الموضوع: ماذا تفعل اذا ركنت سيارتك بمكان و اقفلت عليك سيارة اخرى ( تجربة واقعية )

المشاركة الأصلية كتبت بواسطة tot

الغريب ان اللي فرحانين انهم بيبوظوا عربيات الناس و يخبطوها و يجروا و اللي يشخبط ع الابواب ، دول برضه الاعضاء اللي بيتكلموا عن الاخوة فى الله و الحلال و الحرام و فى بعض الاحيان بيقلبوا المنتدى برنامج فتاوى و احكام، مش فاهم هو كده مش حرام يعني ، بس اكيد كل واحد بيعمل حاجة عنده مليون مبرر يطلع نفسه فى الاخر المظلوم
و بعدين اللي بيكسر القزاز ده اهو ممكن يستفيد انه هيحرك العربية انما اللي يعلم على عربيات الناس و يفسيلهم الكاوتش و يخبط عشان يادبهم ، مش فاهم بيستفيد ايه، و لو عربية ميكروباص الترامكو ولا اتوبيس رحلات قفل عليك هتقدر تفتح بقك معاه ، ساعتها انت اللي هتتعلم

بص يا حبيبي

انا مش كسرت قزاز العربية عند و لا علشان يتعلم, انا باحل موقف انا فية و مافيش حل غير كدة اطلع العربية, ماهو مش حانام جنبها في الشارع بمراتي و بنتي

بس ارجع و اقولك برضة ان لما يكون حد من الرعونة انة يتصرف بأسلوب غير محترم معاك يبقى كل التصرفات مباحه

يعني لما مثلا 4 عيال حبيايب ماما ماشيين بعربية و يزنق عليا و يشتمني من الشباك كمان معتمد انهم اربعه و انا لوحدي مع مراتي وولادي يبقى مباح ليا ساعتها اني احط كاوتش عربيتي علي كبوت عربيتة او اهبدة بالاكصدام اطلعه فوق الرصيف و اسيبة وامشي

كدة بقى يتعلم انة يكون محترم و مايستعرضش عضلاتة مع حد هوة مش قدة علشان شايفين نفسهم شلة صيع ماشية تقل أدبها على خلق الله في الشارع, انت تقدر تشتمني, ماشي بس انا كمان اقدر ارد بطريقتي و أخليك تعيط على عربيتك و تجري وراالسمكرية اسبوع تصلح فيها و تدفع دم قلب مامتك اللي سايبالك عربيتها تتعرض بيها لخلق الله و تقل أدبك كمان

المشاركة الأصلية كتبت بواسطة wawoo

و مين اللى نصب حضرتك رجل قانون عشان تعاقب على اخطاء الغير , و هل كل واحد حتشوفة بيعمل حاجة غلط حتقدر توقفة و تعاقبة , طبعا لاء , انما انت قدرتك تتشطر على صاحب العربية دى عشان هوة مش موجود , ولقيت انة مافيش ما يمنع انك تكسر و تخرب طلما انت تقدر, اذا دعتك قدرتك على ظلم الغير تذكر قدرة الله عليك .
و هل حضرتك ملاك يعنى مش بتعمل اى اخطاء عشان تعاقب الناس و انت ماشى فى الشارع , ما كلنا بنعمل اخطاء و كلنا بنعمل معاصى , انما لو كل واحد نصب نفسة قاضى و حكم بعقوبات على الغير يبقى باقيت غابة .
و هل لو اللى كانت اللى واقفة صف تانى عربية نص نقل مثلا , كنت برضو حتقدر تكسر او حتى تحركها حتى شبر من مكنها .طبعا لاء .
عموما الجدال دة مش حيوصل لنتيجة لان واضح انك مقتنع باللى بتعملة , بس احب اقولك ان حيجى يوم و تضطر تركن صف تانى او اى موقف تانى , و كل اللى عملتة فى عربيات الغير دة حيطلع علي عربيتك تانى , مهو كما تدين تدان .

اهو دة بقى الكلام اللي يضايق

يعني ييجي واحد يحط كوم طوب قدام باب بيتك يقفل عليك وللا واحد يركن عربيتة عالرصيف لازق في الحيط قافل باب العمارة ويسيبها ويمشي

ماهو لو انت عاوزني ملاك يبقى تراعي حقي الأول و بعدين تطلب اني احترمك

انما تقفل على عربيتي و تعطلني ساعه او اكتر و ماعرفش اعمل حاجة و انت ماتعرفش اية الظرف اللي انا فية بكل لا مبالاة و عاوزني احترمك

و لو كان صاحب العربية اللي عطلني في نص الليل ساعه في الشارع طلع كان حاياخد درس في الادب يتعلم منة بعد كدة يراعي حقوق الغير

ولو كان قليل الأدب يتضرب و يتعلم الأدب

طالما مش بيحترم غيرة و مش بيحترم حريتي يبقى من حقي ادافع عن حريتي و و امنع من يتعدى عليها باي شكل من الاشكال

ملحوظة

تنتهي مساحه حريتك عندما تعترض حرية الآخرين, او في مقولة اخرى عندما تبدأ حرية الآخرين

المشاركة الأصلية كتبت بواسطة wawoo

انا اذا كنت مكانك , و تعز تحريك السيارة باى شكل من الاشكال حتى بعد طلب المساعدة من اى احد من المارة مثلا , كنت حاخد تاكسى و اوصل ولدتى للطبيب , حتى عشان ربنا يبارلكى فى علاجها ,
عموما يا اخ ماتركساوى كل واحد و نيتة , الله وحدة اعلم بالموقف كان عامل ازى .

وهو ربنا مش حايبارك في علاجها علشان ابنها كسر قزاز عربية علشان يطلع عربيتة يلحق يودي أمة المريضة للدكتور

هو ربنا بياخد ذنب الشخص بذنب شخص تاني؟؟؟ حسب كلمتك التانية كما تدين تدان!!!!

اللي اعرفة ان كل واحد بيتحاسب عاللي بيعملة, لو في الأصل عمل معصية او ذنب, مش ناس بتشيل ذنب ناس تانية