الموضوع: عداد الـrpm ... إزاي تستخدمه؟؟؟

المشاركة الأصلية كتبت بواسطة fouadseg

السلام عليكم
ممكن مخطط لدائرة التاكو ميتر ن الي عندي في العربية اتحرق ومش لاقي قطعة الغيار بتعتة ؟
وكان في موضوع عن الدايرة دي في المنتدي ودة الينك http://www.nilemotors.net/nile/100228-digital-rpm.html
وشكرا

يا ريت كنت أقدر اساعدك..

بس أنا في مواضيع الكهرباء عموما ضعيييييييف جدا.



...

المشاركة الأصلية كتبت بواسطة nomel3aeb2

الحمد لله انا كده مش فاهم حاجة كل عايز اعرفه بعد اذنك يا بشمهندس بالنسبة للفيرنا والسواقة في وسط البلد لو غير وعداد rpm 3000 يبقى مش هطلع من التاني وسؤال كمان بعد اذنك ايه هو الافضل بالنسبة لاستهلاك البنزين والزيت واغير النقلة على كام rpm واسف على الازعاج

أكيد مفيش إزعاج ولا حاجة :)

أولا وقبل ما ندخل في موضوع رقم الـRPM والحاجات دي.. معلش.. لازم نفهم شوية حاجات...

علشان تسوق عربيتك صح وتعرف تحافظ على موتورك مظبوط لازم تبقى حاسس بالموتور... يعني تحس إمتى الموتور بيكون عليه حمل كبير وإمتى الموتور يكون فايق..

ببساطة كده.. لو لقيت استجابة الموتور مش زي ما انت متوقع من دوسة البنزين .. يبقى غالبا حضرتك محتاج تخف الحمل على الموتور شوية عن طريق إنك تنزل نقلة في الفتيس.


إزاي؟؟ خلينا نتكلم بالبلدي...

لو حضرتك جربت تسوق عجلة سبق (فيها نقلات).. هتعرف إنك لما تعشق النقلة الكبيرة (البطيئة) العجلة هتتحرك بأققل مجهود من رجلك .. بس سرعتك هتكون بطيئة جدا..



والعكس .. لو عشقت النقلة الصغيرة (السريعة).. العجلة هتكون محتاجة مجهود جبار من رجلك علشان تتحرك.. ومش هتقدر تزود سرعتك بسهولة.. بس السرعة اللي هتوصلها هتكون عالية... بس بعد ما تكون عضلاتك جابت آخرها.

أحسن شيء إننا نبدأ بسرعة بطيئة (الغيار البطيء) وبعدين نبدأ نزود النقلات واحدة واحدة علشان نحافظ على عضلاتنا بأحسن حالة وأقل مجهود.


في العربية .. موتور العربية بيمر بنفس وضع عضلات رجلك... يبقى علشان أققل استهلاك البنزين.. لازم أتحرك بأقل مجهود يذكر.


فإوعى تفتكر إنك لو مشيت وانت معشق الرابع على سرعة 30 كم/س إنك كده بتوفر في البنزين.... بالعكس.. حضرتك كده بتستهلك بنزين زيادة وبتتعب الموتور جدا.

إمتى تعرف إن الموتور مستريح؟؟ لما تبقى أقل دوسة بنزين بتخلي العربية تتحرك بنشاط.


معلش.. كان لازم أعمل المقدمة دي علشان ندخل في موضوع الـRPM



المهم..


الصورة دي من كتالوج الفيرنا .. وبيشرح فيها فايدة التاكوميتر (عداد الـRPM)



بناء على كلامنا في الموضوع الأصلي.. كنا بنقول إن الأفضل إنك تنقل في التلت الوسطاني من مدى العداد.. يعني ما بين 2000 إلى 4000 RPM على العداد عندك.

محدش قال إنها لازم تبقى 3000 RPM..

إنما حاول إنك لما تيجي تنقل تكون زودت الدوران لحد ما تيجي فوق الـ2000... علشان يكون الموتور فيه قوة كافية لزيادة السرعة في الغيار الجديد.


خلي بالك... طاقة الموتور وعزمة ماهماش ثابتين ... إنما بيتغيروا مع تغير سرعة دوران الموتور...

وعزم الموتور هو اللي بيخلي العربية تسحب بسرعة.. والمعروف إن أعلى عزم تاخده من الموتور غالبا بيكون في مدى الدوان المتوسط بتاعه (التلت الوسطاني بتاع الـRPM).. وعلشان كده بنقول إنك لما تنقل ما بين 2000-4000 RPM.. فحضرتك كده باختصار بتاخد أعلى عزم من الموتور بدون ما ترهقه بدوران عالي يسبب تآكل ولا دوران منخفض يسبب مشاكل تانية.

مشكلة النقل نحت الـ2000 إن دوران الموتور بينزل لما تيجي تاخد الغيار اللي بعده.. وبالتالي فغالبا هتكون ماشي على دوران قليل قوي والموتور مش هيديك لا العزم الكافي ولا القوة الكافية علشان تفضل ماشي في طريقك صح.

ولو فضلت تدوس بنزين علشان السرعة تزيد.. فحضرتك كده بتعمل ضغط كبير جوه السلندر .. والنتيجة (مع تكرار العملية دي) إن الضغط ده هيخرج من أضعف جزء في السلندر.. اللي هو الشنابر.. وغالبا الشنابر بتتكسر...

لما الشنابر تتكسر.. يعني الموتور بيفقد ضغطه.. وتخسر قوة الموتور.. وتستهلك بنزين كتير .. والزيت ينقص.. ده غير الضرر اللي هيحصل جوه السلندر نفسه.


باختصار.. الصورة دي بتتخصر الكلام كله...



اللون الأحمر ما تقربلوش..
اللون الأصفر حاول تقلل من النقل فيه
اللون الأخضر حاول يكون أكتر نقلك في المنطقة دي.



نيجي بقى لأحسن طريقة لتوفير البنزين...

1- تجنب الطرق المزدحمة.. لإن الطرق المزدحمة بتخليك دايما معشق الغيارات الأول - التاني في أغلب الوقت... وحتى لو حاولت تخرم من الشوارع الجانبية.. فالسواقة فيها بردو مش هتوفرلك بنزين إنما هتوفرلك وقت.

2- كل ما كانت سواقتك هادية كل ما وفرت في البنزين... يعني مش لازم تدوس بنزين كتير وتاخد تسارع عالي (أنا عارف إن الفيرنا مغرية في تسارعها جدا) .. خلي أعصابك في تلاجة.

3- حافظ على سرعة ثابتة بقدر الإمكان... والسرعة الثابتة يعني مفيهاش كل شوية فرامل وبعدين تزود بنزين... لإن كل مرة بتزود بنزين بعد الفرامل بتستهلك بنزين كتير جدا.

4- حاول توصل للسرعة الثابتة بأسرع ما يمكن .. علشان تمشي بأقل استهلاك بنزين أطول مسافة ممكنة.


أنا عندي عداد في العربية بيجيبلي أنا بستهلك بنزين قد إيه وأنا ماشي (بيديني قراية كل ثانية تقريبا).. ومنه قدرت أعرف إني لما بمشي بسرعة ثابتة حوالي 70 كم/س بستهلك حوالي 3 لتر/100 كم.. إنما أول ما بطلع على الغيار الأول في إشارة مثلا.. فأقل استهلاك بنزين بعمله هو 30 لتر/100 كم... يعني 10 أضعاف..

إمبارح دوست دواسة البنزين على الآخر وأنا طالع على الأول... عارف استهلاك البنزين وصل كام؟؟؟ 82 لتر/100 كم..


وآسف للإطالة.. بس لو كان كلامي لسه فيه حاجة صعبة يا ريت تقوللي أحاول أبسطه أكتر.


...