الموضوع: كي جي وان سواقة و عربيات

انا لسة بتعلم السواقة وعاوزة اعرف ازاى اهدى
اهدى بضغطة بسيطة على الفرامل ولا العربية هتهدى لما اشيل رجلى من البنزين

كنت بتعلم على عربية مروتى وكنت بطلع من غير مادوس بنزين
كنت بشيل رجلى من الدبرياج بالتدريج والعربية تطلع بعد كدا ابقا ازود بنزين
لكن لما جيت اسوق على عربيتى وهى ريتمو مش عارفة اطلع بيها خالص
وقالولى انى لازم اطلع عن طريق الدبرياج وازود بنزين
ولما بعمل كدا بطلع بسرعة مش بالتدريج وممكن البس فى اى حد قدامى
هو فيه حاجة ممكن تتعمل فى الدبرياج بحيث انى اطلع عن طريق الدبرياج بس ؟
مش عارفة بقا اعمل ايه

لما يكون فيه مطب انا بدوس فرامل لحد نصها ومش بدوس دبرياج
كدا صح ولا ايه

فيه حاجات غربية بتحصل
لما كنت بتعلم على الماروتى وبقابل مطب... لما ادوس فرامل لحد نصها كنت بعدى المطب بسهولة
لكن امبارح عملت كدا فى عربيتى وكنت ماشية على التانى
شفت المطب من بعيد ودست الفرامل لحد نصها
العربية مهدتش وفضلت تمشى بسرعة وحسيت انها نطت فوق المطب

وانا بدخل فى مدخل شارع اشيل رجلى من البنزين بس ولا ادوس فرامل كمان ؟

فرامل اليد عندى مش شغالة
هو ده خطر ولا عادى ؟

سؤال كمان بقا فى تطليع الرخصة
هو انا لو مقدمتش فى مدرسة السواقة ال فى المرور مش هيبقا صعب انى اطلع رخصة
فيه ناس بتقولى قدمى فى مدرسة السواقة تبع المرور وفى الاخر هما ال هيدوكى الرخصة
وناس بتقولى لو قدمتى فى المدرسة هيسقطوكى كذا مرة علشان تقدمى تانى وتدفعى فلوس تانى
وفيه ناس بتقولى ادى للراجل ال بيمتحنك عشرين جنيه وهو هينجحك
انهو الصح بقا

الناس بتقول طول مانتى بتتعاملى مع المرور لازم تدفعى خمسة عشرة كدا يعنى ولو مدفعتيش ورقك مش هيخلص
انا بصراحة مش حابة اعمل كدا وخايفة لحسن يقولولى رشوة بقا وندخل فى مواويل تانية هى المرور ماشية كدا ولا ايه النظام

بالنسبة للسير فى المطالع فدى اتعلمتها فى مدرسة السواقه على فرضا انك فى مطلع ووقفت
اول حاجه ارفع الهاند وبعدين لما تيجى تمشى خليك رافع الهاند ودوس دبرياج وزود شوية بنزين (حاجه بسيطه مش كتير ) حتلاقى صوت العربية ابتدى يعلى وبعدين شيل رجليك من على الدبرياج سنة سنة حتلاحظ ان صوت العربية ابتدى يقل تدريجيا فى الوقت دا نزل الهاند حتلاقى العربيه بتبتدى تطلع للامام ودى بتتعمل فى المطالع الجامده شوية

لان فى المطالع دى لو حاولت انك تشيل رجلك بسرعه من الفرامل وتدوس بنزين ودبرياج يا إما مش حتلحق وتلبس فى اللى ورا او حتلاقى العربيه نطت منك لقدام وتلبس فى اللى قدامك
مدرس السواقه نفسه اللى فى مدرسه المرور هو اللى علمهالنا يعنى متقلقوش
جربوا تعملوها الاول لوحدكوا فى مكان فاضى وفيه مطلع ويكون هادى فى الاول عشان تسمع صوت الموتور
وواحدة بواحدة حتعملها تلقائيا من غير متعتمد على صوت الموتور بعد كده

بالنسبة للحاجات الغلط اللى بنشوفها فى السواقه هى لما بتكون ماشى على الطريق السريع وشايف امامك ان الطريق مقفول مثلا عشان عربيتين نقل واحدة يمين وشمال فبلاقى كل العربيات متكربسه وراهم ولازقين فى بعض وتلاقى الطريق وراهم فااااااااااااااااضى ومبيبقاش فيه حد عارف يعدى وتلاقيهم متحفزين وهما سايقين ويزود جامد عشان نص متر فضى امامه وبعدين يفرمل جامد طب ليه كل دا وليه نزنق دا كله ياريت الكل يمشى هادى لغاية ما الطريق يوسع شويه وبعدين عديهم لكن نظام الكربسه دا مبيجبش غير العصبى وانت سايق

الموضوع بجد ممتاز خصوصا ان اللي كاتباه علا اللي شجعتني على اختيار السيريون
انا اللي محيرني فعلا تغيير الحارات انا مبغيرش غير لما تكون العريبة الجاية بعيدة جدا عني و ساعات بستنى ورا ميكروباس او اتوبيس واقف عشان مخاطرش لكن بشوف الناس بتنقل بين الحارات بسهولة نفسي اعرف ازاي اقدر انقل و لا لاء
لو حد يقدر يساعدني ؟