ما خاب من استشار تحت امركم فى اى استشارات مالية او عقارية

**mfe** · 22-09-2014 12:19 PM

المشاركة الأصلية كتبت بواسطة barsim

السلام عليكم
متشكرين كتير يا دكتور على نصايح و وقت حضرتك لافادة الاعضاء المحترمين
كنت حابب استشير انا ملاحظ ان حضرتك معجب وبترشح ماونتتن فيو للاسباب الي حضرتك ذكرتها
طب لو هنعمل مقارنه بينها وبين مشروع جديد اسمو ناينتي افنيو تابع لشركة تبارك القابضه موقعها على التسعين امام جامعة المستقبل والجامعه الامريكيه الارض الفاضيه الي واخده ناصيه 60 فدان. الشركه مهتميه بالمشروع ده جامد البناء على 18% مصممين عالميين للمشرع واللاند سكيب ومعمول سمارت هوم بيبيعوا المتر
ب 11000 والصيانه 10 % هما لسه معملوش الاعلانات بتعتو بس المبيعات شغاله . ماونتن فيو بيبيعو النهارده المتر ب 9800 انا محتار بينهم فياريت حضرتك ترشحلي مين فيهم او لو في حاجه افضل مع الاسباب
مع جزيل الشكر

هقول لسعادتك على حاجة معايير اختيار اى كومباوند هى بالترتيب
1- الموقع
2- سمعة الشركة المنفذة و سابقة اعمالها
3- مساحة الأرض المبنى عليها المشروع
4- الخدمات المقدمة داخل الكومباوند
تعالوا كده نفكر احنا بنسكن فى كومباوند و بندفع فيه ضعف السعر ليه ، نتيجة احساس الأمان و التميز و الخدمات المقدمة لو ده موصليش يبقى الكومباوند ملوش اى لازمة
طيب كل واحد يعمل مجموعة عمارات او فيلل و يحوطها بسور تتسمى كومباوند طبعا لا و بيجبرنى لو عايز اشترى علبة سجاير او اى حاجة بسيطة لازم اخرج بره الكومباوند
عامة شركة تبارك سمعتها كويسة بس مش من ظمن الفئة الأولى من المطورين
اشهر المطورين فى مصر بدون ترتيب
عامر
ماونتن فيو
اعمار
بالم هيلز
سوديك
الباثيو
طلعت مصطفى
صبور

**mfe** · 22-09-2014 12:28 PM

المشاركة الأصلية كتبت بواسطة wawamoha

جزاك الله خيرا عل افادتك للاخرين ......

عندي قطعه ارض طالعالي في 6 اكتوبر باسمي ... اسمها القرعه ب - اللي هيا خلف حي الاشجار

للاسف الشديد - زي مانت عارف - بنم حواليها 4 مناطق ابني بيتك و بالتالي سعرها نزل قوي و بقت في الارض

بفكر ابيع الارض - عن طريق توكيل - لاني استلمتها خلاص و اشغل الفلوس في حاجه تانيه ..

ايه رايك في مساله بيع الارض مبدئيا ؟
و تقترح ايه عليا اشغل فيه الفلوس - حوالي 500 الف- علشان محتاج فلوس ابني قطعه تانيه ؟

وشكرا مره تانيه و بارك الله فيك

جميل نصيحتى حاول تبيع و تجيب فى الشماليات المستقبل دلوقتى هناك و لو مش عايز خلى الفلوس وديعة لغاية ما تبدأ بناء الأرض التانية لان تكلفة البناء غليت و هتغلى تانى

**mfe** · 22-09-2014 12:34 PM

المشاركة الأصلية كتبت بواسطة Amro_ON

جزاك الله كل خير عنا
يا ريت اعرف احسن مكان اجيب منه سبائك او جنيهات ذهب ولو في سبائك سويسريه في مصر

شكرا جزيلا

فى الصاغة او فى ميدان الجامع و فيه اكتر من شركة مصرية متخصصة بتنتج دور على gold bullion egypt
بس خد بالك السويسرى فيه متقلد اشترى من محل ليه سمعته و بفاتورة

**mfe** · 22-09-2014 12:39 PM

المشاركة الأصلية كتبت بواسطة a_taamer

ما هو التقيم الاستثمارى لشراء شقه فى منطقه هليوبلس الجديده
مع العلم ان اسعار الشقق بقى نار المتر بقى تقريبا من شركه مصر الجديدة قرب 3000 جنيه
والمنطقه لسه تقريبا فاضيه تماما

زى مقولت انت بالضبط هيليوبلس الجديدة فشلت نتيجة الأسلوب العقيم الى اتخططت بيه افضل عنها عمارات الشروق الى بتطل على طريق السويس ارخص و افضل بمراحل او تزود شوية لغاية 4000 المتر و اشترى فى مناطق الفيلل الجديدة فى التجمع هتلاقى السعر ده بسهولة فى التمر حنة جنب اللوتس و الرحاب

**wawamoha** · 23-09-2014 08:29 AM

المشاركة الأصلية كتبت بواسطة mfe

جميل نصيحتى حاول تبيع و تجيب فى الشماليات المستقبل دلوقتى هناك و لو مش عايز خلى الفلوس وديعة لغاية ما تبدأ بناء الأرض التانية لان تكلفة البناء غليت و هتغلى تانى

شكرا يا دك .....
وانا فعلا اشتريت في الشماليات ... الحمد لله
تقدر تقوللي ايه انسب وسيله لاستثمار ٥٠٠ الف
غير انك تحطهم وديعه بحيث:
يحافظم عل قيمه الفلوس الحقيقيه - عل الاقل
سهوله البيع والتكييش
المده المتوقعه للاستثمار - سنتين
وشكرا تاني - بارك الله فيك

**شريف الهواري** · 07-10-2014 12:36 PM

السلام عليكم
بعد إذن حضراتكم حد يعرف معلومات عن قرية عايدة بيتش بالساحل الشمالي معروض عليا شاليه هناك

**ahmed76** · 13-10-2014 01:29 PM

متابع

**Hanan Ahmed** · 14-10-2014 11:56 AM

أ/ محمد
لك جزيل الشكر على معلوماتك القيمة
انا اتصلت بشركة مصر الجديدة علشان استفسر عن مشروع هليوبارك ، 5 اتصالات وفشلت انى أوصل للمبيعات حسيت انى بكلم جهة حكومية والناس بتتعطف انها ترد عليك!!! واللى بيرد على التليفون اخر ما زهق قالى اصل النهاردة فيه مزاد!!! هي المبيعات كلها بتبقى في المزاد؟!!
المهم انا كنت بتصل لانى مش عارفة أي حاجة عن مشروع هليوبارك ولا حتى موقعه
كان من فترة اتعرض شقة في التجمع الخامس تابعة لوزارة الأوقاف لسة ما بدأوش بناء ومش عارفة هيبدأوا امتى اصل بقالهم سنين كده. هي اجمالى بالاوفر حوالى 350 الف ومساحة 120 متر صافى،، هل لديك معلومات عن المشروع ده وهل ده فرصة لان مفيش الأسعار دى في التجمع طبعا ... هو كمباوند جمعيات يعنى كمباوند لوزارة الكهرباء، وواحد تانى اتصالات وواحد صحفيين وهكذا
مين افضل للسكن هليوبارك ولا شقة الأوقاف ؟!! وأسعار هليوبارك ايه ومكانها فين؟
بكرر شكرى لمعلوماتك القيمة

**Eslam.Elrefaey** · 14-10-2014 01:36 PM

مشروع هليوبارك لسا قدامه كتييييييييير مش اققل من سنتين ونظام الدفع فيه هيبقا مزاد على المقدام يعنى كل واحد يقول انا هدفع مقدم 50 واحد يزود يخليه 60 وهكذا وهيبقا مستواه حلو ومكانه على ما اتوصفلى جمب مدينتى (الكلام من مهندس فى الشركة )