الموضوع: حاجات كنا بنسمعها او نفهمها غلط

المشاركة الأصلية كتبت بواسطة د.أحمد سمير

أنا أيضاً ظللت سنوات أتخيل شكل العم سعد نبيهه ، وتخيلته يا إما بائع بلالين أو بياع عصير قصب مش عارف ليه لحد دلوقتي ..

أغاني الست غامضة الكثير من الأغاني وهي أكثر من غنت بالعربية على الإطلاق في تاريخها ليلى مراد (4000 أغنية )
ولها العديد من الأغاني :

يا حلاوة العصفور ... وهي تقول وانا اغني واقول وياااه ... سق سق سق .. بق بق بق .. أه اه اآآآه آه يا جماله ...
فياريت حد يفهمهالنا ولا هيه كدة .

أغنية الحلم :
شفت منام واحترت انا فيه ..
كنت أسمع ردود الكورس همهمة غير مفهومة
وهو يرد عليها بعد أن تقول ...
شفت منام واحترت انا فيه ... دلوقتي هاحيكله عليه .
فيرد الكورس :
خير ان شالله شفتي إيه ...يلعنو يوم اللي شفتيه ، والنبي قولي شفتي ليه ... فتقول دلوقتي هاحيلكوا عليه ..
وإن كنت أعتقد أن هذا التفسير أقربها للحقيقة

أما موشحها الأندلسي تحت عنوان يا موليمي :
فيبدأ بقول الكورس
مولي موليمي لاااااااا آه آه .. كمال عااارف .. وخبينييييي في كهوف عارف

فكنت أظن أن كمال عارف ده شخص
ثم اعتبرت هذا الموشح موصلي وليس أندلسي .. حيث أن عائلة عارف عائلة عراقية شهيرة حكم منها البلاد رئيسين ليس منهم كمال عارف ... ولا زلت أفتكس المعاني حول هذه الأغنية .. وليتقبل عمنا سعد نبيهه هذه المرة خالص مودتي لأنه بطل الموضوع
وخالص التقدير لعلا عثمان على الموضوع الثري كما عودتنا دائماً

بالنسبة لأغنية العصفور هي كانت بتقول صوته "صو صو صوصوصو" بس سؤسؤ بؤبؤ دي جامدة جدا، موتتني م الضحك
أغنية الحلم "شفت منام واحترت أنا فيه .. دلوقتي أحكيلكو عليه .. -الكورال- خير إن شالله شفتي ايه؟ .. يجعله خير اللي حلمتيه .. والنبي قولي شفتي ايه .. دلوقتي هاحكيلكو عليه"
الأغنية الأندلسية دي ماسمعتهاش قبل كدة، لو ليه لينك ياريت حضرتك تبعتهولنا عشان نشوف كمال عارف (غالباً هايكون أخو سعد بيه نبيهة من الأم :))
ولك خالص مودتي

فيه بقى شوية ألغاز عاوز حد يفسرهالي !!

أغنية محمد منير "نعناع الجنينة"
"في عشق البنات أنا كنت .....
ترومبيلي وقف عجلاته بندريوم"
مكان النقط (نازل يوم - نادر يوم - نابليون)
أناباسمعها "نازل يوم" أخويا بيسمعها "نادر يوم" ونادر ده يعني عامل ندر مش اسم واحد تبع سعد بيه نبيهة :)
نابليون دي بقى واحد صاحبي بيحلفلي إنها نابليون وفيه شبه إجماع على إنها نابليون.

أغنية إحدى فوازير رمضان لشريهان بتبقى واقفة على طبلة (دربكة) وبتقول
"دَرَبُكانبيتي" والكورال يردد "بيتي"
الكلمة دي كنت بافسرها على إنها "دار أبوك كان بيتي" وبعدين قلت إنها "دَرَبُكة نبيتي" يعني دربكة لونها نبيتي
بس واللهٌ أعلم الـ "دَرَبُكانبيتي" دي أحد الإيقاعات الخاصة في الموسيقى العربية

المشاركة الأصلية كتبت بواسطة aif

في عشق البنات انا فوقت نابليون ( يعني تفوقت علي نابليون ) ترومبيلي وقف عجلاته بندريون ( يعني من الآخر: عطل وعجلاته نامت )
والله اعلم ...

آه صح، كدة المعنى بقى تمام :)
ألف شكر

فيه كمان حاجة افتكرتها، أغنية صفاء ابو السعود بتقول:
"بنام ننا هوووو وتطبطب علينا
ولا بيجيلها نوم لو نامت عينيها
يا ماما يا حلوة ربنا (يزيدك)
ياللي ألف بوسة تستاهلها إيدك"

أنا كنت باسمعها "يا ماما يا حلوة ربنا يهديكي" وماما اتنرفزت أوي لما سمعتني باقول كدة :D

من حوالى 3 سنين كنت انا و اربعة اصحابى بنتكلم عن اغنية اهلا بالعيد.
و طبعا احنا الخامسة اجمعنا على سعد و نبيهه. بس فى واحد اضاف إن فى جزء كمان هو مش فاهمة ، صفاء أبو السعود بتقول فيها:
"جت طيارة فى بيت أعيادنا و أطرح فيها البركة و زيد"
فصححناها ليه:
"كتر يا رب فى أعيادن و أطرح فيها البركة و زيد"