ثرموستات الكوعة عبارة عن محبس..
إنما ترموستات الرادياتير عبارة عن حساس بيدي إشارة كهربية لمروحة الرادياتير...
لو غيرنا درجة حرارة تشغيل المروحة .. مش هتأثر على أداء الموتور لو كان ثرموستات الكوعة شغال صح... وكل الموضوع إن درجة حرارة الميه اللي راجعة للموتور ممكن تكون أبرد شوية، وفي الحالة دي ثرموستات الكوعة هيقفل لحد ما درجة الحرارة تتظبط وتوصل لدرجة حرارة التشغيل الصحيحة
درجة الحرارة في ثرموستات الكوعة ما ينفعش تتغير لإنها مظبوطة على أساس حسابات التمدد الحراري للمعادن الداخلة في تركيب أجزاء الموتور، وبالتالي لو غيرنا درجة الحرارة الحسابات دي هتتلخبط وتأثر على أداء الموتور
على فكرة .. مش كل المواتير لها درجة حرارة واحدة... بس معظم درجات الحرارة بتبقى في حدود 80 -90 درجة مئوية
الموضوع ممكن نشبهه بفكرة درجة حرارة الجسم الصح (المفروض تبقى 37).. ولو عليت أو وطيت يبقى فيه مشكلة.
زي ما قلنا في الموضوع... كون إن الموتور مش بيسخن ما يعتبرش ميزة... بالعكس .. ده عيب ولازم يتصلح.
إنما لو كنت شايف (أو خايف) إن الموتور بيسخن... فحاول تفكر في حلول تانية بعيد عن ثرموستات الكوعة... خصوصا إنه معروف عن عربيات الفيات عموما إنهم عندهم مشاكل في موضوع السخونية دي لإنهم مش بيراعوا موضوع تعديلات المناطق الحارة في عربياتهم.
أنا رأيي تفكر في تغيير الرادياتير وتجيب واحد أكبر أو 3 ماسورة ... بمعنى إن كفاءة التبريد تكون أكبر.
المفضلات