تعمل إيه لو طلبوا منك تتنازل عن الجنسية المصرية علشان تتجنس ؟

**Ahmed Samy** · 24-06-2010 05:58 PM

المشاركة الأصلية كتبت بواسطة factorialx

هما الامريكان لما كانوا في حروب أهليه سابوها و مشيوا
لما حصل اللgreat depression سابوها و مشيوا

الماليزين لما كانوا من 30 سنه دولة زراعية متخلفه سابوها و مشيوا !
الفرنسيين بعد الثورة و البلد كانت ضايعه سابوها و مشيوا !
الألمان بعد الحرب العالمية لما البلد إتسوت بالارض حرفيا سابوها مشيوا !
الكوريين لما كانت بلدهم فيها مجاعات في الخمسينات سابوها مشيوا و لا حققوا المعجزة الإقتصادية !

لييه الإنهزامية الفظيعه دي عمرنا ما هنتقدم كده عمرنا

و ياريت نحافظ على كلماتنا

بلاش في داهية
مع 60 سلامه و الكلام الكبير ده

انت بتخلط ورق كتير في بعض

احنا مش عازين نسيبها علشان فقر احنا اغنيا الحمد لله ولو سافرنا برا ممكن مستوانا يقل عن هنا شوية

أما الماليزيين و تالفنسيين و الألمان و اليابانيين و الأمريكان

دول كانوا قاعدين يعمروا و يبنوا في بلدهم ...علشان مستقبل لولادهم فيها

احنا بنحفر في البحر لا البلد بلدنا و لا المستقبل لولادنا

ما اقدرش لما بنتي أو ابني يكبروا يقولولي ما سافرتش ليه !!

زي ما باترحم على ابويا و اقول ياريته كان سافر

والدي ترك فرصة الهجرة وهو قدي تقريبا لأنه أمن بالبلد دي و ان فيه أمل فيها و فيها مكان ليا

و قبل مايموت كان دايما يقول لوالدتي ...انا اللي عملت كده

انا بقى مش هاعمل كده

**Dr Zezo** · 24-06-2010 06:24 PM

قبل مايموت كان دايما يقول لوالدتي ...انا اللي عملت كده

دا كلام يوجع القلب فعلا

رحمة الله عليه

**Ahmed Samy** · 24-06-2010 06:39 PM

المشاركة الأصلية كتبت بواسطة dr zezo

دا كلام يوجع القلب فعلا

رحمة الله عليه

فعلا يوجع القلب

والدي كان خريج علوم عين شمس بتقدير جيد قسم كيمياء و جيولوجيا

و طلع بعثة لروسيا في الستينيات لدراسة الكيمياء

ورجع مصر بعد النكسة باختياره و دخل الجيش كضابط احتياط لمدة ست سنوات من 69 الى 74 و ترك الجيش برتبة نقيب

و بعدها اشتغل في حديد و صلب حلوان مراقب وحدة في الأفران

و وقتها عرض عليه زميل الجيش و صديق الخندق السفر لأستراليا أو كندا و كان عادل صديق والدي ممرضا و قاله ان خبرته و مجال شغله مطلوبين هناك و ماكانش في وقتها معادلة و لا القرف ده

ورفض والدي بدعوى البلد و العيال و المستقبل

و لما الدنيا ازمت هنا قرر يسافر بس قسم البلد نصين

طلع السعودية و عشنا هناك 18 سنة

و رجع والدي بعد ما استقال من كتر اللي شافه من معاملة البدو (مع انه كان مدير ادارة تخطيط شبكات الكهرباء)

ما عرفش يعيش بفلوسه

و شاف من الناس اللي ما قدرش يتعايش معاه

و حاول يعمل مشروع أو يبدأ شغل

فوجيء بكم الفساد اللي ما اتعودش ولا اتعلم يتعامل معاه و اتنصب عليه مرة و اتنين

و قرر في النهاية يتقاعد تماما عن اي نشاط

و لحد موته اللي ما كانش بعيد

كان دايما زعلان على اللي عمله (فينا) انه ما سابهاش من زمان

والدي توفي وهو عنده 56 سنة بمرض مناعي يهاجم خلايا الدم الحمراء بدون أي سبب عضوي

و كان دايما الطبيب اللي بيتابعه " سوداني بريطاني" يقوله يا (سامي غير مخك و سافر اتفسح )

يبقى مين اللي موت أبويا !!!

**M.almaghraby** · 24-06-2010 06:42 PM

والله يا factorial x عالرغم اني مش متفق معاك اوي فوجهه نظرك

بس احسدك بجد علي التفاؤل الي لسه جواك دا و اتمني انه يكون عندي شوية منه حتي عشان اقدر اكمل الكلية هنا حتي :((

**Dr Zezo** · 24-06-2010 06:54 PM

يبقى مين اللي موت أبويا !!!

سؤال مؤلم و صعب جدا

**Ahmed Anwer** · 24-06-2010 06:55 PM

بغض النظر عن الحوار البيزنطي ،،،

التنازل عن الجنسية المصرية قرار مش سهل ،،

1- لو اتنازلت عنها من أصعب الجنسيات للحصول عليها

2- ولادك لأي سبب ( و ده غالبا اللي انتا شخصيا هتقرره ) لو قرروا إنهم يعيشوا في مصر ،، هيعيشوا في مصر علي إنهم أجانب ؟؟

3- أملاكك و حاجاتك أو حته أرض سبهالك أبوك ،،، هتابع الحاجات دي إزاي و تتعامل معاها إزاي و أنتا مش مواطن مصري

الخلاصة أنا عايزها مش عشاني لو عشاني مش فارقه بس عشان أولادي ،،، مينفعشي أقطعهم عن بلدهم للأبد

**Terrible_DaRsH** · 24-06-2010 07:03 PM

المشاركة الأصلية كتبت بواسطة ahmed anwer

بغض النظر عن الحوار البيزنطي ،،،

التنازل عن الجنسية المصرية قرار مش سهل ،،

1- لو اتنازلت عنها من أصعب الجنسيات للحصول عليها

2- ولادك لأي سبب ( و ده غالبا اللي انتا شخصيا هتقرره ) لو قرروا إنهم يعيشوا في مصر ،، هيعيشوا في مصر علي إنهم أجانب ؟؟

3- أملاكك و حاجاتك أو حته أرض سبهالك أبوك ،،، هتابع الحاجات دي إزاي و تتعامل معاها إزاي و أنتا مش مواطن مصري

الخلاصة أنا عايزها مش عشاني لو عشاني مش فارقه بس عشان أولادي ،،، مينفعشي أقطعهم عن بلدهم للأبد

فعلا اتفق معاك .

لان خالتى لما نزلت تعيش سنة فى مصر و كانت عايزة تسقط الجنسية اكتشفت ان ليها استخدامات ( جوه مصر ) .

لو حد خد اى جنسية مش هيسقط الجنسية المصرية لانه لازم يشيل " الدرس " من جذوره و ده صعب بس ميمنعش الرغبة فى الحصول على اى جنسية محترمة .

**Ahmed Samy** · 24-06-2010 07:10 PM

المشاركة الأصلية كتبت بواسطة terrible_darsh

فعلا اتفق معاك .

لان خالتى لما نزلت تعيش سنة فى مصر و كانت عايزة تسقط الجنسية اكتشفت ان ليها استخدامات ( جوه مصر ) .

لو حد خد اى جنسية مش هيسقط الجنسية المصرية لانه لازم يشيل " الدرس " من جذوره و ده صعب بس ميمنعش الرغبة فى الحصول على اى جنسية محترمة .

اولا يا درش

الضرس ما بيتغلعش الا من جدوره هههههه

ثانيا و هو المهم

انا باتكلم بجد و الله

عايز حد يقوللي ايه اللي هاخسره لما اسقط الجنسية

بلاش هزار او اسقاطات سوداوية انا عايز حقايق

**Terrible_DaRsH** · 24-06-2010 07:41 PM

المشاركة الأصلية كتبت بواسطة ahmed samy

اولا يا درش

الضرس ما بيتغلعش الا من جدوره هههههه

ثانيا و هو المهم

انا باتكلم بجد و الله

عايز حد يقوللي ايه اللي هاخسره لما اسقط الجنسية

بلاش هزار او اسقاطات سوداوية انا عايز حقايق

خالتى لما حبت تدخل اولادها الجامعة هنا لاقت ان الجنسية ليها فائدة .

بس بصراحة مهما الواحد سافر و عاش فى ازهى و ارقى بلاد العالم لازم هيرجع مصر يقعد فيها شوية .

و مش المواطن المصرى بس , لا ده اى حد فى الدنيا لازم لازم يرجع بلده يشوف الناس اللى كان بيشوفها زمان و يشوف الشوارع اللى مشي فيها و اصحابه القدامى و و و و و و ألــــــــــخ .

و بعدها لما ياخد قسط من الذكريات يرجع لبلده التانية حبيبته , فالجنسية المصرية لما ترجع هيبقي ليها فوائد اياكش تكون بنسبة 1 % .

**alaa_dash** · 24-06-2010 07:49 PM

انا شايف ان الخسارة الاولى و الكبرى ان الابناء هيتربوا في محيط غير اسلامي ...
و اذا كان المهاجر هيحافظ عليهم و يعلمهم هويتهم فهل يضمن انهم يعملوا كده مع اولادهم ؟!!
فكرة ان احتمال (مجرد احتمال ) ان ذرية تفقد انتمائها و بالتالي دينها حتى و لو في الجيل الثالث
فكرة مرعبة جدا ... و هيبقى المهاجر مشارك فيها و شايل ذنبهم ..
الدين شيء جوهري و اساسي و اغلى من كل و اي شيء..
انا شايف انه فيها قدر من الانانية اني الواحد يدور على راحته و استقراره و ما يفكرش في احفاده..اعمل اللي عليا على الاقل
اللي بيتربى في بيئة معينة بيتأثر بيها ..مش بمزاجه ...حتى لو كان لايفعل مثلهم ..
فالي بيحصل حواليه هيبقى شيء غير مستنكر ..هيبقى عاادي يعني .. و ديه البداية ..
لو مهاجر طلب مني نصيحة ... هقوله سيب اولادك هنا في مصر ...يتعلموا و يكبروا و يدرسوا
هنا .. و لما يوصلوا لمرجلة النضج ..يسافروا اذا عايزين .. و يوصيهم يربوا ولادهم هنا برضه...