حكايات البشر

[أشرف فتحى]

أ / أشرف

أنا قرأت الحكاية دي قبل كدة ؟:u_thin1[1]:
انت كتبتها قبل كدة في لينك من اللينكات على المنتدى بس كانت مختصرة

لو صح... يبقا طمنتني إن لسة فيه أمل ... إني ما كونش أصبت بزهايمر يفوق ال 50 % :o_stupid[1]:

جميلة .. والاجمل التسامح إللي جواك
واحتسابك عند الله
سؤال خارج الموضوع ... حضرتك برج إيه :c_laugh[1]:

أسف يا نور لسه شايف المشاركه دلوقتى بس!!

أشكرك على ذوقك ومجاملتك الرقيقه!...وفعلا معاكى حق انا حكيتها للأخ ميدو اللى كان بيقول انه لو معاه سلاح كان ضرب الراجل اللى شتمه بالنار!!

وده اللى فكرنى بيها وزياده على كده لما قابلته بالصدفه بعدها فقلت أحكيها فى حكايات البشر عشان ناس تانيه تستفيد منها كعبره عن عدم الغضب والتسرع فى الحكم بظواهر الامور كمان انه لسه فى ناس محترمه !!

بالنسبه لموضوع الابراج دى معلش والله مفهمش فيها فسامحينى ولو مصممه هسأل وأابقى أقولك !!

[أشرف فتحى]

دكتوره مسلمه ..

حكايه حضرتك فكرتنى بالحديث " الخير فى وفى امتى الى يوم الدين"

فى عباره بقت مشهوره قوى وبتتكرر كتييييييييير:-

معقوله فى حد بيخدم لوجه الله دلوقتى؟؟!!!

أكيد دى أول حاجه جت على بالك ..مش كده؟!

والله يا جماعه انا شفت موظف فى الضرايب بيتصل بالممولين ينبهم لمشاكل فى الاقرارات بتاعتهم .

الغريبه انه كان بيتصل بيهم من مكتب كنت بشتغل فيه مش من الشغل ومبيعرفهمش شخصيته عشان ميبقاش موضع شبهه وميخسرش ثواب العمل ده .!!!!!

الحلو موجود والوحش موجود بس الوحش عامل زى بقعه القلم الجاف فى القميص الابيض بيشد العين ويبوخه ومبتطلعش فالواحد يكره القميص ده ويفقد الامل فيه انه ينفع يتلبس تانى ..

[أشرف فتحى]

ممكن حكايه صغيره؟!

ممكن ...شكرا !

تعالوا النهارده نحكى حكايه نكد شويه بالعند فى الدكتوره مسلمه !!

هى مش نكد قوى بس احداثها مش مفرحه !!

نعم ؟؟ حاضر ..حاضر..هخش فى المفيد..بس بالراحه شويه !!

حد فاكر فيلم كان أسمه الاخرس على ما أفتكر بتاع محمود ياسين؟

طيب الحكايه دى هتفكركوا بيه..!

الحكايه قديمه شويه بدأت فى الثمانينات ..تقريبا 1983 ..مش فاكر قوى عشان كنت لسه صغير....

نعم؟؟!!

ماشى ..ماشى..هأختصر...بس برضه بالراحه !!

بطل حكايتنا مهندس كهرباء شاب (ساعتها طبعا ) ربنا كرمه بالعلم ومحبه الناس ووضعله القبول فى الارض وسماحه الوجه ووسامته (طبعا لازم يكون وسيم ..مهو عمى ..مش عايزه شرح دى !..حد معترض؟...برضه انت؟!..ماشى!!)..وبالرغم من سنه الصغير بالنسبه لزمايله وصل لانه يمسك مشرف او رئيس ورديه فى مصنع الحديد والصلب اللى كان بيشتغل فيه!!...
طبعا ظهر أعداء النجاح ومحاوله إظهاره بصوره الشاب الصغير معدوم الخبره والمهاره الإداريه و...و...و...!

المهم..لفت الايام وحصلت حادثه فى المصنع فى ورديه عمى ده !

الحادثه عباره عن انه واحد فنى من الفنيين طلع واحد من الابراج اللى فى المصنع ووقع من فوق وطبعا الارتفاع بيبقى عالى جدا وتوفاه الله !!
طبعا سبب وقوعه يعلمه الله !!..يمكن داخ ..يمكن إتزحلق..يمكن أى حاجه!! ..الله أعلم.!

طبعا تحقيقات وحاجات ومحتاجات لغايه ما الموضوع إتقفل لأنه مكانش غلطه حد...والاعمار بيد الله ..

تتخيلوا بقى أيه اللى حصل؟!

طبعا فى الفيلم محمود ياسين جاله حاله نفسيه وفقد النطق واتعرف على القمر مديحه كامل (الله يرحمها) واتجوزها !!.

لكن فى الحقيقه بقى...الناس اللى سميناهم أعداء النجاح عملوا اتصالات بأهل المتوفى وأقنعوهم يرفعوا قضيه إهمال وتعويض مش على مصنع الحديد والصلب .لأ...على عمى على إعتباره رئيس الورديه والمسئول المباشر عن وقوع الحادث..!!!!!!!!!!!!!!

طبعا القضيه مشيت وعمى وقف فى القفص بتاع المحكمه زى المتهمين لغايه ما القضيه إتحفظت ....

نقف هنا شويه....
معقول أهل المتوفى دول بيتاجروا بموته ويدوا ودانهم لحد يضللهم بالشكل ده؟؟؟

معقول الغيره توصل بحد ...أنه يفكر لحد أنه يدمر مستقبله؟؟؟

التعويض اللى طلبوه كان يستاهل انهم يشرحوا جثه ابنهم عشان يحددوا سبب وفاه المتوفى لو القضيه كانت مقنعه او فى دافع او القاضى كمل معاهم ومحفظش القضيه؟

الشركه اللى المفروض طرف فى النزاع مقدمتش اى دعم للمهندس الكفؤ اللى كانوا بيقولوا عليه قصايد شعر...

هدف اعداء النجاح الحقيقى إتحقق وهو الشوشره على الراجل اللى عامل فيها ابو العريف وعايز كل حاجه تبقى زى بلاد بره..(عمى)
وغير الشوشره والاسأه اليه يتشتت تركيزه ويضيع وقته ويقصر فى شغله فيرجعوا زى ما كانوا وكلهم شماته !!!


معقول؟؟؟!!!!

نكمل حكايتنا...

طبعا المهندس المجتهد جاله حاله إحباط وصدمه وإتغيرت كل مفاهيمه ولولا إيمانه بربه وإحتسابه الامر عنده ..الله أعلم كان ممكن يتحول للأيه؟!

طبعا حاله القرف اتوسعت وكبرت لغايه ما بقى مش طايق يقعد فى مصر كلها..!!

فكر فى السفر ...طب هيروح فين؟؟؟

أوروبا ....أى بلد فى أوروبا....مين عارف ؟....مش يمكن الوضع يتغير زى ما بنسمع...

جدتى الله يرحمها تتحايل عليه..أبدا !

جدى الله يرحمه يقنع فيه...مش ممكن !

والدى أخوه الكبير يتناقش معاه...خلاص !!

لم القرشين اللى كان هيتجوز بيهم وطلع على النمسا بتأشيره سياحه طبعا...

ليه النمسا؟؟ معرفش

طب بيتكلم المانى ؟؟ لأ

طب يعرف حد هناك ؟؟؟ ولا عمره خرج بره مصر !


عمل أيه فى النمسا؟؟؟

دى بقى حكايه تانيه...

أشوفكم على خير........

[نور العمر]

دكتوره مسلمه ..

حكايه حضرتك فكرتنى بالحديث " الخير فى وفى امتى الى يوم الدين"

فى عباره بقت مشهوره قوى وبتتكرر كتييييييييير:-

معقوله فى حد بيخدم لوجه الله دلوقتى؟؟!!!

أكيد دى أول حاجه جت على بالك ..مش كده؟!

والله يا جماعه انا شفت موظف فى الضرايب بيتصل بالممولين ينبهم لمشاكل فى الاقرارات بتاعتهم .

الغريبه انه كان بيتصل بيهم من مكتب كنت بشتغل فيه مش من الشغل ومبيعرفهمش شخصيته عشان ميبقاش موضع شبهه وميخسرش ثواب العمل ده .!!!!!

الحلو موجود والوحش موجود بس الوحش عامل زى بقعه القلم الجاف فى القميص الابيض بيشد العين ويبوخه ومبتطلعش فالواحد يكره القميص ده ويفقد الامل فيه انه ينفع يتلبس تانى ..

100 100 100 100 صح
ده موجود والله
والحمد لله

أ / أشرف وفر على نفسك موضوع البرج
انت مواليد شهر إيه

[muslimah_dentist]

أخونا أشرف

كدة تشوقنا .....

عايزين الجزء التانى بسرعة

[muslimah_dentist]

أ / أشرف وفر على نفسك موضوع البرج
انت مواليد شهر إيه

واضح ان الأبراج مأثرة عليكى أوى يا نور....

طيب أنا برج الأسد و فيه حاجات كتيرة جدا من صفات البرج مش فيا خالص زى مثلا حب القيادة ، يعنى انا مثلا مأحبش انى أبقى قائدة على حد أبدااااااااااااااا

[Dr_Mido]

دكتوره مسلمه ..

حكايه حضرتك فكرتنى بالحديث " الخير فى وفى امتى الى يوم الدين"

فى عباره بقت مشهوره قوى وبتتكرر كتييييييييير:-

معقوله فى حد بيخدم لوجه الله دلوقتى؟؟!!!

أكيد دى أول حاجه جت على بالك ..مش كده؟!

والله يا جماعه انا شفت موظف فى الضرايب بيتصل بالممولين ينبهم لمشاكل فى الاقرارات بتاعتهم .

الغريبه انه كان بيتصل بيهم من مكتب كنت بشتغل فيه مش من الشغل ومبيعرفهمش شخصيته عشان ميبقاش موضع شبهه وميخسرش ثواب العمل ده .!!!!!

الحلو موجود والوحش موجود بس الوحش عامل زى بقعه القلم الجاف فى القميص الابيض بيشد العين ويبوخه ومبتطلعش فالواحد يكره القميص ده ويفقد الامل فيه انه ينفع يتلبس تانى ..

لا فى وانا شخصيا اتعاملت مع مندوب ضرايب من النوع ده


كانت حساباتى ملخبطه علسان المحاسب بتاعنا مش خبرة فى موضوع الضرايب وكانت مشكلتنا فى تحصيل ضريبه المبيعات


احنا فى الشركه 3 شركاء واصحاب اساسا من 3 اعدادى من كتير يعنى


المهم
الراجل عرض مساعدته علينا لانه شاف اننا منيلين الدنيا ومتاخرين عن الاقرار


طبعا فى محضر معاينه بيتعمل وهو بيجى يعان مقر الشركه

اولا عل المعاينه فى ن=فس يوم طلبنا للتسجيل على الضريبه لانه راغ=عى اننا مقدمين فى مناقصه هى صغيرة بس تعتبر بللنسبه لينا كبيرة


عمل معاينته عادى جدا وخلص محضر المعاينه وخجة نزله فى عربيته

وطلع قعد معانا بتاع 3 ساعات يراجعلنا الفواتير ويفهمنا نمشى ازاى


وكل دة لوجه الله بدون اى مقابل


تحيه للراجل دة وامثاله

[muslimah_dentist]

لا فى وانا شخصيا اتعاملت مع مندوب ضرايب من النوع ده


كانت حساباتى ملخبطه علسان المحاسب بتاعنا مش خبرة فى موضوع الضرايب وكانت مشكلتنا فى تحصيل ضريبه المبيعات


احنا فى الشركه 3 شركاء واصحاب اساسا من 3 اعدادى من كتير يعنى


المهم
الراجل عرض مساعدته علينا لانه شاف اننا منيلين الدنيا ومتاخرين عن الاقرار


طبعا فى محضر معاينه بيتعمل وهو بيجى يعان مقر الشركه

اولا عل المعاينه فى ن=فس يوم طلبنا للتسجيل على الضريبه لانه راغ=عى اننا مقدمين فى مناقصه هى صغيرة بس تعتبر بللنسبه لينا كبيرة


عمل معاينته عادى جدا وخلص محضر المعاينه وخجة نزله فى عربيته

وطلع قعد معانا بتاع 3 ساعات يراجعلنا الفواتير ويفهمنا نمشى ازاى


وكل دة لوجه الله بدون اى مقابل


تحيه للراجل دة وامثاله

و الله كلامك يا دكتور ميدو أنت و أستاذ أشرف جميل و يرجع الأمل فى الموظفين المصريين

بس أنا مستنية أخونا أشرف يكمل حكاية عمه اللى شوقنا بيها جدا ( يا ريت يعمل ده بسرعة)

و بعد كدة هأنكد عليكم تانى و هأحكيلكم على موقف عجب و لذيذ جدا حصلى مع موظفين زى الفل فى مديرية الصحة

يالا بقى انشاء الله محد حوش......حبة نكد كدة ع الماشى

[أشرف فتحى]

أخونا أشرف

كدة تشوقنا .....

عايزين الجزء التانى بسرعة

مقدرش والله أزعلك يا دكتوره ...كل الحكايه انى كنت فى مقابله المنتدى إمبارح فى اسكندريه وطبعا نمت حوالى 4 ساعات فى اليومين اللى فاتوا وسايق من القاهره للأسكندريه رايح جى غير الجاكوزى اللى كنت اول مره اشوفه واللى عمله فيا ...

نكمل....


طلع عمى على النمسا ..معاه ما تبقى من تحويشه العمر وبدء يدور على عمل ...

اولا المصريين فى الغربه مختلفين تماما عن ما بنقابلهم فى حياتنا العاديه فهما صنف من اتنين...

جدع جدا ويشيلك فى عينيه ويقسم معاك اللقمه لغايه ما تتوفق لحاجه تساعد بيها نفسك..

والنوع التانى ما يستاهلش نتكلم عليه وكلنا عارفينه....

بعد دوخه والفلوس قربت تخلص الى جانب الحاجز المنيع المتمثل فى إختلاف اللغه...فاكرين احمد زكى فى فلم النمر الاسود لما كان بيسأل على محطه القطار وقعد يبكى من إحساسه بالغربه والخلفيه الموسيقيه ""يعنى إختلاف اللسان يسجن بنى الانسان "" ..

الفرق هنا ان عمى طبعا بيتفاهم بالانجليزيه معاهم بس الملحوظه هنا انهم اولا شعب مش ودود قوى يعنى مش مرحب بمساعده الغرباء زى عندنا...تانى حاجه إصرارهم على اللغه الالمانيه كلغه محليه...يعنى لما تسأل حد عن عنوان مثلا يفهم س}الك بالانجليزيه لكن يجاوب بالالمانى يتوهك اكتر..!!!

تخيلوا مهندس كهرباء مصرى بيشتغل ايه فى النمسا؟!!

بياع جرايد ....!!!!

الفلوس اللى جايه على قد اللى رايحه....

التاشيره خلصت من زمان......

الفتن من كل اتجاه......


اتأكد انه إختار غلط...


طب ايه البديل؟!!...مينفعش يرجع مصر بعد ما مبقاش معاه اى حاجه ...وخسر كل تحويشه العمر بس الدنيا مطلعتش وردى زى ما كان متخيل....

ياااااااااااااااه....يعنى رضينا بالهم والهم مش راضى..!!!!!


كان قدامه يرجع مصر ويلغى الاجازه بس هيبقى خسران فوق فلوسه كرامته ...

مجرد فكره الكلام من ورا ظهرك حتى لو مش سامع بيقتلك....وكالعاده هتلاقى اللى يقولك...
كأنك يابو زيد ما غزيت...اديك رحت ورجعت تقشر بصل...وما شابه من تعليقات لا تخلو من الاهانه والشماته !!

طب أجرب بلد تانيه...(الكلام على لسان بطل حكايتنا.)


أيه البلد اللى الشغل متوفر فيها من غير حاجز لغه او تأشيره ؟!!!

بس...العراق...

طب ليه العراق؟

العراق كانت فى حرب مع ايران وكانت بترحب بأى عماله وتقريبا من غير تأشيره كمان !!

كمان فى واحد جارنا كان شغال هناك وممكن يساعدنى...لغايه ما ألاقى حاجه....

اثناء تفكيره و ترتيبه حصل مفاجئه...السلطات النمساويه قبضت عليه...مهو معهوش تأشيره !!

إتسلم للسفاره المصريه عشان يرحلوه ووصل مصر فى أسوأ حاله ممكن يكون عليها نفسيا وبدنيا...


هتقولوا الراجل ده حظه وحش قوى !!!...لسه بدرى..!!!!

فاصل ونواصل..

[نور القمر]

منتظرين باقي الحكاية يا اشرف

[أشرف فتحى]

منتظرين باقي الحكاية يا اشرف

يا خبر ابيض نور القمر بحالها !!

والله شرف ليا انك تهتمى بحكايتى ...شكرا ليك على المشاركه...

نكمل ....

لو فاكرين ان ده أخر جزء فهقولكم من دلوقتى الاحداث بتاعه القصه دى حصلت فى 25 سنه يعنى عمر ...هحاو لأختصر فيها عشان نخلصها بسرعه ونسمع حكايه نور العمر...


وصلنا لغايه ما رجع المهندس المصرى اللى بيبيع جرايد فى النمسا مترحل وفى أسوء حاله ممكن نتخيلها...

لسه برضه جدتى بتتحايل عليه وجدى بيقنع فيه ووالدى بيتناقش معاه...أبدا مش هقعد فى البلد دى تانى...

عايز تليفون جمال...(جمال ده جارنا اللى مسافر العراق..)

أول ما شد حيله إتصل بجمال جارنا وصديقه وبالفعل رتبوا السفر وإستلف مبلغ من والدى وسافر على العراق..

العراق فى الوقت ده كانت فى حاله حرب مع ايران وبطل حكايتنا كان بيشتغل قريب قوى من المنطقه اللى بيحصل فيها الضرب ...

لدرجه انه بيشوف الصاروخ ماشى فوقيه زى ما بنشوف الطيارات دلوقتى...

عاش فى العراق فتره طويله وبصراحه احواله اتعدلت...العراق طول عمرها من اغنى دول المنطقه واكثرها قوه..الى جانب الحكم العسكرى الصارم فى هذا الوقت ( حاجه زى الاحكام العرفيه بتاعتنا بس وقت الحرب بجد ) اللى خلى الناس ملتزمه فى كل حاجه مش من موروثات وعادات النظام فى المجتمع لكن لان فى الوقت ده كان اسهل حاجه الحكم بالاعدام رميا بالرصاص ..
كمان كان فى حكايات مشهوره عن تخفى القاده والحكام ونزولهم المدن ومجمعات الخدمات لتفقد مدى جوده الخدمات ..بمعنى ممكن تركب تاكسى ويكون سواق التاكسى محافظ او تستقبل مريض فى المستشفى وبعد تطنيشه فتره محترمه يكتشفوا انه صدام (الله يرحمه) .وتبقى ليلتهم ملهاش ملامح.

بس كالعاده بعد ما الدنيا حلت أوحلت !

إزاى ....نلتقى بعد الفاصل!!

[أشرف فتحى]

عدنا...

طبعا كما قال الرسول صلى الله عليه وسلم " إخشوشنوا فإن النعمه لا تدوم "

وعمر رضى الله عنه فى مقولته الشهيره "وهل بعد الكمال إلا النقصان "

الدنيا بعد ما زهزهت والحال بقى عال بطل حكايتنا زى أى شاب فكر فى الزواج وطبعا هو مسيره يرجع مصر فالأفضل يتجوز مصريه ..

طيب يبقى لازم يرجع ويخطب وممكن يكتب فى أجازه واحده.

يا ترى نفع؟!!

طبعا لأ

ليه؟

لان أجازته شهر فى السنه او أقل وبينزل يقابل أهل العروسه المرشحه ودايما مكنش بيحصل نصيب...لسه ربنا ما أرادش !!...

أخرهم كانت كريمه المنتقبه ..وده كان نادر شويه فى الفتره دى (من عشرين سنه) وكريمه دى تبقى قريبه واحده جارتنا وفى نفس الوقت ساكنه قريب من بيت العيله...

رحنا (كبار العيله طبعا ) اتقدمنالهم ووافقوا ..لغايه كده تمام!

بعد ما تم الاتفاق وبالتفصيل قالوا خلاص يبقى نعمل خطوبه وشبكه مؤقتا ..

خلاص ..ماشى..

اتجابت شبكه بالشئ الفلانى وإتعمل فرح وخطوبه تعبانين جدا...ليه؟

لان الخطوبه بيكلفها أهل العروسه وبعدين فجأه وبدون أسباب فسخوا الخطبه ورافضين يرجعوا الشبكه...!!!!!!!!

طب ايه السبب؟....إنتوا حد بلغكوا حاجه وحشه على العريس؟
لأ
طب أيه؟!

سمعنا أغرب حجه ممكن تكون سبب فى فسخ خطبه....

أخوها الكبير قال...إحنا كنا فاكرين انك راجع من العراق وفلانه (جارتنا قريبتهم ) قالتلنا انك عندك فى البنك 36 الف جنيه...
لكن لما كريمه (العروسه ) سألتك قلتلها رقم تانى خالص...يعنى على ما تفرش شقتك مش هيفضل معاك حاجه !!!

انتم كده خلاص مينفعش نناسبكوا بس واجب عليكوا ترجعوا الشبكه والهدايا...

لأ طبعا ..انت جبت أيه يعنى....وبعدين انت دخلت بيتنا وبنتنا اتكشفت عليك واتحسبت عليها خطبه واتفسخت..وده مش ببلاش!!!

كلامك سليم لو انا اللى فسخت ..لكن انتم اللى فسختم...

الكلام كده خلص ومعنديش كلام تانى..

تخيلوا بقى الراجل بطل قصتنا كان مش عارف يعمل ايه !

وبعد كذا أجازه وكذا خطبه وكلهم ما يتموش والسبب..مفيش نصيب...
بدأ يشك انه في حاجه غريبه ..

لدرجه انه راح زى ما نصحوه لواحد دجال زى اللى بيطلعوا فى الافلام (مش شيخ ولا معالج بالقران ولا راجل مبروك زى ما بيدعى.!!!......دجااااااااااااااااال).

تخيلوا مهندس مثقف يصدق انه معمول له عمل وسحر من واحده شكلها كذا ومش عايزاه يتهنى فى حياته والكلام ده...!!!

طب هى مين دى ؟؟؟

طب عملها ايه او اذاها فى ايه عشان تعمل له سحر؟!!

طبعا الموضوع كان سر بس غلط وخدنى معاه مره عند الدجال ده فى حته غريبه جدا عشان توصلها بتركب عربيه نص نقل زى البوكس وتتبهدل مطبات وطين لغايه ما توصلها فى حته ريفيه شويه..

طبعا انا مكدبتش خبر وقمت بالواجب .. وبلغت والدى (فتان مش كده!)

المهم ..رجع أخر مره العراق ونوى ينهى شغله هناك ويرجع مصر..كفايه كده غربه!!

ايامها كان نجيب محفوظ لسه واخد جايزه نوبل ...يعنى قبل الغزو العراقى للكويت..(إطمنوا... لحسن القصه كانت هتقلب فلم هندى )

أخيرا لقى بنت الحلال...

يلا بقى كمل نص دينك!

ربنا اكرمه بولد وبنت ما شاء الله !!!

طلع عمره وراها حج!!

نسيت أقولكم انه انتسب لكليه نظريه وقدر ياخد ليسانس ويتعين فى وظيفه إداريه فى الحديد والصلب بعيد عن شله أعداء النجاح.

خلاص بقى الدنيا كده عال العال...!!

متستعجلوش منا قلت فى الاول

الدنيا إذا حلت...أوحلت !!

وإذا كست...أوكست !!

الزوجه الجميله ذات الدين...تصاب بسرطان الثدى (اللهم أحفظنا !).

بطلنا يصاب يكتشف انه عنده مشاكل فى القلب..

طب دا حتى مبيدخنش زى كل أفراد عيلتنا.. ورياضى غير كل افراد عيلتنا !

هما التنين إتقبلوا الموضوع بإيمان ورضا ...

هو عمل قسطره وهى عملت إستئصال وعلاج كيمائى...

تقابلهم ..تقول مفيهمش حاجه...زى الفل...

مواظبين على الصلاه فى المسجد...بيحضروا الدروس ولا كانهم بيعانوا من اى مرض..

لو عايزين الصراحه..خلونى اتكسف من نفسى قوى....

انا السليم المعاف زى القوه ..مش ملتزم زيهم ..بكل أوجاعهم..بكل مشاكلهم..

كانوا فعلا مثال للإخلاص ولا أزكى على الله أحدا.

بعد فتره أشتد على الزوجه المرض وبقت لا تقدر على عمل اى شى حتى القيام للصلاه...بقت بتصلى وهى نايمه وعمى يجيب لها الدروس مسجله تسمعها ..بنتها خلاص بقت أنسه بتخدم امها وابوها وأخوها الكبير...

الدنيا ...دنيا

أيامها الاخيره كانت مؤثره جدا ..ومواقفها تحرك الحجر وترقق قلب شديد الظلمه والسواد ...طلبت مننا السماح واحد واحد ..حست بدنو الاجل وفرغت وقتها كله لطلب الغفران من الله والسماح من العباد..
حتى انها طلبت والدتى تجيلها وطلبت منها تسامحها على مشكله حصلت بينهم زمان وكانت بتبكى وبتتوسل لوالدتى تسامحها ...

إتوفت الزوجه ....

الزوج صابر وراضى ومحتسب !!

البيت بقى عباره عن الاب والولد والبنت وذكريات الزوجه..

أخد الاولاد وراح بيهم عل ىالشقه اللى كان إشتراها فى مدينه جديده عشان يتنقلوا فيها ويوسعوا على نفسهم لكن ربنا قدر انها تكون ملاذ ليه يحاول يتهرب فيها من ذكريات الزوجه الوفيه اللى كان بيحبها جدا جدا جدا..

بعد فتره رجعوا شقتهم القديمه عشان مدارس الاولاد وبقى بطل قصتنا هو المسئول عن خدمتهم ونظافه البيت وكل ما يتعلق بهم..

رفض يتزوج تانى...

يا فلان انت صحتك بقت على أدك ومش هتقدر على خدمه الاولاد لوحدك !

أبدا...

حرام البنت بنتك تتعطل عن مزاكرتها عشان تقوم بشغل البيت لانك بتصعب عليها..

مفيش..

كل الكلام إتقال..وهو محافظ على موقفه لا بديل لزكرى زوجته الراحله...


تمر الايام وأنشغل عن عمى ومبقاش متابع لاخباره والف فى دوامه الحياه اليوميه ...

أسمع خبر من والدى ان عمى أخيرا بعد فتره كبيره غير موقفه..

رضى بالجواز...

معقول ...امال فين كل الكلام اللى كان بيقوله؟!..

فين مفيش ست فى الدنيا تعوضنى عن فلانه؟!!

فين مش ممكن أجيب لولادى زوجه أب؟!

فين الإخلاص؟

صحيح الانسان من نعم ربنا عليه النسيان..بس غريبه جدا ده كان بيحبها جدا..دا كان بيروح وما زال يزورها بإنتظام على الرغم من حالته الصحيه...

خلاص ..الف مبروك ..مهو معزور برضه بس كلامه كان بيقول انه عمره ما هيقدر ينسى زوجته الراحله...


لغايه ما يوم رايح أزور والدى ووالدتى فى بيت العيله وأشوف قدامى مفاجئه هزت كيانى كله...بفتح بوابه البيت وداخل ..لاقيت واحده قدامى بدقق فيها ..مين دى؟؟ (محدش ينسى ان ده بيتنا ومفيهوش غير والدى وأعمامى !).

أيه ده؟!!!!!!!!!!!!!

بسم الله الرحمن الرحيم

أعوذ بكلمات الله التامات من شر ما خلق !!

أعوذ بكلمات الله التامات من شر ما خلق !!!

المرحومه واقفه قدامى فى مدخل السلم...!!!!!!!!!!!!!!

انا إتسمرت وتخيلت انى هصحى دلوقتى من النوم عرقان وبنهج زى ما بنقوم من الكوابيس المرعبه جدا ....

العفريت بيقوللى... السلام عليكم !

عليكم السلام ورحمه الله وبركاته

نقف هنا شويه...

طبعا كل اللى هيقرى الكلام ده هيقول أشرف بيخرف وبيألف قصه..

حياتنا الواقعيه فيها قصص غريبه جدا ولو مكنتش كده مكناش قرينا حكايات البشر...


كنت ناوى أقف هنا بس بس خلاص الحدوته خلصت وانا طولت قوى ولازم أسيب الفرصه لغيرى يحكى...

العفريت ده يا جماعه طلع زوجه عمى الثانيه ...

اللى هيه فى نفس الوقت بنت عم زوجته الاولى وشبيهتها بالمللى إلا أنها مليانه عنها شويه...سبحان الله...

يعنى لما بطل قصتنا وافق يتجوز تانى لما لقى شبيهه زوجته القديمه؟!......يعنى لم ينساها !!!!

يعنى لسه فى وفاء...يبقى لسه فى أمل !!!!


أسف طولت عليكم وحاسس أنكم زهقتم منى...!!!!!!!

[أشرف فتحى]

أ / أشرف وفر على نفسك موضوع البرج
انت مواليد شهر إيه

يا نور انا مواليد 26 إبريل بس خللى بالك انا سألت على موضوع البرج ده لاقيته برج محرج قوى

[AHMEDCAR]

بجد يا اشرف انت ميه ميه عامل شغل جامد جدا بارك الله فيك

[muslimah_dentist]

ياه أخيرا الحكاية خلصت بس ايه الابداع ده.

ما شاء الله حكاية أكثر من رائعة تفكرك بالأفلام و ان فعلا حياة أى انسان هى عبارة عن سلسلة مُتعاقبة من الأحداث منها المُفرح و الحزين.

ما شاء الله على وفائه و اخلاصه لزوجته .

بارك الله فيه و فى ذريته.