كل الي خايف ان عربيته تتكسر او بيته يتسرق, طب هيتسرق ازاي وانت ساكن وسط جيرانك واهل حتتك ؟؟
ساعتها الكل ايدهم هتكون في ايد بعض وهيدافعوا عن ممتلكات بعض وده الي بيحصل دلوقتي في تونس. كان في خبر ان اهالي بعض المدن والقرى عملت مجموعات للدفاع عن الممتلكات قصاد اي اعتداء من المعتدين ( المشهد ده خلاني افتكر مسلسل Jereko) وان كل الناس اتكاتفت وعملوا نظام من الاول مؤقت لغاية لما الحكومه تمسك ذمام الامور.
وماتخافوش خالص من 25 يناير, ده كلام على النت ومش كل الناس على النت ومش كل الناس عندها فيس بوك. بو عزيزي ماكانش عنده لا فيس بوك ولا حاجه وشوفوا عمل ايه؟؟
دي محتاجه اراده قبل ماتبقى محتاجه تنظيم ودلوقتي وقتها والدنيا لسه واقفه قبل ما الكل ينسى ويهدى.
حوالي 60 واحد ماتوا في تونس خلال شهر في حين ان في محافظة الشرقيه 34 واحد ماتوا في حادثتين في يوم واحد !!!
وكل واحد فينا بيحصله موقف انه يبقى هيتعرض لحادثة ويموت فيها كل يوم ولكن لولا ستر ربنا بيتكتبلنا عمر جديد. يعني لو مامتناش في سبيل التغيير ممكن نموت في اي حادثه عاديه.
لازم نبقى مؤمنين ان ده قدر ربنا وان ممكن نموت دلوقتي واحنا قاعدين في بيوتنا.
المفضلات