الموضوع: كي جي وان سواقة و عربيات

their are two ways to drive a car:

1- you drive the car

2- the car drives you

واضح طبعا ان الطريقة التانية تودى فى داهية و بالتالى لازم فى كل الاوقات تبقى العربية تحت سيطرتك الكاملة و دة مش حيتحقق الا بالسير بالسرعات المعتدلة و عدم التعامل بعنف مع عجلة القيادة و القيادة بحذر و توقع خطاء الغير

ساعات كتير بنسمع عن حادثة فى الجرنال و نلاقى مكتوب "و يرجع سبب الحادث نتيجة لاختلال عجلة القيادة فى يد السائق"... هو فى الحقيقة الدركسيون مجريش من السواق ولا حاجة انما العربية او المركبة اللى هو سايقها بدات تخرج برة سيطرتة و السائق رد فعلة كان ابطاء من المطلوب فا وقع الحادث و بالتالى دايما متخليش العربية تسبقك و تاخد هى قرار مع نفسها... لازم تبقى انت سابقها بخطوة فى كل مرة والا حتفقد السيطرة

طبعا الموضوع عايز خبرة كبيرة و بالتالى مبننصحش ان حد يجرى و هو لسة مبتدىء كا نوع من تقوية الاعصاب و كدة لان دة يندرج تحت بند الغشم البحت

لازم فى الاول الواحد ياخد على العربية... يعرف استجابة البنزين قد ايه و رد فعل دواسة الفرامل عامل ازاى و مدى استجابة الدركسيون و الخ الخ الخ فى الكيلومترات الاولى للقيادة

بعد كدة يبداء يتعرف على حجم العربية... الطول العرض و الارتفاع... العربيات الحديثة فيها بومبيهات كتير و ناس كتير لا بتبقى شايفة اخر الكابوت ولا الشنطة و الاجناب و العملية بتبقى كلها تقديرية... كل ما كان تقديرك كويس كل ما بقيت سواق احسن فى وقت اقل

بعد كدة التعامل مع الطريق... دايما اسبق الاحداث و تخيل وضع الطريق بعد ثانية او اتنين من اللحظة اللى انت فيها... يعنى لو انت ماشى على طريق و وراك من ناحية اليمين واحد غبى و عايز يعدى من اليمين و انت لامح بعينك سواق ميكروباص بيفرمل على اليمين قدام شوية... لازم تتوقع ان بعد ثانيتين تلاتة الميكروباص حيكون وقف و البيه اللى بيجرى من اليمين حيبقى قدامة حلين... اما يخش تحت الميكروباص او يرمى عليك... و بالتالى فى حالة زى كدة لازم انت تهدى سنة بحيث تفتحلة مساحة يعدى بدل ما يعمل حادثة و ممكن يخبطك برضة

الموضوع يبان انه شعوزة و كدة بس مع الخبرة و السواقة كتير حتبداء تتعلم كويس انهى مواقف بتؤدى الى ازمات على الطريق و لازم تتصرف من بدرى... زى ما تلاقى اوتوبيس مدى اشارة شمال عشان يلف من يو ترن و طبعا الاوتوبيس طويل فا بيلف على واسع و انت مكاشى فى اقصى الشمال ورا واحد ماشى عادى... لازم تتوقع ان الاوتوبيس ممكن اوى يقطع الطريق على اللى قدامك فا يفرمل بقوة و انت حتلبس فيه... يبقى لازم تهدى شوية بدرى تحسبا لما يسفر عنة الموقف... خصوصا ان الاتنين اللى حيتضرروا من الحداث مش هما اللى غلطانين اساسا

اخذر المشى ورا اوتوبيس او تاكسى او واحدة ست... و لو اللى بيقراء الكلام دة بنت او ست برضة متمشيش ورا واحدة ست

الاوتوبيس بيقف وقت ما يجيلة مزاج و ممكن يفرمل فى اى وقت خصوصا ان لو انت وراه مش حتبقى كاشف الطريق قداة و مش متوقع الفرملة.. و يا سلام لو نور الفرامل بتاعة بايظ

الميكروباص نفس النظام لكن رد فعلة اسرع من الاوتوبيس و ممكن يعمل كدة رخامة عليك مش لمجرد انة ينزل زبون

التاكسى ممكن فى ثانية يقف لو واحد هرش فى دماغة اعتقادا منه انه زبون بيشاورلة... او لو معاه زبون فعلا و قالة "على جنب يا اسطى"

الست ممكن تكون مركزة فى اى حاجة تانية غير السواقة و فجاءة تفتكر انها لازم تخش شمال او يمين و ممكن اوى تكون لقت ركنة فا تمسك فرامل قوية و شكرا (بدون زعل من البنات او الستات بس دة بيحصل بجد والله)

اخر حاجة العرز و الشد و كدة... اللى عايز يخاطر بحياتة هو حر بس ميخاطرش بحياه الناس... اما تشارك فى سباق تحت اشراف او رعاية جهات متخصصة او تعمل اللى انت عايزة و انت بتلعبneed for speed فقط

MMamdouh