كي جي وان سواقة و عربيات

**OlaOsman** · 27-09-2008 04:24 AM

طيب يا جماعة جزاكم الله خيرا.. بس عشان الموضوع ما يتحولش لتقطيم اللي بيسوقوا جديد و نقد غير بناء ليهم يا ريت نخفف من حدة لهجتنا شوية ونشرح بالتفصيل نقصد ايه من كل نقطة (ما تنسوش انكوا بتكلموا مبتدئين) و نقول على التصرف الصحيح، يعني ما نركزش اوي على الأخطاء اللي بتنرفز من غير ما نقول ايه الصح. الموضوع ده للإفادة مش للنقد فقط

**lancerevolution** · 27-09-2008 04:36 AM

الركن يكون بعيد عن الملف ب خمسة متر و فى مكان يمكن الى جاى من إنه يشوفك و يفاديك مستريح خالص
أهم نصيحة دايما سوق وتعامل مع الناس على إنهم مبيعرفوش يسوقوا و توقع الغلط منهم على طول أو القيادة الدفاعية حتكون أممن و متسوقش و أنت نايم مش مركز و خلى عينك على المكروباص و التاكسى جوة البلد بس على السريع بيبقوا برنسات من الأخر أنت جوة عرين الأسد
إنما الى جوة البلد كاد واحد منهم أن يتسبب فى إستضامى أنا و أربعة كمان بعربية لانوس فى عمود كوبرى على 120 السواقين دول أغبية و بيجروا على الركاب و مبيهموش حد

**Ayman_52** · 27-09-2008 05:27 AM

ياسلام موضوع جميل جدا لواحد مبتدىء زى....بجد الواحد استفاد والله..الف شكر لكا النصايح.

والف شكر ياعلا على موضوعك الجامد..

.وربنا يسترها علينا فى الشارع

**mahamedaraby** · 27-09-2008 05:37 AM

1-حاول تعود نفسك تبص في التلات مرايات
2-حاول تعود نفسك علي استخدام الاشارات
3-سيبك من اللي بيقعد يضربلك كلاكسات كتير (طالما عامل فيها ناصح يتصرف بعيد عنك )
4-حاول تعود نفسك علي ابعاد العربيه واعرف امكانياتها كويس واعرف برجلها قد ايه (هتفيدك في اليوتيرن ومداخل الشوارع الضيقه )
5- حاول تعود نفسك من البدايه علي الغيارات الكتير وتظبط رجلك ع الدبرياج (يعني ماتفضلش محمل عليها علي طول ) معلش هتتعب في الاول لكن هترتاح وهتريح العربيه بعد كده
6-ماتحاولش تطلع علي التاني وانت لسه جديد علشان العربيه هتطفي منك وهتعطل الطريق وهيبقي شكلك وحش
7-اعرف امكانياتك كويس ولا تثق في نفسك زياده عن اللزوم
8-ما تحاولش تطلع علي الطريق لوحدك وانت لسه جديد ماتخليش فرحتك بنفسك تعميك استني شويه لما تبقي متمكن وتمسك العربيه كويس وتتحكم فيها كويس
9-نصيحه اخيره لكل اللي هيتعلم جديد اوعي تفكر تتعلم تسوق ورجليك حافيه لأنك لو اتعودت علي كده هتفضل طول عمرك تسوق حافي
10 -حاول في اول مرتين تلاته تخلي حد يعرف يسوق كويس يركب جمبك عشان يعرفك اخطاؤك

فعلا نصايح صح كلها

واى حد بيتعلم جديد يمشى على الكلام ده

واهم حاجه اهم حاجه متكسفش لما العربيه تبطل من على الاول والناس بتتفرج عليك بكره هتتعلم وملكش دعوه بالناس خلاص

اول حاجه تتعلمها الطلعه الاوله

والركنه لو اتعلمت الحاجتين دول يبقى انت كده قطعت نص الطريق

**mas_shine** · 27-09-2008 06:54 AM

موضوع هايل ومفيد جداااااااااااااااااااوبجد تسلم ايدك
متابعة معاكى
ياريت الناس كلها تتفاعل معاه

**hazem_khidr** · 27-09-2008 06:58 AM

برافو يا علا
موضوع كويس
و طالما بتسالي يبقي حتتعلمي:)
اهم حاجه
ما تمشيش في الشمال
خدي الحاره اللي في النص و اللي عاوز يعدي يعدي من الشمال دا المفروض.
لكن برضه تبقي سرعتك نفس سرعه الطريق ما ينفعش تمشي بالراحه و واخده
الطريق كله وراكي حتي لو ماشيه شمال.
,,,,,,,,,,,,,,,,,,,,,,,
تاني حاجه المرايااااااااات
المرايتين يمين و شمال و المرايه اللي في النص لما تبصي فيهم كانك بتبصي قدامك.
و خليكي متعوده كل 5 ثواني تبصي للمرايه اللي في النص
يعني في سرك تقولي 101 102 103 104 105 و تبصي في المرايه:)
ما تستغربيش بس مره في التانيه حتلاقي نفسك بتبصي لوحدك و حتبقي متعوده عليها.
,,,,,,,,,,,,,,,,,,,,,,,,,,,,,
تالت حاجه الاشاراااااااااااااااااات
كل ما تنقلي من حاره للتانيه تبصي في مرايتك و تشغلي الاشاره و تبصي في المرايه اللي في النص
لحد ما تلاقي وش العربيه الخلفيه بقي في المرايه بالكامل تقومي تخشي الحاره واحده واحده.
الكلام دا اكاديمي شويه و صعب يتطبق بس لازم علشان تبقي مش غلطانه في حاجه.
............................
رابع حاجه
تمشي في حارتك بس بلاش تحدفي علي اللي جنبك يعني تبقي عارفه عجل عربيتك رايح فين
و اي سؤال اسالي انا تحت امرك

**OlaOsman** · 27-09-2008 07:31 AM

المشاركة الأصلية كتبت بواسطة mahamedaraby

والركنه لو اتعلمت الحاجتين دول يبقى انت كده قطعت نص الطريق

طيب مافيش حاجة سهلة تعلم الزفتة اللي اسمها الركنة دي؟

**mohamed ismail** · 27-09-2008 07:32 AM

ربنا يكرمك يا علا علي الموضوع الجميل
اولا لازم الواحد يبقي حريص وميعملش فيها ابو العريف وهو لسه بيتعلم
ثانيا خلي اعصابك في ثلاجة يعني لو قدر ربنا والعربي بطلت منك هتلاقي الكلاكسات والنور الزهق من الناس اللي وراكي لو حطيتيهم في دماغك ده هيوترك اكتر ويخليك متسرع في ردود فعلك مع العربية
ثالثا قبل ما افكر اروح يمين او شمال ادي اشارة وابص في المراية وبعدين اقرر التحرك لليمين مش اترحرك وبعيد افكر فيالاشارة والمراية
واخيرا الواحد يخليه صبور وهادي لان الحكاية مش مستهله توتر. هيبقي في البيت ولا في الشغل وكمان في الشارع

**theking2690** · 27-09-2008 07:33 AM

المشاركة الأصلية كتبت بواسطة OlaOsman

طيب يا محمود لو انا لسه عاملة يوترن و طبعا اليوترن هايحدفني على الناحية الشمال و بعد كده بشوية في مطلع كوبري برضه على الشمال.. في الحالة دي طبعا مش هاخد يمين عشان مسافة صغيرة وارجع آخد شمال تاني عشان أطلع الكوبري.. انا برضه لازلت مشيي بطئ فاللي بيحصل اني باكون واخدة الشمال و ماشية بطئ، بس اللي ورايا مش هايعرف اني عايزة أطلع الكوبري، و بالنسبة له انا كده معطلاه فيا إما بيكلكس جامد عشان أعديه او بيطلع من ورايا و طبعا مش بينسى يهاديني بنظرة من إياهم او شتيمة. المسافة اللي باتكلم عليها حوالي 100 متر و الطريق اللي باتكلم عنه ده على كورنيش الساحل.. خبرني بالله عليك ماذا تفعل لو كنت مكاني؟

لو انت قصدك على اليوتيرن اللى قصاد معهد ناصر وبعد كده هتطلعى على كوبرى روض الفرج فأنت خليكى فى الشمال عادى لأن هى كلها مسافه صغيره و بيبقى فيه مطب الناس كلها بتهدى علشان و متحشيريش نفسك فى الحته ديه فى اليمين علشان لو دخلتى يمين عمرك ما هتعرفى تطلعى الكوبرى إلا بأعجوبه واحنا فى الخدمه يا علا باشا لو عاوزنا نقلب اليوتيرن على مطلع الكوبرى عدل نقلبهولك بإذن الله انا الكوبرى ده كده كده فى طريقى كل يوم

بالنسبه للركنه تعالى فى اى شارع جانبى فاضى و اختار مكان بين عربيتين و اقعدى اركنى بينهم عندك الشارع بتاع معهد ناصر اللى كان فيه سينسبرى ده مكان حلو اوى لتعلم الليله ديه

**OlaOsman** · 27-09-2008 07:42 AM

المشاركة الأصلية كتبت بواسطة theking2690

لو انت قصدك على اليوتيرن اللى قصاد معهد ناصر وبعد كده هتطلعى على كوبرى روض الفرج فأنت خليكى فى الشمال عادى لأن هى كلها مسافه صغيره و بيبقى فيه مطب الناس كلها بتهدى علشان و متحشيريش نفسك فى الحته ديه فى اليمين علشان لو دخلتى يمين عمرك ما هتعرفى تطلعى الكوبرى إلا بأعجوبه واحنا فى الخدمه يا علا باشا لو عاوزنا نقلب اليوتيرن على مطلع الكوبرى عدل نقلبهولك بإذن الله انا الكوبرى ده كده كده فى طريقى كل يوم

شكرا يا مصطفى أدها و أدود يا باشا :)

انا عموما باكره اليوترنات و طريقي للشغل مليان يوترنات رايح جاي، أسخفهم أول يوترن في شارع النيل و انت داخله من عند البالون من ميدان سفنكس.. تحسه قرار مش سهل انك امتى تدخل اليوترن و تخلي العربيات اللي جاية من الاتجاه التاني تقف.. و الرخامة بأه لما تكون انت مستني الوقت المناسب و اللي وراك يكلكس لك عشان تدخل.. انا شايفة ان قرار اليوترن ده قرار صاحب العربية اللي في وش المدفع، يعني أول عربية داخلة اليوترن، مش قرار العربية اللي وراها.

بالنسبه للركنه تعالى فى اى شارع جانبى فاضى و اختار مكان بين عربيتين و اقعدى اركنى بينهم عندك الشارع بتاع معهد ناصر اللى كان فيه سينسبرى ده مكان حلو اوى لتعلم الليله ديه

هو مكان حلو فعلا، بس العربيات فيه راكنة عمودي على الرصيف مش موازية ليه و انا فعلا محتاجة أتعلم الركنة الموازية للرصيف دي معقداني

الموضوع: كي جي وان سواقة و عربيات

LinkBack

أدوات الموضوع

عرض

-

-

-

-

-

المواضيع المتشابهه

سواقة السيدات

سواقة عربيات نقل

ا ب سواقة

معلم سواقة

سواقة بنات

الكلمات الدلالية لهذا الموضوع

المفضلات

المفضلات

ضوابط المشاركة