ليه البنات معندهمش زوق ؟؟

**mody_mt2007** · 02-11-2011 11:44 AM

؟؟؟؟؟؟؟؟؟؟؟ مش عارف اقول اية بصراحة

**shaddadfalcon1** · 02-11-2011 12:42 PM

السواقه في القاهره بالذات ينقصها ادب واحترام لايوجد الا عند قلة قليله
مفيش حد بيحترم الطريق والأشارات الا من رحم ربي
اي يوتيرن لازم يوقف الطريق 10 كيلو
اي مخرج او مدخل طريق لازم يوقف الطريق كله

مفيش حاجه اسمها واحد يمشي شويه عشان يركن عربيته لا ازاي لازم يركنها قصاد المكان اللي رايحه حتي لو صف عاشر ويولع الطريق

اي يوتيرن لازم تلاقي ناس كتيير فاكرين انهم اذكي من كل البشر ويمشو في الحاره التالته ويجي قصاد اليوتيرن ويدخل ودي بجد اكتر حاجه بتنرفزني وببقي عايز انزل اكسرلهم عربياتهم لان مفيش اي سبب يخليهم يعملو كده

الناس تطلع من طريق جانبي لطريق رئيسي ولازم تاخد اليوتيرن اللي بعد 5 متر يعني ياخد الطريق بالعرض مع ان في يوتيرن تاني مش اكتر من 500 متر

البارح كنت رايح من المنطقه الحره علي تيفولي مصر الجديده ورحنا من طريق السويس وكان في حادثه في الدائري الاتجاه التاني واحنا طريقنا واقف معرفش ليه
دخلت نزلة السويس وقبلها مدخل الرجاب البشوات بيجو من الحاره الشمال قصاد المخرج علي طول ويدخلو يعني بياخد 4 حارات بالعرض
الطريق كله واقف واكتر من ساعه ونص وكنت صايم عشان اليوتيرن اللي قبل تيفولي عشان برده الأغبياء المتخلفين اللي مش بيمشو في الحاره الشمال لما يجي ياخد يوتيرن والنتيجه الطريق كله يقف - ونفس الكلام علي الدائري عند نزلة المعادي والأتوستراد واي حته فيها مخرج

اما عن الستات فدي اقل مشاكلي في القاهره ونفس الموقف اللي حصل لحضرتك حصل موقف شبيه في الزحمه البارح
انا ماشي ورا زميل ليا عشان معرفش الطريق وهوبا اتوبيس ميرسيدس كبير دخل قدامي عافيه فسيبته وفضلت ماشي وراه وزميلي قدامه وطبعا مش شايفه ومتابع بالتليفون لحد ماقررت انقل من الحاره الشمال للحاره اللي في النص عشان كانت ماشيه وبالتالي اجي عند زميلي تاني وكل مايبقي في مكان عشان ادخل يمين ادي اشاره الاقي اللي جنبي بعد ماكان سايب مكان يعديني يقوم كابس وابقي سامع صوت الموتور بتاعه ويقفل عليا وده راجل مش ست
وفي الأخر خدته خطف من غير اشاره ومن غير مااكسرعليه برده بس كانت حاجه في قمة قلة الذوق

والله انا خايف علي نفسي من السواقه في القاهره لان كل شويه بلاقي نفسي باكتسب صفات سيئه بسبب الناس اللي مش ناس اللي بتسوق

وعلي فكره معظم اللي بيعملو كده ملاكي يعني انا بالنسبه ليا الميكروباصات جنبهم ملايكه بصراحه عي الأقل بتاع الميكروباص هنقول عليه جاهل ولا بيعمل كده عشان اكل العيش لكن بتاع الملاكي ده بيعمل كده ليه

**mikology** · 02-11-2011 01:02 PM

يا باشا الموضوع مش موضوع بنت وولد
انا لاحظت انى لما بادى اشاره محدش بيرضى يعديك الا لو راجل ذوق او بنت يعنى وده نادرا جدا
لكن لو رميت و اخدت اى حاره انت عاوزها بيوسعولك عادى
يبقى انت اكيد فى مصر

**AmatoALLAH** · 02-11-2011 01:55 PM

ابئي اسال يعني ايه غرزة في دول العالم المتقدمه اللي فيها بيحترموا بعض و لو حد عملها ممكن يعملوا فيه ايه :)

**sara2001** · 02-11-2011 02:02 PM

المشاركة الأصلية كتبت بواسطة sab3aawy

بصراحة انا معنديش طولة بال اقرا كل الردود اللى اكيد حولت الموضوع الى معركة، لكن من البداية البنت مخدتش اكتر من حقها، قانون المرور واصول السواقة بتقول ان أولوية المرور لصاحب الحاره، وكونك اديت له اشارة( وده مسألة مش بس ذوقيا لكنها الزامية انك تدى اشارة قبل ما تغير حارتك وبيتوقف عليها ناس وياخدوا مخالفات فى البلاد المحترمة) كونك اديت اشارة لا يعطيك الحق فى اجتياح الحارة المجاورة لك وحرمان صاحب الحق الموجود فعليا داخل الحارة من حقه فى أولوية المرور، انت لما تدى اشارة لحد علشان تحتل حارته قادمه ده استئذان، وله ان ياذن لك وله ان لا ياذن لك دون ان يكون لهذا اى علاقة بمسألة انه عنده ذوق أو لا، وانا لما حد بيدى لى شارة فى مساحة ضيقة ويعتبر نفسه كدة ادانى حقى وان من حقه فى هذة اللحظة انه يكسر عليا ويخيلنى افرمل علشان الباشا يعدى كل اللى انا بعمله انى بدوس على دواسة البنزين لحد الأرض واقفل للباشا الغرزة اللى كان ناوى يخرنى من الطريق ويلبسنى فى الحيطة علشان يعملها، ومفيش حاجة فى الدنيا كلها اسمها فى الزحمة حارتى واقفة اقوم اجتاح الحارة اللى جنبيها عنوه كدة، السيرك ده مش بيحصل عندنا غير فى مصبر، ومش معنى اننا بنعمله انه صح ومش معنى ان حد اتمسك بحقه انه قليل الذوق، انا هنا متكلمتش ومش ناوى اتكلم عن ولد وبنت لأن مش موضوعى خالص لأن انا بتكلم ان القضية اللى انت انتهيت منها الى اتهام البنت بقلة الذوق -وطبقا لوصفك للحالة-هى صاحبة الحق فيها طبقا لكل قواعد المرور فى الدنيا كلها، لو هنحسبها بمنطق السيرك المصرى يبقى اللى يلحق الاول يخش، وفى هذة الحالة كونها لحقت الأول لا يجعلها قليلة الذوق لأن انت لو كنت لحقت قبلها كنت هتكسر عليها وده اللى انت كنت بتعمله حتى لو كنت اديتها اشارة(الاشارة استئذان وليست اجبار ولا تفضل منك) وبالتالى فى الحالتين هى مش قليلة الذوق حتى لو كان حفاظها على حقها حرق دمك

+111111111111111111111111111111111111111111

**kimotop** · 02-11-2011 03:39 PM

مش عدم ذوق يا جميل
دا عدم تمكن من القيادة بجانب طبعا الاحساس بالضعف ومحاولة اثبات الذات باي طريقة زي كدا ما خربين كل الحتت الي بيشتغلوا فيها فاكيد هيخربوا الشوارع بسواقتهم المتوترة
وطبعا دا مش مقياس عام بس الاغلبية يعني

بالمناسبة احكيلك على موقف حصلي
عربيتي عطلت على اسكندرية الصحرواي وانا راجع على الهرم المهم لقيت تاكسي يقطرني لغاية اخر الهرم كدا وبعدين ماشيين فالراجل عايز يمسك جنب الطريق علشان منقفلش الشارع و ماشيين جنب عربية سيراتو سيقاها المهم هو عدى قدامها وهي ماشية على مهلها و استأذنها وهي طبعا ولا فاهمة حاجة كل الي هاممها تعدي قدامي والمشكلة ان في حبل مربوط مش عارف هتعدي ازاي و الراجل يديها كلكس ولا هي هنا هو يكسر قدامها وهي مصصمة تكسر قدامي
راح الراجل نزل في وسط الشارع و قالها يا انسة انا قاطر العربية هتعدي ازاي وبرضو ولا هي هنا
ركب تاني وماشي وبرضو عمالة ترمي قدامي وانا عمال اديها كلكس وبرضو ولا هي هنا - مش عارف كانت فين الصراحة -
في الاخر بقى الراجل طلع من هدومة وزعقلها وقالها اقفي بقى شوية و اخيرا وقفت وعدينا قدامها بسلام الحمد لله و الغريب ببص في المراية لقيتها مدية اشارة شمال وبعدين راحت داخلة يمين هههههههههههههههههه
فعاااااااااادي يا عم روق نفسك

**Amr_tika88** · 02-11-2011 03:57 PM

انا امبارح كان في واحده هتخليني اعمل حادثة محترمة عالدائري فضلت فاتح العالي في عينها لغاية اما اتعمت لان دي اسمها غباوة
انا كنت ماشي عالدائري في حارتي عادي جدا وكان قدامي شيروكي بس بعيد لقيته ادا اشارة يمين وببص لقيت قدامي عربية واقفة عالشمال وونش شكلها عطلانه بس كان في مسافة كبيرة جيت ادي كيك داون اعدي هيا تدوس اجي انا اهدي واعديها تهدي رحت كاسر عليها مرة واحدة وبعد كده جبتها قدامي و هيا مكانش في الطريق حد جنبها خالص ولا وراها ولا اي حاجه يعني بس انا وهيا تقريبا مرضتش البسها علشان احنا عالدائري ومضمنش ممكن ايه يحصلها وانا اشيل ذنبها