الموضوع: كوري ياباني اوروبي ...الزم حدودك واعرف انت بتكلم مين

المشاركة الأصلية كتبت بواسطة hamaka

كعادة محبى الكورى (و لهم كل احترام) ، بيقيموا العربية بالشكل فى المقام الأول ، يا باشا التويوتا أوريس دى بتركن نفسها لوحدها (أعلى فئة) ، كوريا مش بتبتكر حاجة جديدة خالص غير التصميمات الخارجية و الداخلية ، لاكن تكنولوجيا جديدة بخ ، حتى قصة الفتيسات بتاعتهم اللى مفيهاش مشاكل عشان كلها حاجات متجربة و معمولة قبل كده و مالهاش مشاكل خلاص (و اللى عملوها يا أمريكان يا أوروبيين يا اما يابانيين و كوريا نقلتها منهم برضه) ، انما الحاجة الجديدة وارد يكون فيها لسة مشاكل و بتاخد و قت على ما تتعالج و بعد ما تتظبط من أوروبا أو اليابان أو أمريكا طبعاً ، تروح كوريا نقلاها و حاطاها فى عربيتها (و ده مش عيب خالص هو ده التطور بعينه و دى حاجة يحترموا عليه ، لاكن لازم كل حاجة تتحط فى مكانها ، كوريا لم تخترع أى شئ حتى الأن فى العربيات ما عدا التصميمات بتاعتها ده اذا اعتبرناه اختراع أصلاً)

واللهي انت ظالمني. على فكره ده مش عيب وعلى فكره أكتر من 95% من اللي بيركبو عربيات من أي ماركه كده حتى الالمان نفسهم وهما بيشترو عربيات بيفكرو كده. أنا مش مطلوب مني اكون فاهم فنيا في العربيات عشان أشتري أو أسوق عربيه. مش شرط اكون عارف مين اللي صنع ديسكات أو بادات الفرامل أو مين اللي صنع مثبت السرعه ولا ال abs في عربيتي. دي حاجات ميعرفهاش الا اتنين. واحد مهندس عربيات أو واحد مهتم بالعربيات ودول نسبتهم قليله جدا مقارنه بعدد اللي راكبين عربيات. متتعداش 5% بأي حال. زي بالظبط لما تشتري تليفزيون مش شرط تعرف البانل بتاعت الشاشه صنع أي شركة ولا أي دوله. طب فيه ناس قرايبي عندهم جراج مرسيدس فيه مش أقل من 10 عربيات من كذا فئه وواخدين الموضوع ده وراثه ومش بيبيعو القديم بيسيبوه للولادهم يتعلمو عليه ومفيش ولا واحد فيهم كبار وصغيرين يعرف تفاصيل مكونات العربيه ولا أي جزء من العربيه صنع أي شركة ولا يهمهم أي حاجه من دي لأن الموضوع بالنسبه لهم انهم بيجيبو عربيه فخمه وخلاص عشان البرستيج وزي ما قلتلك ده مش عيب لأن دي طريقه تفكير 95% من اللي بيشترو ويسوقو عربيات.

أيوه الشكل عامل مهم لأنه جزء من سعر العربيه وبعدين من حقي لما أدفع 220 ألف جنيه في عربيه أحس بيهم عشان هوه ده اللي عيني بتشوفه طول مانا سايق وده اللي بيديك انطباع عن جوده أي عربيه قبل ما تسوقها. شكل الصالون والتابلوه ايه لكن أكون جايب عربيه ب 220 ألف صالونها زي صالون عربيه صيني أقل من 100 ألف؟

أي حد بيشتري زيرو ومش ناوي يحتفظ بالعربيه 10 سنين مش هيدور على ان العربيه معمره ولا ان قطع غيارها ببلاش ولا متوفره ولا لاء بس هيدور على سعر شراء وكماليات وسعر اعاده بيع. أما أداء الالماني فمش كلنا مايكل شوماخر ولا طرقنا تساعد أصلا على الاستمتاع بالعربيه. يا اما الطريق زحمه وهتفضل طول الوقت بين الاول والتاني ومش هتنقل للتالت ولو مفيش زحمه فالمطبات والنقر والحفر احيانا مش هتخليك تعرف تجري ولا تستمتع بتسارع ونفس الكلام على الثبات. كل العربيات تحت سرعه 100 ثباتها واحد أو الفروق طفيفه ودي السرعه الشائعه عندنا في مصر عشان طرقنا متساعدش على أكتر من كده.

بالنسبه للألماني فهوه مختلفش في تسعيره عن الكوري والاتنين اتبعو نفس السياسه زي ما كيا طلعت سيراتو لفئه سعريه أعلى ونزلت الريو (الاصغر حجما) مكانها. سكودا طلعت اوكتافيا ونزلت رابيد مكانها ومحدش هيعرف يجيب اوكتافيا زيرو بعد كده اللي هيه أصلا الشعبي بتاع الالماني مع الاوبل فمينفعش نقول الكوري شاف نفسه. طب والالماني كده شاف ايه؟

بالنسبه للاختراعات. وفيها ايه لما أشتري حاجه مضمونه ومتجربه؟ هوه انا بدفع الفلوس عشان أخد حاجه سليمه ولا بدفع الفلوس عشان الشركات تعملني فار تجارب؟ يعني اجيب فولكس ولا سكودا بفتيس dsg عشان أساعد الشركه في التجارب ويبقى تمن العربيه تبرع مني للشركة لتطوير أبحاثها؟

على فكره انا مش متحيز وهقولك ليه. انا اشتريت عربيتي في 24 ساعه بدون ما أسأل أي حد. كنت جاي من بره بقالي اسبوعين اتصلت بالليل بسمير ريان قلت للي رد عليا أيه أكبر وأوسع عربيه 1600 سي سي في حدوود 200 ألف؟ (عشان أنا كنت هبقى مرتبط بمشوار سفر معين هاخد فيه 4 معايا لمده كام شهر فأهم حاجه كنت عايزها وسع العربيه) قالي مفيش غير الكاريز يا باشا. قلتله هاجي بكره أشوفها.

اتفرجت على كام فيديو وكام صوره ليلتها وكنت شايفها في الشارع كام مره بس مكنتش بدقق في الاسم الامهم عجبتني ولقيت كمان ان التوكيل جنبي في أبو رواش قلت فل قوي كده ورحت أشوفها تاني يوم قلت خلاص هيه دي رحت سحبت الفلوس من البنك ورجعت استلمت العربيه. هتضحك وتقول عليا عبيط وازاي تشتري عربيه بالشكل ده هقولك هيه فيها اللي أنا محتاجه وأنا مش عايز اكتر من كده ودايما وجهة نظري في اختيار أي حاجه ان اللي يناسبني مش شرط يناسب أي حد حتى لو أنا الوحيد في العالم اللي اختار الحاجه دي مادامت حققت احتياجاتي خلاص.

الكوري خاماته رديئه. ماشي مفيش مشكله. مواتير هزيله؟ ماشي مفيش مشكله. مفيش تكنولوجيا؟ ماشي مفيش مشكله. عاجباني وعاجبه ناس كتير قوي قوي قوي. بس كده...

هتقولي لو قدامك فرصه تجيب ألماني هتجيب؟ هقولك اني بقالي كام شهر عايز أغير خصوصا اني خلصت التزامات تانيه كانت مخلياني مرتبط بحدود 200 ألف للعربيه ودلوقتي جاهز لشرا بي ام 320 الجديده بس لما ركبتها حسيت اني هفقد ميزه الارتفاع اللي اتعودت عليها ومش هستغنى عنها سواء ارتفاع العربيه من الارض عشان المطبات اللي ملت البلد أو ارتفاع الكرسي من الارض لأني طولي 190 سم وكمان هخسر ميزه الوسع والحجم فمفيش بديل بعد الكارينز بالنسبه لي في الالماني غير x1 ودي بطيئه من ناحيه وتجهيزاتها بسيطه من ناحيه تانيه مش هتحسسني اني اتنقلت نقله جامده وال x3 سعرها ممكن أتصرف فيه بس اللي يخليني أفكر مليون مره اني استحرم أركب عربيه ب 600 ألف جنيه وأقف بيها في الزحمه أو أمشي أدبدب بيها في النقر والمطبات ومستمتعش بركوبها يعني من الاخر بلدنا أخرها كوري تركبه سنتين تلاته وتقلبه وتجيب غيره.

بالنسبه للي بتركن لوحدها. مفيش ولا عربيه ألماني في مصر بتركن لوحدها الا أوكتافيا الجديده اللي لسه منزلتش واللي محدش هيشتريها عشان الفتيس. ده حتى السيراتو الجديده فيه منها فئتين فيهم سنسور أمامي وده عشان تلاقيه في البي ام من 328 (475 ألف) فما فوق.