السلام عليكم

بقالي فترة كدا كل ما اجي اركب العربية احس ان انا خايفة منها و خايفة من السواقة و حاسة ان واحدة فينا مش هاترجع سليمة يا انا يا العربية و طول ما انا سايقة ببقى حاسة ان انا هاعمل حادثة في اي حاجة و اقعد اتخيل حاجات مهببة طول الطريق مرة العربية بتتقلب و مرة بدخل في تريللا و مرة بتقلب في النيل و افلام هندي و اول ما بركن العربية و انزل منها بحمد ربنا و كان حجر اتشال من على قلبي و اتنفست اخيرا

لدرجة ان انا مؤخرا مابقيتش احب اخرج بالعربية و لو في اي مشوار بالعربية يا بتحجج باي حاجة عشان اسيبها يا اما بشوف حد تاني يسوق

و الغريبة اني مابخفش لما ببقى راكبة مع اي حد بس بخاف من نفسي و لما بكون انا اللي سايقة و اكيد الحادثة اللي انا عملتها من سنة و نص تقريبا ليها عامل كبير في الحالة دي بس انا الحمد لله الى حد ما اصابتي مكنتش خطيرة و كان كسر واحد في رجلي و اتعالج تمام و الحمد لله بس العربية منفعتش تاني و اتباعت بحالتها ، و بعدين انا رجعت اسوق من 8 او 9 شهور تقريبا و اول ما سوقت مكنش في اي نوع من الخوف خااااااااااالص بالعكس كنت مبسوطة و فرحانة بالعربية الجديدة جدا و مكنش في اي قلق

حاسة ان الموضوع بقى مزمن و انا ممكن قريب جدا مقدرش احط رجلي في العربية و لا اسوق خالص و مش عارفة اعمل ايه لدرجة اني فكرت ابيع العربية ؟؟ لو حد مر بالحالة دي قبل كدا او عندوا نصيحة ياريت يقوللي و جزاه الله كل خير .