الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة husseinoo

السلام عليكم ورحمة الله وبركاته

وعليكم السلام ورحمة الله وبركاته

اليوم حصل بعض المواقف السخيفة
وفضلت انى اكتب عليها تعليق سريع وهام من وجهة نظرى
وحبيت انى احرص كل الاصدقاء المبتدأين فى القيادة من هذه المواقف

سبق واتكلمنا فى موضوع التقاطعات ... تحت عنوان "احترس من التقاطعات"

اليوم وفى احد الميادين الضيقة الصغيرة "ميدان ابن الحكم"
دخلت على الميدان المرة دى بطريقة صحيحة
كان اليوم الجمعة
والحركة معقولة موش زحمة وموش فاضى قوى

المهم انظر الى الصورة عشان الشرح يكون واضح


انظر الى السيارة الزرقاء ودى بتاعتى انا اللى راكبها
المرة دى دخلت على الميدان بطريقة صحيحة
مشيت على المسار الخارجى للميدان ... لانى طالع على طول
اما لو كنت هالف يعنى سوف يتم الدوران مع الميدان يبقى الافضل انى اكون قريب من الجزيرة الوسطى مثل السيارة الصفراء

المهم انا راكب السيارة الزرقاء
وتقريبا دخلت على الميدان بطريقة صحيحة جدا
وبعد الانتهاء من ملف الميدان
والسير فى الطريق الطوالى
المفاجأة ... سيارة تاكسى وافقة بعرض الشارع عشان ياخد زبون

تيخلوا انتم ... سيارة تاكسى واقفة .. موش فى نص الشارع ... ودى واقفة زى الصورة تمام
يعنى لو كان بوكس عامل كمين "كنا قلنا معلهش" دى شغلته ...

وكمان صاحب التاكسى راجل كبير ... يعنى المفروض خبرة

المهم فى اللحظة اللى انا قررت اعدى فيها من التاكسى
وبالرغم انى دخلت فى منتهى الهدوء والحرص
من اول ما دخلت الميدان وانا ماشى بهدوء وحرص

المفاجأة فى نفس اللحظة اللى بعدى فيها من السيارة التاكسى ... تظهر سيارة نص نقل تعدى من على شمالى

فى الوقت اللى انت كل تركيزك على السيارة التاكسى وانك تعدى بدون ان تحتك بها
تظهر العربية النص نقل من على شمالك "عايز يخطف الطريق" زى ما بيقولوا

لولا ستر ربنا
وانى داخل بهدوء ... طبعا كان ممكن يحصل مشاكل على سبيل المثال
احاول انى امشى يمين شوية .. فى الحالة دى اخبط التاكسى
او انى ادخل على طول .. فى الحالة دى اخبط العربية النص نقل
لولا انى دخلت بهدوء .. ربنا سترها معايا

طبعا انا غلطان ... غلط كبير
غلطان فى ايه ؟
الاول: بمجرد انى دخلت الملف .... لم اتوقع انه يوجد اى عربية او اى معوقات او اى حد أنا آسف غبى "يقف الوقفة دى" بعربيته
ثانيا: المفروض انى كنت وقفت خلف سائق التاكسى "معلهش الغبى" لحد ما تخلص المشكلة اللى هو تسبب فيها

الحقيقه انا مش عارفه ايه الصح هل المفروض حضرتك كنت تقف لغاية هو ما يمشي وده اللي انا بفضله علشان مبتدئه في السواقه والا المفروض اتصرف زي ما حضرتك اتصرفت بالضبط
انا بتعرض لمواقف مشابهه في المرات اللي بتدرب فيها مع الفارق ان اللي في الحاره التالته بيكون جاي من الإتجاه الآخر وده طريقه لأن الطريق اتجاهين بدون جزيره في النصف
وكل مره اتعرض لموقف مشابه المدرب او ايا كان اللي معايا بيقولي اعدي من جنبه وما انتظرش وراه لغاية مايمشي لأن كده ممكن اضايق الللي ورايا واحياناً بعمل كده بس بكون خايفه جدا وفي نفس الوقت شايفه انه من الأسلم ان انا انتظر وراه لغاية ما يمشي

ثالثا: كان المفروض انى اتحلى بالصبر وماكانش لازم اعمل المغامرة دى واعرض عربيتى للمشاكل
رابعا: كان المفروض انى لا ازيد سرعة السيارة خالص ... ما دام هناك معوقات

اما لو كنت مكان السيارة النص نقل
نفس الشىء كان لازم يعمل حسابه كويس ... وبالبلدى كده "مايحشرش نفسه" بجوارى
لانه ضيق على المرور بشكل جامد .. كنا هانخبط بعض احنا الثلاثة
عشان انا موش عندى صبر ولا حكمة فى الموقف ده
ولا هو عنده صبر
وسائق التاكسى الله يسامحه "لا تعليق عليه"


ده موقف بصراحة اتعلمت منه كثيير
وكنت ماشى بالعربية وانا مضايق
وشاورت لسائق التاكسى وقلت له بصوت عالى "حرام عليك" دى وقفة دى
غصب عنى .. الواحد بيشوف حاجات موش عايزة تكون مطلع رخصة ولا حتى كرنيه مترو ههههههههههه
حاجات فى منتهى الذكاء

رببنا يسترها مع الجميع



الموقف الثانى
انى اليوم قررت ان احسن حارة امشى فيها بدون توقف هى الحارة الوسطى
ولنا كلام فيها بعد كده إن شاء الله
ماشى فى الحارة الوسطى واللى عايز يجرى من على شمالى يجرى
واللى عايز يتوقف بسيارته على اليمين يتوقف
واللى عايز يفتح باب عربيته مافيش مشاكل
عايز يمشى براحة على اليمين يمشى

المهم انى فى الحارة اللى فى النص ... والشارع ماشى بطريقة معقولة
واذا قابلنى اى "يوتيرن" انا كده كده بعيد عنه ...
ومريح دماغى ... لا بنقل نفسى من الحارة دى ولا من الحارة دى

المشكلة فى ايه
لو عربية عدت من على شمالك ... ده طبيعى جدا
وانا اصلا تارك الحارة اليسرى عشان اللى عايز يعدى ... اتركه يعدى ... واللى عايز يجرى .. اتركه يجرى

الغلاسة والرخامة وقلة الادب
لما واحد يعدى من على يمينك
المشكلة موش لما يعدى من على يمينك
المشكلة لما يكون اللى بيعدى "اوتوبيس اخضر متوسط" تابع لنقل الركاب
العربية موش صغيرة
وكمان انت رايح فيه
ده احنا ثانيتين وهانقف كلنا
موش هاقول لكم غير انه كان بينى وبينه شبر
تخيل سائق متخلف زى ده ... كان ممكن يعمل معاك ايه
ممكن يكون هو عارف انى موش هاغير حارتى مهما حسل وملتزم بالسير داخلها
وده هو اللى شجعه يدخل الدخلة دى
لكن ليه من الأول
الواحد بقى موش عارف يمشى ازاى فى البلد دى

افتكرت
ان صاحبنا كان بينزل ركاب
وانا عديت منه
وهو بدل ما يعدى من على شمالى زى ما عديت منه
راح معدى من على يمينى ... فاكر نفسه راكب عربية ملاكى صغيرة
اصبح فيه عربيات بتعدى بسرعة من الشمال وهما صح مافيش مشاكل
وصاحبنا بيعدى فى نفس الوقت من على اليمين اللى مساحته اصلا ضيقة ..



الموقف التالى وده خطر جدا جدا جدا
وسبق اتكلمنا قبل كده
وهو باختصار يا جماعة
الله يكرمكم كلكم وربنا يسترها معاكم
اكرر مرة عاشرة وموش هازهق

لو كانت الإشارة خضراء
موش معنى كده ان الطريق سالك
موش معنى كده انى ادخل بسرعتى
اليوم كانت الساعة الثامنة والنصف صباحا "يوم الجمعة"
الطريق سالك وكويس
والإشارة خضراء "محطة المحكمة" فى مصر الجديدة

سيدة كانت راكبة عربيتها وداخلة على التقاطع بسرعة
آه فيه عربيات كانت بتجرى وعدت التقاطع
وانا مافيش ثوانى ... بقول لام الاولاد: شايفة العربيات بتعدى التقاطع ازاى
ثوانى وظهرت عربية السيدة الفاضلة ... داخلة على التقاطع بسرعة
فى نفس الوقت طالع لها 3 او 4 عربيات ... اللى هما ماعندهمش صبر
وبالبلدى كده بيقولوا "طالع ببوز العربية" على الطريق
وغير ملتزم بالتوقف خلف الخطوط البيضاء

طبعا السيدة المسكينة دخلت بسرعة على التقاطع على اساس ان الاشارة خضراء
وثوانى كانت هاتخبط فى العربيات المتقدمة فى التقاطع

انظر الى الصورة


فى الصورة تظهر العربيات الحمراء اللى ماعندهمش صبر ولا احترام لإشارة المرور
والسيارة الصفراء دخلت على التقاطع بسرعة على اساس ان الإشارة خضراء
طبعا ربنا سترها
انا دخلت الحمد لله بهدوء على الرغم من ان الإشارة خضراء
العربيات الحمراء ... جريت ... واعطيت لها فرصة انها تعدى بالسلامة
العربيات الخضراء ... بمجرد ما اقتربت من التقاطع ... بصراحة فى منتهى الادب والالتزام ... كلهم وقفوا خلف الخطوط البيضاء فى انتظار أن الإشارة تفتح لهم

النهارده حصل موقف برده في الإشاره العربيات اللي قدامي كلها عدت الخط ووقفت زي العربيات الحمراء وانا الوحيده اللي وقفت قبل الخط زي العربيات الخضراء العربيه اللي ورايا مش عاجبها ان الباقين متقدمين بعد الخط وانا وراء وكلاكسات طبعا وكده كده احنا واقفين في اشاره يعني لما اتقدم الخطوتين دوول برده هو واقف !!!!!!!!!
ده غير ان الإشارات الإليكترونيه بتصور دلوقتي لو عديت الخط على ما اعتقد مش كده؟

وطبعا لازم تنظر الى السيارت الخضراء كويس فى الناحية اليمين
وتنظر الى السيارات القادمة من الناحية اليسار "معلهش الصورة موش كاملة"
وتنظر اكثر من مرة يمين وشمال قبل ما تدخل على اى تقاطع


فى الحقيقة كل يوم يظهر لى ان الكلام اللى بيتكتب ده الى حد كبير ... صح جدا
واحنا يا جماعة موش بنكتبه للتسلية
وبكرر مرة تانية وثالثة
الكلام ده موش للتسلية
لازم نفهمه كويس ونفتكره كويس جدا طول ما احنا ماشيين فى شوارع المحروسة خصوصا

وربنا يحفظكم من كل سوء
وربنا يسترها مع الجميع

فى انتظار التواصل

مع اطيب التمنيات
اخوكم حسين غزالة

في موقف تاني حصلي من الميكروباصات بعد ما عديت تقاطع انا كنت في الحاره التانيه من الطريق بعد التقاطع على طول وفي ميكروباص خارج من التقاطع على يميني وبيلف في الحاره اليمين عادي مفيش مشكله
جه ميكروباص تاني من وراه ولف على الواسع من شمالي ووقف في ثانيه قدامي وقدام الميكروباص التاني يعني قفل الحارتين علشان ياخد الناس اللي واقفه قبل الميكروباص التاني
انا طبعا وقفت خالص ولو في حد كان مسرع ورايا اكيد كان خبطني من وراء
بس في حاجه انا مش فاهماها انا شفته لما اصبح على شمالي بس قبل كده لأ مع اني كنت شايفه الميكروباص الأول اللي كان بيلف من في الحاره اليمين
ياتري الخطأ في ايه؟
انا آسفه طولت عليكم