نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

[husseinoo]

المسافة المناسبة بينك وبين السيارة التى امامك

بدون الدخول فى حسابات كثيرة

• لو ماشى بسرعة 30 كيلوا

هاتترك مسافة بينك وبين السيارة التى امامك تقريبا 15 متر

• لو ماشى بسرعة 90 كيلوا

هاتترك مسافة بينك وبني السيارة التى امامك تقريبا 40 متر

الخلاصة: كل ما هاتمشى بسرعة لازم تكون المسافة بينك وبين السيارة التى امامك كبيرة
وكل ما هاتمشى بسرعة هاتحتاج مسافة اكبر عشان السيارة تتوقف

كما سبق وقلنا انك لازم ترى عجل السيارة التى امامك على الاقل
خصوصا وانت متوقف اثناء ازدحام المرور
... عشان لو العربية التى امامك توقفت بدون تفكير وبدون ارتباك اكسر عجل الدركسيون على الآخر ... هاتعدى وتخرج من السيارة التى امامك بدون ان تلمسها ... وبدون الحاجة الى النظر الى اكصدام السيارة التى امامك هل هاخبط فيها ولا لأ
ما تشغلش نفسك وتخاف
الموضوع بسيط
طول ما انت شايف عجل السيارة التى امامك اكسر الدركسيون بتاعك على الآخر وعدى منه بلا تردد
ساعتها كل تركيزك هايكون على السيارات القادمة من الخلف
وموش هاتكون خايف ولا متردد ولا مرتبك

الموضوع هندسى بحث ... مالوش علاقة بالذكاء والمهارة فى القيادة والكلام الكبير ده ... دى قاعدة هندسية سهلة
لو انت شايف عجل العربية اللى امامك يبقى هاتخرج منها بسهولة بشرط كسر عجل الدركسيون على الآخر

تابع
مع اطيب التمنيات
اخوكم حسين غزالة

[husseinoo]

المسافة الآمنة
قاعدة الـ 3 ثوانى

الموضوع ده مهم قوى قوى
ازاى تعرف انك ماشى على سرعة مناسبة بينك وبين السيارة التى امامك
من غير اى حسابات معقدة "لازم تكون المسافة بينك وبين السيارة التى امامك زمنها 3 ثوانى"
انظر الى الصورة التالية


اضغط غلى الصورة للتكبير

تخيل ان العربية التى امامك تمر بجوار الشجرة
اول ما العربية التى امامك تمر بجوار الشجرة
عد 1001
1002
1003
اذا مثلا الموتوسيكل وصل عند الشجرة يبقى انت ماشى على سرعة مناسبة والمسافة بينك وبين السيارة التى امامك مناسبة جدا ... يعنى هاتلحق تقف بطريقة آمنة لو العربية التى امامك توقفت فجأة لأى سبب

اذا وصلت للشجرة قبل العدد 1003
يبقى انت ماشى على سرعة عالية للطريق
وانت قريب زيادة عن اللزوم من السيارة التى امامك
وموش هاتلحق تقف لو العربية اللى امامك وقفت فجأة

طبعا ممكن تزود ثانية اخرى لو الطريق مبلل بالمطر او فيه شبورة تحجب الرؤية او الطريق مظلم والإضاءة ضعيفة
يعنى ساعتها تعد حتى 1004

تابع
مع اطيب التمنيات
اخوكم حسين غزالة

[husseinoo]

عربية لازقة لى

انت ماشى على الطريق ومرة واحدة ظهر لك المجنون اللى ماشى وراك زى المجنون لدرجة انه لاصق لك والمسافة بينه وبينك حوالى 3 متر ويمكن اقل
هاتعمل ايه مع المجنون ده ؟



لو وقفت مرة واحدة لأى سبب هايحصل ايه ؟
ببساطة هايخبطك من الخلف
ولو وقفت جامد ... هايخبطك جامد
يا هاتخرج من الطريق
يا هاتخبط انت كمان العربية التى تسير امامك

طيب هاتتصرف ازاى؟

خصوصا ان امامك عربية ومافيش فرصة انك تعدى منها عشان توسع للى بيجرى خلفك زى المجنون

الحل
هاتعمل كالتالى:
هاتهدى عربيتك تدريجيا
لحد ما المسافة بينك وبين العربية اللى امامك هاتزيد
هايحصل حاجة من الأثنين
يا اما انت هاتعدى من العربية التى امامك لان المسافة بينك وبينها وسعت واصبح عندك فرصة تعمل مناورة جيدة وتعدى منه
او
العربية اللى خلفك لما هاتلاقى مسافة واسعة امامك هو اللى هايعدى منك ويدخل فى المسافة الواسعة اللى امامك

اهم حاجة
اوعى تقف مرة واحدة ... وفيه مجنون ماشى خلفك ولاصق عربيته خلف عربيتك

نقول ثانى:
لازم تتوقع كل حاجة على الطريق خصوصا الطريق السريع
لازم تنظر فى المرآه كل 5 ثوانى
لازم تكتشف السيارات التى تسير امامك وخلفك وبجوارك
لازم تراعى المسافة المناسبة بينك وبين السيارة التى امامك


وربنا الستار فى الاول والآخر

تابع
مع اطيب التمنيات
اخوكم حسين غزالة

[husseinoo]

اكتشف الطريق

لازم تاخد بالك من كل اللى بيحصل حواليك
موش كفاية انك مركز على اللى بيحصل امامك
القيادة الدفاعية تحتاج منك ان عينيك تتحرك دائما فى كل اتجاه ... ترى ما يحدث امامك وما يحدث خلفك وبجوارك من اليمين والشمال

انظر حواليك وليس للامام فقط
لا تنظر الى السيارة التى امامك فقط ... حاول تنظر الى اكثر من سيارة امامك 3 او اكثر
انظر الى اكثر من تقاطع امامك ... انظر الى الـ 2 تقاطع اللى امامك على الاقل ...

انظر جيدا على السيارات التى امامك وتوقع انها سوف تتوقف فى اى وقت ... انظر الى اشارات السيارة الخلفية ... اول ما تشاهد اشارات السيارة الخلفية مضيئة ... علطول توقع انك سوف تتوقف ... على الاقل ارفع رجلك عن البنزين وضعها فوق الفرامل وكن مستعد للتوقف

يعنى ما تفضلش تتفرج على العربيات التى امامك ... الاشارات الخلفية مضيئة ... وانت فى السرحان وموش فى دماغك ...

انظر يمينك وشمالك
شوف المسافة بينك وبين العربيات اللى على يمينك وشمالك واسعة بشكل كافى ولا لأ
مبدئيا نصيحة منى ما تحاولش تعمل نفسك "سندوتش"
ههههههههه
يعنى اوعى تضع نفس بين سيارتين
بلاش الموقف ده نهائى
خصوصا انك مبتدأ ... حتى ولو كنت قديم فى القيادة
افتكر فقط حكاية السندوتش دى وانت هاتفهم الكلام كويس





انظر فى المرآة كل 5 ثوانى
حاول تنظر من فوق كتفك على السيارات التى تسير بجوارك ... لانها احيانا لن تظهر فى المرآة الجانبية
والموضوع ده خطير جدا جدا
المنطقة العمياء ... سوف يتم شرحها

خد بالك من المشاة
الناس اللى بتخرج لك من خلف السيارات ... ومن خلف الاتوبيسات المتوقفة ... والموتسيكلات اللى بتتحرك من على يمينك بطريقة مفاجأة ومن الاولاد الصغيرين ... الأطفال اللى بتخرج لك من بين السيارات المتوقفة ...

عينك على الاشارات
وعلى سرعة السيارات التى تسير امامك
توقع السرعة المناسبة
كن مستعد للتوقف فى اى وقت ...

خليك مركز ومصحصح
طول ما انت مركز ومصحصح هاتتوقع اى شىء على الطريق ... وهاتقدر تتصرف صح وفى منتهى الهدوء بدون اى انفعال
هاتتصرف بشكل طبيعى وتلقائى وبدون اى خوف او تردد

تابع
مع اطيب التمنيات
اخوكم حسين غزالة

[husseinoo]

زيادة السرعة والفرامل

زيادة السرعة
اضغط على البنزين بشكل تدريجى وهادىء ... عشان العربية ماتندفعش فى الجرى بشكل مفاجىء ... وكمان حتى تحصل على السرعة المطلوبة بشكل تدريجى ... والاهم من ده كله انك هاتوفر بنزين .. يعنى اللى بيضغط على البنزين بشكل جامد ... هايستهلك بنزين بشكل جامد
واللى هايضغط على البنزين بشكل متدرج ... هايستهلك اقل معدل من البنزين

البس الجزمة المناسبة
لو حاسس ان الحذاء بتاعك موش مريحك غيره
يعنى لازم تشعر بدواسة البنزين تحت رجلك ... لو الحذاء موش مريح ههههههه اشترى غيره

اثناء الزحام والمنحنيات
ارفع رجلك من على البنزين وضعها فوق الفرامل
لا تضغط على الفرامل الا عند الضرورة
يعنى كن مستعد
مثلا بتعدى تقاطع ... ارفع رجلك من على البنزين وضعها على الفرامل وكن مستعد لتهدئة العربية او التوقف فى اى وقت
لو حصل اى حاجة اثناء مرورك فى التقاطع هاتضغط على الفرامل فقط بكل ثقة وبدون تردد
اوعى تدخل على التقاطع او المناطق المزدحمة ورجلك على البنزين


الفرامل
اضغط عليها بشكل متدرج وهادىء ... وبقوة فى النهاية حتى تتوقف السيارة تماما عند الضرورة
فى اى تقاطع
ضع رجلك فوق الفرامل وكن مستعد للتوقف او تهدئة السيارة عند الضرورة

لا تستخدم الفرامل كثير
يعنى انظر الى السيارات التى امامك ... لو الاشارات الخلفية مضيئة ... بلا تردد ارفع رجلك عن البنزين ... سوف تهدأ سرعة العربية تدريجيا حتى ولو لم تضغط على الفرامل
اذا احتجت للاستمرار فى السير تابع الضغط على البنزين
اذا استمرت السيارات التى امامك فى التوقف وشعرت ان سيارتك محتاجة الى الفرامل اضغط الفرامل
فى هذه الحالة
لن تستخدم الفرامل الا عند الضرورة لان السيارة هاتكون سرعتها هدأت تدريجيا لوحدها عن طريق "الموتور والفتيس"

ما دام الفتيس معشق ورفعت رجلك عن البنزين
سرعة العربية هاتقل تدريجى
واستخدامك للفرامل هايكون اقل ما يمكن
واستهلاكك للفرامل هايكون اقل ما يمكن
وصيانة الفرامل هايكون اقل ما يمكن

يعنى ما دام سعادتك شايف ان العربيات التى امام متوقفة
مافيش داعى اجرى ولما اوصل عندها اضغط على الفرامل جامد
طيب ليه ؟
ما انا ارفع رجلى عن البنزين فقط
والعربية هاتهدأ سرعتها لوحدها وتدريجى ... ولما اقترب من السيارات المتوقفة امامى ... موش هاحتاج غير انى اضغط على الفرامل بقدر قليل
ويمكن امشى علطول ... وهاتلاقى العربيات اللى حواليك المتوقفة تماما هاتبدأ تتحرك

وانت اساسا قادم من الخلف وبتتحرك قبلها وبسرعة معقول وكل اللى هاتعمله انك هاتختار الغيار المناسب وتستمر فى السير وبالطريقة دى هاتسبق العربيات اللى حواليك برغم انك موش بتجرى بسرعة عالية


الضغط القوى على الفرامل
هايأثر على الكاوتش
الكاوتش سوف يتآكل بسرعة


طيب لو انت نازل من على منطقة مرتفعة
انزل على غيار منخفض مثلا الغيار الثالث او الثانى
لو نزلت مكان مرتفع جامع على الغيار الثانى ... هاتقدر توقف العربية بسهول بمجرد الضغط على الفرامل ...
لكن
لو نزلت مكان عالى وانت على سرعة عالية وغيار عالى مثلا الغيار الخامس ... العربية لن تتوقف بسهولة وهاتعرض نفسك للخطر
اما
لو نزلت من مكان عالى والفتيس ممور ... يعنى بدون اى غيار .. ده اخطر حاجة ... لان العربية فعلا لن تتوقف بسهولة مهما ضغط على الفرامل

نصيحة: اوعى "تمور" الفتيس وانت نازل من مكان عالى زى الكبارى لازم الفتيس يكون معشق على غيار منخفض مثل الغيار الثالث او الثانى

راجع مستوى الزيت للفرامل

اذا سمعت صوت صفارة اثناء الضغط على الفرامل ... لازم تراجع الفرامل عند متخصص ميكانيكى للفرامل ... يعنى ماتفضلش ماشى بالعربية وهى عمالة تصفر اثناء ضغط الفرامل وانت نايم وموش فاهم حاجة

تابع
مع اطيب التمنيات
اخوكم حسين غزالة

[husseinoo]

مراجعة
قاعدة الـ 3 ثوانى

كيف تحدد المسافة المناسبة بينك وبين السيارة التى أمامك

تابة
مع اطيب التمنيات
اخوكم حسين غزالة

[husseinoo]

مسح وكشف الطريق

الخلاصة: هناك 3 قواعد لازم تمشى عليهم

القاعدة الاولى: انظر الى الامام على قدر المستطاع
القاعدة الثانية : انظر الى منطقة كبيرة امامك ... يعنى لا تركز على السيارة التى امامك فقط
القاعدة الثالثة : شغل عينيك علطول فى كل اتجاه "امامك ... يمينك ... شمالك ... خلفك .. تابلوه السيارة"

تابع
مع اطيب التمنيات
اخوكم حسين غزالة

[husseinoo]

المرور من السيارة التى امامك

طبعا خطورة الموضوع ده تظهر فى الشارع الاتجاهين كما هو موضح فى الصورة الشارع حارتين "رايح وجاى"
طبعا لو سعادتك ماشى على سرعة 90 كيلوا والسيارة القادمة فى الاتجاه المقابل هى كمان قادمة على سرعة 90 كيلوا
يبقى الموضوع خطر جدا جدا






تظهر المشكلة ايضا فى المنحنيات
كما يظهر فى الصورة يوجد امامك منحنى وانت موش شايف كويس الطريق




طيب هانعمل ايه فى الطريق المزدوج





الخطوة الاولى
اتحرك شمال سنة صغير
انظر على السيارات المقابلة
لو مافيش سيارات مقابلة




الخطوة الثانية
استخدم الاشارة شمال قبل المرور




الخطوة الثالثة
انظر فى المرايا قبل المرور
يمكن يكون فيه سيارة خلفك اسرع منك





الخطوة الاخيرة
المرور ثم اعطاء اشارة يمين والعودة الى الحارة اليمين والاستمرار فى السير




ملحوظة: انظر فى المرآة لمتابعة حركة السيارات القادمة من الخلف اثناء انتقالك الى الحارة اليمين



ملحوظة: لو انت ماشى على سرعة مثلا 100 كيلو
وعشان تعدى من السيارة اللى امامك هاتحتاج تزود السرعة الى 120 او اكثر

نصيحة: مافيش داعى ان تعدى منه .. لانك ممكن فى ثوانى تتخطى سرعة الـ 120 كيلوا وساعتها هاتكون ماشى على سرعة اعلى من المسموح بها قانونا وتعرض نفسك لمخالفة سرعة عالية

تابع
مع اطيب التمنيات
اخوكم حسين غزالة

[Ashraf Gharib]

السلام عليكم ورحمة الله وبركاته
تأخرت 7 سنوات
ولكني انبهرت بكم هذه المعلومات
اشكركم على مجهودكم الرائع
اشكركم على حسن تعاونكم
بارك الله فيكم وجعله في ميزان حسناتكم

[husseinoo]

السلام عليكم ورحمة الله وبركاته
تأخرت 7 سنوات
ولكني انبهرت بكم هذه المعلومات
اشكركم على مجهودكم الرائع
اشكركم على حسن تعاونكم
بارك الله فيكم وجعله في ميزان حسناتكم

اشرف بك
شكرا جزيلا على تشجيعك وعلى كلامك الجميل
بارك الله لنا ولك
شكرا لحضرتك وكل عام وحضرتك طيب والاسرة الكريمة بخير
مع اطيب التمنيات
اخوكم حسين غزالة

[Ashraf Gharib]

حبيبي ياحسين بك
بجد احيك على روعة سردك للمواقف التي تعرضت لها وحرصك على ايضاح النقاط الهامة
وهذا ليس بجديد على نجم متألق هنا

اشرف بك
شكرا جزيلا على تشجيعك وعلى كلامك الجميل
بارك الله لنا ولك
شكرا لحضرتك وكل عام وحضرتك طيب والاسرة الكريمة بخير
مع اطيب التمنيات
اخوكم حسين غزالة

[Ashraf Gharib]

تحية حب وتقدير
للكاتب الرائع الجميل
تسلم ايديك وربنا يحفظك ويحفظنا
عاوز رأيك في المازدا 323 موديل 82
موتور جديد وبطارية جديدة

[A.Khalifa2017]

الأخ حسين
متابع موضوعك من عام ونصف تقريبا مع بداية مشوارى فى قيادة السيارات والان بعد هذه المدة وصلت الى درجة مهارة عالية فى القيادة رغم انى تعلمت فى مدينة ابها الجبلية فى السعودية بسيارة مانيوال حيث القيادة دائما على المرتفعات والمنخفضات الا ان الامر اصبح سهلا ومألوفا مع مرور الوقت
وهذا بفضل الله سبحانه وتعالى ثم بفضل مقالاتك ونصائحك الغالية
اشكرك كثيرا واتمنى لك كل التوفيق
تقبل تحياتى

[hossam.m]

السلام عليكم ورحمه الله وبركاته

كبداية احب اشكر استاذ حسين وكل من ساهم بمعلومة فى هذا الموضوع
رغم عدم قدرتي على قراءة كل المشاركات لكن فعلا كل صفحة انا قرأتها لابد اني استفدت بشىء مهم جدا

انا لسة ببدأ مشواري فى تعليم القيادة واغلب الاسئلة اللى كانت بتدور فى ذهني فعلا لقيت اجابات لها هنا لذلك انا عاجز جدا عن الشكر
لكن فى شىء محيرني حابب اسألكم فية واتمنى اتوفق ببعض الاجابات
بالمختصر المفيد انا رجلي تقيلة جدا جدا على الفرامل يمكن بقدر اتحكم شوية مع البنزين لكن مشكلتى فى الفرامل
لما بسوق عربية احد اصحابي ويطلب مني اوقف او اهدى العربية سواء كانت مانيوال او اوتوماتيك فبدوس فرامل جامد جدا مش بعرف ادوس تدريجي
لاحظت وانا بركب ميكروباص ان السواق لما بيهدى من سرعة عالية مثلا (حول 100 كيلو تقريبا ) بيدوس على الفرامل بشكل متتالي (بمعنى يدوس ويشيل يدوس ويشيل مرات متتابعة ورا بعض ) لحد ما العربية بتهدي وتوصل مثلا ل 30 ولو احتاج يوقف بعد كدة فبيضغط على الفرامل والدبرياش ويوقف
فهل دة تصرف سليم ال standard لتهدئة السيارة ام نضغط بشكل تدريجي (وليس متتالي )
ونظرا لأن رجلي تقيلة على الفرامل كما وضحت انا شايف الافضل انى ادوس فرامل مرات متتالية وليس مرة واحدة ولا اية رأيكم

شكرا وتحياتي للجميع

[A.Khalifa2017]

السلام عليكم ورحمه الله وبركاته

كبداية احب اشكر استاذ حسين وكل من ساهم بمعلومة فى هذا الموضوع
رغم عدم قدرتي على قراءة كل المشاركات لكن فعلا كل صفحة انا قرأتها لابد اني استفدت بشىء مهم جدا

انا لسة ببدأ مشواري فى تعليم القيادة واغلب الاسئلة اللى كانت بتدور فى ذهني فعلا لقيت اجابات لها هنا لذلك انا عاجز جدا عن الشكر
لكن فى شىء محيرني حابب اسألكم فية واتمنى اتوفق ببعض الاجابات
بالمختصر المفيد انا رجلي تقيلة جدا جدا على الفرامل يمكن بقدر اتحكم شوية مع البنزين لكن مشكلتى فى الفرامل
لما بسوق عربية احد اصحابي ويطلب مني اوقف او اهدى العربية سواء كانت مانيوال او اوتوماتيك فبدوس فرامل جامد جدا مش بعرف ادوس تدريجي
لاحظت وانا بركب ميكروباص ان السواق لما بيهدى من سرعة عالية مثلا (حول 100 كيلو تقريبا ) بيدوس على الفرامل بشكل متتالي (بمعنى يدوس ويشيل يدوس ويشيل مرات متتابعة ورا بعض ) لحد ما العربية بتهدي وتوصل مثلا ل 30 ولو احتاج يوقف بعد كدة فبيضغط على الفرامل والدبرياش ويوقف
فهل دة تصرف سليم ال standard لتهدئة السيارة ام نضغط بشكل تدريجي (وليس متتالي )
ونظرا لأن رجلي تقيلة على الفرامل كما وضحت انا شايف الافضل انى ادوس فرامل مرات متتالية وليس مرة واحدة ولا اية رأيكم

شكرا وتحياتي للجميع

مسالة التحكم فى الفرامل يلزمها بعض التدريب تماما كالتعامل مع دواسة البنزين والدبرياج
اولا يفضل ان تتدرب على الامر فى مساحة خالية مع امكانية التحرك بسرعات مختلفة
ثانيا عدل وضع الكرسى بالسيارة التى تقودها حتى تصل قدمك للدواسات بشكل مريح فلا تكون قريب جدا فلا تستطيع فرد ساقك اثناء الضغط ولا بعيد جدا حتى تكون اطراف اصابعك فقط الملامسة للدواسات
الوضع الافضل هو ان تكون قادر على الضغط على الدواسات بسهولة باستخدام مشط القدم ( المنطقة تحت الاصابع مباشرة )
ثالثا ارتداء حذاء مناسب ذو نعل غير سميك حتى تتمكن من الشعور بضغطة الدواسة تحت قدمك ( مهم جدا )
رابعا ابدأ التمرين على سرعات منخفضة - إذا كنت تقود سيارة مانيوال قم بالتحرك حتى السرعة الثانية وابدأ بنقل قدمك من دواسة البنزين الى الفرامل والضغط بشكل بسيط حتى تشعر بالسيارة بدأت بالتوقف قم بالضغط على الدبرياج مع استمرار الضغط على الفرامل حتى التوقف ، قد يكون الامر صعبا فى البداية لكن اعد التمرين مرارا وتكرارا حتى تشعر قدمك بمقدار الضغط المناسب الذى تبدأ معهالفرامل بالسيطرة وإيقاف السيارة
ودعنى اخبرك ان الامر يختلف كثيرا من سيارة لاخرى فمن تعود على سيارة معينة وقام بقيادة اخرى قد يحتاج بعض الوقت وقد يضطر للضغط على الفرامل بقوة اكثر من الازم حتى يعتاد حساسية الفرامل ويحدد مقدار الضغط المناسب لايقاف السيارة على سرعة معينة
خامسا اذا اتقنت ايقاف السيارة بالضغط على الفرامل فى الوقت المناسب مع السرعة المنخفضة فابدأ بزيادة السرعة ثم تهدئة السيارة فقط بالفرامل بدون توقف كامل - قم بقيادة السيارة الى السرعة الثالثة ثم ابدأ بالضغط على الفرامل برفق حتى تهدأ سرعة السيارة ثم انقل الغيار الى السرعة الثانية مع العودة للضغط على البنزين والاستمرار بالسير
ايضا قم بتكرار هذا الامر عدة مرات حتى تتقن تماما تهدئة السيارة بدون التوقف بشدة
وإعلم ان الصحيح هو الضغط على الفرامل بمقدار مناسب مع الاستمرار حتى العودة للسير او التوقف الكامل اما الضغط المتقطع فهو غير مناسب ولا يمكنك من التحكم بالسيارة بالشكل المطلوب وخاصة انه مع نظام abs اصبح بالامكان تغيير اتجاه السيارة مع الضغط المستمر على الفرامل بدون الحاجة الى الضغط المتقطع
كما ان الضغط بشدة على الفرامل بدون وجود ما يستدعى ذلك يحمل خطورة فى اصطدام من بالخلف بك
لذا تدرب كثيرا على الامر ويفضل باستخدام نفس السيارة حتى تجد نفسك قد اعتدت الامر بعد فترة من الوقت

وفقك الله