الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة reco1

السلام عليكم أستاذ حسين

وعليكم السلام ورحمة الله وبركاته

أولاً : أحييك على فكرة المجلة لكن الفكرة هتكون مكتملة إذا جمعت كل موضوع فى شكل مجلة
يعنى مثلاً موضوع :
- القيادة فى 10 أيام
- القيادة الدفاعية
و هكذا يكون كل موضوع مستقل بذاته فى مجلة منفصلة أقصد الموضوع كامل و ليس ملخص


هو كلام حضرتك مضبوط جدا
لكن
المشكلة انى عشان اجمع اكثر من 100 او 200 صفحة فى شكل مجلة مرة واحدة ... الموضوع ده كده يحتاج الى وقت وتفرغ كبير
الافضل ان الواحد يعمل مشاركات بسيطة حتى يكتمل الموضوع وبعد كده يتم تجميعه مرة واحدة
الموضوع صعب شوية ... لكن ربنا ييسر الاحوال ان شاء الله


ثانياً : فى موضوع السواقة أنا عندى مشكلة فى الشوارع الضيقة الجانبية يعنى أحياناً الشارع لا يعدى عربيتين جنب بعض أحياناً تنتظر مكانك لحد الجاى لما يعدى و هكذا لكن مشكلتى فى لفة عجلة القيادة السريعة مش عارفة أظبطها أو أقدرها إزاى و خصوصاً إن فيه عربيات راكنة فى الشارع مطلوب تظبط المسافة بينك و بين العربيات اللى راكنة علشان متخبطهاش و فى نفس الوقت تعدى من جنب العربية اللى قادمة بدون ماتخبطها و فى نفس الوقت تعدل نفسك بسرعة حاسة إن الموضوع ده لسة صعب على شوية و خصوصاً فى تقدير المسافات
فهل عندك أى نصائح او إرشادات لهذا الموضوع

بالنسبة للشوارع الضيقة لازم تركز على الجانب الايمن على قدر المستطاع
يعنى تبتعد عن منتصف الشارع
لماذا ؟
عشان السيارات المقابلة تدخل بشكل مريح
وانت كمان تمشى بشكل مريح
لكن
لازم تحترس من المشاة والسيارات اللى بتفتح ابوابها مرة واحدة .. والسيارات اللى بتكون راكنة ومرة واحدة تتحرك

الخلاصة: ما دام انت شايف ان المسافة اللى امامك هاتعدى العربية .... يبقى خلاص كل تركيزك فى الحالة دى على العربية اللى على شمالك لانها الاقرب منك
تحاول الاقتراب منها على قدر الامكان
وما تحاولش تركز على الجانب الايمن ... عشان ما تضرش لخمة ... كل تركيزك على السيارة المقابلة ... قرب منها على قدر الامكان ... وامشى براجة ...
كل ده بشرط انك تكون واثق ان المساحة هاتعدى عربيتك
اما بخصوص اولوية المرور
ده يرجع لخبرة كل واحد فيكم
يعنى لو انت شايف ان السيارة القادمة هى الاقرب للمرور
يبقى انت تختار مكان فاضى وتركن فيه شوية عشان هو يعدى براحته
اما لو كنت انت الاقرب للمرور
يبقى تضرب له كلاكس .. وممكن تشاور له بإيدك عشان ينتظر شوية حتى تمر بسلام

اما لو انتم الاثنين لازم تمشوا مع بعض فى نفس الوقت
يبقى تمشى براحة قوى ... على اقل من مهلك
ورجلك فوق الدبرياش ... عشان تهدى العربية على قدر الامكان

يعنى الموضوع محتاج شوية ممارسة

و لك منى جزيل الشكر

وانا تحت امر حضرتك وسعيد جدا بمشاركة حضرتك

المشاركة الأصلية كتبت بواسطة lela

اذيك يا استاذ حسين اخبارك ايه يا رب تكون بصحة وسلام

اهلا وسهلا بحضرتك ... الحمد لله رب العالمين ... ازى حضرتك إن شاء الله تكونى بخير

فى عندى مشكلة انا لما بخرج بالعربية الناس بقت فظيعة فى الشوارع الكل عايز يجرى وملهوش دعوة بحد

انا لحد النهارده بشتكى من موضوع "قلة الادب" فى الشارع ... لكن بحاول اتحكم فى اعصاببى على قدر الامكان

على سبيل المثال لو انت بطئت شوية تلاقى واحد كان وراك وعدى من جنبك ويشمت بالفاظ زى انتى حمارة - يا غبية - انا مش عارف مين اللى ركبك عربية وما الى ذلك

ده انسان سورى "زبالة" ... وما يتحطش فى الدماغ خالص .... الواحد بيقابل ناس كثير مبتدأين ... وعلى طول يفتكر ايام بداية تعلمه وكان عامل ايه ... واصبر جامد جدا ... مافيش اى مشاكل

مش عارفة اعمل الناس مش عندها صبر وكل واحد فاكر نفسه انه اتولد بيعرف يسوق

ههههههههههه

انا حصل لى موقف لذيذ ان سواق تاكسى كان ماشى ورايا وعمال يضرب كلاكسات عمال على بطال المهم انى عديته لانى زهقت منه ومشى وعقبال ما وصلت اليه لقيته خبط فى عربية والشرطة وقفته على جنب بصراحة فرحت فيه علشان اللى عمله فيا وشكرا ليك

ده قدر ربنا ههههههههههههههه ... واضح ان اللى يجى عليكى ما بيسلمش ههههههههههههه ... وانا كمان حصل معايا نفس الموقف بس كان سيارة مينى باص ... هانروح بعيد ليه ... النهارده واقف عشان فيه ام بتعدى بأطفالها ... توقفت تماما فى الاشارة ... عشان الست تعدى بسلام ... اللى ورايا عمال يضرب كلاكسات ... شاورت له بإيدى على الست ... وقلت له انت موش شايف الناس اللى بتعدى ... انا عندى استعداد للتوقف لمدة طويلة ... المهم انى لا اعرض اى انسان لخطر ....
النهاردة صاحبى اتخبط جامد
سيارة فيات اصطدمت بيه وهو نازل مين الاوتوبيس ... وداست على رجله ... هههههههه ربنا ستر .... لكن انتى اوعى تحطى فى دماغك الاغبياء اللى بيضربوا كلاكس عمال على بطال

المشاركة الأصلية كتبت بواسطة lela

اذيك يا استاذ حسين اخبار حضرتك ايه

ازى حضرتك ... الحمد لله رب العالمين

انا خرجت بالعربية بس مش مع المدرب ولكن مع صديق بس كا اعتمادى كله على ما فهمته واتعلمته ومشيت كويس بس عايزة اقولك انى كنت مرعوبة جدا وانا لوحدى من غير المدرب

هايل ... وممتاز جدا
الخوف طبعا هايستمر معاكى شوية
مفيش اى مشاكل ... عادى جدا
بس احلى حاجة انك خرجتى بها لوحدك ... وهو ده المهم

لكن خرجت ورجعت من غير اصابات لحد ما وصلت قبل البيت بشوية غصب عنى كنت نازلة من منزل عالى

نازلة من على منزل عالى ... يبقى رجلك لازم تكون على الفرامل جاهزة للتوقف ... وانزل براحة على قدر الامكان ... واتوقع التوقف فى اى وقت ... اوعى تنزلى ورجلك فوق البنزين ... كده غلط كبير

شوية وبلف فوجئت بسيارة امامى حاولت الف منها لكن العربية اتخبطت والحمد لله ربنا ستر

ما دام المساحة صغيرة ... او انت موش واثقة انك هاتمرى بسلام ... يبقى كان الافضل التوقف تماما خلف السيارة المتوقفة ... وتضربى له كلاكس عشان يتحرك شوية من المكان اللى هو واقف فيه ... لانه ممكن يكون قافل الشارع والغلطة ماتكونش غلطتك
لان الكثير منا بيقف فى اماكن خطر جدا ... وموش فاهم انه بيعرض نفسه ويعرض غيره للخطر ... خصوصا على ناصية اى شارع

ولو كان صاحب السيارة شايف ان المساحة كافية
كان هاينزل من عربيته ويساعدك تعدى منه بسلام
او
هايوسع لك عشان خايف على عربيته ههههههههه
المهم انك كان لازم تدخلى بشكل بطىء جدا ...
ومافيش داعى للمغامرة

بس كنت خايفة من صاحب العربية اللى امامى لحسن يطلع راجل لسانه طويل ويشتمنى لكن شاف ان عربيته محصلش ليها حاجة فسكت وركب ومشى ورحت ثانى يوم عند السمكرى وصلحتها

يا ستى حصل خير
انا فى اول اسبوع
حكتين ثلاثة فى الاكصدام
عادى ... وبعد كده الامور بتكون عال العال
اهم حاجة
ان الواحد ياخد باله كويس جدا من الناس اللى ماشية فى الشارع
حكة فى اكصدام او رفرف ... تتعوض
المهم لما نشوف ناس ... فى الحالة دى نحترس جدا جدا جدا

ولو زعلتى جامد
خلاص
ارتاح شوية من موضوع السواقة ... يومين ثلاثة ... او اسبوع مافيش اى مشاكل
وارجع تانى اكمل تدريبى لما اعصابى تهدأ

شكرا لحضرتك وعلى فكرة موضوع المجلة اللى حضرت بتقول عليها فكرة جميلة جدا وربنا يوفقك

ربنا ييسر الاحوال .. واول ما افضى شوية نبدأ نشتغل فيها
وإن شاء الله نسمع اخبار جميلة من حضرتك

وشكرا على مشاركتك القيمة جدا

مع اطيب التمنيات
اخوكم حسين غزالة

استاذ حسين
ازيك

عايز اضيف جزئية بسيطة بعد اذنك
ان ممكن ترعشى نور للمقابل وده معناه ان معندكيش مكان فاضى تركنى فيه علشان تعديه الاول
وده ممكن يتعمل بالليل او النهار

وممكن - بس حركة رجالى طبعا - السائق يشاور بايده للى جاى بعلامة تعالى
يعنى السواق اللى بيشارور بيقوله انه هيستنى والتانى يعدى
او انه يقف لكن يكون واضح انه وقف فى مكان ويرعش نور
يعنى عدى ومتمشيش بالراحة

الترعيش طبعا بيكون بجذب النور العالى فى ومضة سريعة