الموضوع: العربية الخفيفة أحسن من العربية التقيلة!!! اتعرف على أساسيات ثبات السيارات

المشاركة الأصلية كتبت بواسطة buddha

تسلم ايدك .... شكرا لوقتك ومجهودك



استفسار خاص :

عايز اعرف منك اية رد الفعل ال المفروض اعملة عشان اخد الملف بسرعة دون انزلاق او انحراف ودون خفض السرعة
سواء كانت العربية FWD or RWD

الله يكرمك ويعزك... يارب أكون قدرت أوضح حاجات ما كانتش مفهومة لناس كتير



بالنسب لإيه اللي نعمله عشان نقدر ناخد ملفات بسرعة أكبر (لإن مستحيل فيزيائيا إنك تاخد ملف بنفس سرعتك في الخط المستقيم بسبب انتقال الوزن).. فهي باختصار إننا نراعي كل ما سبق واتشرح في الموضوع... وده عن طريق تعديل أجزاء العربية... وعشان أوضح أكتر:

بالنسبة للوزن... فتقليل الوزن لأقصى حد مطلوب... لو تقدر

وبالنسبة للنظام التعليق... حاول تنزل ارتفاع العربية... أو تغير المساعدين والسست بأطقم أنشف عشان ميل العربية يقل... ولو تقدر تقوي الاستابلايزر وتجيب واحد أنشف

بالنسبة للكاوتش... فتركيب جنوط أكبر وأعرض من أهم التعديلات وأسهلها

وآخر حاجة في التعديل على العربيات... إنك تركب اسبويلر خلفي وسد للهوا في الأمام وتنانير جانبية... عشان تقلل من تأثير الهوا على العربية وهي ماشية... وده حنتكلم عليه في المشاركة بتاعة الإيرودايناميكس إن شاء الله




أما بقى لو عايز تاخد ملف بأقل قدر من تقليل السرعة وبدون ما تعدل على العربية... فأنصحك تعمل نفس طريقة أخد الملفات في السباقات.. والغرض منها زيادة نصف قطر الدوران بقدر الإمكان.

الطريقة باختصار هي:

1- قبل الملف تهدي شوية وتاخد أقصى الجهة الخارجية منه... يعني لو الملف يمين تاخد أقصى الشمال في الطريق، ويفضل تنزل نقلة لو سرعتك نزلت عن حد العزم للنقلة اللي انت عليها.

2- أول ما تدخل الملف وجه العربية بحيث تلمس الجهة الداخلية من منتصف الدوران تقريبا، وهنا ثبت رجلك على البنزين.

3- وجه نفسك بعد كده إنك تاخد أقصى الجهة الخارجية من الملف مرة تانية وانت خارج (زي ما دخلت الملف) ودوس بنزين عالآخر


ملخص الطريقة زي الصورة دي:




بس نصيحة.... ما تعملش الطريقة دي في طريق مفيهوش جزيرة في النص... ربنا يكتبلك ويكتبلنا السلامة كلنا.



...

المشاركة الأصلية كتبت بواسطة buddha

borio1704


تسلم يا وحش على المعلومة


استفسار اخر :
انت قولت ان معدل ارتفاع او انخفاض المقصورة عن الارض فى نسبة وتناسب بينة وبين وزن العربية
انا عايز لو ارزل عليك تانى مرة المعادلة الرياضية وهل طول العربية نفسة هيدخل فى المعادلة


بحيث لو حبيت اهبط العربية اعرف اهبطها بدرجة محسوبة رياضيا يعنى مش تهبيط وخلاص وعشان تبقى افضل نتيجة



تسلم يا صديقى

الحقيقة هو مفيش نسبة وتناسب بين أبعاد العربية ووزنها... إنما المشكلة كلها في إن أبعاد العربية نفسها ممكن تكون سبب من أسباب اتزان العربية أو عدم اتزانها



إزاي الكلام ده؟؟؟

هديلك مثال على حاجة بعيدة عن العربيات تماما...

لو عندك ترابيزة زي دي... الرجلين أو القاعدة واخدين مساحة بسيطة... إنما اللوح الأساسي واخد مساحة كبيرة



تقدر توقعها بسهولة؟؟؟

أكيد... زقة صغيرة وهي تميل على جنبها على طول



طيب إيه رأيك في الترابيزة دي؟؟؟



أكيد الترابيزة دي أثبت... طيب ليه؟؟؟


الفكرة هنا في القواعد... كل ما كانت القواعد ماسكة الوزن من الأطراف كل ما كان السيطرة عليه أسهل






طيب مقارنة تانية




طبعا... الترابيزة المنخفضة أثبت وأصعب إنك تقلبها






آخر ترابيزات بقى علشان ما نزهقش...




بفرض إن الترابيزتين ليهم نفس الوزن الإجمالي... الترابيزة اللي فيها دعامة سفلية هي أكيد الأثبت... لإن فيه جزء كبير من الوزن متركز تحت... يعني مركز الثقل بقى منخفض.

-----




نرجع بقى للعربيات...




طبق الكلام اللي فوق ده ونقول...

كل ما خليت العجل خارج بره العربية يبقى أحسن للتماسك .. مفيش حاجة تمنعك إلا إن العجل يحك في الرفرف (والرفرف ممكن توسعه)

كل ما نزلت العربية لتحت كان أفضل للاتزان... مفيش حاجة تمنعك إلا إن العجل يحك في أجزاء التعليق أو إن العجل يكون مايل على الأرض وتقل مساحة التلامس

كل ما قللت الوزن من فوق وركزته تحت... كان أحسن للاتزان... وأحسن شيء هو استخدام الفايبر والألومنيوم في الأجزاء العلوية من العربية


كل مللي بتنقصه من ارتفاع العربية في صالح الاتزان




كل مللي بتزوده في عرض محاور العجلات في صالح التماسك



كل جرام بتنقصه بشكل عام من وزن العربية هو أكيد في صالح الاتزان عموما والأداء كمان.




...