الموضوع: ماذا تفعل اذا صدمت شخص بسيارتك ؟؟( تجربة واقعيه )

المشاركة الأصلية كتبت بواسطة OlaOsman

ماهو برضه ممكن يكون ان لم يصادف أهله فأنت أهل للبهدلة و الوقوف في ساحات المحاكم

انا باقول كده بس لو خبطت حد و سبته و مشيت انا عارفة اني هاندم أشد الندم و هابقى عايزة أرجع له تاني.

مش مشكله , اهم شىء انى ارضى ربى وارضى نفسى و اعيش مرتاح

المشاركة الأصلية كتبت بواسطة mohamed_88sk

حضرتك كلامك سليم بس مدام واحد حضرتك باين عليه مفيهوش خربوش والحادثه خفيفه وكل الناس مغلطاه يبقى ليه تديله أهتمام وتجعله يستعبط ..
يعني ما أوديش نفسي للتهلكه ...وكمان هو مفيهوش حاجه .. لكن لو فعلا أصيب يبقى أوديه وأمشي .. أما لو انا غلطان أوديه وأستحمل اللي يجرالي.
(فالله خير حافظا وهو أرحم الراحمين)

كلام جميل , بس انا قولت مع اخذ جميع الاحتياطات يعنى هاشوفه اولا محتاج يروح المستشفى ولا لأ ؟ بس غالبا هوديه لان تقديرى ممكن جدا يكون غلط و يكون عنده نزيف داخلى لا قدر الله و هاخد معايا شاهد او امين شرطه من المكان و احفظ المكان تماما بمداخله و مخارجه ومحلاته واماكن عبور مشاته و بسلاطاته و بابا غنوجه و اتصل بالمحامى فورا اللى هو لحسن الحظ ابويا

المشاركة الأصلية كتبت بواسطة shalaby2001

يأخى انت التوقيع بتاعك وجعنى
وقلبى اتقبض والله ما بهزر

ليه بس يا اخى العزيز ؟

صوتي راح للهروب .من مكان الحادث خصوصا إذا كنت مش غلطان

الي هايحصل إني هاتأذي و خلاص و مش هاخد حقي أبدا أبدا أبد و شوفت بعني مليون حالة و كفاية الحالة بتاعة ماتركساوي صاحب الموضوع و الحالات الكتيرة المشروحة

أحنا في ج ع ع و بما أنه لا يوجد نظام ....... و بما أنها فوضى ....... و بما أنه سيرك كبير ........ و بما أن الشعب معندوش ذرة ضمير .......... و بما أن الحكومة لن تأخذ لك حقك أو تحاول التحقيق فيه .......... و بما أنها الغابة و قوانينها السارية .......... و بما أن أمين الشرطة ( الله يحرقه ) يفبرك محضر مغشوش ( زي كل حاجة مغشوشة ) علشان 20 أو حتى 100 جنيه و يوديك في داهية .......... و بما إن كل حاجة غلط x غلط ..........

يبقى لا يجب أن تقف
من يخاف على نفسه يتحقق من الطريق أولا قبل أن يعبره
و من لم يفعل .......... إلى الجحيم ......... إلى الجحيم

أنا ليه أتحمل مسئولية حمار مش باصص على الطريق أصلا و ما شفش العربيات اللي جاية قبل ما يعدي ؟؟

و ليه أتحمل مسئولية واحد سايب الرضيف و ماشي في وسط الشارع ؟؟؟؟؟؟؟؟؟

و ليه أتحمل مسئولية إن واحد يدعي عليه بالكذب ؟؟؟

و ليه مصر بقيت كدا ............. علشان مفيش قانون و مفيش أخلاق ..........

و شكرا

مع الهروب ............ الهروب
أدام حقك كدا كدا ضايع ......... تقف ليه ؟؟؟؟

المشاركة الأصلية كتبت بواسطة r0xer

و أفرض اللي بيعدي دا عيان! أو عنده حالة وفاة او مرض أو عنده هموم الدنيا اللي مكفياه ومش مركز ولا منتبه!!!! هل يجب أن نفرمممممممه بالعربية لمجرد إننا راكبين عربية و هو ماشي على رجله؟ طالما في أمل من إنقاذه...يبقى ليه لا؟

على فكرة..اللي رخص البني آدم مش الحكومة يا أستاذ توت، اللي رخص البني آدم هو اللي متخيل إنه طالما ماشي في الشارع و مغلطش و غيره غلط يبقى لازم نموته ونمشي.

وخليك فاكر إن كل واحد وله يومه بيغلط فيه! سواء كان بيسوق.. أو من المارة.


منطق الغابة لا يطبق إلا في الغابات....

أنا لو في بلد محترم ............ و مع ناس محترمة
هاقف أساعد مهما تكون الحالة

إنما أبقى أنا مش غلطان و أقف و ألاقي نفسي لابس سجن علشان خاطر واحد كان ماشي سرحان ( أنا مليش دعوة هو سرحان ليه )
المهم أنه أتسبب في مشكلة ليا و أنا مليش بيها أي علاقة
و ده ممكن يدخلني السجن
و أنام مع القتلة و اللصوص و المغتصبين أردء أنواع البشر اللي موجودة في السجن ...........
يبقى الحل أيه ؟؟؟؟
لما يكون فيه قانون ........... أقف و لو أنا غلطان مستعد أتحمل غلطي
إنما ألبس مصيبة بسبب خطأ غيري
فلا و ألف لا ........ إذا كنت أستطيع تجنبها

زمن الطيبة خلاص أنتهى

لو أظهرت للناس طيبتك ........... بتبقى ضعيف
و لو عملت فيها وحش بتبقى شيطان
فالأحسن أجتناب معرفة الناس و خلاص و الهروب إذا أنت لم تخطئ .......... لأنه مفيش حد هايجيب حقك أو يحاول يثبت برائتك

و تحيا ................. ج ع ع

المشاركة الأصلية كتبت بواسطة mohamed_88sk

أنا أقصد بالغلطان الرجل المتوفى -الله يرحمه- بس خدي باللك ممكن دفاع الخصم يستند بإن أخوكي كان بين التريلتين والمتوفى مكنش شايفه ...فعلا لازم الواحد يحط نفسه مكان الطرف الأخر ... بس دلوقتي إيه حصل جديد في الموضوع؟؟ أعذريني لسه عارف الموضوع ده دلوقتي والله .. كان الله في العون وربنا يسهلكوا الحال ..
بس بجد بعد لما ربنا يسهل بالخير بإذن الله . في رأيي تدوا لأهله قرشين كده مساعده برضو ده ممكن يكون رب لأولاد على وش جواز أو غيره ....وكله في ميزان حسناتكم وتثابوا عليه وأنتو طبعا مش مجبرين .
بس برضو لو الطرف التاني غلطان أنا مصر أني أسيبه يهاتي وأمشي .

لا محمد اخويا مش غلطان خالص لانه اولا ماشي اقل من السرعة القانونية على الدائري ثانيا محمد مكانش بين تريللتين دة كان على اقصي الشمال و على يمينه تريللا و شماله الصور اللى فاصل الاتجاهين !! يعني حتى احنا مش فاهمين الراجل بيعدي ليه اصلاا و رايح فين ! جايز هيعدى الصور الاسمنتي دة اللى فاصل بين الاتجاهين بس بجد حرام عليه نفسه ! ازاى حد يعدي من على الدائري! يعني شفت حضرتك الدائري كله مفصول الاتجاهين بتوعه بالفاصل الاسمنتي دة و مفيش حتى u turn للعربيات عشان تلف !! بعدين يا ريته حتى كمل جري قدام محمد .. دة جه قدام محمد و وقف من التعب بتاع الجري لانه على شهادة الناس اللى شافو الموقف بيقولو دة واخد الطريق كله جرى كدة و قلنا الراجل دة هيتخبط...
بعدين اللى مطمنا ان كل الناس وقفت مع اخويا و قالولو هنيجي نشهد معاك و انت مش غلطان . مع ان دايما فى المواقف دي يحملو الغلط علىطول على اللى سايق من غير ما يعرفو ايه اللى حصل لكن الحمد لله ناس كتير راحت مع اخويا و ادولو نمر موبايلاتهم عشان نبقي نكلمهم و كدة

طلع يا حرام بعد كدة انه لما ولاده راحو النيابة ان الراجل اصلا لع بيعانى من امراض الشيخوخة و عنده زهايمر و كل شوية يهرب من البيت و يجري كدة فى الشوارع و انهم مكانوش شافوه من يومين !!! و كل دة اتقال فى المحضر و اتكتب و فى صالح اخويا ان شاء الله

ربنا يكملها بالستر يا رب

والله يا جماعه فكرتوني بقصة مشابهة حصلت معايا انا شخصيا من حوالي 6 سنين..
اول ما جيبنا العربية ال125.. و انا كنت لسة مطلع الرخصة. و كنت راع من الكلية لوحدي الساعة 3 الضهر.. في عز الحر و الزحمة..وو لوحدي.. و مشغل الراديو بصوت عالي شوية.. (متجمعه فيا كل عوامل الغلط في نظر الشهود المصريين في الشارع)
الموضوع ده حصل في شارع بورسعيد علي الناصية اللي عند مدرسة الخديوية.. قريب جدا من مستشفي احمد ماهر التعليمي..
الشارع كان ضيق في حته كده عشان كان في تاكسي مالوش فيها بينزل زبون.. و بعد ما الشارع فتح شوية. جريت.. قرصت علي التاني و اديت التالت.. يعني بالكتير علي 50 مثلا..
ماشي علي افصي الشمال و مفيش عبور مشاة و اذا بيا الاقي واحد راجل كبير عنده حوالي 65 سنة.. بيجري بيعدي الشارع.. لقاني باجري شوية فوقف.. وانا كبست فرامل.. فلما شوفته وقف كملت مشي عادي جدا.. و لما قربت منه لقيته فجأة قام نط فجأة و كمل جري في اتجاهي..
لمسته بطرف العربية الشمال طااااااار في الهوا و اترمي علي الارض و راسه خبطت في الرصيف..
المهم وقفت و نزلت اشوف الراجل جراله ايه.. والشارع كله اتلم عليا و اللي يقول ده شيطان.. (عليا انا يعني) و اللي يقول انا شايفه عمال يجري من اول الشارع (و الشارع كان واقف اصلا.. !!!)
و كل اللي عنده كلمه واقفة في زورة طلعت..
المهم لقيت واحد متطوع من الناس دي قام ناطط في العربية و ساحب المفاتيح. مرضيش يديهالي غير لما قولت اني هاوديه المستشفي.. و الكلام ده مكانش تحت اي ضغط.. لأني كان معايا مفاتيح تانية.. و كان ممكن اسيه و امشي عادي جدا.. بس ضميري بقي وجعني و قولت طالما انا خبطته هاوديه المستشفي عشان اطمن عليه.. المهم الناس حطوه ف العربية و ركب معايا 2 م الشهود بس كانوا بخق الله حقانيين.. راجل كبير و واحدة ممرضة كانت ماشية..
اول ما وصلنا المستشفي و ركنت نط امين الشرطة اخد الرخصة اديتهاله بحسن نيه جدا و انا لسة صغير بقي و عندي 19 سنة و لسة مطلع الرخصة بقالي شهرين تلاتة..
الممرضة الي كانت معايا دي قبل ما الامين ياخد الرخصة.. قالتلي امشي دلوقتي في الخباثة كده (هي كانت عارفة اللي بيحصل بقي و انا اللي كنت علي نياتي..) و انا اقولها لأ طبعا..!!!! انا خبطته يبقي لازم اطمن عليه (عرق الرجولة و الحماس بقي لما بيعلي عند الواحد. خيبة شباب بعيد عنكم حتي لو مكنتش غلطان..) المهم اهلي يتصلوا بيا مش راضي ارد غير لما اطمن الاول.. عشان لو في نصيبة هارد عليهم ولو عادي مفيش مش هاقولهم حاجة..
المهم 3 ساعات لحد الراجل ما اتعمل ليه اشعات و الدكاترة شافوه.. (انا كنت شاكك في كسر في الفخد و ربنا يعافيكم جميعا مينفعش فيه غير عملة و مسامير و ليلة كبيرة.. عشان كده فضلت معاه)
المهم النتيجة انه مفيهوش كسور.. انا ارتحت جدا ساعتها.. و بعد ما خلصنا جه الامين و سأل الراجل قاله مش عايز منه حاجة انا عايز امشي.. (الراجل كان عنده ضمير و كان عارف انه غلطان و اني مش غلطان.. او علي الاقفل الغلط علينا احنا الاتنين..)
خرجت برة علي الشارع جيبت تاكسي و اديته الاجرة مسبقا و ركبت الراجل و مشي.. و انا مشيت. بس بعد ما جيبتله الادوية..
رعب بقي و مقولتش حاجة لأهلي ف البيت و مش راضي انزل بالعربية بعد ما كنت باتلك اخدها حتي لو نازل اجيب عيش مثلا.. :) بس عشان مياخدوش بالهم تحاملت علي نفسي و نزلت بيها تاني يوم عادي جدا..و احلام بقي ان يتعمل ليه مضر عشان اخدوا الرخص.. و ممكن اتسجن بقي و مستقبلي يضيع.. :) (مانا كنت لسة في سنة اولي في الكلية..) و كده لحد ما الموضوع هدي..
الحمد لله عدت علي خير لأن الراجل عنده ضمير.. و الحمد لله جت سليمة لحد كبير.

بعد كده بقي بقيت لو داخل علي حد بيعدي او بيفكر يعدي.. باهدي و انور النور او الكلاكس.. و اشاور بايدي كمان..يا اما اشاور عدي او اشاور اقف متعديش..
ملحوظة: انا كنت عنيف جدا في الرد علي الناس ساعتها فغي الشارع.. يمكن عشان كده محدش ساق فيها و اتكلم كتير.. فعلا بيشو عنده حق ف الحته دي..
و رأيي في الموضوع.. توديه المستشفي عادي بس ممكن تقف بعيد بالعربية.. و متديش رخصك لحد
و تمشي وقتي و متعملش فيها ابو الشهامة و الرجولة.. كفاية انت اخدت ثواب انك وديته المستشفي اصلا.. و ربنا يستها معاكم جميها و محدش يمر بالتجرية القاسية دي.. ولا خابط ولا مخبوط.. :)