تعمل إيه لو طلبوا منك تتنازل عن الجنسية المصرية علشان تتجنس ؟

**factorialx** · 24-06-2010 12:04 PM

أولا : إيه اللي جاب سيرة الخليج ؟ أنا قلت دول الخليج ؟؟؟ أنا كاتب " البلد اللي بتحلم بيها" أي بلد إن شاء الله الإسكيمو , أنا ما قارنت الجنسية المصرية بجنسية معينة ,أنا بتكلم عن أي بلد شايفها أنت حلم !!
واللي أنت شايفهم زبالة هم حلم حياة نسبة كبيرة من المصريين إنهم يشتغلوا عندهم

ثانيا : ما قلته عن الآية الكريمة هو سبب ا لنزول , إنما الآية تطبق على المستضعفين في كل مكان وزمان ودي عظمة القرآن , إنه مش حكاوي تاريخية إنما تشريع يصلح للبشر في أي زمان

ثالثا: أنت ليه بتسألني أسألة و ترد عليها أنت ؟؟؟ ما تديني فرصه أرد !!

ما أنا مش فاهم إنت بتقولوا عايزين تحرقوا الجواز تتنازلوا عن المصرية

تكلم واحد طب تروح تعد في بلد مش مسلم و عيالك يبقى مطبعين بطباع البلد ده يوقلك لا أنا هروح بلد مسلم
طيب إيه البلاد المسلمه المزدهره و العربية مافيش غير الخليج

هتهاجروا الجزائر يعني !!!!!!!

هل أنت قادر على إقامة دينك في مصر ..... لا
هل أنت آمن على نفسك في مصر ..... لا
هل هتقارن مكة أيام الجاهلية بكل ما كان يحدث للمسلمين من تنكيل و تعذيب بمصر دلوقتي ! أيوة طبعا ؟؟

مقارنه ظالمه بجد
مجحفه آخر حاجه ( حلوة مجحفه آخر حاجه ديي )

المساجد مفتوحه و الصلاة تقام و تقولي زي ايام الجاهليه !!

**abou_ruqi** · 24-06-2010 12:09 PM

يا جماعة ما تقلبوش الموضوع على الخليج بالله عليكم علشان ما يبوظش , فيه عشر مواضيع تانية أتكلمنا فيها عن الحياة في الخليج , ده مش منهم !!!!

**thedeveloper87** · 24-06-2010 12:09 PM

على فكرة إحنا ناسيين حاجة مهمة جدا!
ناسيين إن ربنا سبحانه وتعالى يؤتي السلطة لمن يشاء وينزعها ممن يشاء.

قال تعالى: "قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ (26)" سورة آل عمران

طب ليه ربنا سبحانه وتعالى مسلط علينا من لايخافه ولا يرحمنا؟ بذنوبنا.

أقبل علينا رسول الله صلى الله عليه وسلم فقال يا معشر المهاجرين خمس خصال إذا ابتليتم بهن وأعوذ بالله أن تدركوهن لم تظهر الفاحشة في قوم قط حتى يعلنوا بها إلا فشا فيهم الطاعون والأوجاع التي لم تكن مضت في أسلافهم الذين مضوا ولم ينقصوا المكيال والميزان إلا أخذوا بالسنين وشدة المؤنة وجور السلطان عليه ولم يمنعوا زكاة أموالهم إلا منعوا القطر من السماء ولولا البهائم لم يمطروا ولم ينقضوا عهد الله وعهد رسوله إلا سلط الله عليهم عدوا من غيرهم فأخذوا بعض ما في أيديهم وما لم تحكم أئمتهم بكتاب الله تعالى ويتخيروا فيما أنزل الله إلا جعل الله بأسهم بينهم الراوي: عبدالله بن عمر المحدث: المنذري - المصدر: الترغيب والترهيب - الصفحة أو الرقم: 3/29
خلاصة حكم المحدث: [إسناده صحيح أو حسن أو ما قاربهما]

يا جماعة أرجوكم إحنا في محنة ومش هتترفع غير لما كل واحد يتقي الله.
ياللي بتغش الناس اتقي الله...
ياللي بتنقص المكيال والميزان اتقي الله... على فكرة المتر 100 سم مش 90 سم، الكيلو 1000 جرام مش 900.
يا موظف الحكومة اللي بتبهدل الناس وبتاخد رشاوي ، اتقي الله...

**factorialx** · 24-06-2010 12:12 PM

المشاركة الأصلية كتبت بواسطة abou_ruqi

يا جماعة ما تقلبوش الموضوع على الخليج بالله عليكم علشان ما يبوظش , فيه عشر مواضيع تانية أتكلمنا فيها عن الحياة في الخليج , ده مش منهم !!!!

يبقى محدش يتكلم عن الخليج أنه جنه

و أنا عمري ما هفكر مجرد الفكره إني أتخلى عن كشكولي الاخضر

**abou_ruqi** · 24-06-2010 12:22 PM

المشاركة الأصلية كتبت بواسطة factorialx

ما أنا مش فاهم إنت بتقولوا عايزين تحرقوا الجواز تتنازلوا عن المصرية

تكلم واحد طب تروح تعد في بلد مش مسلم و عيالك يبقى مطبعين بطباع البلد ده يوقلك لا أنا هروح بلد مسلم
طيب إيه البلاد المسلمه المزدهره و العربية مافيش غير الخليج

هتهاجروا الجزائر يعني !!!!!!!

المساجد مفتوحه و الصلاة تقام و تقولي زي ايام الجاهليه !!

يا سيدي في اللي شايف ان الخليج حلمه و في اللي شايف اوروبا حلمه و في اللي شايف امريكا حلمه و في اللي شايف اسيا حلمة , مالناش دعوة باللي جه في دماغ الي صوتوا إيه , أنت ليه مصمم تقلبه على الخليج بصفه خاصة ؟

وبعدين إنت عندك دول اسلامية غير عربية

عندك ماليزيا عندك سنغافورا عندك تركيا عندك الجمهوريات السوفيتية الإسلامية عندك كتير قوي

يا ريت ما تطلعش عيوب في دول كمان , لإن اسم البلد مش هو المهم , المهم كل واحد بيحب إيه و الناس اللي قالت مش عاوزة الجنسية المصرية ده غالبا كرها في الأوضاع في مصر أكتر من حبا في الغربة

أما بخصوص المساجد فحضرتك بتقول المساجد مفتوحة

.......................
.......................
.......................

أنا كتبت كلام كتير بدل النقط بس لقيته ما ينفعش يتنشر فأنا حبعتهولك على الخاص

**x512** · 24-06-2010 01:05 PM

أنا كنت اتمني ابقي تركي او ماليزي........ناس بتنهض ببلدها و تحافظ علي كرامه المواطن في الداخل و الخارج و مسلمين حسن مننا كمان الدين عندهم اسلوب حياه مش صلاه في الجامع و نقاب و دقن و مع السلامه علي كدا مع احترامي لكل ملتحي او منقبه....و جو مصر هي امي و اهلي و ناسي دا مبقاش ينفع الصراحه...لان محدش بيساعد حد الا اذا كان في مصلحه....دا غير ان الناس اتغيرت ..اختفت الطيبه و الشهامه...بقو كلو بيكيد ل كلو ولو واحد شاف خناقه بين 2 في الشارع يقول و انا مالي...يبقي فين بقي اهلي اللي بتتمثل فيهم مصر...اما مصر كحكومه و قياده فانا مستعد اعيش في ظل حكومه الصومال او النيجر حتي...بس يبعدو عننا السفاحين المرتشين دول ...خصوصا بتوع الداخليه اللي مفيش فيهم حد عدل...و بكررها تاني مفيش فيهم حد عدل(لان لو في حد شريف مكنش سكت عالظلم و الفساد دا كلو و الاتاوات اللي بتفرض عالشعب مالشرطه علنا كدا).

**factorialx** · 24-06-2010 01:15 PM

مين قال إن التركي و لا الماليزي أحسن مننا دينا و خلقا ( مع إحترامي ليهم )
دي ناس متقدمه عننا بس مش شرط إنهم مدنيين أكتر منا أو أحسن منا

يعني أنتوا بتحاولوا ليه " تبرروا " سبب ترككم الإفتراضي للجنسية المصرية
بالدين
أو الأخلاق
أو الظلم
أو الحالة الإقتصادية

و كلها حاجات أنا متأكد إنها مش كاملة تركيا و ماليزيا و الخليج و كل البلاد اللي بتقارنوا بيها مصر

من الآخر مش مصر الوحشه اللي حكموها من 60 سنه هما اللي عملوا فيها كده

**x512** · 24-06-2010 01:36 PM

المشاركة الأصلية كتبت بواسطة factorialx

مين قال إن التركي و لا الماليزي أحسن مننا دينا و خلقا ( مع إحترامي ليهم )
دي ناس متقدمه عننا بس مش شرط إنهم مدنيين أكتر منا أو أحسن منا

يعني أنتوا بتحاولوا ليه " تبرروا " سبب ترككم الإفتراضي للجنسية المصرية
بالدين
أو الأخلاق
أو الظلم
أو الحالة الإقتصادية

و كلها حاجات أنا متأكد إنها مش كاملة تركيا و ماليزيا و الخليج و كل البلاد اللي بتقارنوا بيها مصر

من الآخر مش مصر الوحشه اللي حكموها من 60 سنه هما اللي عملوا فيها كده

انا لا اقصد بالدين الصوم والصلاه...اقصد السلوك...شوف نظافه الشوارع عندهم و عندك...شوف اتقان العمل..شوف العداله الاجتماعيه..احنا عندنا ايه في دول؟؟...كل حاجه بقت ماشيه يا اما برشوه يا واسطه و للاسف خدنا علي كدا و بقي دا الطبيعي...بالنسبه للعداله عندنا مفيش اكتر من ان وكيل النيابه بقي بيتعين بمقبول ورشوه تصل ل 90 الف (مش كلهم طبعا) و دا هيبقي قاضي المستقبل...طب بص علي اسلام نبيه مثلا اللي عذب عماد الكبير في القضيه المشهوره و الناس اللي افتكرت ان الراجل خد حقو...دلوقتي اسلام نبيه خرج و رجع يشتغل ظابط و يمارس عملو عادي جدا في اسيوط...طب ازاي؟؟ اكيد دفع رشوه ضخمه عشان يحصل تجاوز زي دا....العيل اللي قتل لاعب في منتخب اليد السنه اللي فاتت يتم اطفال و رمل زوجه و قتل نفس بسلاحو الميري و خد 10 سنين سجن؟؟ يا تري دا عدل؟ كل دي علي سبيل المثال و ليس الحصر....حضرتك و انت ماشي بعربيتك لو وقفوك ف لجنه....يجي امين شرطه معهوش اعداديه يكلمك بقرف وقله ذوق و يقل ادبو و انت راجل محامي او مهندس او طبيب وخريج جامعي محترم و اهلك صرفو دم قلبهم عليك عشان تبقي انسان ذو قيمه...يجي واحد زي دا يطنطط عليك ..طبعا لو ملكش ضهر مش هتعرف تاخد حقك او ترد عليه و اتحدي اللي يقول غير كدا...السلبيات عندنا كتير و انا ركزت عالشرطه و القضاء للان دول احد اهم اسباب الفساد

**x512** · 24-06-2010 01:44 PM

المشاركة الأصلية كتبت بواسطة abou_ruqi

طب و إذا كان ربنا -اللي بتقول إنه إدانا أرض ننتمي إليها- أمرنا بالهجرة أمر مباشر و سيحاسب البعض على عدم الإمتثال كما وضحنا , و لم يأمرنا في ولا أية ولا حديث للإنتماء للأرض؟؟

ده من دروس الهجرة من مكة للحبشة و من الحبشة للمدينة هو بلاغ للمؤمنين بعدم التمسك بالأرض الظالم أهلها والذهاب للأرض ذات الحاكم العادل !!!

وفي قصص الأنبياء كثير من الهجرة مثل إبراهيم و يوسف وموسى

هاتلي دليل شرعي أو نص قطعي الدلالة أننا علينا ألا نترك أوطاننا وأنا أضع أمامك مائة دليل على ضرورة الهجرة في حالة مثل حالتنا

اتفق معاك تماما ولولا ان اهل مكه اشتدو في الكفر و العناد و تعذيب المسلمين و مطاردتهم لمده 13 عام لما امر الله االنبي صلي الله عليه و سلم بالهجره للمدينه لنشر الاسلام من جديد في ارض جديده...ولو كان النبي فضل في مكه مكنش الاسلام انتشر و انتصر عالكفر و الظلم......نفس الشيء مينفعش انا ابقي مظلوم في بلدي و كل حقوقي ضايعه و راضي و ساكت و اقول البلد دي احسن من غيرها...لا اهاجر و اشوف مكان اخد في حقي و احاول اصلح بلدي من بره و احسن سمعتها من خلال شغلي...زي زويل و كثير من علماء مصر برا

**Dr Zezo** · 24-06-2010 01:44 PM

شوف اتقان العمل..شوف العداله الاجتماعيه..احنا عندنا ايه في دول

و هو عشان احنا معندناش الحاجات دي نقوم بدل ما نصلحها نسيبها و نمشي!!!

هو ده الحل النهائي الساحق و الماحق للمشكلة

و لا حل فردي مؤقت ؟!!!

مشاهدة نتائج الإستطلاع: ممكن تتنازل عن الجنسية المصري نظير الحصول على الجنسية اللي بتحلم بيها ؟

الموضوع: تعمل إيه لو طلبوا منك تتنازل عن الجنسية المصرية علشان تتجنس ؟

LinkBack

أدوات الموضوع

عرض

-

-

-

-

المواضيع المتشابهه

متنااااااااازل عن الجنسية المصرية

الكلمات الدلالية لهذا الموضوع

المفضلات

المفضلات

ضوابط المشاركة