الموضوع: زي النهاردة من 16 سنة ...الزلزال .. فاكرين ايه اللي حصل

رحت لجدي كان قاعد بياكل (و كان في أواخر ايامه يعني) .. اقوله يا جدو تمساح يا جدو!!! .. قاللي روح قول لأمك تجيب الفاصوليا .. والدتي جابت أختي الصغيرة كان عندها سنة ساعتها و قعدتنا تحت ترابيزة و قعدت تقرأ قرأن .. حاولت تقوم جدي بس هوا كان مصمم يكمل الفاصوليا .. المهم الزلزال خلص و جدي ولاااااا حس بيه أصلاَ .. و قام من عالترابيزة قال "انا عايز أشرب شاي" .. بعد كدة بقي والدتي شرحتلي إيه اللي حصل

الله يرحمه انا كمان ستى قولنلها فى زلزالى قامت دخلت تانم

كان عندي 7 سنين و كنت في تانية ابتدائي

كنت لسه راجعة من المدرسة و ماما عملت لي الاكل و انا غيرت هدومي و اكلت و روحت عشان انام

كانت اختي الصغنونة نايمة و كانت لسه هي كمان راجعة من مدرستها (مكناش مع بعض السنة دي)

لقيتها نايمة فروحت عشان ابوسها و اغطيها (حنينة من يومي):D

و انا ببوسها لقيت الشباك اللي فوق سريرها اتفتح فجأة

و العمارة بترقص بينا

ماما و بابا اوضتهم معانا في نفس الطورقة في الشقه

بس ماما مش كانت عارفة تيجي اوضتنا لان من شدة الزلزال هي اوضتها كانت بالنسبة لنا تحت و احنا فوق

و كل ما تحاول تيجي اوضتنا تتزحلق و تقع

و بعدين عقبال ما عرفت توصلنا انا و اختي فتحت باب الشقه و رمتنا بره و قالتلنا اجرو بسررررعه انتو

لانها مكانتش ينفع تجري باللبس بتاع البيت فاتكسفت و رمتنا احنا بسرعه عشان نجري

لانها افتكرت ان العمارة بتقع

بس احلي حاجة بقي ان شارع الهرم و فيصل كله بعد الزلزال مباشرة كان نايم في الجنينة اللي في النص في الشارع

:k48::k48::k48:

عن جد كل الناس من مختلف الطبقات كانوا قاعدين في الجنينه دي

بابا كان راجع من الشغل و السواق كان سايق و هو كان نايم

فاساسا محسش بحاجة و لا عرف انو كان في زلزال الا لما دخل القاهرة لما فوجيء ان الناس كلها قاعده في الشارع بلبس البيت و السليبرز :k48:

و قعد يسأل نفسه هو فيه ايه؟

هي الناس اتجننت؟ :k48:

الله يرحمه و يغفرله و يسكنه فسيح جناته

ادعوله يا جماعة بالرحمة

انا كنت ساعتها فى سنة تالتة هندسة وكانت الدراسة لسة بادية
وكانت خالتى اطال الله عمرها عندنا فى البيت بتساعدنا فيما ختص بشئون البيت لأن والدتى رحمها الله كانت فى مرضها الأخير(توفيت بعد الزلزال ب 12 يوم) ، وكنت انا لسة راجع من المانيا وجايب كومبيوتر 386 sx (كان عجبة ايامها زى الكوادراكور ديو النهاردة) ، الهم خالتى قررت انها تنضف مكتبى، فطلبتى منى انى اجى اشيل الكومبيوتر علشان تنضف تحتيه. المهم قلت لها تعالى شيلى معايا(اجهزة الكومبيوتر وقتها كان وزنها بيعدى ال15 كيلوجرام) ، ورحنا شايلين الكومبيوتر من على المكتب علشان نحطه على الأرض، يادوبك شلناه وراح الزلزال مشتغل، وكل اللى جه على بال خالتى القروية الطيبة ساعتها انها عملت حاجة غلط فى الكومبيوتر وهى شايلاه هى اللى سببت اللى بيحصل ده اللى هى مش عارفة هو ايه، فضلت تصرخ وتقول "يالهوى ياخالد، الكومبيوتر ياخالد، وانا وهى واقفين شايلين الكومبيوتر قصاد بعض وعمالين نرقص مع الزلزال ومش عارفين نتحرك خطوة واحدة، فضلنا فى الوضع ده لحد ما الزلالاز خلص، بعد ما خلص انا بصيت لها وقلت لها بهبل كدة(ده باينه كان زلزال وللا ايه) المهم حطينا الكومبيوتر على الأرض وبدأنا نستوعب فكرة ان ده كان زلازال ، اجمد زلزال شفناه فى حياتنا، وبدأنا رحلة الاطمئنان على الأقارب، وبعدين ابتدت قصة توابع الزلزال ،والتى وضعت كلمة (توابع) فى قاموسنا اللغوى المعاصر لأن محدش كان يعرف كلمة توابع دى ولا كان بيستخدمها قبل زلزال 12 اكتوبر 1992