الموضوع: ماذا تفعل اذا ركنت سيارتك بمكان و اقفلت عليك سيارة اخرى ( تجربة واقعية )

المشاركة الأصلية كتبت بواسطة Noha-M

براحة بس شوية يا استاذ ادهم . انت لو كنت قريت رايي في الموضوع دة هتعرف انى مبسكتش فى حاجة زى كدة و فعلا موقف فى منتهى الاستفزاز

بس اللى خلانى اهدي شوية فى رد فعلى و استني زى ما قلت قبل كدة و اشوف دة راجل ولا ست ولا ايه الوضع انه حصل معايا موقف و كانو قافلين عليه مرة و انا فعلا مستعجلة و عمالة ازعق و اسال البوابين اللى واقفين و ادي فى كلاكسات و محدش عارف مين صاحب العربية اللى واقفة و لما نزلو و انا ساننة سكاكيني باة و مستعدة انى اشوط فى اول واحد يكلمنى لقيتهم بعد كدة نازلين براجل عجوز رايح خالص من الدنيا و طالعين بيه المستشفى و نازلين عياط و لطم . فالواحد بس يصبر شوية لان مهما بلغت حجم الكارثة اللى انا فيها و الاستعجال اللى انا فيه مش هيبقي فى حجم مصيبة ناس ابوهم ولا جدهم رايح من الدنيا خالص و طايرين بيه على المستشفى

هو بس يظهر الناس مبقتش قادرة تستحمل بعضها فى اقل حاجة و انا كمان زيك ..

ماهو بالراحه يا مدام/نهى انا مش متعصب و لا حاجة بس الحالة مختلفة, يعني اللي قاعد في السوبر ماركت ساعه و راكن عربيتة صف تاني بالعرض على عربيتين تلاتة و الناس عمالة تندة علية في الميكروفون 5 او 6 مرات و مش عاوز يطلع يشيل عربيتة معتمد انها كابريس مايتخافش عليها و يولع اللي واقف برة دة يستناني لما اخلص مشترياتي و حاجتي براحتي اياً كان الظرف اللي هوة فية (عيان/دكتور وراة عملية/مسافر وراة طيارة/ست بتولد/واحد غلبان تعبان من شغلة و عاوز يروح/ ست و متأخرة برة و عاوزة تروح بمشترياتها/ طفلة رضيعه بتعيط/واحد وراة ميعاد مهم جدا و مش مستحمل يتأخر)

الغريب ان اللي فرحانين انهم بيبوظوا عربيات الناس و يخبطوها و يجروا و اللي يشخبط ع الابواب ، دول برضه الاعضاء اللي بيتكلموا عن الاخوة فى الله و الحلال و الحرام و فى بعض الاحيان بيقلبوا المنتدى برنامج فتاوى و احكام، مش فاهم هو كده مش حرام يعني ، بس اكيد كل واحد بيعمل حاجة عنده مليون مبرر يطلع نفسه فى الاخر المظلوم
و بعدين اللي بيكسر القزاز ده اهو ممكن يستفيد انه هيحرك العربية انما اللي يعلم على عربيات الناس و يفسيلهم الكاوتش و يخبط عشان يادبهم ، مش فاهم بيستفيد ايه، و لو عربية ميكروباص الترامكو ولا اتوبيس رحلات قفل عليك هتقدر تفتح بقك معاه ، ساعتها انت اللي هتتعلم

يا جدعان الركنة صف تاني لها قواعد بسيطة
سيب الفرامل و اعدل العجل و اظبط العربية بحيث لو حد زقها متطلعش في قلب الشارع

و تبقي مشكلتك مع المرور ( مخالفة او كلابش او الونش )
و محدش متضرر

و لو الشارع في ميل و العربية حتجري حط تحت العجل طوبة صغيره او متركنش بالاسلوب ده من الاصل و تعرض سيارتك و الناس للضرر

انما اللي يتربس العربية و يعشق و يشد فرامل اليد يستحق كل اللي يجراله اي كان

انت عمرك ما تعرف ايه السيناريو
افرض ده عربية طبيب و انت قفلت عليه و هو نازل جري يلحق مريض او حتي حد من اسرته
و لا مريض متاخر علي معاد دوا نسيه في البيت
و لا اب حيوصل ابنه للدرس و عشان يعوض التاخير يمشي بسرعة و يعمل حادثة

حرام يا جماعة اللي ما يرضاش التصرف ده يتعمل فيه ما يعملوش في غيره و حط نفسك مكان الغير دايما
و الشارع مش ملك لحد يركن بمزاجه و يعذب الناس معاه

المشاركة الأصلية كتبت بواسطة karim_monir

الاخ واو والاخ تووت
معلش مش معاكم
لما واحد يتسببلي اني اتاخر عن شغلي ويضيع مني صفقة مثلا
او يضيع يوم عمل بسبب انه ما راعاش قيم المجتمع بانه ركن عليا صف تاني وكمان بيحبسني
يعني بسميها قلة ادب وبجاحة
يبقي يستاهل اني افكرة انه اللي عملة ده غلط
وبما اننا بقينا في بلد عايشة بقانون الغاب
مش هاقول اخسرة كتير
بس اخسرة قد ما خسرني
العين بالعين والسن بالسن والبادي اظلم

انا معاك هى بجاحة و قلة ادب و سؤ خلق و تصرف اهوج و اخرق و كل الاوصاف , بس انا مردش على كل دة بتصرفات مماثلة , هوة غلطان و حيتحمل وزر هذا الخطء و وزر ما يترتب علية , يعنى تاخرك فى العمل او ضياع الصفقة هوة حيتحمل وزرها , شوف انت بقى لما واحد مريض مثلا عاوز يروح او اى حاجة , يبقى انا لو مكانة افكر الف مرة قبل ما اعمل هذا الخطاء اساسا ,
لكن لو فتحنا الباب ان كل واحد يكسر و ياخد حقة بيدة يبقى باقيت غابة فعلا زى ما بتقول , وهى الحقيقة غابة بالفعل بس انا محبش اكون الوحش المفترس اللى فيها , لان اخرت المفترى دة وحشة جدا , انما طول ما انا غزال فانا فى السليم .

و احب افكرك ان فى اوقات بيكون القدر هوة السبب فى اشياء احنا لا نفهمها و نتخيل انها شر , و عسى ان تحبو شىء و هوة شر لكم و عسى ان تكرهو شىء و هوة خير لكم , و عشان اسبتلك كلامى دة , شوف قصة سيدنا موسى مع الخضر لما طلع على سفينة سليمة و كان اصحبها ناس طييببين و راح هوب خرق لهم السفينة , و هما طبعا مشفهوش و هوة بيعمل كدة , هما لاقو بعض شوية السفينة بتنزل مياة و طبعا راحو توقفة على جنب , و تخيل معاية تفكرهم كان عامل ازى , اكيد مثلا كانو بدعو على الشخص اللى عمل كدة , و لو كانو ظبطوة كان اخد علقة محترمة و مش بعيد كانو قتلوة , اما لو يعرفو ان خرق السفيينة دة كان ضرر اقل عشان الواحد يتجنب ضرر اكبر كانو حمدو ربنا انة بعتلهم هذا الخضر , انما هوة القدر كدة , بتحصلك اشياء وتزعل جدا و تكتشف بعد كدة انها كانت قدر اخف من قدر , و كذلك باقى قصة الخضر .
يعنى محدش عارف الخير فين , يمكن فى حاجة فى الطريق مثلا او فى موقف معين ربنا عاوز ياخرنى شوية عشان اتجنبة , مين عارف تصاريف القدر ماشية ازى .

انا طبعا مش بدافع عن الركن صف تانى , انما زى ما انت شايف لو كل واحد اخد حقة بيدة يبقى بقيت غابة , و لو انت بالفعل بتتعامل على انها غابة , يبقى حاول تكون انت الحكيم الحليم اللى موجود فى الغابة دى , و اكيد دة حيكون لة ثواب عظيم , انما الشيطان لما يصدق ينشر العداوة و البغضاء بين الناس , و يوسوس لدة و يسوسو لدة و دة يكسر و دة يخرب , و يقعد هوة الشيطان يضحك و يرقص من اللى بيعملة بين الناس.

و بعدين انت اية رايك فى ان الحكومة نفسها بتروح مكلبشة العربيات اللى هى صف تانى , سعتها حتعمل انت اية . حتكسر الكلبش و لا تكسر العربية و لا اية .
عموما دة رايى الشخصى بعد تامل فى الموضوع , و كل واحد حر ياخد حقة بالطريقة اللى تعجبة , بس احب افكركم ان العفو عند المقدرة لة ثواب عظيم , و الكاظمين الغيظ والعافين عن الناس لهم برضو ثواب عظيم .