الموضوع: أخيرًا جبت بولو

المشاركة الأصلية كتبت بواسطة elshrpeny

انا على فكره مشترك فى المنتدى من زمااااان وكمان من قراء مواضيعكوا بإنتظام بس مكنتش لسه من اصحاب السيارات عشان أكلم معاكوا فيها بس الحمد لله رب العالميين اشتريت واحده بولو 2001 .

يا باشا الف مبروك.

المشاركة الأصلية كتبت بواسطة elshrpeny

وكان عندى شوية اساله مبدأيه أحب افتحها معاكوا كبدايه ليه فى المنتدى.
اولا: كنت عايز اعرف سعر مفتاح التدوير لان انا شاريها بمفتاح واحد وعايز اعرف لو حبيت اطلع عليه واحد منين وبكام؟

انا عربية اختى جت بمفتاح واحد, رحت عند عزب اللى فى شارع السودان ادام بنزينة موبيل و عملة فى 15 دقيقة و خد 100 جنية و ناس محترمة جدا.

المشاركة الأصلية كتبت بواسطة elshrpeny

ثانياٌ:الساعه الى فى عداد ال rbm بيظبط منين وازاى؟

الدايرة اللى على الشمال هتلاقي كانها مربوطة بمسامير سودة, هتلاقى اتنين من الاربعة اللى تحت مش مسامير ولاكن زراير صغيرة داخلة لجوة, اليمين بيزود الدقايق و الشمال بيزود الساعات.

باى حاجة رفيعة باة و ظبط.

المشاركة الأصلية كتبت بواسطة elshrpeny

ثالثاٌ:لو انا حبيت اركب للعربيه ريموت للسنترلوك الى فيها ايه هو افضل و أحسن نوع واجيبه منين وفى حدود كام اذا مكنش حد عارف سعره بالظبط ؟

اى حاجة مش فارقة.

المشاركة الأصلية كتبت بواسطة elshrpeny

رابعاٌ:ولو حبيت برده اعملها زجاج كهرباء ايه برده اجود وافضل نوع وبكام وبيتباع فين؟

موجود المكن الاصلى بتاعها استيراد بالفرش بتاعة و الزراير الاصلى فى حدود 1200 جنية. لو انت عايز اى حاجة تانية يبقى معرفش.

المشاركة الأصلية كتبت بواسطة elshrpeny

خامساٌ:هل فعلا ان لو انا حبيت اجيب جنوط ليها مبيكونش جامد زى الجنوط الاصليه الى بتيجى بيها بتاعة بلدها يعنى عشان انها بتكون الومنيوم ولا فى انواع مثلا بتبقى نظيفه وتمام بس بتبقى غاليه شويه يا ريت حد يكون فاهم فى موضوع الجنوط دا يفيدنى وأكون شاكر جدا.

انا ماليش فى موضوع الجنوط دة, بس نصيحة هات الاصلى بتاعها سواء 14 او 15 لانة بتاعها فا شكلة حلو عليها + خامتة اصلى.

المشاركة الأصلية كتبت بواسطة elshrpeny

وأخيرا::: نيجى لموضوع الكاسيت وما ادراكوا ما الكاسيت دا موال لوحده برده يا ريت الى فاهم فيهم هو طبعا وسامعاته يفيدنى فيه وأكون شاكر جدا.

انت عايز اية فية بالظبط ؟؟

و عموما راجع دة:
http://www.nilemotors.net/Nile/showp...69&postcount=4

المشاركة الأصلية كتبت بواسطة elshrpeny

وبالمناسبه انا من ساعه ما جبتها مودتهاش للميكانيكى يشيكلى عليها فايا ريت تفيدونى بخبراتكوا وتقولولى ايه المهم الى اكشف عليه او اغيره او اشتريه او اعمله عموما .

هى عاملة كام كيلو دلوقتى ؟؟

و راجع دة:
http://www.nilemotors.net/Nile/showthread.php?t=34761

المشاركة الأصلية كتبت بواسطة elshrpeny

معلش يا جماعه انا طولت عليكوا فى اول مشاركه ليه فى المنتدى بس شكلى حصلى زى ما بيقولوا فضلت صايم صايم صايم وبعدين قومت داببها مره واحده ههههههههههههه

تحت امرك يا باشا و شوف عندك اية تانى ...

مبروك يا باشا

مبروك يا باشا
و يا ريت لو حد يعرف حد عندخ بولو 98 او 99 بالاسكندرية و تكون حالتها ممتازة

المشاركة الأصلية كتبت بواسطة elshrpeny

المفتاح الى انت قولت انه بيتعمل ب 100 جنيه دا هيبقى هوا هوا الاصلى بالظبط يعنى اقدر افتح منه الابواب و الشنطه والتابلوه وكمان ادور بيه العربيه.

الPolo من موديل 1998 نزلت فيها Immobilizer عشان موضوع شفرة المفتاح.
المفتاح اللى انت بتقول علية دة بيتعمل ازاى ؟؟
الراجل بياخد منك المفتاح و بيحطة على مكنة المفاتيح و يجيب الجديد و يشغلها و ينقل التعاريج (فى ناس بتقول عليها الخريطة) من القديم للجديد و بس كدة.
الراجل اللى بقولك علية دة بقى بيزود على كدة انة بيفك الImmobilizer من العربية و يوصلة عندة على الكمبيوتر و يعمل download للشفرة اللى علية لعندة و بيكتبها برقم شاسية العربية (عشان لو احتاجتها تانى ميفكش تانى) و بعد كدة يحط المفتاح الجديد على جهاز تانى واصل بالكمبيوتر و ينقل لة الشفرة.
انا جبت الراجل دة من هنا:http://www.nilemotors.net/Nile/showthread.php?t=22724 و عايز اقول لك انى رحت لمركز سعيد و عصام دة بردة بس قالى 200 جنية و تاخد ساعة بينما عزب قالى 100 جنية و ربع ساعة.
المفتاح هيعملك كل اللى انت عايزة و حتى مش هتعرف تفرقة من الاصلى فى الشكل من برة.

المشاركة الأصلية كتبت بواسطة elshrpeny

وبالنسبه لريموت السنتر دا يا ابيزا سعره فى حدود كام؟

انا الصراحة معرفش.
بس دة مش ريموت لوحدة, دية وحدة كاملة بتركب و مفيش منها اصلى فى مصر (على حسب ما اعرف) فا لو كدة ركب انزار و هو يعمل الموضوع دة.

المشاركة الأصلية كتبت بواسطة elshrpeny

وبالنسبه للزجاج الكهرباء الى انت بتقول عليه اجيب الاستيراد الاصلى بتاعها مين اضمن واحد اقدر اجيب من عنده الموضوع دا إن شاء الله.

انا جبت من عند بيومى فى الحرفيين و ممكن بردة تلاقى عند الشهاب فى الحرفيين و الاتنين حاجتهم نضيفة جدا.

المشاركة الأصلية كتبت بواسطة elshrpeny

وبالنسبه للجنوط الاصلى بتاعتها الى انت بتقول عليها دى فى حدود كام برده ومين احسن واحد اجيبها من عنده ؟

نفس الاتنين اللى فوق و اعتقد ان ال14 بيعمل من 900 ال 1500 و ال15 بيعمل من 1500 الى 2000 حسب الحالة.

المشاركة الأصلية كتبت بواسطة elshrpeny

بالنسبه لموضع الكاسيت

انت طبعا تجيب اى نوع مش فارقة, بس طبعا يفضل الBlaupunkt عشان هيركب على نفس الفيشة من غير ما اى حد يقص سلكة واحدة. و دة من مميزاتة انة نفس لون اضائة التابلوة فا مش هيبقى شاذ + ان الموديلات الجديدة فيها كل اللى بتقول علية.

بص على الBlaupunkt Hamburg MP68 فية كل اللى انت عايزة + انة بيشتغل Car Kit للموبايل عن طريق الBluetooth و سعرة كان فى حدود 1400 او 1500 (مش فاكر بالظبط) بالضمان المحلى عند مجدى كلاريون فى ميدان الحجاز فى مصر الجديدة.

المشاركة الأصلية كتبت بواسطة elshrpeny

وبالنسبه للكيلوات الى عاملااها هيه انا جايبها وهيه عامله 83000 كيلو ورحت فولتها بنزيين وغيرتلها زيت موبلوان 3000

دايما هات زيت Synthetic زى الSell Ultra او الMobil1 اللى بيعمل 10,000 كيلو و تغير الفلتر مع كل غيار زيت لان الخواص بتاعتة احسن و بتحتمل الحرارة و الاحتكاك عن الزيت العادى و بتطول عمر الموتور.

المشاركة الأصلية كتبت بواسطة elshrpeny

وصفرت عداد كيلوات الزيت عشان يحسب من اول ما حطتلها الزيت الجديد

دة مش عداد كيلوات الزيت, دة عداد الtrip, يعنى تقيس علية مسافة من حتة الى حتة تانية, تسفرة لما تفول عشان تعرف العربية استهلكت اد اية. انما غيار الزيت دايما يحسب على العداد الكبير يعنى انت غيرت دلوقتى على 83,000 يبقى الغيار اللى جاى مثلا على 86,000 و هكذا.

المشاركة الأصلية كتبت بواسطة elshrpeny

ايه بقى الخطوه الى بعد كدا؟

يا ريت فلتر هواء و بوجيهات و فلتر بنزين, هيفرقوا معاك جامد. و من ال100,000 امشى على الجدول مظبوط.

المشاركة الأصلية كتبت بواسطة elshrpeny

وعلى فكره الى انا شاريها منه كان قالى اما تيجى تمشى بيها تغيرلها سير كاتينه

المفروض لو كان عامل الService مظبوط يبقى السيور هتتغير عند ال100, اسالة مغير الحاجات دية امتى.

المشاركة الأصلية كتبت بواسطة elshrpeny

انا حاسس انها هتبقى عايزه كمان سير دينامو وتكييف لان التكييف مبيطلعش فريون سقوعيه يعنى ولا ممكن تكون عايزه تشحن فريون مش عارف بقى .

لا ملهاش علاقة بالسير, هو يا اما شغال يا اما مقطوع.
اكشف على الفريون و غالبا هتلاقية ناقص.
و معلومة بردة ليك, التكييف بتاعها ساقع جدا بس مشكلتة ان مروحة الكويل ضعيفة فا بياخد وقت. يعنى انت تحط ايدك قدام الهوايات هتلاقى ان ايدك بتلج بس لما تبعدها تحس بالهواء ضعيف.
انا فية ناس قالتلى غير مروحة الكويل او الكويل نفسة بواحد يابانى بس انا مش بحب العك فا راضى بية كدة.

المشاركة الأصلية كتبت بواسطة elshrpeny

وبالنسبه بقى لفوانيس الشبوره الى هو على ما أعتقد فوانيس الزنون دا ولا ايه هل تنصحنى بأنى أركبه ولا لاء لانى كنت سمعت انه صينى وغالى وبيبوظ بسرعه ولو فى نوع نضيف وبيعمر ايه هو وبكام واجيبه من عند مين؟

فوانيس الشبورة بتيجى من غير لمض اساسا و ممكن تركبلها لمض عادية H7 و لو انت عايز تجيب لمض زينون دية طبعا حاجة ترجعلك.

احسن حاجة بالنسبة للسعر حاليا هو الHID Plus و السعر مش فاكر بالظبط بس هتلاقى ناي كتير قالتة فى حتت هنا على الforum

المشاركة الأصلية كتبت بواسطة elshrpeny

وكمان من حق الزماره بتاعة الدريكسيون بتعلق دى من ايه من الدريكسيون نفسه ولا سلك ملمس عايز يظبط ولا ايه ؟

معرفش لانها محصلتليش, بس روح لكهربائى يبصلك عليها دية حاجة بسيطة.

المشاركة الأصلية كتبت بواسطة elshrpeny

وكمان باب السواق بيفتح بصعوبه شويه عن بقية الابواب فهل دا طبيعى ولا محتاج تظبيط ؟

لا كدة محتاج تظبيط لان عند كل الابواب بتفتح زى بعض.

المشاركة الأصلية كتبت بواسطة elshrpeny

وفى حاجه كنت عايز فيها كمعلومه يعنى : هل انا كنت اجيب عربيه ابيزا 2000 افضل وكنت ريحت دماغى من حكاية الزجاج الكهرباء وريموت السنتر وكمان فوانيس الشبوره ولا انا كدا صح البولو 2001
لان انا اساسا كنت مصر على انى اجيب بولو على الرغم ان كمالياتها اقل بس كفايه انها فولكس وكمان شكلها ومتانتها .

دية اذواق, و بعدين انا ركبت الIbiza 2000 من كام شهر و فضلت معايا شوية, بصراحة مستريحتش فيها. التابلوة و الصالون مش عاجبنى خالص و شكلها من قدام برضة مش عاجبنى (بقول اذواق تانى).

انا بحب الPolo دية بالزات و تابلوها مختلف عن اى عربية VW من حيث التصميم و لو على اد كماليات, ابقى هات براحتك اللى انت عايزة.

معلومة: دية اخر موديل Polo طلع من مصانع المانيا.
معلومة: حاجة الPolo استيراد و جديد اكتر من الIbiza اوى.

المشاركة الأصلية كتبت بواسطة elshrpeny

معلش هتعبك معايه شويه يا ابيزا بس تعمل ايه فى شغف وفضول الى لسه شارى عربيه بقى

انت بس شاور يا باشا

المشاركة الأصلية كتبت بواسطة elshrpeny

وكنت عايز اعرف اسمك ايه بقى يا ابيزا؟

اسمى عماد

الف مبروك يا باشا
وتعالى بقه المقابله بيها
الناهرهده الجمعه 28 نوفمبر 2008
الساعه 3 م فى كارفور الاسكندريه
امام الطارق بتاع العربيات