أخيرًا جبت بولو

**iBiZa** · 10-12-2008 10:49 AM

للاسف معرفش غير www.ebay.co.uk و دة الوحيد اللى بجيب منة, بس فية مشكلتين ان دة فى انجلترا فا دركسيون يمين و مش كل حاجة هتركب عندك + محتاج Paypal و دة مش شغال فى مصر + معندهمش حاجات كتير.

**momomania22** · 08-02-2009 02:42 PM

yayeb law nawy 3la polo 2003 ....atekel 3la allah....7ad yeshga3ny w ye2olly akshef 3aleha fen wezay....plz replay...thanks

**algeneral** · 09-02-2009 05:32 AM

الطاره Airbag عامله 400 جنيه من بورسعيد

**GAFFER** · 16-02-2009 06:04 PM

اريد انسب فتيس للبولو 1300

**mido_919** · 16-02-2009 10:38 PM

مبروك يا باشا ربنا يباركلك فيها

**elshrpeny** · 11-03-2009 12:47 AM

السلام عليكم ورحمة الله وبركاته ازيك عماد اخبارك ايه معلش بقى انا بقالى زمان مشاركتش فى المنتدى

بقولك يا عماد انا طلعت على مطب جامد مكنتش شايفه المهم فالأكصدام الى ادام انكسر من ناحيه السير الاسود الى فى الاكصدام من تحت مع كسر فى الفيبراو البلاستيك الى فوق الشبكه السوده الى تحت دى من الناحيه الشمال ناحية السواق

فا إيه حل الموضوع دا ؟
ويا ريت تقولى لو فرضا عالجتها وأعدت بيه فتره الاكصدام دا وبعدين حبيت اغيره واجيب واحد استيراد مثلا او جديد هيبقى بكام يا عماد ؟

**iBiZa** · 11-03-2009 10:19 AM

انا طبعا مش عارف الكسر اد ايه, بس اى حد بتاع فيبر مش بياخد اقل من 50 الى 100 عشان يعمل حاجة نضيفة, و بعدين هترشة عشان شكلة يبقى كويس.

انا مش عارف الاكصدام الامامى دلوقتى استيراد بكام, بس لو لقيت واحد بسعر كويس و نفس لون عربيتك يبقى احسن يادوب هتفك و تركب.

ابعد عن الجديد لان خامتة بتبقى ضعيفة و الصبة بتاعتة مش مظبوطة فا مش هيظبط شكل العربية + انة لازم يترش.

**elshrpeny** · 13-03-2009 07:04 AM

ماشى كدا تمام

طيب بالنسبه للجنوط إيه اكبر مقاس يركب للبولو 2001 وميعملش مشاكل للعفشه ولا يحك فى الرفارف طبعا ودا طبعا مع مراعاة انى هجيبه مستعمل نفس نوع العربيه طبعا عشان يبقى نظيف مظبوط ؟

ومين عندكوا فى القاهره الى إن شاء الله لو حبيت اجيب الجنوط دى أجيبها من عنده وتكون اسعاره معقوله وهل هتبقى بنفس الاسعار الى كنت قولتهالى ولا رخصت شويه وبرده كنت عايز اعرف اسعار الكوتش الرفيع الى بيركب للجنوط دى انظف نوع بيبقى بكام ؟ ومين برده احسن واحد اسعاره معقوله أروحله ؟

وجزاك الله كل خير

**umoussa** · 13-03-2009 02:21 PM

مقاسات الجنوط مكتوبة على غطاء باب تانك البنزين

ودي تقدر تشوف الي انت عايزة وكمان حتلاقي ضغط الهواء داخل الإطارات مع عدد الي بيركبوا جوا العربية

الجنوط استيراد مش حتلاقي نضيف ولو لقيت نضيف مش حتلاقي 4 خرم ولو لقيت 4 خرم مش حيكون أصلي ومعتقدش كمان حيعجبك حتلاقيه بتاع حاجات كوري وتايواني والكلام ده.

أنا جربت أنواع الكاوتش التالية
1. كونتيننتال
2. بريللي
3. فولدا
4. روودستون
5. بريدجستون

عن تجربة شخصة أفضل عجلة فيهم هي البريدجستون أدرينالين "بوتينزا" بس دي كانت غالية الفردة مقاس 15 كانت عاملة 650 جنيه من سنة ودا ياباني مش ماليزي

كان فيه منه ماليزي بس أنا ركبت الياباني

ممكن تروح عند أرابكوم وتشوف تشكيلة الجنوط الموجودة عنده، حتلاقي حاجات كتير تعجبك، بس متجبش حاجة صيني لأنه حيتكسر بسرعة ومش حيستحمل.

عملية التجنيط دي مش حتكلفك أقل من 4000 - 4500 علشان تبقى عارف

ولو موتورك 1000 متجبش جنوط 15 أعتقد انها حتكون كتير على العربية
ممكن تستخدم جنوط 14 حتكون كويسة وكمان هات الجنط الي صبته ناشفة وخفيف

ومتنساش لما تركب الجنط ال 14 تخلف بيض المقصات، يعني تجيب البيضة اليمين في الشمال والشمال في اليمين علشان زاوية الكاستر تتغير والعجل يترحل للأمام 1 سم

عادة مع جنط 14 العجل مش حيحك وممكن تسيب البيض في مكانه بس الزوايا بتاعة العربية عمرها ما حتتظبط والكاوتش حيتاكل

الجنوط أرابكوم
الكاوتش بريدجستون

متجبش كاوتش فولدا إطلاقاً
بريللي حلو بس صبة ناشفة عايزة أرض حرير
الكونتيننتال يعني هو الفبريكية بتاع العربية بس الموجود في السوق برتغالي
الروودستون معدل تآكله سريع، هو شكل وبس

**elshrpeny** · 14-03-2009 07:38 AM

متشكر جداً يا أسامه على المعلومات دى .
وبعدين انا اساسا مش هعمل الموضوع دا حاليا بس انا كنت بسأل عشان لما انوى هيبقى النظام إيه ؟

بس فى حاجه مش الكوتشات الرفيعه دى بتبقى برده احجام يعنى مثلا :-

الجنط ال14 له كوتش رفيع بسمك طخين
والجنط ال15 له كوتش رفيع بسمك ارفع شويه
والجنط ال16 له كوتش رفيع بسمك ارفع أكتر ........ وهكذا

فالمفروض ان قلة سمك الكوتش بيعوض كبر حجم الجنط فاهمنى ؟
هى دى وجهة نظرى مش اكتر انا مش فاهم طبعا ومعنديش خبره بس بستفسر عشان ابقى فاهم ايه الى بيحصل بالظبط .

والحاجه التانيه الى كنت عايز استفسر عنها بالنسبه للجنوط كنت بسمع على حاجه اسمها ( نيكل كروم ) ودى على حد علمى بتبقى براقه بتلمع وفى نفس الوقت جامده متينه يعنى وكمان شكلها جميل فإيه بقى حكاية النيكل كروم دا ؟