الموضوع: تقرير استلام التو 2015 الشكل الجديد

جبت دلايات للعجل الاربعه ب 45 جنيه بس لسه مركبتهمش
وجبت كاسيت بفلاشه صينى ب150 جنيه ولسه هاركبه
وجبت استيكر احمر ولزقته ع السقف علشان هركب شبكة باذن الله علشان السقف ميتجرحش
بس مش ناوى اروح التوكيل نظرا للشكاوى الكتير دى
وباذن الله هعمل الصيانات بره وربنا يستر زى ماعملت فى الماروتى قبلها.

المشاركة الأصلية كتبت بواسطة amr axel

الف مبروك العربية يا باشا ربنا يديك خيرها و يكفيك شرها
و ان كنا نتمني انك ترفق بالتقرير صور للعربية الصالون و الحوض
العربية ديه شوفتها قبل ما يتم الاعلان عنها حتي ميكانيكة و عفشة نفس الالتو الموديل اللي قبلها لكن باختلاف شكل داخلي و خارجي و اضافة كماليات

الله يبارك فيك ياباشا

باذن الله هعمل تقرير اخر الاسبوع

بس حد يقولى رفع الصور ازاى

المشاركة الأصلية كتبت بواسطة amr axel

الف مبروك العربية يا باشا ربنا يديك خيرها و يكفيك شرها
و ان كنا نتمني انك ترفق بالتقرير صور للعربية الصالون و الحوض
العربية ديه شوفتها قبل ما يتم الاعلان عنها حتي ميكانيكة و عفشة نفس الالتو الموديل اللي قبلها لكن باختلاف شكل داخلي و خارجي و اضافة كماليات

صور العربية موجودة فى الصفحة 3 وحاولت احطها فى اول الموضوع فى الصفحة الاولى بس ماعرفتش اعمل تعديل ... يا ريت من حضرتك تنقلها الصفحة الاولى عشان تبقى مع الموضوع الرئيسى

المشاركة الأصلية كتبت بواسطة mrghost

جبت دلايات للعجل الاربعه ب 45 جنيه بس لسه مركبتهمش
وجبت كاسيت بفلاشه صينى ب150 جنيه ولسه هاركبه
وجبت استيكر احمر ولزقته ع السقف علشان هركب شبكة باذن الله علشان السقف ميتجرحش
بس مش ناوى اروح التوكيل نظرا للشكاوى الكتير دى
وباذن الله هعمل الصيانات بره وربنا يستر زى ماعملت فى الماروتى قبلها.

الف مبروك على الكماليات يا باشا
كنت عاوز اعرف جبت الدلايات من التوفيقية ولا منين ... وهل هى بتاعة الالتو ولا اى دلايات هاتركب ؟؟

الحمد لله تم تجربة العربية على طريق السفر القاهرة - اسكندرية رايح جاى فى 24 ساعة
واليكم نتائج التجربة:
1- انا عملت بالظبط فى 24 ساعة 500 كيلو بالظبط اغلبهم طرق سريعة
2- وانا رايح كان معايا فردين واحد قدام وواحد ورا ... وانا راجع كان معايا فرد واحد بس
3- وانا رايح كنت ماشى 100-120 عشان الطريق كان زحمة ماكنتش عارف اجرى ووقفت فى الرست شوية ... العربية ثابتة على الارض فى السرعات العالية الا لما حد بيعدى من جنبك ... الهوا بتاع العربية اللى معدية من جنبك بيحرك العربية حركة خفيفة يمين او شمال ... بس مش مؤثرة اوى لدرجة انى مرة جربت وسبت الدركسيون فترة طويلة ملقتش اى حدفة ولما عربية عدت من جنبى العربية راحت يمين سنة وردت تانى من غير ما امسك الدركسيون
4-وانا راجع عديت بيها ال140 بس ماوصلتش لل 150 لانى لقيتها هاتبتدى تهيس منى وابتدت تبان رجة فى الدركسيون والعربية كلها فرجعت على 120 وثبت رجلى على كده طول الطريق وماخدتش رست ... العربية على 120 بسم الله ما شاء الله ثابتة
5- البنزين :: طبعا فى خلال اول تفويلتين كنت بحسب البنزين لقيتها بتعمل معايا 17 كيلو فى اللتر داخل المدينة ... لما سافرت وانا راجع قبل بوابة اسكندرية ب 20 كيلو دخلت افول وصفرت عداد الترب ولما وصلت بعد بوابة القاهرة بشويتين فولت تانى ... لقيت العربية خدت 10 لتر ( بالظبط 9.8 لتر ) .. بصيت على العداد لقيتها عامله 185 كيلو ... يعنى بتاخد على طريق السفر 18.5 كيلو فى اللتر وده متهيالى معدل كويس جدا لاستهلاك البنزين
6- فى النهاية مفيش اى ملاحظات على العربية قبل واثناء وبعد السفر نفس النتيجة متأثرتش باى حاجة الحمد لله

هتركب شبكه ! قصدك شبكه تحط عليها حجات و انت مسافر مثلا ولا شبكه ايه مش فاهم لوسمحت وضحلى الموضوع دا هل العربيه تستحمل شبكه او فيها مكان لشبكه تتركب و بتتجاب منيين و شكرا مبروووك

يعنى اخرها 140 طب كويس ...طيب و بقيت العداد لحد 180 منظر ؟؟
الحركه بتاعه الرعشه و الرجه دى حصلت معايا ف الافيو بس مش فاكر على سرعه كام هى فوق 120 خفت و اتراجعت بردوا زيك وقولت الطيب احسن شويه و سيبت العربيه تجرى لحد ما جت عند نفس النقطه مش فاكر بالظبط سرعه كام و عملت الرعشه دى اصريت اكمل و عديت مؤشر الامبير فالنقطه دى و بعدها العربيه ظبت لحد ما وصلت لل 180 ملحقتش اوصل 200 لصراحه كان نفسى اقفل عدادها على طريق مطروح

السلام عليكم و رحمة الله
الاخوة الكرام -- بالنسبة لموضوع السرعة بالسيارة التو
من خبرتي في تلك السيارة --
لن تستطيع ان تزيد عن 140 كيلو في الساعة اذا كانت القيادة عكس اتجاه الهواء -- و سوف تحس ان السيارة جايبة اخرها -- انا شخصيا عديت بها 145 او 150 -- علي مصر اسماعيلية الصحراوي -- مع اتجاه الهواء -- -- و لكن لخفة وزن السيارة و صغر مساحة قاعدة العجلات -- فلا ينصح ابدا بتجاوز هذه السرعة - و يفضل 120 و علي فكرة -- العربية تعتبر ثابتة علي السرعات بذلك وده نادرا لما بيكون في عربية بذلك الحجم و الوزن.
-- موضوع الشبكة -- مش اي حد يركبه -- عشان ما يبوظش شكل العربية --
من وجهة نظري الخاصة -=---- نقطة ضعف تلك السيارة هي شيئين:
طبعا مع الوضع في الاعتبار انك من الاساس فاهم و عارف انك بتشتري سيارة صغيرة الحجم
1-كانت هذه السيارة تحتاج الي 10 سم طول في الصالون الداخلي -- عشان اللي قاعد ورا -- لان بصراحة قمة الغباء --- اما موضوع انها تزيد في العرض -- زي ما قلنا -- انت شاري و عارف انك هاتركب سيارة صغيرة
2- كانت هذه السيارة تحتاج الي مساعدين خلفية اكثر قوة من التي فيها -- عشان لو مركب 2 ورا و اكلت مطب هواء مثلا علي الدائري علي سرعة 100 مثلا -- ها تلاقي العربية تتهبد علي الاخر و تجيب اخرها -- مش معني كده ان المساعدين و حشة و لكن كانت تحتاج المزيد من القوة.
بالتوفيق للجميع