الموضوع: ما خاب من استشار تحت امركم فى اى استشارات مالية او عقارية

المشاركة الأصلية كتبت بواسطة wael

شكرا يا باشا على التوضيح السهل و اعتقد ان حضرتك فى رد من ردودك ذكرت البورصة و الدراسة قبل البداء فيها........بس انا كان لي تعليق لو تسمحلى, ان فهمى البسيط للبورصة بعد قراءة و متابعة لفترة انها زى تربيزة القمار لازم حد يخسر علشان تكسب و طبعا الى بيخسر بيكون العضو الجديد الى داخل جديد بدون دراسة او خبرة و يمكن اكون مخطئ فى وجهة نظرى دى و حضرتك تصححلى.....طيب الدراسة من اية و فى اية و هل هى مجرد risk ولا فيها calculated risk ....و شئ اخر انت اوردت سيرة مصنع الحجر الصناعى و عوائد الاستثمار فية فمكن بعد اذنك شرح اطول بس..... و شكرا على ذوقك.

بص ياباشا البورصة هى وسيلة التمويل الرئيسية للشركات فى معظم دول العالم و هى وسيلة التمويل الوحيدة للشركات فى أمريكا
الفكرة ان المستثمر بدل ما يحط الفلوس فى البنك بيمول هو الشركات بشكل مباشر سواء بنفسه او من خلال صناديق الاستثمار الى بيديرها خبراء
طيب جميل قوى بس هل العائد بيبقى واحد و المخاطرة بتبقى واحدة لكل الشركات طبعا لا
يعنى مثلا سهم شركة فيزا الى كروتها مع معظمنا كانت من كام سنة ب 40 دولار دلوقتى 210 دولار يعنى الى درس الشركة و قرر يستثمر فيها حقق 500 % طيب هو كده كسب طب فى حد خسر قصاده
الاجابة لا محدش خسر الى خسر فى الشركة خسر من المكسب الى كان ممكن تحققه يعنى مش خسارة فعلية
طول ما انت بتختار اسهم مالية قوية و بتختار التوقيت الصح يبقى احتمالات الخسارة بتقل جدا و حتى لو خسرت علشان فيه ازمات اقتصادية او انخفاض فى البورصة دايما يبقى قراراك ممكن تقبل الخسارة او تستنى صعود قادم
الدراسة شقين دراسة مالية توريك مستقبل الشركة دى و دراسة لتوقيت الدخول و الخروج من خلال التحليل الفنى لو اجدت الاثنين احتمالات الخسارة بتقل جدا
مشروع الحجر الصناعى هشرحه بعد ما خلص الرد

ردا على كل التساؤلات المتعلقة بالاستثمار
نقسم حجم الاستثمار قسمين
الاستثمارات فوق 500 الف و تحت 500 الف
و نقسم طبيعة المستثمر قسمين قسم يحتاج دخل شهرى و قسم يحتاج عائد راسمالى طويل الأجل
و نقسم طبيعة عمل المستثمر قسمين قسم تمكنه الظروف من ادارة العمل بنفسه و قسم لا تمكنه الظروف من ادارة العمل بنفسه
و نقسم مدى تقبل المستثمر للمخاطر الى قسمين مستثمر متحفظ و مستثمر غير متحفظ ممكن يتقبل مخاطر
و نقسم المدى الزمنى للمستثمر يختلف فيه واحد ممكن يحتاجها بعد سنة و واحد مش محتاجها خالص وواحد محتاجها بعد خمس سنين

علشان اعرف اجاوب على اي سؤال لازم اى حد يحدد لى هو مين من التقسيمات الى فوق
يعنى مثلا لو مستثمر تحت 500 الف و معندوش القدرة يدير استثمار بنفسه او عنده وظيفة تشغله و يحتاج دخل شهرى و متحفظ مش عايز مخاطر يبقى حله الوحيد يحط فلوسه فى البنك
طب لو نفس المستثمر مش عايز عائد شهرى يبقى ممكن يجيب سبائك دهب او ودائع بالدولار مثلا
طب لو نفس المستثمر ممكن يتقبل المخاطر يبقى ممكن يحط جزء من الفلوس فى صندوق استثمار فى البورصة
يبقى علشان اعرف انصح اى حد لازم الأول يفكر هو مين من الى فوق دول