نفسنا بننضرب على قفانه بجد ويمكن دا بيحصل النهارده فى الغلابه اللى بيقولو لأ ومش لاقيين ياكلو ولما انا وانت والناس اللى راكبه عربيه ولاقيه تاكل يجى عليها اليوم اللى يجردوهم من ممتلاكاتهم عشان ثروتهم تزيد وناخد على قفانه زى الغلابه اللى الموجودين دلوقتى يبقى مانلومش الا نفسنا لأننا كنا ضدد التغير (دا لسه من يومين بيقولك مجلس الشورى يدرس تحديد حصه لكل مواطن من الوقود على قد مشواره من شغله لبيته يعنى بيحدد اقمتك بالزوق )وعارفين كويس اننا مش هندوس على الريموت هنغير كل حاجه زى ماحضرتك متخيل ولو حضرتك ضد التغير وراضى بالوضع اللى انت فيه خليك زى ماانت محدش طلب من حضرتك حاجه بس يجي اليوم اللى تتقاد فيه شعله التغيير لأن لو متغيرناش بكره ابنى وابنك وبنتى وبنتك يدعو علينا مش لينا

المشاركة الأصلية كتبت بواسطة ahmed4000

بشكرك يامدام نور على النقطة دى لان الناس بلا استثناء معتقدة ان الرئيس لما يتغير يبقى حندوس على زرار التقدم فى الريموت كنترول بتاع الشعب فنصحى الصبح نلاقى:

وعارفين كويس اننا مش هندوس على الريموت هنغير كل حاجه زى ماحضرتك متخيل ولو حضرتك ضد التغير وراضى بالوضع اللى انت فيه خليك زى ماانت محدش طلب من حضرتك حاجه بس يجي اليوم اللى تتقاد فيه شعله التغيير لأن لو متغيرناش بكره ابنى وابنك وبنتى وبنتك يدعو علينا مش لينا

حنلاقى الفساد مش موجود -كان مش كلنا فينا فساد اومال مين اللى بيحط جنيه للعسكرى علشان يركن صف تانى او يدى بريزة لامين الشرطة علشان مسكه وهو بيتكلم فى الموبيل- ولا ده مش فساد
مهو لو الناس دى بتاخد مرتبات ادميه تعيشها عيشه كريمه كان مبقاش فى الرشوه اللى حضرتك بتتكلم عليها لأنو ساعتها مش هيبقى محتاج لها فى حاجه
حنصحى الصبح منلاقيش واسطة ولا محسوبية -كان مفيش واحد فينا لما بيتوقف ردار وهو مخالف فعلا مبيحاولش باى طريقة يكلم فلان بيك ولا علان بيك علشان يشيله المخالفة
المشكله انك بتقول حاجات كلها وليده النظام الفاشل لأن القانون لو بيطبق على الكل بعدل مكنش حد عمل كده حضرتك زى ماحصل فى دوله من دول الأمارات لما عريف دفع احد الأمراء مخالفه تخطى السرعه وكرمه الحاكم
حنلاقى التعليم والصحة بقت تماما فجاءة - كان المدرس والدكتور والمهندس محتاج حكومة كويسة علشان هو يبقى كويس-
نفس ردى عليك فى النقطه الأولى راتب المدرس كان لحد فتره قريبه لا يتعدى ال 250 ج ثمن غيار الزيت فى عربيه حضرتك

الناس حتبقى فجاءة متحضرة ومحترمة وبتراعى الذوق والاخلاق والجيران حتحب بعض والعنف حيقل وكل شئ حيبقى جميل....بس بمجرد مالرئيس يتغير...لكن الشعب ده فلة واحسن شعب فى العالم واذكى شعب فى العالم واكتر شعب متحضر فى العالم....بس حظه قليله

بخته وحش...غيرولوله الرئيس بس وهو حينطلق وحيبنى هرم جديد

حتى لو مش هيبقى بمجرد ما الريس يتغير بس هيجي الوضع تدريجى مع تغيير الضغوط اللى خلت الناس وصلت لدا ولو حضرتك من مواليد ال 80 او ماقبل هتعرف ان الوضع كل مادا بيسؤ ولو تابعت احد المواضيع اللى بيتكلم عن الزكريات زمان هتعرف ان الشعب اللى مش عاجب حضرتك دا كان من احسنالشعوب بس بسبب الحكم الغير عادل اللى خلى الناس تلهس ورى لقمه العيش هو اللى وصله للأخلاق المنعدمه وعديمه الزوق والكراهيه للغير وزع الحقد فى القلوب
وحضرتك بتقول الشعب دا فله أه حضرتك الشعب دا له بس وفرله الظروف والمناخ الكويس
ياراجل دا انت بتكرم الدكتور مجدى يعقوب وزويل بعد ما بلغو زروه العلم هل عندك المناخ اللى يطلع ناس محترمه زى دى
متزعلش منى لو اسلوبى حاد شويه بس الصراحه أراء حضرتك مش عجبانى ولك مطلق الحريه فى التعبير عنها زى ما انا ليا مطلق الحريه انى اقبلها او مقبلهاش تعجبنى او متعجبنيش
وفى النهايه اقولك الأختلاف فى الرأى لا يفسد للود قضيه

**Dr Zezo** · 16-01-2011 07:56 PM

إنه هرب فجأة فى وقت غريب و هروب غير منطقى

الهروب منطقي جدا

التسلسل واضح و تكرر دوما

1- الجيش يقهر المتظاهرين بالرصاص و لا فائدة
2- الاعداد تتزايد و الرصاص لا يكفي
3- بداية تراخي القبضة الامنية في بعض المحافظات التونسية اما بالتخاذل امام المتظاهرين و امام بالجلوس في المنزل " مظاهرة صفاقس قبل الهروب بيوم كان بها 20 الف متظاهر بلا رجل شرطة واحد "

4- لجأ الرجل الي الجيش

الجيش قيادة : تخشي من الاشتباك مع الشعب بما يضيع هيبته و مكانته
الجيش جنودا : المتظاهرون هم اهلنا و ما يشكون منه نشتكي منه ايضا الجيش لا يعيش بالمريخ و مهما بلغت امتيازاته لن تبلغ مقدار امتيازات المحيطين ببن علي
الجيش عددا و تسليحا عير قادر علي قمع المتظاهرين الا بالكثير من الدماء بين الطرفين و لن يتم قمعهم
هذه امور معروفة

الجيش حسم امره ممثلا في قيادته

لا اطلاق للنار علي المتظاهرين يا سيادة الرئيس

فيعزل الرئيس قائد الاركان

هيئة اركان الجيش بالكامل تعتزم مواجهة الرئيس : ارحل من البلاد

فرنسا صامتة و ترقب في حذر ما سيؤول عنه الامر
لو دعمت بن علي ثم رحل ستضر بمصالحها مع النظام الجديد

5- الجيش يؤمن رحيل الرئيس

باي باي بن علي

طائرته في السما يطلب مالطا ترفض

باريس ترفض " أين انت ايها الشاه؟"

يطلب عواصم عربية رئيسية " من دول الاعتدال " ترفض دولتان معروفتان بهما الكثير من القلائل

تتمني التوفيق للرئيس بلهجة مهذبة و في اذهانهم

اتنيل بعيد عنا هيا ناقصة

تقبل الدولة المعتدلة الثالثة " السعودية " فيهبط الرجل في جدة و ليس الرياض >> كاد الوقود ان ينفذ من الطائرة

هرب سريعا قبل ان يخطط لوجهته

الحل الحقيقى حل معقد جدا

من باب النقاش و اثراء الموضوع

ما هو الحل ؟

**SeiffoZ** · 16-01-2011 08:23 PM

المشاركة الأصلية كتبت بواسطة dr zezo

من باب النقاش و اثراء الموضوع

ما هو الحل ؟

الحل فى تغيير بنود الدستور و جعل السلطة تداولية ... الحل فى تعديل نظم إدارة البلاد ... فإن كانت الإدارة جيدة نفذ القانون .. وقف الإستبداد ... كل شئ .. الكل سيخاف من القانون ... و هذا هو الحل المؤقت ..

الحل الحقيقى للوضع هو التعليم ... و إنشاء جيل جديد له فكر مختلف يقوم بالمجتمع ...

الحل تخطيط شامل لكافة بنود الحياة فى مصر ... و فى خارج مصر إن كان فى مصلحة الأمن القومى ...

هل نستطيع يوما ما أن نفعل هذا ؟؟؟

هل نستطيع فعل ما فعلته ماليزيا بعد إن كانت مجرد قبائل همجية كل ذات لغة مختلفة .. فى 22 عاما أصبحت ماليزيا ..

هل نستطيع البناء و التقدم فى ظل المعوقات و العقبات .. و فى ظل من يتربص بنا ينتظر لحظة الهجوم ؟؟ ( إسرائيل و أمريكا ) ...

المشاركة الأصلية كتبت بواسطة dr zezo

الهروب منطقي جدا

التسلسل واضح و تكرر دوما

1- الجيش يقهر المتظاهرين بالرصاص و لا فائدة
2- الاعداد تتزايد و الرصاص لا يكفي
3- بداية تراخي القبضة الامنية في بعض المحافظات التونسية اما بالتخاذل امام المتظاهرين و امام بالجلوس في المنزل " مظاهرة صفاقس قبل الهروب بيوم كان بها 20 الف متظاهر بلا رجل شرطة واحد "

4- لجأ الرجل الي الجيش

الجيش قيادة : تخشي من الاشتباك مع الشعب بما يضيع هيبته و مكانته
الجيش جنودا : المتظاهرون هم اهلنا و ما يشكون منه نشتكي منه ايضا الجيش لا يعيش بالمريخ و مهما بلغت امتيازاته لن تبلغ مقدار امتيازات المحيطين ببن علي
الجيش عددا و تسليحا عير قادر علي قمع المتظاهرين الا بالكثير من الدماء بين الطرفين و لن يتم قمعهم
هذه امور معروفة

الجيش حسم امره ممثلا في قيادته

لا اطلاق للنار علي المتظاهرين يا سيادة الرئيس

فيعزل الرئيس قائد الاركان

هيئة اركان الجيش بالكامل تعتزم مواجهة الرئيس : ارحل من البلاد

فرنسا صامتة و ترقب في حذر ما سيؤول عنه الامر
لو دعمت بن علي ثم رحل ستضر بمصالحها مع النظام الجديد

5- الجيش يؤمن رحيل الرئيس

باي باي بن علي

طائرته في السما يطلب مالطا ترفض

باريس ترفض " أين انت ايها الشاه؟"

يطلب عواصم عربية رئيسية " من دول الاعتدال " ترفض دولتان معروفتان بهما الكثير من القلائل

تتمني التوفيق للرئيس بلهجة مهذبة و في اذهانهم

اتنيل بعيد عنا هيا ناقصة

تقبل الدولة المعتدلة الثالثة " السعودية " فيهبط الرجل في جدة و ليس الرياض >> كاد الوقود ان ينفذ من الطائرة

هرب سريعا قبل ان يخطط لوجهته

إللى وصلنى من معلومات .. أن الرئيس لم يتعامل مع الشغب ..

بل صرح ان المظاهرات غير ممنوعة ... و لم يعلن حالة الطوارئ ...

و لذلك تفاقمت الأمور ... و مع ذلك لم يتعامل بحكمة مع الأمور ..

و بدأ فى تصريحات عن إقالة الحكومة كلها ...

وقتها فقط .. تخلى عنه الجميع ...

و أحس بذلك .. فهرب

**ahmed-moga** · 16-01-2011 08:32 PM

احييك دكتور زيزو علي هذا الرد والتحليل المنطقي وحاليا نظامنا الحالي خائف من تكرار الأحداث هنا في مصرنا التي يعلم انها بين قوسين او ادني منه نظرا لتشابه الشديد بين النظامين وسيحاول بشتا الطرق ان يحبط اي محاوله لتظاهر بشتي الوسائل مره بالأستجابه لبعض متطلبات الشعب مؤقتا حتي تهدأ الأحوال ومره بمحاوله وهن العزيمه والقول بان المحاوله سيبؤها الفشل وستري قررات ستضر بالشعب ثم يخرج آخرون ويبطلون هذه القررات لتحسين صورتهم كما تري حاليا في التمثليات الساذجه التي يقوم بها مجلس الشعب الحزبي الوطني من محاولات وهميه للمعارضه والأستجواب وطلبات الأحاطه وفي نهاية الجلسه يقوموا ليسلموا ويهنئوا الوزير حتي المفارقه الدكتور فتحي سرور قال لهم ولما انتم بتهنوا الوزير لزمتها ايه طلبات الحاطه تمثليه ساذجه ليقنعونا بأن المجلس سيكون به معارضه ومن داخل الحزب ستري عجب العجاب الأيام القادمه في محاولات لبث روح اليأس ووهن ارادة شعبنا المصري لكن لايعلمون ان من الشعب من وعي واستفاد بالدرس وسيطبقه في يوم من الأيام عاجلا ام آجلا فالأحري بهم ان ينزعوا رؤوس الفساد التي استفحلت في جميع المناصب ويقوموا بدور الأصلاح والنهوض ويرتقوا بالبلد وبالمواطن الفقير الذي اندثر فنحن جميعا نريد حياة كريمه في جميع المتطلبات لا أكثر ولا أقل ولا يكون هذا وقتيا بل دائما وابدا ولن يكلفهم هذا شيئ ولن يكون له عواقب وخيمه فأذا حققت للشعب حياة كريمه محترمه في جميع متطلبات الحياه احبوك وتمسكوا بك ووضعوك فوق رؤوسهم