الفرق بين محرك ياباني و ألماني

**1.8Tee** · 16-05-2008 04:16 PM

المشاركة الأصلية كتبت بواسطة mars3v

معلش فى التأخير فى الرد، عندى امتحانات و مهيص

بالنسبه للدعايه، مفيش حد بيكتب القرايه من العجل...بس سمعت قبل كده ان المتسوبيشى ايفو بتكتب قرايه اقل من الحقيقه، و فى ناس جربت العربيه على الداينو و جابت اعلى من الارقام المعلنه، انا مشفتش بعينى بس سمعتها من كذا واحد، بس معرفش اذا كانو جربوها على داينو كرنك ولا عجل...
بس قياس قوة الموتور و اللى الشركات بتكتبه فى العربيات العاديه مش دايما صادق، بيبقى فى قرايات اللى بيتوقعها الكمبيوتر و فى gross و فى net و متقاسه من الموتور فى الظروف المثاليه جوه معمل و فى عند اسوأ الظروف... بس دايما الالمان بيكتبوا اقل رقم جابه الموتور... لاكن اليابانيين معروف انهم بيهيسوا، و الرقم اللى بيكتبوا صعب تجيبه...

بالنسبه لل MR2، هيه موديل 92، انا كان قصدى الفاقد 40 حصان مش فى الميه، معلش عالخبطه...بس حكاية ان الموتور يطلع 105 حصان و انت تاخد 100 من العجل ده مستحييل...
انا سمعت اراء كتير فى موضوع الفاقد ده...
فى ناس بتقول انه ثابت، و الجيربوكس بياخود حوالى 35 حصان و لو عندك كورونا شوف هيا كمان هتاخد كام و بعد الموتور عن العجل هيزود الفاقد ، عشان كده انا قولت ان المتور اللى قدام هيبقى الفاقد اعلى من الموتور ورا و الناس اعترضت معرفش ليه...

الرأى التانى بيقول ان الفاقد ده بيبقى نسبه من قوة الموتور، علشان الفاقد ده جاى من الاحتكاك بين الاجزاء سواء جيربوكس او كلتش، و معامل الاحتكاك ده بيعتمد على قوة المتور، زى الفرامل، عندك متور اكبر يبقى عايز احتكاك اكبر يبقى عايز فرامل اكبر...و بيقال ان نسبة الفاقد من 15-20% للمانيوال و 18-25% للاوتوماتك... و انا مسمعتش عن ال 15% ديه غير فالبى ام M3 و M5.
و انا مقتنع بالرأى التانى اكتر، محدش يضرب :D

يعنى أية حضرتك مفيش ؟. دة الناس مثلا تقعد تقول مكتوب فى الأعلان 120 حصان و يشوفة فى ال internet أو user manual يبقى 100 حصان.

و بعدين حضرتك بتقول نفس الكلام الذى أنا قلتة بس بطريقة مختلفة :).

الأعضاء غالبا فهموا قصد حضرتك غلط (وانا كمان فى الأول)....فاكرين قصد حضرتك موتور بوضعية أمامية و دفع خلفى, اكن حضرتك قصدك موتور بوضعية خلفية و دفع خلفى....صح :) .

بالنسبة للقراءة الأقل من الحقيقة....فعلا أنا سمعت عنها عشان اليابان عندها زى قانون (مش عارف لسة لحد دلوقتى) العربيات بتبقى detuned و متعديش ال 280 حصان علشان ال emissions و زى الأخ أبو عبدالله أشار ألية مسبقا.

**PRO-DRIVE** · 16-05-2008 04:28 PM

خلاص قانون ال280 حصان اتلغي

و دا كان الحاجز الرئيسي قدام الشركات اليابانيه في انها تصنع عربيات قويه

**1.8Tee** · 16-05-2008 04:39 PM

أه صح....ال Gt-r أتعملت, شكرا على التوضيح يا برو :) .

**mohamed hatem** · 16-05-2008 09:17 PM

الموتور الياباني معروف.... وخاصة في التويوتا .... والدليل انتشار التويوتا حتى عند الامريكان اللي هما حيتان المواتير ...

التكنولوجيا عندهم ليها شكل تاني ... انا شفت الفيرنا 1600 و الياريس 1300 .... فرق واضح فعلا ....

**Ahmed Hassan** · 17-05-2008 02:57 AM

علش يا جماعه... احنا كده معظمنا بيتكلم كلام غير منطقي.... مفيش حاجه اسمها موتور اقوى بسبب جنسيته!! بعد تساوي السعه... الفيصل بيكون التصميم و التكنولوجيا... يعني مثلا ممكن تحس ان الفيرنا 1600 بتكلبش من التكييف في حين ان الكرولا لأ... بس ده ممكن يكون سببه ان كمبريسور تكييف الكرولا اخف من اللي في الفيرنا بكتير!! ده حتى في المرسيدس الزلمكه (موديلات تسعينات) بيغيروا الكمبريسور بكمبريسور كرولا (تسعينات بردو) هل ده معناه ان المرسيديس الألماني اللي على الأقل 2000 سي سي موتورها اضعف من الكرولا الياباني الـ 1300 سي سي؟!!!!

عموما الفروق ممكن تكون في طول عمر الموتور او جوده مكوناته...و حتى دي لا يمكن تعميمها بجنسيه المحرك حيث اعرف و عن تجربه العديد من المحركات الألمانيه اللي عمرها اقصر كتير من محركات يابانيه.

يعني من الآخر بلاش التعميم من غير تفكير.. و بلاش نصمم على رأينا من غير ما نفكر.

**Ahmed Hassan** · 17-05-2008 03:09 AM

المشاركة الأصلية كتبت بواسطة ramyayash

بص يا باشا
في فرق كبير بين مكونات الموتور الالماني
والموتور الياباني
والموتور الكوري
لو جوده صناعه الموتور الكوري زي الياباني كان الناتج بقي زي ناتج العربيه الياباني
وانت شوفت اللي بيقول الابيكا الياريس بهدلتها
هو ده الوضع
والبورا 1600 لو مشيت مه النترا 1600
مع لانسر 1600
مين يكسب؟
البورا تكسب اللانسر
واللانسر تكسب الالنترا
هو ده

اختار اي عربيه كوري او ياباني 1600 و خليها تشد مع بورا (او حتى جولف) 1600 و قوللي مين اللي هيسبق!! و على فكره.. النتيجه عكس ما 90% من الناس متوقعه... احنا دايما بنتكلم على السمعه من غير تجربه حقيقيه.. و بردو في النهايه.. التسارع مش دليل على الأجود

**mars3v** · 17-05-2008 03:20 AM

المشاركة الأصلية كتبت بواسطة SlvrLan99

يعنى أية حضرتك مفيش ؟. دة الناس مثلا تقعد تقول مكتوب فى الأعلان 120 حصان و يشوفة فى ال internet أو user manual يبقى 100 حصان.
.

خلاص، روح هات نيسان صنى اللى فى مصر و حطها عالداينو و قولى طلعت كام حصان. الناس لمل بتكتب فى الكتلوج بيبقى كاتب مواصفات الموتور مش العربيه ككل

و بعدين حضرتك بتقول نفس الكلام الذى أنا قلتة بس بطريقة مختلفة .

يعنى اتفقنا:)

الأعضاء غالبا فهموا قصد حضرتك غلط (وانا كمان فى الأول)....فاكرين قصد حضرتك موتور بوضعية أمامية و دفع خلفى, اكن حضرتك قصدك موتور بوضعية خلفية و دفع خلفى....صح .

انا قصدى موتور محطوط ورا و بيزق العجل اللى ورا هيعمل فاقد اقل من موتور محطوط قدام و بيزق العجل اللى ورا, انا مش عارف انتو فهمتونى بقول ايه

**Ahmad Allawy** · 17-05-2008 09:42 AM

المشاركة الأصلية كتبت بواسطة Ahmed Hassan

اختار اي عربيه كوري او ياباني 1600 و خليها تشد مع بورا (او حتى جولف) 1600 و قوللي مين اللي هيسبق!! و على فكره.. النتيجه عكس ما 90% من الناس متوقعه... احنا دايما بنتكلم على السمعه من غير تجربه حقيقيه.. و بردو في النهايه.. التسارع مش دليل على الأجود

نا معاك يا باشا في الموضوع ده..
انا مع اني معايا كورسا 1200 بس لما في مرة فكرت اشد مع بيرودوا كليسا ولا حتي شيفرولية سبارك.. قطعوني..
ده اكيد مش سببه ان مواتيرهم اقوي او كده.. او احسن..
لأ ممكن يكون لأسباب تانة كتير زي وزن عربية و باور بيطلع عند ار بي ام معين نسبته مختلفة
و تكنولوجي موتور و كده.. مع العلم اني السعة اللترية عندي اعلي من العربيتين اللي قولت عليهم مش نفس السعة

**فادى** · 17-05-2008 11:25 AM

المشاركة الأصلية كتبت بواسطة mohamed hatem

الموتور الياباني معروف.... وخاصة في التويوتا .... والدليل انتشار التويوتا حتى عند الامريكان اللي هما حيتان المواتير ...

التكنولوجيا عندهم ليها شكل تاني ... انا شفت الفيرنا 1600 و الياريس 1300 .... فرق واضح فعلا ....

المحرك اليابانى من ناحية التكنولوجيا عادى جدا على فكرة و السيارات اليابنية مش مشهورة بالمحركات القوية.
المحركات اليابانية مشهورة بتوفير الوقود فقط, لكن قوتها و أدائها عادى جدا, و أقل دائما من المحركات الأوروبية, و انتشارها فى الولايات المتحدة ليس دليلا على أى شىء.
المحرك اليابانى ممكن نقول انو متخلف تكنولوجيا عموما عن المحركات الأوروبية, و التى نجحت رغم القيود البيئية المفروضة عليها (اليورو 5) و التى تشترط الحد من انبعاثات المحرك, فى تطوير نفسها و اعطاء أقصى ما يمكن أخذه من محرك.
و عموما السيارات الأوروبية مشهورة بجودة محركاتها, فالمحرك الألمانى مشهور بأنه الأكثر اعتمادية و تحملا, و الأطول عمرا, و المحرك الايطالى مشهور بأنه الأكثر تطورا و الأفضل من ناحية الأداء و المرونة, الى جانب طبعا أنه لا يفتقد للاعتمادية و هو معمر أيضا مثل الألمانى.
و كل الابتكارات فى مجال المحركات طلعت من أوروبا. أنا بتكلم عن السمعة المتوارثة, و لكنها ليست قاعدة, يعنى قد تجد محركات ألمانية تفتقد للاعتمادية.

**فادى** · 17-05-2008 11:36 AM

لكن لازم نذكر انو تكنولوجيا المحركات الأن أصبحت متشابهة جدا, و مفيش فرق كبير بين محرك و أخر فى نفس السعة الا على صعيد الاختيارات, و لازم نعرف برضو انو فيه قاعدة حياتية بتقول "مفيش حاجة ببلاش", أى أحصنة زيادة معناها عمر أقل و مرونة أقل. و هنا تختلف الاختيارات بين شركة و أخرى.
يعنى مثلا أنا بعمل عربية 4*4, لازم يكون أهم حاجة عندى هو العزم مش القوة الحصانية, لأن العربية معمولة عشان تعافر فى الصحرا و محتاجة عزم, لكن لما أكون بعمل عربية رياضية, يبقى أهم حاجة عندى هو القوة الحصانية, لأن التحميل و المرونة مش مهمة, الى جانب طبعا انو السيارات الرياضية مش معمولة للاستخدام اليومى, يعنى مينفعش أروح الشغل راكب بورش و لا فيرارى, دى معمولة للتمتع بقيادتها فى الأجازات فقط, و يبقى عندى جنبها عربية تانية متوسطة للاستخدام اليومى. عشان كده أهم حاجة هنا هو القوة الحصانية بما أن السيارة هتمشى على الطرق السريعة مش فى المدينة, و مش هتركب فيها حد أكثر من - لامؤاخذة - صاحبتك أو خطيبتك عشان تتفشخر عليها, أما السيارة العائلية السياحية, فلازم أوازن بين الاتنين, لأنى ممكن أركب فيها ناس و شنط, اذن أنا محتاج عزم, و لازم برضو يبقى عندى تسارع جيد عشان توفر لى السيارة حد أدنى من المتعة فى القيادة, الى جانب انو العمر مهم لأن قدراتى المالية ممكن متسمحش ليا انى أغير العربية على فترات قريبة.

مشاهدة نتائج الإستطلاع: أيه رأيك في المحركات التالية

الموضوع: الفرق بين محرك ياباني و ألماني

LinkBack

أدوات الموضوع

عرض

-

-

-

-

-

-

-

-

المواضيع المتشابهه

اية الفرق بين محرك 1500 و 1600 سى سى ؟؟؟

الفرق محرك ميجان 2005 و 2007

صراع ألماني ألماني أوبل سنترا وبي أم

الفرق بين محرك الديزل ومحرك البنزين

للبيع لاب توب سيمنز ياباني وليس ألماني

الكلمات الدلالية لهذا الموضوع

المفضلات

المفضلات

ضوابط المشاركة