الموضوع: إسأل و إطمن علي الفرامل..

المشاركة الأصلية كتبت بواسطة cobraa2008

السلام عليكم انا عندي مشكلة اني وانا ماشي على 120 وادوس فرامل الاقي العربية ببترج جامد جدا واذا زودت عن ال120 ووصلت ل140 ومسكت فرامل الرجة بتخف وممكن ماتكنش في حاجة

تبقى ايه هيا المشكلة

ممكن تكون الطنابير محتاجة خرط بس لو ممكن تقول لنا اخبارها أيه علي السرعات العادية جوة المدينة مثلا.

المشاركة الأصلية كتبت بواسطة dr_abooody

انا الحمد لله روحت ركبت الماستر العمومي بس الفرامل البدال وطى لتحت بس بتفرمل جامد اكتر من الاول
المشكلة ان البدال الواطي دة انا مش متعود علية
قولتلة ينفع نعلية اكتر من كدا
قالي لا
قولتلة لية قالي عشان الصباع قصير شوية
تقريبا بتاع السيرفو

السؤال بقى هل البدال هيعلى مع الوقت
انا فاكر انى عملت شغل فرامل و البدال كان واطي و على لوحدة بعد كدا ؟؟

هو البدال يعلي لوحده مع الوقت لو كنت غيرت تيل أو طنابير عشان بياخد فترة علي ما يطبع لكن كدة المفروض أنه ياخد هوا من كل عجلة و يرجلش و ياخد هوا من العمومي لو لزم الامر عشان البدال يعلي عن كدة.
هو أخد هوا أصلا و لا لا؟؟

المشاركة الأصلية كتبت بواسطة roky

عزيزي عاشق السيارات،

الفرامل أخدت منها هوا .. وبعد أسبوع واحد بس خفت تاني :
ورحت لميكانكي غيره قالي ده عيب طاقية السرفو ، و هي اصلا نصر 83 مفيهاش سرفو.


عاوز استفسر منك عن شوية حاجات عاوز اعلمها بنفسي في عربيتي الـ 127، لاني مش لاقي أي حد متخصص فرامل هنا في 6 اكتوبر

أولا عاوز أتأكد انه مفيش تسريب زيت أعمل أيه، هل هاتنقط زيت تحت الكبوت زي زيت الموتور ... التسريب واضح تحت العربية يعني ولا اعرفه ازاي

ثانيا انا الحمد لله لو شفت التيل الخلفي بقدر اعرف اذا كان متهالك ولا لأ ، أذا كان سمكه 3 ملم تقريبا يبقي كويس .. صح ولا أيه
أما التيل الأمامي أعرف أزاي انه كويس ولا متهالك، لاني اصلا ماعرفش مكانه فين و يتشاف ازاي ؟؟ه
برضه الحقيقة انا معنديش بيبة .. ينفع أفك الفرامل بمفتاح عاده ؟؟
ثالثا العربية كانت جاية و فيها علبة زيت lookhead الأنجليزي ، بس مالقيتوش في السوق فجبت Bindex. هل ده نوع كويس ولا ردئ

أخيرا شكرا ليك علي الموضوع الحيوي و الحساس ده ... ياريت الأدارة تثبت الموضوع ده

أهلا بيك يا roky
بالنسبة لموضوع أني الفرامل وطيت تاني فممكن الرجلاش يتفتح شوية و يتاخد هوا تاني برضه بس أنت متأكد انها مفيهاش سرفو و موديل 83؟؟!!
ياريت تتأكد لنا من النقطة دي.

بالنسبة لتسريب زيت الفرامل أو بمعني اصح سائل الفرامل فبتتأكد منه بانك تحط ايدك خلف كل عجلة و تشوف لو فيه تسريب سائل لأني سائل الفرامل مش بس عند الموتور ده واصل و بيتوزع لكل عجلة لوحدها و لو لقيت سائل يبقي في ماستر ضارب زيت و لازم يتغير ده بالنسبة للعجل بس ممكن الزيت يتسرب من المواسير أو الخراطيم بتاعة الفرامل و المواسير بتكون تحت العربية فصعب شوية أنك تشوفها أما الخراطيم فبتكون موصلة للعجل فحتكون قريبة علي أيدك و لما تمد أيدك لو لقيت سائل لا قدر الله حتقدر تحدد اذا كان من الخراطيم او فيه ماستر ضارب و أحيانا بيكون الزيت ضارب و واصل لحد العجلة من برة و تلاقي الزيت نازل عليها, اما الماستر العمومي فبيتعرف بأنك بتفتح الكبوت و تشوف الماستر نفسه هل ناشع عليه زيت من الخارج و لا لا و عشان تريح دماغك أكشف علي الزيت اللي في خزنة الفرامل و بس و لو لقيته ناقص متزودهوش لأني النقص ده ممكن يكون تآكل في التيل أو تسريب و لازم يتعالج إلا لو كنت في مكان بعيد زي ما بتقول في 6 اكتوبر مثلا و لازم توصل بيها لأقرب متخصص في الحالة دي ممكن تزودها عشان تمشي بيها.

أفتكر 3 ملم بالنسبة للتيل الخلفي كويس أنت قيسته أزاي معاك بوكوليس و لا أيه؟؟

التيل الامامي لو أتاكل حيبدأ يصفر مع دوسة الفرامل و حتلاقي الزيت بينقص و لو تحب تعرفه حتفك العجلة و حتلاقي التيل متوصل بالجشمة اللي متوصلة بالعجلة هي عبارة عن حديدة كدة متوصلة بالعجلة بخراطيم و كدة و جواها بيكون التيل الامامي و تقدر تشوفه أو تحط ايدك و تشوف سمكه.
و دي صور للجشمة او الكاليبر أو الماستر الامامي:-
التيل موجود بالحديدة الموجودة أعلي الطنبورة (الجشمة) كما نري و يبدو التيل ظاهراً لو دققت النظر:-


و صور أخري و التيل موجود داخل الجشمة الزرقاء اللون هنا في الصورة:-


و بالنظر او وضع يدك يمكنك تقدير حالة التيل الامامي الموجود.

بالنسبة لفك الفرامل بمفتاح عادة فانا لا افضل فكها اصلا لاني اللعب في الفرامل مش كويس و حتي لو فكيتها بمفتاح عادة حتقدر تطلع التيل من مكانه و كدة و في سوست و حاجات زي كدة؟؟

بالنسبة للبندكس هو زيت كويس أوي و يضاهي اللوكهيد و أرخص منه و انا شخصيا بستخدمه و مش بنبيع غيره في الورشة علي الاقل حاليا.

و ألف شكر لثناءك علي الموضوع و لذوقك.

المشاركة الأصلية كتبت بواسطة samer_engines

هو البدال يعلي لوحده مع الوقت لو كنت غيرت تيل أو طنابير عشان بياخد فترة علي ما يطبع لكن كدة المفروض أنه ياخد هوا من كل عجلة و يرجلش و ياخد هوا من العمومي لو لزم الامر عشان البدال يعلي عن كدة.
هو أخد هوا أصلا و لا لا؟؟

هو اخد هوا من الماستر بس

لان انا كنت مغير ال 4 طنابير و تيل من شهر

المشاركة الأصلية كتبت بواسطة roky

سؤال صغير كمان
هي أيه لزمة البتاعة اللي عاملة زي العوامة و فيها سلك طالع لفوق اللي بتكون جوه علبة الزيت
و المفروض تكون عايمة ولا غطسانة

وشكرا مقدما

المفروض بتكون عايمة علي السائل و هي بالظبط نفس فكرة عوامة البنزين لما البنزين يقل لمبة البنزين بتنور.
و نفس الكلام لما سائل الفرامل بيقل لمبة الفرامل بتنور عشان تنبهك و هي معتمدة علي اني في عوامة صغيرة مع نزول الزيت بتنزل معاه و مع نزولها بتوصل دائرة الكهرباء للمبة الموجودة في التابلوه عندك و بكدة تخليها تنور بس.

المشاركة الأصلية كتبت بواسطة mahmooodnageeeb

ما المقصود بــــ :
يرجلش الفرامل
أو
يعمل رجلاش للفرامل

و ما فائدته للسيارات الجديدة عند أول صيانة في التوكيل بعد الخمسة آلاف كيلو الأولى .

و جزاك الله خيرا

أهلا بحضرتك
و بالنسبة لموضوع الرجلاش ده ما هو إلا تقليل المسافة الفاصلة (الخلوص) الموجود فيما بين التيل و الطنابير الخلفية و ده بيعمل علي تعلية الدواسة و جعل إستجابة الفرامل أفضل و أسرع و هو بمثابة تعويض للتيل المتآكل.
و إليك صورة للإيضاح:-
و يظهر كما هو واضح الماستر بالأعلي و من الأسفل موجود الرجلاش كما هو مكتوب وواضح علي الصور:-


و صورة أخري بشكل آخر للرجلاش:-


و فائدته أنه يقوم بتعويض التآكل في التيل كما قلت سابقا و يقوم بظبط المسافة ما بين التيل و الطنابير.
أرجو ان أكون قد اوضحت الصورة و أي إستفسار أنا في خدمتكم دائماً.

المشاركة الأصلية كتبت بواسطة kemoelord

انا عندي بس استفسار بخصوص ماستر الدبرياج وهو ان من سنه ونصف تقريبا لاقيت الدبرياج سقط لتحت وطبعا العربيه وقفت مكانها لان انا ساعتها ما عرفت انقل فالمهم الميكانيكي جالي وغيرلي ماستر الدبرياج فطبعا الحكايه دي حصلت فجأة فهل الماستر ده له مده ويتغير زي الصيانه كده ولا له اعراض تلف ولا ايه بالظبط

أهلا بيك و بإستفسارك
لكن في سؤال هل حسيت أني الفرامل ضعفت لما كان الدبرياج ضعيف؟؟
لأني عربية حضرتك الدبرياج بتاعها علي زيت مش علي سلك يعني الدبرياج بيعمل من سائل الفرامل و لها ماستر زي الماستر العمومي للفرامل بس أصغر حجما و بيستخدم نفس خزنة زيت الفرامل.
و علي كل أعراض التلف بتكون أني الغيارات مش بتيجي كويس أو تقيلة بس اللي أعرفه أني الدواسة لما تسقط كدة يبقي محتاجة زيت و عشان كدة بسأل علي الفرامل و لو ولابد من تغيير في الحالة دي ممكن نجيب طقم إصلاح فقط.
لكن برضه مش عايز أظلم الراجل و خاصة أني العيب ده مش بيتكرر كتير و الماستر مهما كان ليه عمر إفتراضي.