الموضوع: ماذا تفعل اذا صدمت شخص بسيارتك ؟؟( تجربة واقعيه )

المشاركة الأصلية كتبت بواسطة gassarian

No one came to or mentioned the act of calling the Emergency Center. All of you here were doctors driving ambulances.
Who can say the injury is dangerous or not?
And who said that the way u transfered this injured didnt hurt him more?
Some injuiries are not troublesome unless the injuired is moved by a wrong way...
The best thing in this case is to call 911 or 123 or 112
the ambulance will come and see.
If the man is dangerously wounded u maybe killing him the way u r transferring him.
The ambulance has the first aids needed and the ambulance staff are witnesses on the circumstances of the accident
Safer for all the sides

اسعاف ايه يا سيد ؟
ده انت ممكن تتصل يقولولك فوت علينا بكره
و لو جت الاسعاف احتمال انها تتاخر و تقلل فرص المصاب فى النجاة اكتر من التعامل مع الاصابه بشكل فورى خاطىء

المشاركة الأصلية كتبت بواسطة Amien

+1


الصح صح ... والحق حق ... ومش عشان فيه ناس غلط لازم انا كمان امشى غلط عشان العمليه تتوزن.

لو كل واحد خبط حد هرب دى تبقى مصيبه .... حتنام ازاى ???

انا خبطت واحد ومكانتش غلطتى تماما ... ووقفت ... والحمد لله الناس اللى شافت الحادثه وقفوا معايا ... ووديت الراجل المستشفى مش عشان انا ليا آى زنب ... لا علشان ده انسان ... هل خلاص فقدت الكلمه دى اى احترام لدرجة انك ممكن تسيب انسان يموت على الارض وتجرى ... وتقول اصلها غلطت امين الشرطه والحكومه ... فين الضمير ??? عشان مآقضيش ليله فى الحجز واحد يموت وعياله تتيتم ... اى منطق آعوج ده ... الصح صح .... الصح صح .... اعمل الصح ولو على رقبتك ... وخد حذرك ... شهود وصور لكن ما تسيبش انسان ينزف داخلى او خارجى ووتطلع تبريرات تنقذ بيها نفسك .... خد حذرك وخد اسماء شهود الواقعه وتليفونهم والمصريين جدعان ... تستطيع ان تهرب من الناس ولكن اين الهروب من نفسك ...... الهروب انانيه ... الهروب جريمه .... ربنا يرحمنا جميعا.

يا رجالة أنا متفق معاكوا
بس برضه ممكن تلاقي نفسك لابس مصيبة علشان واحد أتبلى عليك
واحد غبي ماشي سرحان و مش بيبص على الطريق ( و معظم المصريين عاملين فيها مازنجر و مش بيبصوا قبل ما يعدوا )
و تلاقي نفسك في السجن
و المسألة مش مسألة يوم في السجن
ياريتها تيجي على أد يوم و لا أسبوع حتى

إنما لما تلبس قضية ......... و تبقى سوابق ............ و تصاحب سلومة الأقرع .......... و عبده تلوث ............ و إبراهيم سنجة

لو الموازين مظبوطة في البلد ............. ماشي
إنما للآسف الحال لايسر أي أحد
و أنا معاكوا و كلامكوا صح مليون % ............ بس برضه أنتوا لو مريتوا بتجربة هاتغيروا رأيكم من الظلم اللي هاتشوفوه

ياريت تفكروا في الموضوع بمنطق
اللي أيده في المية مش زي اللي ايده في النار

The best thing in this case is to call 911 or 123 or 112

حلوة موضوع الإسعاف ده
و كمان 911 .................. ضحكتني يا مان

911 ده و أرقام الطوارئ ........... معمولة للبلاد المتقدمة

الإسعاف هنا تقعد تتصل به .......... و التليفون يرن و محدش بيرد
و إذا حصل و التليفون رد
يقولك خلاص ما تصدعش دماغنا .,,,,,,,, هانبعتلك العربية
و أنت و حظك بقى

أنا وقفت أساعد ناس على الطريق مصابين

و أتصل بالإسعاف
الراجل زعقلي في التليفون و كان ناقص ينط من التليفون يضربني بوكس

و الإسعاف لما بييجي بسرعة ............. بيكون في خلال ساعة أو 45 دقيقة ( ده لو المصاب حظه حلو )

اخواني الكرام

تابعت كل الردود الموجودة في الموضوع و كلها من جانب واحد .. جانب صاحب السيارة او قائدهاانا هاحكي ليكم حكلية حصلتلي شخصيا ، ولا كنت سايق ولا أنا اللي اتخبطت بس شوفتها من منظور قريب جدا ممكن يكون لينا وجهة نظر متوازنة

انا بحكم عملي كان بتجيلنا سفريات كتير للجامعات المصرية
و كنا في السفريات دي لما بتبقي في جامعة قريبة بنجيب عربية بالسواق من مكتب تأجير علشان توصلنا أريح كتير من هم القطارات و المواصلات

كنا في جامعة المنوفية في شبين الكوم، و احنا راجعين فكرنا نعدي علي برج المنوفية اللي علي الزراعي يعني نجيب حاجات واحنا مروحين
الراجل السواق لف بينا من وصلة كده و وقفنا قدام برج المنوفية من الاتجاه المعاكس يعني لازم نعدي الزراعي علشان نوصله

نزلت انا وصديقي اللي كان معايا، وجري عدينا الطريق"طبعا ما ينفعش أساسا يتعدي بالشكل ده" و اكتشفت الكلام ده بعد ما عديت. المهم
و احنا راجعين عدينا الطريق الاولاني جري برضو. ووقفنا علي الجزيرة اللي في النص قابلنا السواق اللي كان معانا بيعدي يجيب سجاير تقريبا من الناحية التانية ، يا دوب هي خطوة اللي نزلها علي الطريق و فجأة لاقيته منطور ما يقرب من 15 متر علي الطريق و اللي خبطه كان راكب نص نقل. المنظر كله كان مريع.. انا تخيلت ان الراجل ده مش هايقوم.. خلاص انتهي.. طبعا فوقت علي نفسي واقف في عرض الطريق باواقف العربيات اللي جايه و الناس اتلموا
شالوه علي الجزيرة اللي في النص
و لاقينا أمين شرطة مبلغ باللاسلكي الاسعاف اللي جه من مستشفي قويسنا، اللي مش ابعد من كيلو من مكان الحادثة
طبعا انا مش عايز اقولكم لا أنا ولا صاحبي كان فينا اعصاب ولا حد عارف يسوق العربية بتاعة الراجل طبعا ستر ربنا بتوع الاسعاف واحد منهم خد العربية وصاحبي ركب معاه و انا ركبت الاسعاف مع الراجل الميت من وجهة نظري "ربنا يديله طولة العمر دلوقتي" ... اللحظات دي حسستني قد ايه حياة الانسان غالية .. غلطان بقي مش غلطان ... مؤمن ولا كافر.. ده بني آدم يا ناس .

اللي عايز اتكلم عنه كمان اننا لما وصلنا المستشفي قمة في الاهمال و التخلف احنا بنشيل الراجل نحطة علي جهاز الاشعة و السونار، طبعا لما لقيت المنظر كده قعدت ازعق بهيستيريا لما طلعلي مدير المستشفي و عرف احنا مين فجأة لقيت الدنيا بدأت تتعدل ، الممرضين ظهروا، و السونار اشتغل

المهم الراجل طلع اصلا ظابط جيش متقاعد وشاري عربيته وشغال عليها، و أهلوا جم بالليل نقلناه مستشفي تابعة للقوات المسلحة والحمد لله بقي سليم وزي الفل، والحمد لله روحنا البيت الساعة 12 بالليل بعد انا كنا في الزراعي راجعين الساعة 2 الظهر.

اللي عايز اقوله
احنا كنا غلطانين ، و هو كمان غلط بس برضو حياة البني آدم غالية ، والغلط مش إحنا بس السبب فيه
الغلط من اللي ما خططش طرق صح ،، من اللي ما حطش قانون صح،، ومن اللي ما علمش احترام طريق صح ،، ومني ومنكم
فلما تحصل مشكلة لازم انا و انتم وهما نشيلها سوا ، حتي لو مش انا اللي غلطان ، نصيبي كده اني مصري زيي زيكم ، ببلاويها بهمها ، بكل قرف الكلمة ،، بكل معانيها.. وده قدرنا.. ده همنا وده نصيبنا

أأسف للأطالة بس فعلا انتوا جيتوا علي وتر لحد النهارده بيأثر فيا و انا باعدي الشارع .. وانا نايم.. لما افتكر المنظر .. لما اركب مواصلة


تحياتي و محبتي