الموضوع: تحذير ونصيحة- محدش يشترى الصنى الجديدة لعدم توفر قطع الغيار ( تم حل مشكلة العضو )

الموقع معليهوش باسوورد علشان تجيب صور وارقام الأجزاء ... ده الباسوورد علشان وقت الشراء فقط

عموماً لقيت الصورة اللي انت حطيتها وهو فعلاً الجزء اللي كنت اقصده


زي ماقلت لحضرتك عندي إمكانية اجيبهالك من برة يوم الأربع ان شاء الله, وتكون عندك يوم السبت بالليل أو الأحد بإذن الله لو لقيتها برة


واحنا جميعاً بنتعاون علشان ننقذ الوضع الحالي وماكانش في الحسبان أصلاً ان حاجة زي كدة تحصل لا من التوكيل ولا من المصنع , يارب نقدر نعمل حاجة

والشباب اللي معاهم تليفون أو إيميل المصنع اتدخلوا وبيحاولوا يحلوا المشكلة, ربنا يجازي كل من تدخل وحاول يحلها كل خير , واحمد مصطفى تدخل مشكوراً علشان يساعد في الموضوع , ومن حق صاحب الموضوع يشتكي ويتنرفز بالفعل لأن ده شقى عمره واترمى في الأرض بسبب جزئية غير مسئولة من التوكيل, والتوكيل بالفعل مخطئ في الحكاية دي وماحدش بيحاول يجمل صورته

وماحدش في الناس اللي حكوا عن تجربة كويسة مع التوكيل أو العربية كان بيكدب أو بيعمل من البحر طحينة , وأعتقد لما يكون أخونا في أزمة ندخل كلنا نحاول نحلهاله سواء من جوة أو برة مصر ونفضل معاه لحد ماتتحل, مش نصطاد في المية العكرة ونشتم في كل حاجة سواءً العربية أو التوكيلات أو الناس اللي قالوا على العربية انها كويسة , صاحب الموضوع قال ماحدش يشتريها علشان فيها كذا وكذا, عن تجربته الشخصية وبالفعل هو محق في كدة, أنا عن نفسي لو كنت اعرف الحكاية دي ماكنتش جبتها على الأقل لحد ماتتوافر قطع الغيار, دلوقتي ماشي وحاطط إيدي على قلبي وربنا يستر طريقنا لأنها لو حصل حاجة لا قدر الله هاتتركن

تجاهل مشاركات أصحاب العربية ومحاولة حلها والصيد في المية العكرة على حساب زميل عزيز لينا محتاج مساعدة ومتنرفز من سوء أداء وكيل عربيته مش مبرر اننا ندخل نخبط في الكل, احنا في الأول وفي الآخر أخوة وبنتعاون علشان نوصل لحل للمصيبة دي, ولستة الأخطاء الجاهزة اللي بتترص مع كل حد بيشتكي أعتقد انها بتعبر عن حاجة معينة

والأخوة اللي كانوا ملاحظين حاجات أنا كمان ملاحظ زيكم بالظبط


قوللي ياباشا على رقم تليفونك على الخاص علشان وانا برة ان شاء الله أكلمك اشوف جبتها ولا لأ ساعتها , علشان احدد اجيبهالك بدوري ولا لأ


وأرجو ان الموضوع من أوله لآخره حد يقرأه من قسم التسويق في نيسان مصر, علشان يوصل الكلام ده للإدارة العليا ويفهموا ان سلعة معمرة زي دي لو حصل تقصير زي الحالي في توفير قطع الغيار ازاي الدنيا هاتقوم ومش هاتقعد , وتبقى فرصة ممتازة لأي حد عايز يخبط في العربية والماركة والتوكيل وكل من تكلم عنها بشكل طيب في يوم من الأيام, كفاية اننا بنتحمل أخطاء ناس تانيين المفروض يقوموا بشغلهم, وأغلبنا سأل عن توافر قطع الغيار قبل مايشتريها وجاله الجواب بالإيجاب, وطبيعي ماحدش راح يتأكد من أي توكيل وقاللهم أنا عايز وش سلندر للعربية الجديدة علشان يشوف موجود أو لأ .... دلوقتي أخدنا خبرة أخونا وعرفنا ان ممكن الموقف المؤسف ده نتعرض له كلنا


ويارب نحل المشكلة