الحقيقه انا مش عارفه ايه الصح هل المفروض حضرتك كنت تقف لغاية هو ما يمشي
وده اللي انا بفضله علشان مبتدئه في السواقه
والله انا اعتقد ان ده هو الصح ... ومافيش داعى للمخاطرة
والا المفروض اتصرف زي ما حضرتك اتصرفت بالضبط
انا اتصرفت بحرص ... وحبيت اعدى منه بهدوء ... لكن غيرى ماعندوش صبر ... ومهما كان هو موش هايخاف على عربيته زى العربية الملاكى ... هو عربيته نص نقل ... وكمان هو ينظر امامه فقط .. بمجرد انه راى مساحة خالية امامه ... دخل فيها بسرعة ... لكن لو كان مقدر انى داخل فى نفس المكان ... كان على الاقل ضرب لى كلاكس مرة ولا مرتين ... كنت فى الحالة دى وقفت فى مكانى تماما ... ومافكرتش انى اعدى من التاكسى ... لكنه اتسحب زى الحرامية ... ودخل معايا بشكل "غبى"
انا بتعرض لمواقف مشابهه في المرات اللي بتدرب فيها مع الفارق ان اللي في الحاره التالته بيكون جاي من الإتجاه الآخر وده طريقه لأن الطريق اتجاهين بدون جزيره في النصف
وده موقف خطر جدا جدا
وكل مره اتعرض لموقف مشابه المدرب او ايا كان اللي معايا بيقولي اعدي من جنبه وما انتظرش وراه لغاية مايمشي لأن كده ممكن اضايق الللي ورايا واحياناً بعمل كده بس بكون خايفه جدا وفي نفس الوقت شايفه انه من الأسلم ان انا انتظر وراه لغاية ما يمشي
هو كلامه صح ... لو احنا عندنا القدرة نشوف كويس العربيات اللى ماشية جنبنا .. لكن للاسف العربيات التانية فى الوقت ده بيكونوا ماشيين فى المنطقة العمياء ... اللى احنا موش شايفينهم فى المرايه ... اصبح المطلوب فى الوقت ده ... ان احنا ننظر الى المرايه اللى فى النص .. وننظر الى الامام على العربية المتوقفة ... وننظر الى المرايه الجانبية مثلا ناحية اليسار ... وننظر فوق كتفنا الايسر عشان نشوف السيارات اللى فى المنطقة العمياء ... كل ده فى وقت واحد وبسرعة
عايز تشوف اللى جاى وراك ماشى بسرعة ولا شكله ايه ...
اللى وراك ملاكى ولا ميكروباص ولا اوتوبيس
عملية موش ظريفة ... وفيه فرق بين الفهلوة و"الحداقة" ... وبين المغامرة والتدريب والتجربة الصحيحة ...
النهارده حصل موقف برده في الإشاره العربيات اللي قدامي كلها عدت الخط ووقفت زي العربيات الحمراء وانا الوحيده اللي وقفت قبل الخط زي العربيات الخضراء العربيه اللي ورايا مش عاجبها ان الباقين متقدمين بعد الخط وانا وراء وكلاكسات طبعا وكده كده احنا واقفين في اشاره يعني لما اتقدم الخطوتين دوول برده هو واقف !!!!!!!!!
ده غير ان الإشارات الإليكترونيه بتصور دلوقتي لو عديت الخط على ما اعتقد مش كده؟
كلامك صح وسليم مية مية ....
فيه اشارات كثيير الآن فيها كاميرات تصوير ... فى انجلترا مثلا فيه مناطق معينة السير فيها بالفلوس ... يعنى اول العربية ما تدخل المنطقة المطلوبة ... يتم تصوير السيارة من الامام ومن الخلف ... ولما صاحبها يدفع رسوم العربية ... يكتشف انه عليه مبالغ مرور فى المنطقة المحددة ... المبالغ دى بتدفع تلاقئى
احنا ايضا فى الطريق لتطبيق النظام ده
وسوف يتم الاعتماد على الكاميرات بشكل كبير جدا
اما بخصوص اللى بيضرب لك كلاكس ... فهو ده "الجهل بعينه" ... المفروض الخط الابيض معمول عشان نقف خلفه ... بغرض ان قائد السيارة يستطيع اولا مشاهدة إشارة المرور ... يعنى هايعرف ازاى انها خضراء ولا حمراء .. إذا كان هو عدى الإشارة هههههههههههههههههههه
ثانيا: العربية لما تعدى الخط الابيض ... طيب لو كان فيه مشاه وعايزين يعدوا الشارع يمشوا فين ... بين العربيات ولا على العربيات
فى الاول والآخر ده الجهل والغباء وقلة الأدب ... اللى نفسى نتخلص منها ونكون متحضرين شوية فى سلوكيتنا
في موقف تاني حصلي من الميكروباصات بعد ما عديت تقاطع انا كنت في الحاره التانيه من الطريق بعد التقاطع على طول وفي ميكروباص خارج من التقاطع على يميني وبيلف في الحاره اليمين عادي مفيش مشكله
جه ميكروباص تاني من وراه ولف على الواسع من شمالي ووقف في ثانيه قدامي وقدام الميكروباص التاني يعني قفل الحارتين علشان ياخد الناس اللي واقفه قبل الميكروباص التاني
انا طبعا وقفت خالص ولو في حد كان مسرع ورايا اكيد كان خبطني من وراء
بس في حاجه انا مش فاهماها انا شفته لما اصبح على شمالي بس قبل كده لأ مع اني كنت شايفه الميكروباص الأول اللي كان بيلف من في الحاره اليمين
ياتري الخطأ في ايه؟
سائقى الميكروباس دول "اغلبهم" لان فيهم ناس محترمة وسواقين عشرة على عشرة
لكن الاغلبية منهم اعوذ بالله
موش ممكن اللى بيعملوه ده
شغل مجانين على طول الخط
انت موش عارفة هاتركزى على مين فيهم
وفى منتهى قلة الادب وقلة العقل
يعنى لو كتبنا عليهم ... محتاجين كتاب ... للاسف مافيش قانون بيطبق عليهم
مشاكلهم تظهر خصوصا لو كان راكب العربية اللى اسمها "الترامكو" اللى صاجها معمول من "صاج البراميل" يعنى ماشى لا مؤاخذة بعربية زبالة ... واللى هايخبطوا لا قدر الله ... "مالوش دية عنده"
على العموم انت اتصرفت صح ... والافضل دائما انك لو شوفتى سائق ميكروباس .. اتركيه يعدى بالسلامة ... يعنى اول ما تشوفيه فى مرايه العربية اللى فى النص من بعيد ... اعملى حسابك انك تتركيه يعدى ... وتحاولى تتصرفى كويس عشان يعدى بعيد عنك "لكن بدون انك تعرضى نفسك للخطر عشان خاطر عيونه" ... يعنى لو فيه فرصة تهدى شوية عشان هو يتصرف ويعدى منك ... خلاص هدى شوية ... لو كان فيه فرصة تمشى على جنب ثوانى على ما يعدى ... مافيش مشاكل ... لكن لو كان المكان ضيق والعملية موش مستحملة غباء .. خلاص مافيش داعى للمخاطرة عشان خاطره
انظرى الى الصورة التالية
عربية من النوع ده ... امبارح كانت بتجرى وارء عربية ملاكى راكبها شاب ... الولد كل ما يجرى من الميكروباص ... الميكرباص سخن ومصمم انه يجرى وراه ... انا داخل على اليوتيرن وبلف ... والاقى صاحبنا جاى زى الصاروخ ... صاروخ بيجرى ... المشكلة انه موش هايخبط العربية اللى هاتخرج من اليوتيرن .... لأ ده ممكن لا قدر الله ربنا يحفظنا جميعا "يموت ناس فيها" ... كان بيجرى زى القطار زى المجنون زى الصاروخ ... اوصفى زى ما انت عايزة
انا وقفت فى مكانى على طول بدون تفكير ... على ما نظرت اليه الناحية التانية ... كان اختفى زى السراب .... متخيلة سرعته كانت اد ايه
للاسف مافيش قانون بيطبق عليهم
واحد مجنون زى ده ... يشوف له شغلة تانية احسن ده لو كان فيه قانون
لكن اتعلمت حاجة مهمة جدا جدا ... مهما كان وراكى عربيات ... لازم انظر فى الشارع الرئيسى واتأكد ان الحارة الخاصة باليوتيرن مافيهاش حد بيجرى فيها زى صاحبنا لازم انظر كويس جدا جدا ....
وللمرة العاشرة ... مادام رجلك على الفرامل وانت بتلف ورجلك التانية ضاغطة على الدبرياج ... خلاص هاضغط فرامل ...
لكن لا قدر الله لو كانت رجلى على البنزين ... وبدل ما اضغط على الفرامل اضغط بنزين ... او ادخل على الحارة وانا مطمئن وبدون ان انظر على السيارات القادمة وارتبكت .. ودخلت على "الميكروباص او الملاكى" كان هايحصلى ما لا يحمد عقباه
... فى الاول والآخر ربنا هو اللى بيسترها معانا ... لكن احنا لازم ناخد بالأسباب ... ولا نستخف بأى كلمة مكتوبة او معلومة نعرفها
انا آسفه طولت عليكم
بالعكس ده انت مميزة جدا ... لانك بتكتبى لنا كل المواقف اللى بتقابلك بشكل مفسر وممتاز ... وبنتعلم منه ... وبنقارن المواقف دى مع بعض ... وبنفهم اللى بيحصل كويس ... وبنتأكد هل الخطأ ده مننا ولا احنا غير مسئولين عنه ... وكمان الكلام مع بعض يزيد الثقة .. ويزيد الخبرة والفهم
ربنا يبارك فى حضرتك
وشاكرين افضالك
وفى انتظار المزيد من مشاركاتك القيمة
مع اطيب التمنيات
اخوكم حسين غزالة
المفضلات