الموضوع: بعد لقاء القوات المسلحه..ايه رأيكم النهارده فى كلام وزير الداخليه ؟؟

اسمحلى بعد اذنك يا دكتور محمد ارى ان كل السيناريوهات اللى حضرتك توقعتها من بعد رجوع النت الى العمل لم يحدث اى منها و كان معظمها فيه نوع من تثبيت الهمم و التخويف من القادم و البعبع العسكرى اللى ما كانش هيخلى راجل هيقدر يوقف فى الشارع و الكلام ده يعتبر اساءة لشباب الثورة لانهم مش شوية عيال هتخاف و تروح و اظن انا وملايين غيرى شافوا ان هؤلاء الشباب العزل تصدوا بصدورهم العارية للبلطجية و ضباط امن الدولة و اسلحتهم البيضاء و الالية فى الوقت الذى دخل افراد الجيش الى دباباتهم و تركوهوم بلا حماية و قد قامت امريكا و بعض الدول بادانة هذا السلوك السلبى من الجيش و هل كنت تظن ان اى جيش فى العالم كان يستطيع ان يردع هؤلاء الشباب الذين لم يعد يرهبهم الموت الذى كان يحيطهم و هل كنت تعتقد ان لو الجيش كان ضرب شوية من الناس كانت روحت و الموضوع خلص اتحدى يا دكتور و الا كانوا عملوا كده
ارجوك يا دكتور بلاش تسفيه للشباب المصرى و اظهاره بمظهر الجبان و اللى مش فاهم حاجة فصاحب الايمان سيدافع عنه الى الموت و لك فى ليبيا التى تعطيها لنا فزاعة خير الدليل فهم خرجوا و لم يرهبهم الطيارات و لا المدفعية و لا المرتزقة لانهم امنوا بقضية بلدهم و بالحرية وسيدافعوا عنها حتى النصر
ملحوظة اخيرة يا دكتور اترك الشباب يحلم لهذا الوطن فالاجيال السابقة كانت هى السبب بسلبيتها و استكانتها فى التدهور الذى وصل اليه الوطن

بصوا يا جماعه
انا مشفتش الحلقه و هعتمد ان شاء الله في تعقيبي علي كلام الاخ الزميل صاحب الموضوع
بصراحه يا جماعه انا عاوز اقول حاجه
اولا و بصفه عامه : متطلبات الشعب بكل طوائفه معروفه في جميع الجهات و لازم لازم لازم يكون في تحديد و تدوين لهذه المطالب و يكون فيه لجنه مكونه من افراد مخلصين يمثلوا صوت الشعب الحر بجد و ينقلوا صوتهم للمجلس الاعلي للقوات المسلحه و يقول المجلس بالتنسيق علي ايه ينفع و ايه مش هينفع مع اللجنه الممثله للشعب و بجداول زمنيه
ثانيا بقي و بوجه خاص بالنسبه لموضوع وزاره الداخليه
انا ليا تعقيب علي موضوع امن الدوله اللي في كل العالم
يا جماعه مين فيكم مشفش بنفسه او سمع ان في ناس بتتاخد من بيوتها في نص الليل و ساعات بيعتقل لسنين بدون وجه حق و ميعرفش اتحبس ليه
و في الاخر يكتشف انه مره رمي السلام علي واحد كان بيصلي في مسجد
او يكتشف انه سلم علي واحد طلع في مظاهره
او او او
يا جماعه مشكله امن الدوله ان لهم نفوذ شديد جدا و غير مقنن
بيحبسوا اللي علي مزاجهم
و عامه و بصورة عامه في الشرطه بتحس ان الشعب شغال عندهم
يعني بمنتهي البساطه ضابط الشرطه بتحس منه انه بيتعلم ازاي يفتري علي خلق الله في الكليه
يا جماعه موضوع وزاره الداخليه ده كان العن مصيبه عدت علينا و انتم عارفين الاسباب
وزاره الداخليه لازم يتعاد صياغة ادوارها
و لازم يبقي في جهه رقابيه عليها
و لازم يبقي فيه جهاز او جهه اشتكي الداخليه ليها لو ظلمتني
يا جماعه احنا مش اول دوله في العالم عندنا داخليه
متبصوا لانجلترا
موطن من لا موطن له
نتعلم منها و نشوف و ننسق معاهم و نعرف نظامهم و نحاكيه و نعمل زيه
مش اختراع يعني
بس هو كل الموضوع اخلاص نيه سليمه
اسف للاطاله

يا جماعة طبعا هوا مش عارف يرد و يقول ايه ...!!!

معلش اللي حصل حصل بس لازم العادلي يتحاسب حساب عسير امام الشعب كله و نبدأ صفحة جديدة مع الوزير الجديد و نتسم فيه الخير و الأمل في ربنا كبير و الله أكبر فوق كل شئ و ياريت نعطي لكل وزير من الوقت اللازم لوضع خططه و لو حتي فيه وزير مش عاجبنا او مقصر صدقوني بعد الثورة لا يجرء أحد لأعمال الظلم مرة ثانية ... و لكن الموضوع موضوع وقت مش أكثر من كده نديلهم فرصة .

المشاركة الأصلية كتبت بواسطة dr-mohamed

هرد عليك لسبب واحد هو احترامك في الكلام
واي حد هايتكلم بالطريقة دي انا معاه يقنعني او اقنعه
اي حد هايتكلم بطريقة تانية هايبقي فيه كلام تاني يليق بيه


وهل قام بالثورة الشباب فقط ؟
والاجيال السابقة التي تتكلم عنها منها معلمك ووالدك هل ساهموا في وصول الوطن للتدهور والاستكانة؟
ولو ده رايك ايه رايك كمان نسيب البلد ونمشي كلنا منها ونسيبها للشباب اللى بتقول عليهم
الجيل الحالي اللى بتقول عنه منه الشباب الواعي الفاهم زيك ومنهم الشباب الضايع اللى واقف يشرب بانجو في الشارع منهم اللى بيقكر ومنهم اللى واخد الدنيا بالدراع
والجيل الاكبر منكم فيهم الفاسد ودول قلة ومعظمهم ستجدهم في المناصب الكبري جدا ومنهم المستسلم ومنهم من يبذل وبذل كل جهده حتي تصبحوا على ما انتم عليه فلولا والدك وجيله الذي تتهمه بالسلبية والاستكانة ما كنت انت وجيلك موجودين وما كان عندكم الامكانية ان تدخلوا على الانترنت لتنتقدوهم وتطالبوهم بالصمت

بغض النظر عن مين صح و مين غلط انا بحييكما علي اسلوبكما المتحضر
لازم يا جماعه نتعلم ازاي نختلف و نحترم بعض طالما النوايا سليمه