الموضوع: تقييم أوكتافيا a7 بعد حوالى 5800 كيلو و مقارنتها بالسيفيك 2007 و بى ام e90 2008

المشاركة الأصلية كتبت بواسطة طارق _عبد السلام

ربنا يبارك
شكرا على نقل التجربه العربيه بدأت تنتشر وبنشوفها كتير بس لو كل اللى اشترى اوكتافيا جاء الى هنا هتلاقى كده كام واحد هيستلموه..... والفتيس ..وفلوسك راحت... وممكن اللى اشترى يتعالج نفسيا بعدها

انا مجرب ياباشا بس لحقت نفسي الحمد لله
وشكرا للاستاذ صاحب التقرير

المشاركة الأصلية كتبت بواسطة cosmicone

ممكن اضيف كام معلومه للملاك :)

اولا وانت واقف و مدور هتسمع صوت تكتكه غريبه من الموتور بس صوتها واطى
لا تقلق ده طبيعة صوت ال direct fuel injectors الي في الموتور ده و اسمع انها في الكوري زي الgdi اعلى بكتير جدا

من حلولها كفر موتور فولكس cc معرفش بيتباع في مصر ولا لا بيكتم صوت الانجيكتورز ببطانه عازله

ثانيا الدي اس جي بيوصل لاحسن نعوميه لما العربيه بتسخن مش اول ما تطلع فبراحه عليه اول المشوار

ثالثا مهم او للحفاظ على التربو عندك حرارة الزيت في الشاشه الوسطنيه
متحرقش خالص قبل ما الحراره دي تبقي ٨٠ درجه مهم اوي للحفاظ على الشاحن التوربيني و تزيتوا كويس

و ميعديش الحراره ١١٠ حسب سكودا و ١٣٠ اقصى حاجه حسب فولكس
لو وصلت للحراره دي متحرقش على الغيارات و امشي عادي بس

لما تقرب من نهاية مشوارك هدي السواقه و اقف شويه بعد ما تركن لحد ما حرارة الزيت توصل حوالى ٩٥ او اقل و بعدين اطفي المحرك
مش كويس اوي انك تطفي و الحراره ١٠٠ مثلا ولا حاجه

المعلومات دي مجمعه من مواقع للgolf r و gt و الحاجات دي من ناس غاوية سواقه و فاهمين في التربو و الحوارات دي :)

اشكرك علي المعلومة فعلا معلومة هامة عمري ماخذت في بالي اشاهد درجة حرارة الزيت بالرغم من وجودها

المشاركة الأصلية كتبت بواسطة mo7a_mo7a

مينفعش نقارن عربية مالتي لينك بتورشن بيم في الثبات خالص

حتي التورشن بيم لو من فولكس طلع نزل هو تورشن بيم يعني مساعد وسوستة فقط
طبعا سكودا بتضيف ستابليزر بس بردو ملوش دور كبير خاصة لما نقارنها بماتي لينك بعيدة اوي المقارنة دي

ثانيا طول الشاسيه مش هو السبب لان وزن العربية مش متوزع 50% -50% زي البي ام لا هو 70%- 30% وهو ده نفس النسب بتاعة الفانتازيا وبالركاب بتقل شوية يبقي الفرق في ايه ؟؟؟
الاجابة بسيطة ---- العفشة الخلفية

العزل دي حاجة تتاخد علي سكودا بس القصة انهم بيحاولو يقدموا افضل قيمة مقابل السعر في الفئة دي فبيقدموا بعض التنازلات علشان ينزلوا بالتكاليف
طبعا بالحد اللي يسمح بالمنافسة منغير ما يخسروا الزبون وطبعا شريحة الزبون الاوروبي هي الاهم والدوشة في شوارعهم محتملة وبالتالي الشكوى من العزل اقل بكتير من عندنا في مصر

انا منصحكش ابدا تقلل ضغط الكاوتش عن الموصى به لانه حياثر معاك بالسلب جدا علي الاتزان وعلي الكاوتش نفسه

وبعدين متنساش ان 3 او 4 بار مش حياثروا ابدا علي الارتفاع بتاع العربية ولا علي التراكشن بالقدر المعنوي اللي يؤدي انك تعمل تغيير

الحل انك تتعود علي اداء العربية بالشكل ده وخصوصا انه مش كارثي هو بس مختلف


بالنسبة لدرجة حرارة الزيت هو يستحمل لحد 130 عادي بس الحرارة الزيادة بتاثر علي عمر وخواص الزيت مش علي الموتور مباشرة وبالتالي بننصح الناس اللي بتحرق كتير علي مواتيرها يغيروا الزيت علي نصف عمره يعني علي 5000 بدل 10 الالف

اخيرا بالنسبة للفتيس بجدد نصيحتي لكل ملاك الدراي ديوال كلاتش انهم يحولوه مانيوال في الزحمة علشان يطولوا عمره الافتراضي لاقصي حد ممكن ويمكن ده يكون مفيد لحجات تانية كمان اهمها اصوات الخشونة

الاستاذ mo7a
انا عملت بنصيحتك وفعلا في الزحمة بشتغل مانيول بس في مشكلتين محتاج راي حضرتك فيهم
اولا صوت العربية بيعلي وبحس بعداد الربي ام عالي وبالتالي بتأكل بنزين
الكمبيوتر علي الشاشة بعد ١٠ دقائق كده تجبرني يطلب مني للتحويل للوضع D اي للاوتوماتيك
برجاء الافادة

المشاركة الأصلية كتبت بواسطة cosmicone

عربياتنا الفئه الاولى 2014 الى فيها الدركسيون بقا جلد

انا هكتب التقييم و لو فى اى اسئله حتى فى تفاصيل التفاصيل اسئلوا عادى , انا كده كده من النوع المحسوك اوى فبلاحظ دبه النمله فى العربيه للأسف :)

الموتور
لا يقارن طبعاً و لا بالسيفيك ولا بالبى ام خالص
ولا فى الأداء و لا فى استهلاك البنزوين

التربو مش مجرد 0 - 100 بس , التربو فى السواقه العاديه فوايدو انك بتشد على اى نقله لحد السابع عادى جداً
لو محمل ناس و تكييف و الشنطه مفيش أثر زى العربيات الى مش تربو , يعنى بتسوق عادى جداً مبتحسش بكل ده

طيب لو سايق ملمس على الدواسه و التربو شبه مبيشتغلش بتبقى موفرة بنزين جداً جداً
انا مشوارى يومياً مدينة نصر - القريه الذكيه عن طريق الدائرى

من غير شد و اى ان كانت السرعه ممكن اوصل و الكمبيوتر قارى 5 و كسور ليتر لكل 100 كيلو

طبعاً مع التربو و الضغط جامد على الدواسه بتشرب البنزين :)

التكييف
فوجئنا انو كويس جداً و لله الحمد حتى اجسن من بتاع الهوندا

الinfotainment system
من الكاسيت و الشاشه الى بين العدادات رائعه و فيها اغلب ما تحتاج اليه و زياده

الوسع و الشنطه انتو عارفين

العفشه
ناشفه و بتعمل ساعات اصوات مش عارف ليه بالذات ورا , يمكن بدأت دلوقتى تبقى احسن شويه مع الوقت بس مازالت نشفه
اصوات زى نبضات عاليه فى الحفر و ليها ايام تحس انها مخلعه شويه

الفرامل
قويه جداً لله الحمد علشان العربيه خفيفه كمان عن الفانتازيا فالفرامل كلبشه زى الفرنساوى كده من اول ما تلمس الدواسه

الثبات
فيه مشاكل و دى و حاجه تانيه هذكرها اكتر عيب مكناش متوقعينه فى العربيه انا و ابن خالتى
العربيه فعلياً بتلعب مع الرياح الجانبيه و بتلعب من الخلف بالذات مع الطريق :(
الدركسيون ناعم اوى و sensitive جداً و مفيهوش dead center خالص يعنى سنترتوا صعبه و حركتوا متواصله على طول محتاج inputs & correction من السواق بشكل ممل جداً

الغريبه ان العربيه احساس السرعه فيها منعدم مقارنة حتى بالبى ام يعنى انت فجاًه بتبقى 200كيلو عادى جداً بس العربيه بتتمرجح مع الهوا الجانبى و اطلع على محور n/a و حاول تفضل فى track بالعافيه

حتى الأن مش عارفين حل للموضوع ده و بسأل بره على موقع بريتش سكودا و بردوا محدش عارف حل بس العربيه فعلاً كبيره و عاليه و خفيفه

الفتيس
ناعم جداً فى نقلاته و سريع طياره فى النقل و المودز الى فيه رائعه
الخشونه الوحيده فيه لو طالع الاول او الرجوع للخلف و فيه عائق او مطلع بيخشن شويه لحد ما يطلع


العزل
ارض و موتور تحفه لله الحمد
المشكله التانيه بقا الغريبه عزل الصوت الخارجى
ضايع
لو واقف زيرو و مقفل كل حاجه تسمع بوضوح لو عدى جنبك ناس بتتكلم او موتوسيكل او عربيه نقل و تلاقى ايدك لا ارادى راحت لزراير الأزاز تتأكد من قفلها

ابن خالتى لاحظ ان الزجاج رفيع جداً جداً مقارنة بالبى ام و ده فعلاً حتى مقارنة بالألنترا الكورى و الأزاز الأمامى ضعيف تنين مقارنة لاسيفيك و البى ام و اخدنا انا و هو زلطه و عملت شروخ فعلا فى الأزاز
حاجه محصلتش معايا فى الهوندا مع ترزيع طوب و زلط على الدائرى حوالى 6 سنين.


الخلاصه العربيه حلوة جداً ما شاء الله لو بتمشى على 100 الى 120 فهيا برفكت مش مجرد حلوه بس
الأوبشنز الى فى اول فئه بصراحه متخليكش محتاج تتدفع فى الفئات الأعلى.

اشكرك يافندم علي التقرير
انا من ملاك السيارة وعندي تشابه في الرأي مع حضرتك في بعض النقاط
بص انا راجع اليوم من اسكندرية وصلت لحتي ١٩٠ ومحمل شنط تقيلة ومشغل التكييف علي ٥ ومعي اسرتي وفعلا ثبات السيارة كان جيد علي الطريق
حصل حاجة حد فتح الزجاج من الخلف فعلا حسيت بأصوات غريبة بس الي سافر اليوم يعرف ان الهواء كان غير طبيعي وانت ماشي 180-190 فأكيد ده طبيعي

المشاركة الأصلية كتبت بواسطة elmesallamy_be

اولا مبروك علي العربية
ربنا يبارك ليك فيها ويرزقك خيرها ويكفيك شرها
العربية مشاء الله تحفة وجميلة جداً والحمد لله أنا معايا اختها
اما بقي عن الهواء اللي بيخبط علي العربية وبيأثر في السرعات العالية
ممكن تجرب تمشي في وقت الرياح فيه تكون خفيفة وشد براحتك ومش هتسمع الكلام ده خالص
اما بقي في سؤال كان بخصوص خربطة او تكتكه قدام خفيفه بتظهر مع المطبات ، فربنا يطمئن قلبك لان الصوت ده كان مخوفني جدا
اما بقي في حوار العزل فده موضوع نسبي الي حد ما أنا مش بحس أني
سامع الناس بالشكل الملحوظ اللي انت اتكلمت عنه بس للأسف الناس هيا اللي صوتها بقي عالي بزيادة
لكن علي السرعات العاليا يعني من اول مثلا 140 بحس بهجوم الصوت بشكل شويه عالي
لكن لو حابب تقتنع بالعزل هات عربيه لانسر وسوق علي 60 وانزل روح عربيتك وهات 160 هتحس بمعني العزل في
عربيتك
بس يبقي سؤال أنا مش عارف ليه أجابه كل اما حد يركب معايا يحس انه عايز يرجع ويقول حساس أني راكب طياره وودانه توجعه ؟
اتمني ان اري اجباتكم علي سؤال

هاهاها اتفق مع حضرتك في موضوع الطيارة سمعته برده من اكثر من صديق واري انه راجع
عزم السبورت درايف لما يشتغل صراحة انا عن نفسي بحس اني راكب طيارة وايضا عزم العربية من الثبات
ولو فتحت الزجاج تحس الهواء داخل بشكل مخيف
دي اجابتي

المشاركة الأصلية كتبت بواسطة mostafa_dreem

الاستاذ mo7a
انا عملت بنصيحتك وفعلا في الزحمة بشتغل مانيول بس في مشكلتين محتاج راي حضرتك فيهم
اولا صوت العربية بيعلي وبحس بعداد الربي ام عالي وبالتالي بتأكل بنزين
الكمبيوتر علي الشاشة بعد ١٠ دقائق كده تجبرني يطلب مني للتحويل للوضع d اي للاوتوماتيك
برجاء الافادة

يا كبير

رجع الفتيس لل دى
و اقفل الزجاج علشان الدراج
و متشغلش المحرك كتير واقف و الكلام ده مجرد eco tips
انت براحتك مش مجبر

انا عموماً لاقيت ان المنيوال فى الزحمه الشديده مش مريحنى و لا مريح العربيه

انا بمشى زى ما وصفت كده حلو جداً جداً ما شاء الله

الدى تسيبها تطلع سموز جداً و بعدين بنزين خفيف و بعدين وقفه تانى يبقى الn و هكذا

ممكن حد مش من اصحاب العربيه يقول ايه الشغلانه دى وانا اعمل كده ليه ما اروح اجيب اى عربيه تانيه و خلاص

الفكره ان الاداء بتاع الموتور و الفتيس دول لا يقارنوا خالص بأى حاجه هتشتيرها تانيه غير لو تربو او بدا من 2500 سى سى

المشاركة الأصلية كتبت بواسطة المنسي

شكرا لصاحب الموضوع عن التقرير وربنا يبارك لك فيها ويديك خيرها ويكفيك شرها

أمين يا رب العالمين