الموضوع: ماذا تفعل اذا صدمت شخص بسيارتك ؟؟( تجربة واقعيه )

بيتهيألي المشكلة في عدم النظام
انا مع الجري في المواقف دي بنسبة مية في المية - عشان البهدلة - ومع عدم نقل المصاب الى المستشفى - عديت في التجربة دي ولولا الراجل قال ماليش دعوة كان زمان في قصة ومش قادر اتخيل لو كان زي الناس اللي سمعنا عنهم من اللي ممكن يلبسك الليلة وانت مجرد فاعل خير - شوف الدنيا - ولسة في ناس بتقوللك قف-
ممكن لو معايا مسدس زي الراجل بتاع الشيروكي او ابويا ظابط او وكيل نيابة او ذو نفوذ وجبروت غير كدة شكرا
ومن تلات أيام في الكربة كنت هخبط واحد بيعدي والمفروض انه عدى بس مش عارف بصيت في المراية عشان آجي يمين ( من وراة يعني عشان هو معدي من اليمين للشمال) ببص تاني قدامي لقيتة لسة في مكانه واقف في وشي وعمال يشاورلي اقف والحمد لله سرعتي كانت هادية ووقفت ولقيتني باعتذرله مع انه هو اللي غلطان بس شكل بني آدم وهو بيتوسل اليك ترحمة (ساعة ما كان بيشاور قدام العربية وانا باصص في المراية ) كان صعبان علي اوي

وعموما احسن حاجة عشان الفوضى والسيرك اللي احنا فيه ان اللي خايف على نفسة يخلي بالة ويكون حريص جدا سواء كان سايق او بيعدي الشارع عشان اللي بيقع مالوش دية ولا اللي بيوقعه ليه دية - خليك سايق على مهلك واعمل حسابك ان اللي واقف على الرصيف دا ممكن يسيء تقدير المسافة بينك وبينه & تقدير سرعتك وينزل يعدي في لحظة غلط ولو انت مش عامل حسابك ( ان شاء الله بس تشيل رجلك من عالبنزين وتحطها عالفرامل من غير ماتدوس فرامل ولا حاجة بس تبقى مستعد والثانيتين دول صدقوني بتفرق جدا )
من كام سنة وانا بعدي صلاح سالم من عند نادي الجلاء للناحية التانية من عند التمثال كدة ومعايا واحد تاني بيعدي بس معرفوش وسألني على عنوان قلتلة الناحية التانية قام مديني ضهرة وواخد في وشه وهيعدي ومالوش دعوة باي حاجة تماما واقسم بالله انا شديته عشان مستحيل التعدية في اللحظة دي ، وسيبتة ثواني وانا واقف مستني الطريق عشان اعدي لقيتة هينط تاني وبقوله استنى مسمعنيش رحت شدة لتاني مرة وقلتلة تعاى من على يميني وعدي معايا ولو وقفت اقف زيي ولو رجعت ارجع تاني ماشي ؟ لقيتة مستسلم تماما وبيقوللي ماشي عشان انا مش عارف اعدي خالص ووقفنا يومها حوالي ثلث ساعة وهو ارفان وعايز ينزل وانا اقوله استنى لحد اللحظة المناسبة اللي عدينا قيهاوطبعا عدينا جري عشان انا المسئول عن نفسي محدش تاني ولو سايق عربية بهدي في الحتت اللي زي دي وبستغرب عشان بلاقي ناس داخلة بسرعتها وفي مشاة بيعدوا او واقفين بس حتى على الرصيف
وانت سايق خليك على مهلك وخلاص وعلى سرعة تلحق تسيطر فيها على رد الفعل اللي انت عايزة - الفرق بين السرعات بيبقى ثواني وهي الثواني دي اللي بتفرق في أغلب المواقف
انا مع صاحب العربية الغلبان اللي فجأة بقى متهم ولابس كلابشات ومترحل مرة للنيابة ومرة للقسم وحاجة زفت وفي نفس الوقت برضة في غلابة بيعدي الشارع وهو عمرة ما ركب عربية ولا ساقها ومش عارف اللي سايق رد فعلة اية ولا بيتعامل ازاي وفاهم ان الفرامل بزرار هتقف لحظة ماصاحبها يعوز وعشان كدة بنسمع الجمل المشهورة في المواقف اللي زي دي انتو راكبين عربيات تدوسوا عالناس - بابا جايبلو الاتومبيل ونازل يهرس في الخلق ( اووتومبيل دي سمعتها من سواق تاكسي دخل في عربية ابويا بالعرض ومش عاجبه وشايف اني انا الغلطان - ماعلينا مش موضوعنا)
في صديق لي في الشغل لما كنا نعدي الشارع اقوله بسرعة يقوللي مالعربيات تقف ايه اللي فيها يعني ؟( كان بيعدي حاطط ايدة في جيبة وببطء مصطنع وساعات يدي ضهرة للشارع يعني بيعدي بميل ودا كان مالوش اي تفسير عندي غير نفسية مش تمام والله أعلم - حاسس اني طولت بس معلشي بقى

اللهم احفظنا