الموضوع: حجز الشوارع للركن (ضروري حد يفيدني)

المشاركة الأصلية كتبت بواسطة MoToRiZeR

انا مع الرأي اللي بيقول إن الأولوية لأصحاب العمارة يركنوا .

طيب مصدر الاولوية دى جة منين؟؟؟ الساكن دة يملك جزء من العقار مش الشارع بالتالى موضوع الاولوية دة ملوش اساس من الصحة

ماهو مش معقول يعني أبقي راجع بيتي و تعبان و عايز أنام و مالاقيش ركنة عشان واحد جي يقعد ساعتين علي قهوة ولا عيل بيلعب بلاي ستيشن في المحل اللي في الشارع ولا حتي لو بيعمل حاجة مهمة، و بصراحة منظر مستفز طبعاَ (بالنسبة لي) إن ألاقي حد راكن تحت بيتنا و تحت الشجرة اللي إحنا زارعنها و مغطي العربية كمان

و هو الشخص اللى جاى يقعد على القهوة او يلعب بلاى ستيشن دة مواطن درجة تالتة و مش من حقة يركن عربيتة؟؟؟ خد بالك لو عممت المبداء دة يبقى الاحسن كل واحد يركن عربيتة تحت بيتة و يروح يقضى مشاويرة على رجليه لان مش حيبقى مسموح لة يركن الا تحت بيته فقط

طالما مشيت من الركنة اللى انت فيها و سيبتها فاضية يبقى من حق اى حد يركن فيها لان الشارع منفعة عامة مش ملك ليك او حتى ليك افضلية انك تستخدم المكان دة لمجرد انك ساكن فى العقار... افرض انك مستاجر للشقة اللى انت فيها و جارك مالك للشقة بنتعتة... يبقى هو له افضلية عليك؟؟؟

أول حاجة المصريين بيحبوا يركنوا قدام المكان اللي رايحينوا بالضبط .. ولا بديل عن ذلك .. يعني لو هتشتري حاجة من محل تركن صف تالت قدامه مفيش مشاكل .. لو رايح تمضي ورقة من مكان تركن قدامه تماماَ و لو ينفع تركن جوه المكتب و تديهم الورقة من جوة العربية و إنت قاعد يكون جميل .

معاك قلبا و قالبا... و انا شخصيا بركن فى انسب حتة للركن القانونى حتى لو بعيد شوية عن المكان اللى انا رايح له

تاني حاجة الشارع دائماَ هو الإختيار الأول لأغلبية الناس .. رغم إن معظم الأماكن اللي الواحد بيروحها (معظمها) بيكون فيها أماكن و ساحات باركنج .. و الدليل علي ذلك شارع سوريا في المهندسين .. لفترة من حياتي شغلي كان في ذلك الشارع و هو طبعاَ معروف للجميع .. شارع واسع و لكن الركن فيه أربع صفوف (أيوا ! أربعة و متفهمش الحياة ماشية إزاي و تمام!) .. و الشارع ماشي في حارة واحدة .. يعني لو حد حب ينزل حد راكب معاه ولا حد نازل من تاكسي الشارع كله يقف .. و متقدرش تقوله أقف علي جنب لأن أصلاَ مفيش جنب، و في المقابل .. في ضهر الشارع و عند التوحيد و النور فيه ساحة جراج بركن فيها تقريباَ انا و 4 أو 5 عربيات تانيين ! و برضه فيه جراجات مكدسة بصراحة بس يبقي الشارع هو الخيار الأول دائماَ ! عشان محدش عايز يدفع جوز الجنيهات .. و علي فكرة في الدول المحترمة مفيش ركنة ببلاش حتي في الشارع .. عشان محدش يقول إنه إفترا إنه يدفع كل ما يركن .

افتكر زمان كان فيه parking meters بالعملة فى وسط البلد... دلوقتى يطلعلك واحد من تحت الارض و يعمل حركتين اونطة "خش يا بية" و "ارجع يا بيه" و يبقى عايز ياخد اللى فى جيبك... و دلوقتى الركنات اللى بالكروت بقى فيها نصب و الكارت اللى بيتحط فى المكنة غير الكارت بتاعك و يقولك "دا الكارت فيه 50 قرش بس" و يبيعلك كارت جديد و يضرب على الكارت بتاعك

MMamdouh