الموضوع: انت تسأل وإستشاري منتدى متسوبيشي يجيب (2)

المشاركة الأصلية كتبت بواسطة abdullahalbadr

باشمهندس طارق تتكلف كام تظبيط وتصليح عفشة العربيه لو أنا حغير المساعدين الأربعه والمقصات قاعدة الموتور وتغيير فلتر البنزين لو أنا حعمل الكلام ده فى التوكيل
وهل فى فرق بين المساعدين الخليجى والمسعدين اللى بينزل فى السيارات المصرى مش الخليجى ، ولو فى إمكانية أن أجيب الحجات من دبى ، أفضل ولا ما تفرقش هنا وهناك واحد ، وهل ممكن الواحد يركب البوجيهات الجديد اللى نازله فى السوق ولا ما ينفعش
مع العلم إن معايا لانسر 2006 خليجى ، وأسف على الإطاله والإزعاج.

اسعار قطع غيار ومصنعيات العفشة كالتالي :

- الكشف على العفشة 60 جنيه

- تغيير 2 مساعد أمامي 200 جنيه مصنعيات وسعر الواحد 860 جنيه

- تغيير 2 مساعد خلفي 180 جنيه مصنعيات وسعر الواحد 420 جنيه

- تغيير مقص امامي يمين أو شمال
مصنعيات 100 جنيه وسعر المقص الواحد 735 جنيه

- تغيير 2 تيش دركسيون
مصنعيات 150 جنيه + 80 جنيه ضبط زوايا
سعر التيش الواحد 280 جنيه

- تغيير 2 بيض دركسيون
سعر الواحد 120 جنيه

- تغيير 2 مسمار ميزان
مصنعيات 50 جنيه وسعر الواحد 60 جنيه

- تغيير 2 مقص خلفي
مصنعيات 200 جنيه وسعر الواحد 300 جنيه


اما عن قواعد المحرك - فيه 3 قواعد

المصنعيات 180 جنيه
قاعدة زيت 420 جنيه
قاعدة قنطرة امامية 245 جنيه
قاعدة على الصاب فريم 235 جنيه

بالاضافة الى قاعدة فتيس 340 جنيه

غير ما يستجد من أعمال

ولا يوجد فرق في المساعدين بين المصري والخلبجي الا اذا كانت العربية الخليجي ليست بعفشة رياضية وده هيتعرف من رقم الشاسيه للعربية وهل عاوز تغير المساعدين لنفس النوع اللي نازل فيها ولا عاوز المساعدين اللي بتنزل في المصري

اعتقد الأفضل شراء قطع الغيار من التوكيل في مصر علشان الضمان

المشاركة الأصلية كتبت بواسطة invisiblebaby

السلام عليكم
باشمهندس طارق بارك الله فيك

ممكن أعرف من حضرتك التكلفة التقريبية لرش الاكصدام الأمامي بالكامل (اكصدام جديد) + الجانب الأيسر بالكامل ( أبواب و رفرف أمامي وخلفي وعتب جانبي ) من السيارة ( بومة 1600 سوبر أكشن مو 2008 شامبين )

السمكرة المطلوبة كانت خفيفة وتم عملها بالفعل والسيارة الآن ينقصها رش الأجزاء التي ذكرتها فقط

وهل هناك فرق جوهري واضح بين رش السيارة بالتوكيل أو مركز خدمة معتمد وبين رشها عند بوهيجي خارج التوكيل مع استعمال بويات ( سكنز أو البغبغان) مثلاَ

وللتوضيح أكثر :
الخدوش الموجودة كانت في أقصى طرف الرفرف الأمامي والخلفي من ناحية الأبواب وبالنسبة للأبواب : حوالي 15 - 20% من مساحة الأبواب

وجزاك الله خيرا

تكلفة رش الأجزاء المذكورة 1500 جنيه (5 قطع)

لو البوهيجي الخارجي هيستخدم بويات سكنز وعنده باقي المواد المستخدمة (بطانات وخلافة) مواد ذات جودة عالية ولديه فرن رش وصنايعية عندهم خبره يبقى مفيش فرق جوهري

المشاركة الأصلية كتبت بواسطة abdullahalbadr

يا باشمهندس ربنا يخليل ويكرمك على المعلومات القيمة ، معلش عندى سؤال صغير ، بخصوص ما إذا كانت العربيه بعفشه رياضيه ولا لأ من رقم الشاسيه ، كيف أعرف ذلك .
مره أخرى شكرا جزيلا على المعلومات القيمة التى قدمتها وربنا يجزيك خير

هو المقصود ان حضرتك لما هتبلغني برقم الشاسيه اقدر اعرف من برنامج كتالوج قطع الغيار رقم صنف المساعد اللي نازل في العربية وتحديد هو رياضي ولا عادي انما في الحالتين حضرتك اشتري احسن مساعد العفشة الرياضية علشان يستحمل اكتر

المشاركة الأصلية كتبت بواسطة mi22do

ازيك يا بشمهندس طارق
كان ليا استفسار بخصوص السيارة بتاعتي هي بومه مو 2006 - 1600سي سي - glx
كنت عاوز اعرف هي خليجي ولا مصري ؟؟؟
شاسية رقم : 1850
و لكم جزيل الشكر,,,

هو الرقم ده اما مصري او أردني وانا كشفت على قوائم العربيات المصري عندنا ولم اجد الرقم ده فبالتأكيد هي أردني

المشاركة الأصلية كتبت بواسطة boma

السلام عليكم ورحمه الله وبركاته
المهندس الفاضل الاستاذ طارق .... انا متابع على المنتدى من فترة وتبينت انك شخص محترم وغايه فى الذوق ومحب لمساعدة الاخرين بطبيعتك وده شجعنى اطلب منك استفسارات معينه اتمنى تجاوبنى عليها..
انا من حوالى 6 شهور اشتريت بومة موديل 2006 اتوماتيك خليجى من احد الاشخاص وانا عاوز اعرف شويه معلومات عنها وقت ما اشترتها كانت عامله 88 الف كيلوا وعاوز اعرف هو عمل صيانه ال 80 الف كيلوا ولا لاء انا لاحظت ان زيت الفتيس اصفر شفاف وكامل مش ناقص ولما جيت ازوده فى البنزينه العامل قالى ده بحالته ولما بصيت على سيور الديناموا والتكييف لاقيت عليها كتابه وارقام بالانجليزى لسه واضحة فهل بكده يبقى عمل صيانه ال 80 الف ولا لاء وعموما هو رقم الشاسيه 795773 لانى عاوز اعرف اغير الكاتينه ولا لاء ....اما بالنسبه لاستفسار التانى انا عندى العربيه قالى انها رياضيه قتحة سقف وجنوط وسبويلر وسى دى وabs وفتيس سى فى تى بس الفوانيس شفافه ورا وفاتحة اودام وفرش جلد بيج بس تحته فى فرش عادى بيج وعليه الكيس البلاستيك بتاعه فكده تبقى رياضيه ولا سوبر اكشن علما بان الاريال فى القايم مش فى السقف....اما الاستفسار التالت بخصوص استهلاك البنزين انا سافرت حوالى 320 كيلو منهم 40 كيلوا زحمه واستهلكوا معايا 29 لتر من غير تكييف وسرعه من 90 الى 120 بس طريق زراعى يعنى كل كام كيلوا اقف وابدا من جديد علشان المطبات لو ده مش طبيعى انظف الرشاشات بايه ... واسف على الاطالة

شكرا لكلماتك
انا كشفت عن رقم الشاسيه ده فلم اجد له بيانات عندنا فممكن حضرتك تسأل اللي باعها هو عمل صيانة التمانين فين وكانت شاملة ايه
اما اذا تعذر ذلك فالفنيين بالكشف على السيور هيعرفوا هي متغيره قريب ولا لأ وده ممكن يتم في الصيانة القادمة باذن الله

السوبر اكشن فرقها عن السبورت الفرش الجلد وطالما ده فرش جلد تحت منه فرش تاني يبقى مش اصلي والعربية اصلا بدون فرش جلد
اذن هي سبورت وخليجي وعلشان كده تفرق عن المصري ان الفوانيس الأمامية مش غامقة وكذلك موضوع الاريال قايم مش سقف
وبشكل عام كل الكماليات بتتغير حسب طلب الوكيل في الدولة المستوردة

بخصوص استهلاك البنزين فهو زايد شوية وممكن منظف دورة الوقود يساعد في تحسن الاستهلاك (الأصلي ماركة ميتسوبيشي سعره 60 جنيه ويباع في منافذ بيع قطع الغيار ويوضع مع التفويلة كل 10 آلاف كيلو متر)