(تقرير بالصور) محآولة انقآذ نـيسآن صني .. ياريت تفاعل من كل ذوي الخبررررره

**Manchestrawy** · 21-01-2012 10:07 AM

السـلآم عليكم ورحمه الله وبركآته

صباح الفل على كل اعضاء القسم المحترمين ..

بصرآحه انا بقالي يومين مقمتش من على الكرسي من كتر ما القسم شدني

وانبهرت بطريقه التعاون الموجوده بين الاعضاء ذوي الخبره والمبتدئين

وهوا ده الي شجعني اني اجي اطلب مسآعده ونصايح حضرآتكم لأني متأكد ان هلاقي تجآوب..

اولآ انا من عشآآق النيسآن منذ الصغر لان عربية والدي في الشغل كانت نيسآن بآترول

وبعد كدا ربنا كتبلي ان اول عربيه ليا تكون نيسآن صني ..

العربيه نيسآن صني 1600 موديل 2005 خليجي تقفيل يآبآني ماشيه 150000 والدتي المالك الاول

اخر صيانه تمت ليها كانت في توكيل المسعود في ابوظبي عند الـ 60000

هعرضلكم صور العربيه الآن

بس قبل ما اعرض الصور احب اقولكم ان العربيه مش انا الشخص الوحيد الي بيركبها .. العربيه وآلدتي كانت بتستخدمها

و ثآنيآً كنا مقيمين في منطقه شعبيه مليآنه من الحاجات الي بتمشي الي اسمها ( التوكتوك ) :D :D وانتو اما تشوفو الصور هتعرفو :\

بسم الله ..

معلش محدش يعلق على المنظر ويآريت اصحاب الصني ميكرهونيش على الصور الي توجع القلب دي :(

هآخدها وآحده وآحده .. الكبوت مفارق عن الاكصدام والفنوس مفارق عن الاكصدام والكبوت

سبب كل اللخبطه دي هوضحه في الصورة الجايه

----------------------------------------------------------

ده حادث حصل مع والدتي من سنتين ومن بعدها وش العربيه مش راضي يتعدل مهما اوديه لسمكريه بس تقريبا انا عرفت السبب وموضحه بدآئره في الصورة وهوضحه ليكم اكتر في صورة مقربة يمكن حد يقدر يقول الحل وامكانيه تصليحه تابعو الصورة الجايه دي عن مكان المشكله

----------------------------------------------------------

زي ما حضراتكم شآيفين الكرمشه الي في الحديد دي ؟ هي دي الي مخليه وش العربيه مش متسآو
مش عارف دي ايه حلهاآآآ لان مهما اعمل هيفضل الكبوت والفنوس والاكصدام مش راكبين على بعض ..
وفي واحب انوه ان بعد الخبطه دي في اصوات تزييئ قالولي دي المقصات بايظه
ده بالنسبه لوش العربيه ..

----------------------------------------------------------

ضهر العربيه سليم الحمدلله بدون اي خبطات بس محتاج اكصدام
بس مش عارف هعمل ايه في الحساسات هل ممكن انقلهم للاكصدام الجديد ؟

----------------------------------------------------------

جنب العربيه الشماآآل فيه كالآتي حسب الارقام الموضحه عالصورة
1- العتبه دي مطبقه زي ما حضراتكم شآيفين
2 - الباب ده كان مخبوط وتم رده عالبآرد بس شكله زي ما انتم شآيفين هل هضطر اجيب باب جديد ؟ بس ده صعب لان سعره فوق الـ 2000 .. هل ممكن الاقيه مستعمل في اي مكان ؟ ولا ممكن يتصلح
3- الرفرف ده تآيواني وتم تغيره قبل كدا وممتآز صراحه فبالتآلي هغيره تاني مش هصلحه وسعره 175 جنيه
4- الاكصدام مكسور بس معرفش هيكون سعره الياباني كام لان الي راكب دده صيني بـ 150 وسيئ جدا فعايز حاجه غيره ..

بالنسبه لجنب العربيه اليمين انضف من الشمآآل وفيه خبطآت قليله هيتم توضيحها

----------------------------------------------------------

دي خبطه في الباب والرفرف مع بعض .. حلها ايه ؟ :S

----------------------------------------------------------

ودي خبطه في الرفرف هل هتتصلح ولا اغير كمآن ؟

----------------------------------------------------------

نيجي للعربيه من جوآآ .. نظره عامه للماتور

1- البطاريه تم تغييرها من التوكيل
2- الكبسوله بتاعت الريديتر دي مكسورة يعني مربوط من نآحيه وحده
3- الغطا ده مفقود :(

----------------------------------------------------------

ودي صورة معرفش صورتها ليه بس قلت يمكن حد من يطلبها مني

----------------------------------------------------------

في كمان البرغي ده معرفش مكسور ولا مفكوك نتيجه الخبطه

----------------------------------------------------------

المراوح دي مبتلفش بقالها اسبوع والحراره بقت بترتفع لفوق الشرطه الاولى عند الـ C
مع ان المؤشر عمره ما وصل للدرجه دي ابدآ غير لما كانت في الامارات نظراً للحراره هنآك
وهوا ده الي لفت انتبآهي اني شفتها مرتفعه مع ريحه (شيآط) .. والحراره بتنخفض مع السرعآت وبترتفع في الاشارات والزحمه والانتظار معرفش ايه السبب

----------------------------------------------------------

اكتر مصدر ازعاج وضجيج بالنسبآلي هوضحه في الصورة الجايه

1- السيرين دول بيوقفو لما بلف الدركسيون على الاخر سواء يمين او شمال بيطلعو صوت وبيشتغلو بتقطيع يعني بيلفو ويقفو خالص ويرجعو يلفو تاني ويقفو كداااا وبسرعه
نآس قالتلي زيت بور .. وغيرته بس المشكله ما اتحلتش لحد ما اكتشفتها انا

2- انا اتخضيت من المنظر ده حد يفيديني (:

----------------------------------------------------------

فآآآت الكتير ما بقى الا القليل :D

معلش الي زهق ممكن يكمل الموضوع وقت تآني :(

----------------------------------------------------------

بعض المشاكل التانيه البسيطه
1- عندي بقى نور الامبير ( العداد ) ضعف جدا بعض الحادث
هوا مش مطفي خالص بس ضعيف جدا + نور التكيف والزراير الي جنبيه محروقه
ما عدا الكاسيت بس هوا الي نورة شغآآآل ..
2- ضوء العربيه الخفيف بيبقى ضارب في عيون الناس ومش منور اي حاجه قدامي
يعني العربيات الي قدامي بتفضل تشاورلي عشان النور ضارب فيهم مع انو مش منور حاجه قدامي عالاسفلت .. بس فعلا بيبقى معكوس بقوى اوي في العربيه الي قدامي وبيضايق بجد .. مع العلم اني مغير لمض الفنوسين الي قدام مؤخراً
3- العربيه صعب السيطره عليها في الغيار الاول والتاني يعني لو لمست الدواسه العربيه بترقص يمين وشمآل والسبب ان الكوتشين الي قدام مقاس واحد لكن نوعين مختلفين وحالتهم مختلفه + المقصات مدمره .. دي الاسباب الي انا اعرفها

----------------------------------------------------------
الخطة الي وضعتها لأنقاذ العربيه كالآتـي :
1- اول خطوه اني اعمل التقرير ده واخد ارآئكم لانكم اكثر خبره وعلى درايه بمواضيع الصيانه دي اكتر مني .. لان دي اول عمليه صيانه اقوم بيها في حياتي
2- اخدت رأي ميكانيكي وقالي كالآتـي :
* محتاج مقصين بجلبهم ( اشترط انهم يكونو يآباني اصلي )
* طمبورتين امامي ( اشترط انهم يكونو يآباني اصلي )
*اكصدام امامي وخلفي تايواني
*كبوت يابآني اصلي
*رفرف شمآل تايواني
* فانوس يمين تايواني ( لاني لسا مشتري الشمال جديد قالي خليهم جداد مع بعض)
3- الي هعمله اني هروح التوكيل اجيب القطع الياباني وهشتري باقي القطع
من اماكن بيع قطع الغيآآر .. والي حضرآتكم هتدلوني على اماكنها والاسعار بتاعت كل قطعه ولو حد شايف ان في حاجه كمان لازم اصلحها ياريت يقول ولو حد قريب مني في الشيخ زايد او اكتوبر ومتفرغ لنصف ساعه يسوق العربيه ويشوف بنفسه هكون شآكر جداً ليه وهشيله الجميل ده على رآسي
4- نآس نصحتني بشرآء وش كامل للعربيه من الحرفيين او اي مكان انا عجبتني الفكره بس بقلقل من الحرفين وموضوع زي ده مش هعرف اعمله لوحدي ده اكيد

طولت اوي ولآزم انهي الموضوع بس عشمي فيكم كبير اوي والله
وبشكركم مقدمآً وان شآء الله ابقى عضو فعآل معآكم واساهم في استمرار عطآء القسم

وقبل مآ انسى لازم اشكر الأستاذ يوسف y2y1500 الي وجهني لكل حاجه
واستقبل رسايلي بصدر رحب .. جزآآه الله األف خير

أخوكم محمد عآطف
----------------------------------------------------------

**SonaSteel** · 21-01-2012 10:35 AM

متابع بنفس وبضمير و بكل مشاعري بصراحة :)))
ربنا يعينك والله

**Ahmed_Rahem** · 21-01-2012 12:08 PM

انا ممكن اجربهالك واقولك الى اعرفة، وممكن تروح مركز اتو ايجيبت فى ابورواش للكشف عليها

**Sehsss** · 21-01-2012 02:46 PM

بص يا باشا، العربية مش ضايعة أوي يعني كل الحاجات دي ممكن تتلم بس هاتصرف شويتين، لأنك لو حابب العربية وعاوز ترجعها زي ما كانت هاتصرف، أنا رأيي شغل الميكانيكا والعفشة يتعمل في التوكيل وخاصة أوتو إيجبت، ودا اللي لازم تبدأ بيه، أما الشغل اللي بره (السمكرة والدوكو) ممكن تصبر عليه شوية وتعمله عند سمكري بره التوكيل لأنه هايكون مكلف جدا لو عملته في التوكيل، وربنا يوفقك للخير

**SonaSteel** · 21-01-2012 03:10 PM

المشاركة الأصلية كتبت بواسطة manchestrawy

ومتآآبع ليه يا استآذ sona دا انت من ذوي الخبره والاعضاء النشطين
المفروض تمد الاعضاء بالمفييد :d :d ولا انت ايه رأيك

ربنا يعزك ويبارك في عمرك اخي وحبيبي في الله
فيه حاجات فعلا مستني اعرف رأي الناس اسه اللي استغلوا في العربيى بايديهم زي وليد عادل يفيدوك وايه اللي ممكن تجيبه من التوكيل وايه اللي بره
وزي ما انت قلت
1- المقصات والطنابير والتيل طبعا هاتهم من التوكيل وركبهم بره مفيش مشكلة
2- الاكصدام الصيني انا عارفانه مش قد كده علشام مش بياخد ويدي معاك فبيشرخ كل شويه .... حاول تجيبه استيراد او جديد
3- الباب اعتقد ان الفرش من جوه سليم فمش هتحتاج الباب بالفرش بتاعه وده برده ممكن تجيبه استيراد
ولو اني شايف ان ممكن يتظبط وانت كده كده لازم هاترش ومتحتاجش باب غيره
4- العتب انا مش عارف ايه ظروفها بتتغير كاملة ولا بتستعدل في انتظار رأي باقي الناس.
5- خبطة الرفرف مع الباب بسيطة وتترد ان شاء الله
6- العدادات واللمض ده شغل في التابلوه والانوار وكهربا وان شاء الله بسيطة
7- الميكانيكة ان شاء الله الاخوة يفيدوك ... بس موضوع العربية بترقص علي اول غياراين دول اعتقد ان العفشة ولما تغير الحاجات ديه كلها هتبان بعد ظبط الزويا كمان
-----------------------------------
وسامحني انا مكنتش عايز ارد علي حاجة مش عارفها لغاية ما اشوف رد الصقور ايه
ولو عايز تروح لسمكري بره ...... فيه ورشة نايل موتورز بتاعه ا/كريم منير وشغله ماشاء الله عليه
كنت وديت عنده عربية كارينز كانت مسروقة وراجعه متدمرة فظبط الاداء ماشاء الله
ورأي أخير ... هو ممكن يكون مكلف ياريت تخلي شغل الميكانيكا والعفشة في اوتو ايجيبت والكهربا علشان ماشيي بالمانيوال بتاع الصيانة والعربية هاتخرج من تحت ايديهم مظبوطة ان شاء الله
واعمل مقايسة عندهم وشوف الفرق يستاهل انك تظبطها عنهم ولا بره ....... ومتنساش تاخد الاستيكر علشان خصومات قطع الغيار والمصنعيات هايفيدك اوي الفترة اللي جاية ان شاء الله
تقبل مروري واقعد بألف عافية :))

**SonaSteel** · 21-01-2012 03:12 PM

المشاركة الأصلية كتبت بواسطة maged george

انا رايي ان العربية مش بالسوء اللي حضرتك متخيله بس المشكلة ان العربية شكلها اهملت شوية بدون صيانة لذلك الصح انك تظبط العفشة والبودي الاول وبعدين تظبط زوايا وتشوف لو محتاجة زرجينة او لأ وتعملها الاول والكلام ده ممكن يخلص في الحرفيين عند ناس محترفة بس بصراحة انا معرفش اماكنهم ممكن حد من الاخوة يفيدك عن اماكنهم وبالنسبة لقطع الغيار الجديد من منافذ بيع قطع الغيار احسن اما البودي زي الكبوت والفوانيس والرفارف مستعمل من الحرفيين هيكون افضل من الجديد التايواني والصيني وبعدين روح عند ميكانيكي محترم يغيرلك السيور ويكشف على البوجيهات والذي منه واي كهربائي يكشف على المراوح بس هو الموضوع عاوز شوية صبر واجازة من الشغل يومين كده عشان تقدر تتابع وربنا يكون في عونك وابقى طمنا عملت ايه.

المشاركة الأصلية كتبت بواسطة sehsss

بص يا باشا، العربية مش ضايعة أوي يعني كل الحاجات دي ممكن تتلم بس هاتصرف شويتين، لأنك لو حابب العربية وعاوز ترجعها زي ما كانت هاتصرف، أنا رأيي شغل الميكانيكا والعفشة يتعمل في التوكيل وخاصة أوتو إيجبت، ودا اللي لازم تبدأ بيه، أما الشغل اللي بره (السمكرة والدوكو) ممكن تصبر عليه شوية وتعمله عند سمكري بره التوكيل لأنه هايكون مكلف جدا لو عملته في التوكيل، وربنا يوفقك للخير

+1111111111111111111111111111111111

معلش مشوفتش الردود ديه علشان فاتح الصفحة بقالي حبة :))

**تامر.محمد** · 21-01-2012 03:44 PM

انا شايف ان اول خطوة من حل مشاكلك انك تطلع على ورشة سمكرة محترمة
ممكن تطلع على العقيد خالد في الحرفيين , او لو تعرف سمكري انت عارف انه محترم و فاهم اطلع عليه
هاتحل مشاكل السمكرة ان شاء الله , هي يمكن تصرف شوية بس ما اظنهاش عقد

بعد كده يا الاخوة هنا يقولوا لك على ميكانيكي نيسان محترم يظبط لك الحاجات التانية , يا تطلع على التوكيل

**Dr'AhmZZong** · 21-01-2012 03:58 PM

المشاركة الأصلية كتبت بواسطة SonaSteel

ربنا يعزك ويبارك في عمرك اخي وحبيبي في الله
فيه حاجات فعلا مستني اعرف رأي الناس اسه اللي استغلوا في العربيى بايديهم زي وليد عادل يفيدوك وايه اللي ممكن تجيبه من التوكيل وايه اللي بره
وزي ما انت قلت
1- المقصات والطنابير والتيل طبعا هاتهم من التوكيل وركبهم بره مفيش مشكلة
2- الاكصدام الصيني انا عارفانه مش قد كده علشام مش بياخد ويدي معاك فبيشرخ كل شويه .... حاول تجيبه استيراد او جديد
3- الباب اعتقد ان الفرش من جوه سليم فمش هتحتاج الباب بالفرش بتاعه وده برده ممكن تجيبه استيراد
ولو اني شايف ان ممكن يتظبط وانت كده كده لازم هاترش ومتحتاجش باب غيره
4- العتب انا مش عارف ايه ظروفها بتتغير كاملة ولا بتستعدل في انتظار رأي باقي الناس.
5- خبطة الرفرف مع الباب بسيطة وتترد ان شاء الله
6- العدادات واللمض ده شغل في التابلوه والانوار وكهربا وان شاء الله بسيطة
7- الميكانيكة ان شاء الله الاخوة يفيدوك ... بس موضوع العربية بترقص علي اول غياراين دول اعتقد ان العفشة ولما تغير الحاجات ديه كلها هتبان بعد ظبط الزويا كمان
-----------------------------------
وسامحني انا مكنتش عايز ارد علي حاجة مش عارفها لغاية ما اشوف رد الصقور ايه
ولو عايز تروح لسمكري بره ...... فيه ورشة نايل موتورز بتاعه ا/كريم منير وشغله ماشاء الله عليه
كنت وديت عنده عربية كارينز كانت مسروقة وراجعه متدمرة فظبط الاداء ماشاء الله
ورأي أخير ... هو ممكن يكون مكلف ياريت تخلي شغل الميكانيكا والعفشة في اوتو ايجيبت والكهربا علشان ماشيي بالمانيوال بتاع الصيانة والعربية هاتخرج من تحت ايديهم مظبوطة ان شاء الله
واعمل مقايسة عندهم وشوف الفرق يستاهل انك تظبطها عنهم ولا بره ....... ومتنساش تاخد الاستيكر علشان خصومات قطع الغيار والمصنعيات هايفيدك اوي الفترة اللي جاية ان شاء الله
تقبل مروري واقعد بألف عافية :))

-

الموضوع: (تقرير بالصور) محآولة انقآذ نـيسآن صني .. ياريت تفاعل من كل ذوي الخبررررره

LinkBack

أدوات الموضوع

عرض

-

-

-

-

المواضيع المتشابهه

بالصور سؤال مصيرى ممكن ابيع العربية بسببة ياريت الكل يدخل ارجوكم

ياريت المساعدة انا بدور على تصميم فرش جلد وياريت يكون بالصور

مطلوب تفاعل كل اللانسراويه

استياء من عدم تفاعل اللانسراويه

ياريت الفرق بين كرولا2008خليجي وجنوب افريقي بالصور والامكانيات

الكلمات الدلالية لهذا الموضوع

المفضلات

المفضلات

ضوابط المشاركة