الموضوع: تقرير استلام التو 2015 الشكل الجديد

المشاركة الأصلية كتبت بواسطة ibrahimahmed

مبدئيا كل اللمب دى بتنور لما تحط مفتاح العربية فى الكونتاكت وتلفه على وضع ال acc ولما بتدور العربية المفروض كل اللمب دى بتطفى ماعدا لمبة فرامل اليد .. بتطفى لما تنزل ايد الفرامل ... لو اى لمبة فضلت منورة والعربية دايرة يبقى الحاجة اللى بتشير اليها اللمبة فيها مشكلة ... ندخل بقى على لمبة لمبة
نبتدى بالعمود اللى على اليمين:
اول لمبة فوق دى لمبة زيت الموتور ... لو فيه تسريب فى زيت الموتور او ضغط الزيت غير كافى او اى مشكلة فى دائرة الزيت اللمبة هاتفضل منورة ... فى الحالة دى لازم تقف وتشوف المشكلة فين وتحلها ضرورى
تانى لمبة من فوق هى لمبة شحن البطارية ( الدينامو ) ... وتفضل منورة لو الدينامو مش بيشحن ... لازم برضو المشكلة تتحل وماتمشيش بالعربية واللمبة منورة
تالت لمبة لمبة التشيك ... وهى لما بيكون فى مشكلة فاى جزء من الموتور او محاور نقل الحركة فى العربية زى الاكسات وخلافه ... دى لو فضلت منورة تروح لاقرب مركز خدمة وهما هايعرفو ايه المشكلة
رابع لمبة من فوق فى العمود اللى على اليمين هى لمبة فرامل اليد وبتطفى لما تنزل فرامل عشان ماتمشيش وفرامل اليد مشدودة
نيجى للعمود اللى على الشمال وده فيه لمبتين
اللمبة اللى فوق دى لمبة المفتاح المشفر ( الايموبلايزر ) ... لو حاولت تدور العربية بمفتاح غير بتاعها اللمبة دى هاتقعد تنور وتطفى والعربية مش هاتدور
اللمبة التانية بتاعة الباور ... وطبعا عشان الالتو اللى نازلة مصر مافيهاش باور اللمبة دى مش هاتنور اساسا ... بس هى عامة بتنور لما بيكون فى مشكلة فى الباور ستيرنج
فى لمبة مهمة جدا مش منورة فى الصورة ... هتلاقيها على اليمين وهى لمبة الحرارة ... بتنور لما تحط المفتاح وتطفى لما تشغل الموتور ... لو فضلت منورة يبقى العربية سخنت ولازم تقف حالا وتشوف المشكلة فين
فيه لمبة تانية بتبقى على اليمين فوق لمبة الحرارة ... دى لمبة النور العالى بتنور لما بتشغل النور العالى
ودى كل اللمبات اللى موجودة فى تابلوه الالتو

هي العربيه دي فيها (إيموبلايزر) يا ه ه ه ه ..متهيألي ده أعلى أوبشن موجود فيها ..يعني هو أحمد مرعي شال الطفاية ..والولاعه ..والكاسيت ..والباور.. ..وساب الإيموبلايزر ..لا والله ..الراجل كتر خيره ..بيراعي ظروف البلد ..

هي العربيه دي فيها إيموبلايزر بجد ..ولا حضرتك بتشرح النور اللي في التابلوه بتاع إيه على الإطلاق وخلاص

العيوب اللى قريتها تخلينى اروح اشترى اى عربية تانية حتى لو مستعملة
بعد ما كانت الالتو الجديدة داخله دماغى
..
صح؟

الموضوع بدون لعب ف الضفيرة انا مش محتاج اى سلك من الضفيرة

يا جماعة
التو 2015 جديدة ام اسبيرنزا a 113 2013 مستعمله؟؟؟؟

المشاركة الأصلية كتبت بواسطة m_m_sh_a

هي العربيه دي فيها (إيموبلايزر) يا ه ه ه ه ..متهيألي ده أعلى أوبشن موجود فيها ..يعني هو أحمد مرعي شال الطفاية ..والولاعه ..والكاسيت ..والباور.. ..وساب الإيموبلايزر ..لا والله ..الراجل كتر خيره ..بيراعي ظروف البلد ..

هي العربيه دي فيها إيموبلايزر بجد ..ولا حضرتك بتشرح النور اللي في التابلوه بتاع إيه على الإطلاق وخلاص

لا فعلا العربية فيها ايموبلايزر

المشاركة الأصلية كتبت بواسطة lord2010

يا جماعة
التو 2015 جديدة ام اسبيرنزا a 113 2013 مستعمله؟؟؟؟

انا من وجهة نظرى ماحطش الجديد مع المستعمل فى مقارنة واحدة ابدا ... الا لو كان الفرق بين العربيتين شاسع
يعنى مثلا تقوللى اجيب ايمجراند زيرو ولا اجيب كورولا مستعمل بنفس التمن اقولك الكورولا تكسب
اجيب التو زيرو ولا اجيب لانسر مستعمل بنفس رينج الفلوس اقولك هات لانسر
انما غير كده انا ارجح دايما الزيرو ... الفرست هاند برضو ليه ثمنه

المشاركة الأصلية كتبت بواسطة ibrahimahmed

انا من وجهة نظرى ماحطش الجديد مع المستعمل فى مقارنة واحدة ابدا ... الا لو كان الفرق بين العربيتين شاسع
يعنى مثلا تقوللى اجيب ايمجراند زيرو ولا اجيب كورولا مستعمل بنفس التمن اقولك الكورولا تكسب
اجيب التو زيرو ولا اجيب لانسر مستعمل بنفس رينج الفلوس اقولك هات لانسر
انما غير كده انا ارجح دايما الزيرو ... الفرست هاند برضو ليه ثمنه

كنت فنفس الحوار و الحيره دى و اخدت القرار بالزيرو التو و مقارنش ابدا زيرو بمستعمل حتى لو ارخص حوراته مبتخلصش ابدا كان ادامى بولو 98 و 113 اسبرانزا و طبعا فرق اسعار يحير اكتر لكن الجديد يكسب و باقى خطوه التنفيذ رينا يسهلها انشاء الله و اجيب الرمادى الغامق

المشاركة الأصلية كتبت بواسطة a_aseda

انا رجعت من التوكيل الحمد لله
اغلب الناس عندها مشاكل
وكان اليوم كله خناقات مع العملاء
...
رحت الساعة 12:30 خلصت 4:15 بيشيكوا علي السوائل وتربيط عفشة وتغيير الزيت والفلتر ؟؟؟؟؟ مش مصدق كل الوقت ده !!!!
ثمن الفلتر 65 جنيه .... دي سرقة وقالي هو ده سعره
وفي الاول قالي تغيير الزيت 360 غير الضريبة
قلت له في اتو ايجيبت ب240 وتوتال ازاي السعر عندكم كده
بعد شويه قالي فعلا العربية بتاخد 3 لتر ب 240 جنيه غير الضريبة و10 ج مصروفات ادارية ؟؟؟؟؟ قمة الاستهبال

فعلا نور الصالون نور وقال في فيوز كان مش شغال .... وكنت قلت لهم حاسس ان صوت العربية عالي شوية ؟
واخر اليوم المهندس قال فعلا تم قياس الماتور وكان عالي شوية وظبطناه ....
..
وكانت المفاجاة .... صوت العربية عامل زي المحرات ( الجرار الزراعي ) لما بدات اسحب 90 ك و100 الصوت بيعلي شغلت التكييف لاول مرة (اكثر من رائع كانك في عربية كبيرة وتكييف قوي) ولكن استمر صوت الماتور يعلي ويعلي لدرجة غير معقولة
مش عارف في حاجة في الماتور ولا الشكمان ولا زي ما حد قال يكون في حاجة في البلية والدسك (الصوت غير عادي ) تحس كان الموتور تحتيك ومفيش عزل صوت ولا حاجة وكل ما ادوس بنزين اسمع صوت (ززززززززززززز)

وللاسف الوقت كان الساعة 5:10 ومينفعش اتصل قلت بكره اتصل بيهم
التوكيل مش مريحني :t_thum1[1]:

تحس ان الامور مش طبيعية اكثر من واحد زعق فيهم النهاردة وهو بيقول اجيب العربية سليمة اخرج بيها بعيوب ؟؟؟

استر ها يا رب

رحت النهاردة التوكيل ( ابو رواش) ودخلت الصالة وبعد الكشف علي الماتور بالجهاز ومراجعة الشكمان
المهندس قال هو ده الصوت الطبيعي للعربية
لانها بتكون اعلي من العربيات السيدان الاستاندر (تويوتا - لانسر - نيسان ... مثلا)
لان الالتو بيكون عزلها اقل شوية وكمان العجل الصغير بيساعد عملية رفع الصوت
.....
وده كان رد المهندس بعد التهرب من الاجابة عدة مرات