الموضوع: إسأل و إطمن علي الفرامل..

المشاركة الأصلية كتبت بواسطة samer_engines

أنا أسف أني بتأخر في الرد بس ظروف و أسف مرة تانية.

بالنسبة لبعض المصطلحات اللي بنسمعها.........
و نبدأ بأخد هوا من دورة الفرامل:-
و اللي بيحصل أنه أثناء عمرات الفرامل و الفك و التركيب او حتي لو وجد اي منفذ لدخول الهواء لدورة الفرامل يحدث دخول بعضا من الهواء الي دورة الفرامل مكان الزيت مما يتسبب في ضعف في القوة الفرملية للسيارة.
و الحل أن يجلس أحدهم خلف عجلة القيادة و ينصت للصنايعي اللي بيكون بجانب كل عجلة و ماسك بيبة 10 و ايده علي مسمار يسمي (مسمار الهوا) و يقول لفظ معروف و مشهور و هو (كارك) ومعناه الضغط بسرعة و بصفة مستمرة علي بدال الفرامل و تركه كذا مرة حتي يسمع من الصنايعي لفظ آخر و لكنه معروف وهو (دوس) فيقوم بالضغط علي بدال الفرامل بقوة (لا يجب عليه ان يقف علي الدواسة و يحاول كسرها طبعا, لحسن حد يجي يقول لي مش انت اللي قلت بقوة؟؟!!)
لكن يجب الضغظ حتي تتوقف الدواسة تحت قدميه بعد ذلك سيشعر بأن دواسة الفرامل تهرب من تحت قدميه (لكن لا تقلق فأنت الأن تخرج الهوا من دورة فرامل سيارتك) فيقوم بإنزال قدمه معها إلي آخر الدواسة و في تلك اللحظة يكون الصنايعي قد فتح مسمار الهوا و اخرج بعض الهواء و تتكرر العملية حتي يفتح مسمار الهوا فيجد سائل الفرامل طلع من المسمار و ليس الهوا و احياناً يقال لفظ آخر و هو (جابت زيت), و تتكرر العملية كذا مرة في كل عجلة إلي ان تنزل بعض قطرات سائل الفرامل و من الماستر العمومي أيضاً و بهذا تجد ان بدال الفرامل أصبح عاليا تحت قدميك و أحيانا أيضا يطلق لفظ أخير و هو (العربية حضرت فرامل).

و بالنسبة للرجلشة:-
كنت قد احضرت صور لشكل الرجلاش في الصفحة الماضية او التي قبلها و هو عبارة عن آداة في الفرامل الخلفية موجودة أسفل وسط التيل الخلفي نقدر عن طريقها أن نقوم بإبعاد أو تقريب المسافة فيما بين التيل و الطنبورة.
و عادة ما يحدث معنا شعور بأن الفرامل وطيت فيقوم المختص بفتح الرجلاش و تسمي تلك العملية (رجلشة) و اللي بيبقي عارف في الألفاظ دي شوية أو التكسجية يجي يقولك انا عايز أرجلش و بيفتح الرجلاش لتعويض التآكل الحاصل في التيل و كل مرة نرجلش إلي أن يتآكل التيل و يصبح تغييره وجوبي و بعد التغيير نغلق الرجلاش كما كان.
و للسؤال عن أي لفظ انا موجود و في خدمتكم دائما.

السلام عليكم
انا من فتره كنت قولتلك عللى مشكله عندي في هروب البدال وحضرتك اقترحت ان المشكله ممكن تكون في الماستر
رحت كشفت وطلع الماستر سليم والتيل والطنابير سلام واللي تم حاجتين:
اولا اتاخد هواء من دورة الفرامل
ثانيا ريجلاش للعجلتين الخلفيتين
ودلوقتي الفرامل بقت احسن كتير بس المشكله لما اجي افرمل بسمع صوت (هس) كده والصوت ده مبسمعوش الا لما اكون ماشي جنب سور او اكون ماشي في حته هاديه مافيهاش غيري
في حاجه تانيه لما اكون ماشي مشوار طويل اجي احط ايدي على العجل (الطاسه)الاقيها سخنه هل ده عادي ولا ايه؟
انا خايف تكون طنابير
سؤال اخير هو طبيعي لما اجي اكبس فرامل على الاخر (اخر حاجه يعني )الاقي البدال ينزل معايا لاخر الدواسه يعني في النص الاول من المشوار بيبقى كويس وبعد كده مقاومته تقل وينرل معايا بسهوله في النص التاني من مشوار البدال هل ده طبيعي؟
شكرا ليك على اهتمامك وعلى التوبيك الهايل ده لانه مفيد جدا ويهم كل واحد فينا