أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

**NaderNabil** · 22-06-2010 02:42 PM

عملت إعلان عن لاب ديل لاتيتيود مستعمل بإمكانيات محترمة في الوسيط وطلبت ٦ آلاف جنيه..كلمني واحد وطلب نتقابل ورتبت معاه معاد يجيلي البيت..اتصل من أجل تعديل الموعد...كنت أخبرته إني سأكون في الطريق في الوقت الفلاني فطلب مني بمنتهى الإحراج المرور عليه طالما هو في طريقي..وصلت وقابلته ووجدته إنسان شيك وواضح عليه التهذيب وطلب مني الصعود لمنزله بدلا من المقابلة في السيارة..وإحنا طالعين اتكلم مع البواب والأمن بمداعبات..دخلنا الشقة كان فيها آثار غسيل ومسح وتنضيف فطلب مني الانتظار ثواني حتى تتمكن زوجته من إفساح الطريق..دخلنا البلكونة عشان الشقة مكركبة..قعدت في جانب البلكونه بحيث لا أستطيع كشف ما بداخل البيت..عاين الجهاز..أخرج من جيبه مبلغ من المال ملفوف في ورقة شبيهة برزم البنك وقال لي عد دول وأنا داخل أجيبلك الباقي..عديت الفلوس لقيتها ٣٠٠ جنيه خمسات..لم يظهر له أثر بعد ربع ساعة ناديت عليه أكثر من مرة وأنا متحرج..بعدها بعشر دقائق كمان قمت بصيت لقيت الشقة فاضية والباب مفتوح...بقية القصة معروفة..شقة مفروش هيصة ودوشة ومحاضر وقصة طويلة ملهاش أول من آخر والنتيجة في قرار النيابة (تحفظ لعدم الاستدلال على الفاعل).....واتفضل جنب إخواتك يا ناصح

المشاركة الأصلية كتبت بواسطة mido777

نفس الكلام بالنص حصل مع زميلى بالعمل
وبرده اعلان فى الوسيط ولاب توب والشقة كانت تقريبا فى خالد بن الوليد

+1

نفس الكلام حصل مع صديقي في الجامعة أيام هوجة الIphone...

كان شاري 4 أجهزة و عرضهم في الوسيط...و جهاز منهم إتنصب عليه بنفس السيناريو ده بالمللي...

و بعدها بإسبوعين حصل سيناريو شبيه لكن النصاب رسم نفسه دكتور...و قابلنا في مستشفى كيلوباترا و دخل يسلم على الممرضين و العمال و السيكيوريتي...و عزمنا في الكافيتيريا و حاجة أخر شياكة...

و فجأة حط إيده على علبة الأيفون و قالنا هاخده أوريه لدكتور فوق...بصينا لبعض...و راح صاحبي حط إيده على إيد النصاب بسرعة....قاله هاجي معاك....راح ده لاوع في الكام و أصل و فصل....و لما لاقى ان إحنا قافشين قام قال ثواني و جاي....و فص ملح و داب :)

**osoliman88** · 22-06-2010 02:52 PM

المشاركة الأصلية كتبت بواسطة ahmed4000

وانا صغير جالى الشخص البيت وكلمنى عن انه تبع وزارة الصحة وجاى يعمل تطهير للحمام ودخل الحمام بانبوبه عجيبة كده وخرج قال محدش يفتح الحمام لمدة ساعتين وهو ماشى ادالى وصل ب"5 جنيه" وطبعا لا طلعت وزارة ولا طلع تطهير ولا حاجة
:)

نفس الموقف تقريبا حصل معايا بس دول خدوا 15 جنية والكلام من 5 سنين تقريبا، وعلى فكرة أنا الوحيد في العمارة اللى اتنصب عليه في هذا الموضوع

**osoliman88** · 22-06-2010 02:59 PM

في مثل معروف إن النصاب زبونه الطماع

**w-m-a** · 22-06-2010 03:28 PM

مرة من عشرين سنه قابلنا انا وواحد صديقى راجل محترم جدا جدا وقف معانا وعرفنا بنفسه بمصافحه فى منتهى الحميميه
انه الاستاذ محمد عبد الحميد مدير ادارة فى المنصورة طبعا كنا شباب وهو راجل محترم بدله وكرافته وشعر ملزق وانه اتنصب عليه وممعهوش تمن التذاكر فطبعا فى منتهى الجدعنه اعطيناه 5 جنيه (5جنيه من عشرين سنه كانت حاجه جامده قوى) والراجل اصر ياخد عنوانا علشان يبعت حواله بالمبلغ واحنا رفضنا تماما راح مطلع بطاقه عائليه من بتاعه زمان طب خذوا بياناتى وتعالوا انتو ابدا بالسلامه وسلمنا عليه ومشينا ونحن نظن انا قمنا بالواجب مع غريب
المهم بعد كام شهر انا وصديقى ده ماشين باليل عند قصر المنيل ونلاقى واحد داخل علينا وبيسلم بمنتهى الحميميه وانا اخوكم الكبير استا...... وانا وصديقى فى نفس واحد محمد بيه عبد الحميد مدير الادارة وفين يوجعك شويناه وقلبناه ملاقيناش معاه غير البطاقه المضروبه وخمسه ... سته جنيه فكه وعلبه سجاير طبعا اتصادروا والشعب المصرى المتواجد بالمنطقه كل واحد افتكر موقف حصله وأكل علقه بالهنا والشفاوقلع هدومه وجزمته وقال يا فكيك واحنا متنا من الضحك.....
كمل يا شنورى

**محمد محمد** · 22-06-2010 03:31 PM

قصة حصلت لصاحبي من حوالى شهر
ماشي جنب كارفور مستني اي مواصلة تروحه البيت عربية لانسر معدية عليه لو سمحت يا كابتن متعرفش مصنع كذا فين ...لأ الحقيقة معرفش.....بتاع العربية طلع التليفون يعمل مكالمة معهوش رصيد ...ممكن يا كابتن اعمل دقيقة من تليفونك.....اتفضل...طبعا صاحب العربية خد التليفون وهرب.
قصة شخصية
كنت مرة في جمصة وانا صغير واحد لقيناه اسمه سيد مرسي بيكتشف مواهب بيجوب المحافظات علشان يجيب لاعيبة للأندية في جميع الألعاب كان جاي يجيب من جمصة لعيبة سباحة وكرة شافني بلعب اتعرف علينا انا وناس معارفنا طالعين معانااخذ بياناتنا وفرجنا علي صور لأحمد السيد لعيب الأهلي ومحمد فضل وهو متصور معاهم وكان مسمي نفسه سوبر مان....بعد ما رجعنا من المصيف لقيته جاي البيت قعد معانا يتكلم وبتاع بعد كده قال انا هخليك تلعب في نادي المقاولين وهننزل دلوقتي نجيب اللبس علشان تروح تتدرب هناك نزلنا معاه بكل ثقة طبعا ملقيناش اللبس بيتباع قالنا خلاص هشتريه انا اخذ 70ج ومشفناش وشه بعد كده.
بعد شهر لقيت موضوع في الجمهورية صفحة الرياضة كاتبين عن سيد مرسي انه اكتشف لعيبة كتير ولازم اتحاد الكرة يعمله مرتب خاص علشان ظروفه المادية.

**محمد محمد** · 22-06-2010 03:44 PM

المشاركة الأصلية كتبت بواسطة AshTurbo

حكايتي مع النصابين تتلخص في الآتي :

النصاب :

- شاب في منتصف العقد الثالث من العمر .
- أسمر اللون .
- اللغة : هي لغة أهل أسوان الجميلة .
- الشكل : بدلة شيك جداً مع بروش لعلم جمهورية مصر العربية وجزمة سوداء أنيقة وتلمع كالمرآة .
- المهنة : ضابط حراسة في أحد شركات البترول المشهورة (

)

المكان :

- الأتوبيس الأحمر أبو دورين في الأسكندرية .

الزمان :

- الصيف الماضي .

الموقف بالتفصيل :

كنا في مشوار أنا ووالدتي في بحري وخلصنا والدنيا كانت حر جداً وقلنا بدل ما نركب تاكسي نركب الأوتوبيس المكيف وأهي حاجة نظيفة وفسحة في نفس الوقت المهم ركبنا وطلعنا طبعاً الدور الثاني ( تنبيه لطوال القامة زي حالتي : وطي شوية لما تطلع الدور التاني عشان السقف منخفض بدل ما دماغك تتخبط زي ما حصل للعبد لله ) طبعاً الجو فوق شيك جداً كأنك سافرت أوروبا نص اللي كانوا قاعدين أجانب قلت يا سلام يابلدي وحسيت بالفخر أني مصري وأن مصر بلد الأمن والأمان ( طلعت بعد كدة بلد الكوسة والبدنجان ) المهم قعدنا بعد ما دفعنا وكان في عيلة تجلس في الكرسي اللي قدامنا معاهم طفل صغير لطيف وفي واحد قاعد في الكرسي بمحاذتنا ( النصاب ) بيلاعب الطفل دة وبيعكسة من بعيد ( طبعاً عرفت كان ليه بيعاكسة عشان يشد طرف حديث مع عائلة الطفل ) ولكن الرجل أبو الطفل لم يكون ودوداً بالشكل الكافي عشان كدة صاحبنا النصاب صرف نظر وبصيلنا من مكانه بعين رضية وعلى الفور حدد الهدف التالي لعملية النصب ....

To Be Continued

تتابعون في الجزء التالي :

- كيف قام النصاب بجذب أنتباهنا وشد طريف الحديث معنا ؟
- ماذا كانت ردة فعلنا ؟
- هل سيهرب النصاب وينجو بفعلته ؟
- هل سيتمكن أدهم صبري من تدمير الدبابات والطائرات المملوكة للمافيا الأمريكية وهل سينجح في أختراق مبنى المخابرات الأمريكية والأسرائيلية والبريطانية لأنقاذ منى من أيديهم ؟

تابعونا ...

كونان المتحري الذكي.

**w-m-a** · 22-06-2010 03:48 PM

واحد صاحبى وخاله كانوا مسافرين بالعربيه على الصحراوى من كام سنه وهما ماشين بعد الرمايه بشويه لاقوا واحدة واقفه جنب عربيتها عطلانه والعربيه مدخنه والدنيا ضلمه قاموا وقفوا
اى خدمه
اه العربيه ولعت
طب ننزل نشوفها
لا شكرا خلاص انا بعت اجيب حد من الفيلا بس اتأخر ممكن توصلونى
اتفضلى
ركبت ورا
الدنيا برد قوى وانا مخضوضه ممكن البس الجاكت بتاع حضرتك
اتفضلى
بعد كام كيلو
هنا من فضلك الفيلا هنا
اتفضلى يا افندم
اتفضلوا قابلوا بابا
شكرا
طيب الجاكيت هبعتوا مع عبده السفرجى
عدى عشر دقائق ربع ساعه نص
دخلوا الجنينه ضربوا الجرس
فنح السفرجى
فين الهانم
هانم مين
جاء البيه على صوت الدوشه زى فبلم غزل البنات خير يا عبده
البهوات مجانين بيسئالوا على الهانم
الرجل بمنتهى الحزن اى هانم
طبعا صورتها كبيره جدا على الحائط
دى الى فى الصورة
دى بنتى ابتسام ماتت من عشر سنين زى النهارده العربيه ولعت بيها بعد الرمايه بشويه وماتت محروقه
يا نهار اسود عفاريت طبعا طاروا
المهم بعد يومين وحكاوى لموا بعض العمال والصعايده الى عند خاله فى الشركه (شركه مقاولات)وراحوا الفيلا لاقوا الهانم والبيه والسفرجى وطلعوا عصابه وكلوا علقه موت واتسلموا وطلع عليهم حوالى 100سنه احكام نصب
............والله تنفع فيلم

**mohfud** · 22-06-2010 03:59 PM

المشاركة الأصلية كتبت بواسطة بحري

عملت إعلان عن لاب ديل لاتيتيود مستعمل بإمكانيات محترمة في الوسيط وطلبت ٦ آلاف جنيه..كلمني واحد وطلب نتقابل ورتبت معاه معاد يجيلي البيت..اتصل من أجل تعديل الموعد...كنت أخبرته إني سأكون في الطريق في الوقت الفلاني فطلب مني بمنتهى الإحراج المرور عليه طالما هو في طريقي..وصلت وقابلته ووجدته إنسان شيك وواضح عليه التهذيب وطلب مني الصعود لمنزله بدلا من المقابلة في السيارة..وإحنا طالعين اتكلم مع البواب والأمن بمداعبات..دخلنا الشقة كان فيها آثار غسيل ومسح وتنضيف فطلب مني الانتظار ثواني حتى تتمكن زوجته من إفساح الطريق..دخلنا البلكونة عشان الشقة مكركبة..قعدت في جانب البلكونه بحيث لا أستطيع كشف ما بداخل البيت..عاين الجهاز..أخرج من جيبه مبلغ من المال ملفوف في ورقة شبيهة برزم البنك وقال لي عد دول وأنا داخل أجيبلك الباقي..عديت الفلوس لقيتها ٣٠٠ جنيه خمسات..لم يظهر له أثر بعد ربع ساعة ناديت عليه أكثر من مرة وأنا متحرج..بعدها بعشر دقائق كمان قمت بصيت لقيت الشقة فاضية والباب مفتوح...بقية القصة معروفة..شقة مفروش هيصة ودوشة ومحاضر وقصة طويلة ملهاش أول من آخر والنتيجة في قرار النيابة (تحفظ لعدم الاستدلال على الفاعل).....واتفضل جنب إخواتك يا ناصح

كمل يا شنوري......

فين المكان والشقة بالظبط يا باشا
والم تلاحظ أى شىء غريب على الامن والبواب

-

الموضوع: أكبر مرجع لعمليات النصب والأحتيال في مصر - أدخل قولنا حصل أيه معاك وأتصرفت أزاي

LinkBack

أدوات الموضوع

عرض

-

-

-

-

-

-

-

-

المواضيع المتشابهه

قولنا سوقت ايه

رابطه مالكى السياره ايمجراند 7 (emgrand 7 ) الجديده كليا قولنا اخبارها معاك ايه

أكبر موسوعة كتب سيارت و لن تجد لها مثيل || 17 جيجا من الكتب الرهيبة || أدخل و حمل

عايز تحافظ علي موتور البايك أدخل و أعرف أزاي

مرجع لكماليات اللانوس

الكلمات الدلالية لهذا الموضوع

المفضلات

المفضلات

ضوابط المشاركة