العربية ونضافتها وشكلها بغض النظر عن تمنها وموديلها وخاصة الصالون الداخلي بيدل مدلول واضح على شخصية صاحبها
انا اي عربية امتلكها لازم يكون ليها بصمة والناس بتحب تشتريها مني
انا صرفت على بيتلز موديل 73 5 الالاف جنية جنوط وفرش وبطارية وكاسي
في ناس شايفه ان مالهمش لازمة
لكنهم عندي ليهم لازمة
صرفت على اكسيل موديل 96 اكثر من 10 الالاف جنية
ما بين رش للسيارة كامل ميتالك وعتب سبور وفرش جلد محترم تفصيل وجنوط وكاوتش وعفشة كاملة
مشيت بيها 55 كم في سنة وبعتها اتخطفت مني
وكل الناس تقولي ماترشهاش هاتنزل من تمنها طب سيب السقف
انا ليا مبدأ
انا جايب العربية انا اللي اركبها مش اللي بعدي يبقي لازم انا اللي استمتع بيها
جبت الكرولا وكانت اخر دفعة من غير زجاج كهرباء
نزلت جبت 4 ماكينات زجاج كهرباء من عربية 2006 من الحرفيين وقبل ماركب نمر كنت فاكك فرش الابواب وعملتهم
شافنا زميلنا محمد المصري في الحرفيين بالصدفة قاللي يا قلبك دي زيرو
قولتلة جايبها لمتعتي مش عشان ابيعها للي بعدي
ولما خبطت الطفل الصغير وبهدل الكبوت كان لازم تسمكر وتترش
عملتها طبعا امشي بيها مخبطة ومجرحة ليه
مفيش مرة ادخل بنزينة اغسلها الا والعمال يقولوي دي لسه زيرو ولا ايه (ما شاء الله)

وطبعا اهم 100 مرة من الشكل والكماليات ان تكون عربيتك مظبوطة ميكانيكا وعفشة

انا مرة شوفت مرسيدس موديل 60 تاكسي تحففففففففففففففة في البنزينة
من شياكتها ورواقتها والفرش الجلد الاحمر الاصلي وقفت اصورها واصور صاحبها ويحلفلي انه معتني بيها بغباء من يوم ماشتراها من صاحبها الاول في اواخر السبعينات

بس طبعا شواعنا تهلك اي عربية بس لازم برضه نعتني بيها
من كام يوم نازل ابارك لواحد صاحبي في الشغل على عربيتة الجديدة ورغم انه جايب عربية تمنها 230 الف جنية (باسات)
والله قرفت من بواقي الاكل وكوباية النسكافية اللي القهوة عملت عفن فيها وطفي السجاير وحاجة نيلة

وياما ركبت عربيات 128 قمة النضافة من جوة
عشان كدة بتدل على صاحبها وشخصيتة فعلا
عذرا للاطالة