الموضوع: اسال ويجاوبك مهندس نجاد من بريدجستون

المشاركة الأصلية كتبت بواسطة som3aa

كنت عايز اسال هو الكاوتش مفروض يتغير كل كام الف كيلو؟
الكاوتش عندى كومهو

انظر اسفل الرد

المشاركة الأصلية كتبت بواسطة ahmedel_rayies

السلام عليكم ورحمة الله وبركاته

بشمهندس نجاد
تحية طيبة،،،

أرجوا من سيادتك الرد بخصوص سعر الكاوتش تورانزا 195/60/15 GR 80 Super Silent يابانى.

وهل متوفر منه عدد أربع فرد؟

وماهي هيا أقصى مسافة يجيب تغيير الكاوتش بعدها؟

ولكم جزيل الشكر والتقدير

السعر 625 جنية سيتوفر خلال أسبوعين... باقى السؤال انظر اسفل الصفحة

المشاركة الأصلية كتبت بواسطة sherif_84

باشمهندس نجاد
ازى حضرتك يارب تكون بخير
سؤالى انا معايا نوبيرا 2006 ماغيرتش الاطارات بتاعتها من وهى زيرو لغاية دلوقتى والعربية ماشية 58000 كم وكنت عايز أبدل مكان الاطارات وأملاهم نيتروجين فهل اعمل الكلام ده دلوقتى ولا استنى لما اغير الاطارات على 60 او 70 الف مع العلم انى مابدلتش أماكن الاطارات لغاية دلوقتى ومع السرعات العالية بتبقى فى رجة فى الدريكسيون ده بيكون بسبب ايه
أسف على الاطالة وجزاك الله خيرا

غير الاطارات الآن ......

المشاركة الأصلية كتبت بواسطة Matrix_Reloaded

شكرا يا مهندس نجاد انا استفد فعلا ويمكن فيه حاجات لأول مرة اعرفها وفيه عندى شوية اسئلة
- عربيتى اوبل كورسا 1200 Cc مو 95
- مقاس الكاوتش هو 165/70ر13
ولازم اغير فردتين لأن واحدة ضربت سلك وكانو سلفرستون ماليزى بصراحة كاوتش مش حلو عامل 30000 كم فى سنه و10 شهور
سألت مالقيتش غير البردجستون الأندونيسى ب 260ج ياترى يفرق ايه عن اليبانى وخاصة ان الفرق 100ج؟
- ينفع مقاس 175/70ر13 او اى مداس اعلى على نفس الجنط؟ لأنى مش لاقى حاجة عن العربية دى فى مقاسات الكاوتش
- الفردتين اللى قدام 165/70ر13 جى تى اندونيسى بقالهم 3 شهور ياترى ممكن اسيبهم لو حاعرض المداس ولا اغيرهم؟
- الفردتين الجداد يركبوا ورا ولا قدام حضرتك بتقول ورا طب بعد اذنك ممكن اعرف ليه؟

واخيرا شكرا على مجهودك ووقتك

الرجوع لكتالوج العربية لمعرفة المقاس البديل كما ذكر سابقا ولو اطارين يركبا فى المحورالخلفى (ذكر سابقا) والسبب بسيط جدا حضرتك تتحكم فى الاطارات الامامية بالدريكسيون ! مضبوط ؟؟ طيب الاطارات الخلفية كيف تتحكم فيها ؟؟؟؟ طالما اننا لا نتحكم فيها فيجب ان تكون الاحسن حال والامامية اقل حال

المشاركة الأصلية كتبت بواسطة dr_timo

لو سمحت ياباشمهندس انا كانت زوايا في عربيتي مش مظبوطة فدة خلا الكاوتش الشمال الامامي اتمسح جزء من نقوشه الداخلية وخلاص ظبط الزوايا فهل الكاوتش دة لازم يتغير ولا ممكن امشي بيه عادي مع العلم اني مش من هوات السرعة تماما واقصي سرعة بمشيها سبعين وفي ناس قالولي اني ممكن انقل الفردة دي ورا وعادي مش هيبقي فيه مشكلة فاية رئي حضرتك ولك جزيل الشكر

ارجو من سيادتك الحضور لفرع كالتكس عباس العقاد لرؤية حالة الاطارت على الطبيعة لتقديم النصيحة الصحيحة

اعضاء المنتدى الأعزاء ...... الأسئلة المذكورة تم الاجابة عليها فى صفحات سابقة تحديدا الصفحة (5) وكان الرد هو "الأخ العزيز شريف آسف لتأخرى فى الرد عليك بالنسبة لموضوع تغيير الإطارات عامة لا يوجد فى اى كتالوج سيارة اطلعت عليه حتى الآن كيلومتر محدد يتم عنده التغيير ولكن المذكور دائما هو الحد الآمن وهو مؤشر تآكل النقشة ويوجد على جانبى الإطار أسفل كتف الإطار او على حرف الجانب ويكون هذا المؤشر فى اطارات بريدجستون وبعض النوعيات الأخرى عبارة عن مثلث ومقابل هذا المثلث بين فتحات النقشة جزء صغير من المطاط ارتفاعه من ارضية النقشة فى اطارات الملاكى 1.6مم, فإذا تآكل المداس حتى يصل لهذا المستوى (المتبقى فى النقشة = 1.6مم) يجب أن يتم تغيير الاطارhttp://www.nilemotors.net/Nile/attac...1&d=1216062917 وكذلك هناك بعض المؤثرات والمؤشرات الأخرى التى يجب عندها تغيير الاطارات مثلا اذا لاحظت وجود تشققات بجانب الاطار وكذلك بين فتحات النقشة والمداس، اذا لاحظت وجود تآكل غير منتظم مثل تآكل بجانب واحد من الاطار او مثلا تآكل بوسط الاطار فقط او تاكل كما نقول عالى وواطى نتيجة عيوب بالمساعدين او العفشة، او نتيجة لعدم ضبط زوايا السيارة لفترة طويلة وعدم تبديل اماكن الاطارات كل 10000كم ... وهى عامة كما نسميها عملية الصيانة للاطارات وعلى رأس هذة العمليات جميعها الحفاظ على ضغوط الاطار والكشف بصفة دورية اذا كان هواء يجب المراجعة اسبوعيا او كل 10ايام على الضغط اما فى حالة النيتروجين فكل 3-4 اسابيع تتم المراجعة. ارجو ان اكون قد اجبت على سؤالك وياريت تقدر تزور احد معارضنا فى القريب العاجل للكشف على حالة اطارات السيارة وابلاغك بها واذا كان يجب تغييرها ام لا... انا فى كالتكس عباس العقاد ياريت اتشرف بزيارتك قريبا ان شاء الله"

المشاركة الأصلية كتبت بواسطة Lion_Heart

اللى أعرفة ان طريقة التخزين للكاوتش تؤثر على كفاءة الكاوتش فياريت تعرض لنا ايه هيه الطريقة المثالية للتخزين بخيث لو روحنا اى مكان وملاقيناش التخزين كويس نتوكل على الله على طول دون مناقشة ,
كل عام وانتم بخير .

ياريت لو المهندس نجاد يخبرنا بأفضل طريقة لتخزين الكاوتش .
و هل المتاح من الكاوتش مقاس 175-70-13
تايلاندى ام يابانى ام كلاهما متوافر خاصة بفرعكم بالمنصورة .